ཤེས་རབ་སྙིང་པོའི་རྣམ་བཤད་ཀླུ་སྒྲུབ་ཀྱི་དགོངས་པ་གསལ་བར་བསྟན་པ་བཞུགས་སོ། །
༄༅། །བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཆོས་ཀྱི་འཁོར་ལོ་སྒྱུར་སྲས་དེ་ཡུལ་འོས། །ཤེར་ཕྱིན་སྒྱུ་འཕྲུལ་ཆེ་ལོགས་གཉིས་པ་གར། །དེ་ཕྱིར་ཉན་རང་བྱང་སེམས་ཤཱཀ྄་རིགས་པ། །བཞེད་དོན་སྒྲུབ་ནུས་དེ་ལ་སུ་མི་འདུད། །ཤེས་རབ་མཆོག་གིས་དྲིས་པ་ལ། །སངས་རྒྱས་བྱེད་ཡུམ་འདི་རང་དུ། །སྙིང་རྗེ་ཆེན་པོས་མཛུབ་ཚུགས་པར། །དགའ་མགུར་སྤྱོད་ཐོབ་བདག་སྐལ་བཟང་། གཙུག་ལག་མཱ་ལ་ཡ་ཡི་དཔལ། །ཤེར་ཕྱིན་སྦྲུལ་གྱི་སྙིང་པོའི་ལྕམ། །སྲིད་གདུང་གཞོམ་ལ་འགུགས་ངལ་བའི། །ལྷོ་ཕྱོགས་རླུང་བཞོན་སྨན་པ་བཞིན། །འདིར་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ། ཚིག་སྤུན་གྱིས་མ་བསྒྲིབས་པར་རྗེན་ཐེར་སྟོན་པས་སྙིང་པོར་བཞག་པ། བཀའ་བསྡུ་མཛད་པ་རྣམས་ཀྱིས་གླེགས་བམ་ལ་བཀོད་ནས་ཀླུ་རྣམས་ལ་གཏད་པ་ལས། ཕྱིས་མི་ཡུལ་དུ་མགོན་པོ་ཀླུ་སྒྲུབ་ཀྱིས་སྤྱན་དྲངས་པའི་སྡེ་ཚན་དུ་གཏོགས་པ་འདི། དེ་ཉིད་ཀྱི་མན་ངག་རིག་ནས་འཆད་པར་འདོད་དོ། །དེ་ཡང་གླེང་གཞི་དང་། གླེང་བསླང་ཚུལ། བར་གྱི་མཚམས་སྦྱོར། མཐའི་མཇུག་སྡུད་རྣམས་ནི་སྟོན་པ་ཉིད་ཀྱིས་གདམས་པ་ཇི་བཞིན་བསྡུ་བ་པོས་བཀོད་པས་དེ་དག་རྗེས་སུ་གནང་བའི་བཀའོ། །དེའི་དབང་གིས་གླེང་གཞི། མདོར་བསྟན་དུ་འོས། གླེང་བསླང་བ་ནས་ལན་རྫོགས་པའི་བར་བྱིན་གྱིས་རློབ་པའི་དངོས་ཀྱི་བདག་རྐྱེན་སྟོན་པ་ཉིད་ཡིན་པས་བྱིན་གྱིས་བརླབས་པའི་བཀའོ། །དངོས་ཅེས་མ་སྦྱར་ན། འཛམ་བུའི་གླིང་ན་ཆུ་འབབ་པ་ཇི་སྙེད་པ་ཀླུ་མ་དྲོས་པའི་མཐུ་ཡིན་པ་དཔེར་མཛད་ནས་སངས་རྒྱས་ཀྱི་ཉན་ཐོས་རྣམས་ཀྱི་ཆོས་ཅི་སྟོན་པ་ཐམས་ཅད་རྒྱལ་བའི་བྱིན་རླབས་ཡིན་པར་གསུངས་པ་གཉིས་མཚམས་མི་ཕྱེད་པའི་སྐྱོན་དུ་འགྱུར་རོ། །ལེགས་སོ་ནས་ཡི་རང་ངོའི་བར་ནི་ཚངས་པའི་དབྱངས་ཉིད་ཀྱིས་བཤད་པས་ཞལ་ནས་གསུངས་པའི་བཀའོ། །དེ་བས་ན་བར་མ་རྒྱས་བཤད། འདི་དོན་བསྡུར་ཡོད་པ་བཞིན་མདོར་བསྟན། རྒྱས་པར་བཤད། དོན་བསྡུ་བ་གསུམ་ལས། དང་པོ་ནི། འདི་སྐད་བདག་གིས་ཐོས་པའི་དུས་གཅིག་ན་ཞེས་པ་དུས་འཆད་པ་ཡིན་ལ། འདི་སྐད་ཀྱིས་བཤད་བྱ་རིལ་པོ་བསྡུས་པ་སྟེ། དེས་ན་དེའི་ལེགས་སྦྱར་ལ་ཨེ་ཝཾ་ཞེས་བྱུང་། ཡི་གེ་དེ་གཉིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་པོ་ཐམས་ཅད་ཀྱི་ཕ་དང་མར་གསུངས་པ་ཡིན་ནོ། །བཅོམ་ལྡན་འདས་དེ་ནི་སྟོན་པ། རྒྱལ་པོའི་ཁབ་བྱ་རྒོད་ཕུང་པོའི་རི་ལ་གནས། དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ་འཁོར། དེ་དག་རེ་ཡང་བསམ་གྱིས་མི་ཁྱབ་པའི་ཕྱིར་ཕྱོགས་གཅིག་གིས་བཤད་དུ་མི་རུང་ངོ་། །དེའི་ཕྱིར་ཕུན་སུམ་ཚོགས་པ་ཞེས་བྱའོ། །དགེ་སློང་གི་དགེ་འདུན་ཞེས་པའི་ཁོངས་ན་རང་རྒྱལ་སློབ་པ་དག་ཀྱང་ཉན་ཐོས་ཀྱི་ཚུལ་དུ་གནས་པས་དངོས་ཀྱི་འཁོར་ལ་རིགས་ཅན་གསུམ་ཚང་བ་སྟེ། ཉན་རང་བྱང་སེམས་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱ་བ་དང་། ལ་ལ་རང་བྱང་ཆུབ་ཏུ་སེམས་བསྐྱེད་དོ་ཞེས་འབྱུང་བས་ཀྱང་ཤེས་པར་ནུས་སོ། །དེའི་ཚེ་བཅོམ་ལྡན་འདས་ཟབ་མོ་སྣང་བ་ཞེས་པའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །ཟབ་མོ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྟེ། སངས་རྒྱས་ནི་བཞེད་པས་འཇུག་པ་ཡིན་པས་མེ་བུས་ན་དུ་བ་འཐུལ་བ་བཞིན་དུ་གདུལ་བྱ་དག་ལ་དེ་བར་ཆད་མེད་པར་སྣང་བས་ན་ཟབ་མོ་སྣང་བ་ཞེས་བྱའོ། །གཉིས་པ་ལ། གླེང་བསླང་ལུས་དང་། དྲི་བ་དང་ལན་ཡན་ལག་རྒྱས་བཤད་ཀྱི་ཚུལ་དུ་བསྟན་པ་གཉིས་ལས། དང་པོ་ནི། ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་ཉིད་ལ་རྣམ་པར་བལྟ་ཞིང་། དེ་ནི་ཤེས་རབ་ཀྱིས་ཆོས་ཐམས་ཅད་རབ་ཏུ་མི་གནས་པར་སྦྱོང་བ་ཡིན་ནོ། །ཕུང་པོ་ལྔ་པོ་དེ་དག་ལ་ཡང་རང་བཞིན་གྱིས་སྟོང་པར་རྣམ་པར་བལྟའོ། །སྙིང་རྗེས་སྒྱུ་མ་ཙམ་དུ་ལམ་དུ་འཁྱེར་བ་བསྟན་ཏེ། འདིའི་མན་ངག་ཀམ་པ་ལའི་ཡུམ་གྱིས་མཛད་པ་ལས། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཀུན་ནས་ཉོན་མོངས་པ་དང་རྣམ་པར་བྱང་བའི་སྒོ་ནས་ཤེས་པར་བྱས་ནས། དེ་ཁོང་དུ་ཆུད་པར་བྱ་བ་ཡིན་ནའང་། ཕལ་ཆེ་བའི་སྤྱོད་ཡུལ་མ་ཡིན་པས་ཞེས་གསུང་པའི་ཕྱིར་རོ། །དེ་ནས་སངས་རྒྱས་ཀྱི་མཐུས། ཚེ་དང་ལྡན་པ་ཤཱ་རིའི་བུས། སྤྱན་རས་གཟིགས་དེ་ལྟར་ལྟ་བ་ཤཱ་རིའི་བུས་ཤེས་པ་སངས་རྒྱས་ཀྱི་མཐུ་ཡིན་ནོ་ཞེས་སྟོན་པ་སྟེ། གཞན་ཉན་ཐོས་དག་གིས་བྱང་ཆུབ་སེམས་དཔའི་གནས་སྐབས་གཞལ་བར་མི་ནུས་པས་སོ། །དེ་ལྟར་ཤེས་ནས་སྤྱོད་པ་དེ་ཞིབ་མོར་དྲི་བའི་འདོད་པ་སྐྱེས་པ་ཡིན་ནོ། །གཉིས་པ་ལ། དྲི་བ་འགོད་པ་དང་། ལན་གྱིས་རྒྱས་པར་བཤད་པའོ། །དང་པོ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྤྱད་པར་འདོད་པ་དེས། ཇི་ལྟར་བསླབ་པར་བྱ། དེ་སྐད་ཅེས་སྨྲས་པ་དང་། གཉིས་པ་ལ། ལྟ་བའི་གནད་མིག་གིས་ལྟ་བ་ལྟ་བུ། སྒོམ་པའི་གནད་གོམ་པ་དོར་བ་ལྟ་བུ། འབྲས་བུའི་གནད་འདོད་སར་བརྟོལ་བ་ལྟ་བུ། སྤྱོད་པའི་གནད་གསེང་ལམ་ལྟ་བུར་བཤད་པ་ལས། དང་པོ་ནི། རྣམ་པར་ཐར་པའི་སྒོ་གསུམ་གྱིས་བསྟན་ཏེ། ངོ་བོས་སྟོང་པའི་ཚུལ་གྱིས་སྟོང་ཉིད་ཀྱི་རྣམ་པར་ཐར་པ། རྒྱུས་སྟོང་པའི་ཚུལ་གྱིས་མཚན་མ་མེད་པའི། འབྲས་བུས་སྟོང་པའི་ཚུལ་གྱིས་སྨོན་པ་མེད་པའི་རྣམ་པར་ཐར་པ་བཤད་ལ། དེ་ལས་དང་པོ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །མའི་མིང་ཤཱ་རི་ཀ དེའི་བུ་ཡིན་པས་ཤཱ་རིའི་བུ། ཤཱ་རི་དྭ་ཏིའི་རིགས་ལས་འཁྲུངས་པས་དེའི་བུ། དེས་ན་ཕྱོགས་གཅིག་ངོ་ཤེས་པས་ཅིག་ཤོས་མི་བསུབ་བོ། །ཤཱ་རིའི་བུ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྤྱད་པར་འདོད་པ་དེས། འདིས་གདུལ་བྱ་བསྟན་ཏེ། རིགས་ཅན་གཞན་གཉིས་ཀྱང་མཐར་འདི་ལ་སློབ་དགོས་མོད་ཀྱང་རེ་ཞིག་མ་ཡིན་པས། རིགས་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་པའི་ཐེག་པ་ཆེན་པོའོ། །གང་ལ་ལ། དེའི་ཡང་ཐམས་ཅད་མ་ཡིན་ཏེ། ལམ་གྱི་ཤེས་པའི་ས་པ་དག་གོ །ཆོས་རབ་ཏུ་རྣམ་པར་འབྱེད་པའི་བློ་གྲོས་ཀྱིས། ཆོས་ཐམས་ཅད་རབ་ཏུ་མི་གནས་པར་སྦྱངས་པ་ནི་འདིར་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་དུ་གཟུང་ངོ་། །ཟབ་མོའི་སྤྱོད་པ་ནི་གསེར་འོད་དམ་པ་ལས། རིགས་ཀྱི་ལྷ་མོས་བཅོམ་ལྡན་འདས་ལ་གསོལ་པ། བདག་དང་གཞན་ལ་ཕན་གདགས་ཕྱིར། །བྱང་ཆུབ་སེམས་དཔའ་རྣམས་ཀྱིས་ནི། །འཁོར་བ་མྱ་ངན་འདས་བྲལ་བའི། །བྱང་ཆུབ་སྤྱོད་པ་ཇི་ལྟར་སྤྱད། །དེ་ནས་བཅོམ་ལྡན་འདས་ཀྱིས་རིགས་ཀྱི་ལྷ་མོ་ལ་འདི་སྐད་ཅེས་བཀའ་སྩལ་ཏོ། །ལྷ་མོ། ཆོས་ཀྱི་དབྱིངས་ལ་གནས་ཏེ་བྱང་ཆུབ་ཀྱི་སྤྱོད་པ་སྤྱད་པས་ན་མཉམ་པ་ཉིད་ལ་ནན་ཏན་དུ་བྱའོ། །དེ་སྐད་ཅེས་བཀའ་སྩལ་པ་དང་ཞེས་གསུངས་པ་དེའོ། །རབ་ཏུ་མི་གནས་པར་སྦྱངས་པ་དེ་ཡང་། མེས་བུད་ཤིང་ཐལ་བར་བཏང་བ་ལྟ་བུ་མ་ཡིན་ཏེ། ཆོས་ཐམས་ཅད་གཟོད་མ་ནས་ཞི་བ་ཡིན་པས་གཞི་ཇི་ལྟར་གནས་པ་ལམ་དུ་དེ་ལྟར་འཁྱེར་བས་འབྲས་བུ་ཇི་ལྟ་བ་མངོན་དུ་འགྱུར་བའོ། །དེའི་ཕྱིར་ཤེར་ཕྱིན་དེ་ཡང་། རང་བཞིན། ལམ། འབྲས་བུ་གསུམ་དུ་བཞག་སྟེ། མགོན་པོ་ཀླུ་གྲུབ་ཀྱིས་འདི་ཉིད་ཀྱི་སྒྲུབ་ཐབས་སུ། དུས་གསུམ་རྒྱལ་བ་ཀུན་གྱི་གཞི་ཡིན་ལམ་ཡིན་འབྲས་བུའང་དེ། །ཤེས་རབ་མི་དམིགས་ཤེས་རབ་སྙིང་པོ་ཞེས་གསུངས་པས་སོ། །འདི་ལྟར་རྣམ་པར་བལྟ་བར་བྱ་སྟེ། ཕུང་པོ་ལྔ་པོ་དེ་དག་རང་བཞིན་གྱིས་སྟོང་པར་ཡང་དག་པར་རྗེས་སུ་ལྟའོ། །ཕུང་པོ་ནི་སྤུངས་པ་སྟེ་དུ་མ་ཚོགས་པའི་བརྡའོ། །དེ་ཡང་འཆད་པར་འགྱུར་བ་ལྟར་ལྔར་ཕྱེ་ལ། དངོས་པོ་དམིགས་སུ་རུང་བ་ནི་དེ་དག་ཏུ་ཟད་དོ། །དེ་དག་ད་ལྟར་ཡོད་ཕྱིས་རྐྱེན་གྱིས་ཞིག་པ་ལྟ་བུའི་སྟོང་པ་མ་ཡིན་པས་རང་བཞིན་གྱི་སྟོང་པ་ཞེས་སྦྱར། དེ་ཡང་ཆོས་ཐམས་ཅད་ཀྱི་རང་བཞིན་ནི་རབ་ཏུ་མི་གནས་པ་ཡིན་པས། རབ་ཏུ་མི་གནས་པས་དེ་དག་སྟོང་སྟེ། འཇུག་པར། གང་ཕྱིར་དེ་ཡི་རང་བཞིན་དེ། །ཡིན་ཕྱིར་མིག་ནི་མིག་གིས་སྟོང་། །ཞེས་པས་སོ། །དེ་ལྟར་མདོར་བསྟན་ནས་ཞིབ་མོར་འཆད་པའི་ཕྱིར་གཟུགས་སྟོང་པའོ། །ཆོས་མངོན་པར། གཟུགས་སུ་རུང་བ་ནི་གཟུགས། དེ་དུ་མ་སྤུངས་པ་གཟུགས་ཕུང་དུ་བཞག་པས་ན། གཟུགས་ཀྱི་ཕུང་པོ་དེ་ཐམས་ཅད་ངོ་བོས་སྟོང་པས་དེ་དག་སྟོང་པ་ཉིད་དོ། །རང་བཞིན་ནམ་ངོ་བོ་དེ་ཉིད་གཟུགས་སུ་སྣང་བས་སྟོང་པ་ཉིད་གཟུགས་སོ། །དེའི་ཕྱིར་གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །དེ་ཡང་དཔེས་བཤད་ན། སྣོད་དག་པར་ཞོ་གཙང་མ་བླུགས་པ་རྒན་མོ་མིག་རབ་རིབ་ཀྱིས་ཁེབས་པ་ལ་བྱིན་ན། དེས་དེ་སྐྲ་ཤད་ཀྱིས་གང་བར་མཐོང་སྟེ་སེལ་བར་རྩོམ་མོ། །མིག་དག་པས་དེ་ཉིད་དུ་སྐྲ་ཤད་མ་མཐོང་ནས་བརྡ་སྤྲོད་དོ། །དེ་ཉིད་ཀྱང་མིག་ནད་དག་པ་ན་སྐྲ་ཤད་གཅིག་ཀྱང་མི་སྣང་ངོ་། །དེ་ལས་གཟུགས་ངོ་བོས་སྟོང་པ་ནི། ཞོ་གཙང་མར་མཐོང་བས་སྐྲ་ཤད་མི་རྙེད་པ་ལྟ་བུ། རང་བཞིན་གཟུགས་སུ་སོང་བ་ནི། རབ་རིབ་ཅན་ལ་ཞོ་གཙང་མ་དེ་ཁ་སྐྲ་ཤད་ཅན་དུ་སྣང་བ་ལྟ་བུ། གཟུགས་ལས་སྟོང་པ་དང་སྟོང་པ་ལས་གཟུགས་གཞན་མ་ཡིན་པ། ཞོ་གཙང་མ་དེ་ལས་སྐྲ་ཤད་ཅན་ནམ། དེ་ལས་ཞོ་གཙང་མ་ལོགས་སུ་མི་རྙེད་པ་ལྟ་བུའོ། །དེའི་ཕྱིར་སྟོན་པས་ཀུན་ནས་ཉོན་མོངས་པའི་ངོ་བོ་ཉིད་ཤེས་པ་དེའི་རྣམ་པར་བྱང་བ་ཞེས་གསུངས་སོ། །རབ་ཏུ་མི་གནས་པ་དེ་མཐོང་ན་དམིགས་པ་ཐམས་ཅད་ལ་སྡོད་པའི་གླགས་མེད་དེ། དེ་ལྟར་ཡང་དག་པར་མཐོང་བ་དེ་ཁ་ཐར་པ་དང་ཐམས་ཅད་མཁྱེན་པའོ། །དེ་བཞིན་དུ། ཚོར་བ་དང་། ཉམས་སུ་མྱོང་བ་ནི་ཚོར་བ་སྟེ། དེའི་ཕུང་པོ་ཡང་། རང་བཞིན་གྱིས་སྟོང་ངོ་། །སྟོང་པ་ཉིད་དེ་ཚོར་བའི་ཕུང་པོའོ། །ཚོར་བ་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་ཚོར་བ་གཞན་མ་ཡིན་ནོ། །འདུ་ཤེས་དང་། མཚན་མར་འཛིན་པ་འདུ་ཤེས་ཏེ། དེའི་ཕུང་པོ་དང་། འདུ་བྱེད་རྣམས་དང་། སེམས་མངོན་པར་འདུ་བྱེད་པ་ནི་འདུ་བྱེད་དང་། དེ་ནི་རབ་ཏུ་མང་བས་རྣམས་སྒྲ་སྦྱར་ལ། རྣམ་པར་ཤེས་པ་རྣམས་སྟོང་པའོ། །རྣམ་པར་རིག་པས་རྣམ་པར་ཤེས་པ་སྟེ། དེའི་ཕུང་པོ། དེ་ཐམས་ཅད་ལ་གཞི་སྦྱར་ནས་ཤེས་པར་བྱའོ། །ཤཱ་རིའི་བུ་དེ་ལྟར་ཆོས་ཐམས་ཅད་སྟོང་པ་ཉིད་དེ། དེ་དག་ཀྱང་གསེར་འོད་ཀྱི་སྔར་གྱི་འཕྲོར། རིགས་ཀྱི་ལྷ་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་ཆོས་ཀྱི་དབྱིངས་ལ་གནས་ཏེ་བྱང་ཆུབ་ཀྱི་སྤྱད་པ་སྤྱོད་ཅིང་མཉམ་པ་ཉིད་ལ་ནན་ཏན་དུ་བགྱི་བ་ལགས། ལྷ་མོ་དེ་ནི་ཕུང་པོ་ལྔ་ལ་ཆོས་ཀྱི་དབྱིངས་སུ་འདོགས་ཏེ། ཆོས་ཀྱི་དབྱིངས་ནི་ཕུང་པོ་ལྔ་ཉིད་དོ། །ཞེས་གསུངས་སོ། །སྟོན་པས་ཆོས་ཅན་རེ་རེའང་། མཚན་ཉིད་གསུམ་དུ་ཕྱེ་སྟེ་བསྟན་པའི་སྐབས་སུ། ཀུན་བརྟགས་པའི་གཟུགས་གསུངས་པ་དེ་སྐྲ་ཤད་ལྟ་བུ། རྣམ་པར་བརྟགས་པའི་གཟུགས་ཞོ་དང་དེ་འདྲེས་མར་མཐོང་བ། ཆོས་ཉིད་ཀྱི་གཟུགས་ནི་ཞང་མ་ལྟ་བུ། གཟུགས་དང་དེའི་རང་བཞིན་མ་ཕྱེ་བ། དེ་དུས་ཀྱི་གདུལ་བྱས་ཞིབ་མོ་མ་བཟོད་པས་ཡིན། འདིར་དེ་ཕྱེ་བས་ཆོས་ཉིད་ཀྱི་ཚེ་གཟུགས་བཞག་ཏུ་མེད་དོ། །མཚན་ཉིད་མེད་པ། མཚན་ཉིད་གཉིས་ལས། དངོས་པོ་དག་གི་མི་རྟག་པ་ལ་སོགས་པ་སྤྱིའི་མཚན་ཉིད། འདིས་གཟུགས་རྟག་ཅེས་རྟོག་ན་མཚན་མར་འགྱུར་བར་མ་ཟད་གཟུགས་མི་རྟག་གོ་ཞེས་བརྗོད་པའང་མཚན་མའོ། །དེས་ན་གཟུགས་རྟག་པ་དང་མི་རྟག་པར་མི་དམིགས་པ་དེས་སྤྱིའི་མཚན་ཉིད་མེད་པ་ཞེས་བྱའོ། །གཟུགས་སུ་རུང་བ་ལ་སོགས་པ་ནི་རང་གི་མཚན་ཉིད་དེ། གཟུགས་བཞག་ཏུ་མེད་པས་དེར་རུང་བ་མ་བྱུང་། ཞོ་གཙང་མ་སྐྲ་ཤད་ཅན་དུ་ཤར་བའི་ཚེ་ཞོ་ལ་སྐྲ་ཤད་ཡོད་མ་མྱོང་བ་བཞིན། སྟོང་པ་ཉིད་ཕུང་པོ་ལྟར་བཞག་པའི་ཚེ་ཡང་ཕུང་པོ་ལྟར་མ་སོང་། སོང་ན་ཕུང་པོ་ལྔ་མི་སྣང་བར་འགྱུར་བ་ལྟར་སྟོང་པ་ཉིད་ཀྱང་ཆད་པར་འགྱུར་རོ། །གལ་ཏེ་སྟོང་ཉིད་གཞན་ལ་ཕུང་པོ་ལྔ་དེ་ལ་དྲི་མ་འབགས་པ་ལྟ་བུར་འདོད་ན་རྟག་པར་འགྱུར་རོ། །དེས་རང་གི་མཚན་ཉིད་ཀྱིས་ཀྱང་སྟོང་པས་མཚན་ཉིད་མེད་པ་ཞེས་བྱའོ། །གསེར་འོད་ཀྱི་འཕྲོས་སུ་ཕུང་པོ་ལྔ་ཡང་བརྗོད་དུ་མེད་པ། ཕུང་པོ་ལྔ་མ་ཡིན་པ་ཡང་བརྗོད་དུ་མེད་པ་སྟེ། དེ་ལ་ཆོས་ཀྱི་དབྱིངས་དེ་ཉིད་ཕུང་པོ་ལྔ་ཡིན་ན་ནི་ཆད་པར་འགྱུར་རོ། །གལ་ཏེ་ཕུང་པོ་ལྔ་ལས་གཞན་པར་འདོད་ན་ནི་རྟག་པར་འགྱུར་རོ། །མཚན་མ་གཉིས་དང་བྲལ་བ། མཐའ་གཉིས་ལ་མི་གནས་པ། བལྟར་མེད་པ་བལྟ་བར་བྱ་བ་ལས་འདས་པ། མིང་དང་མཚན་མ་མེད་པ་དེ་ནི་ཆོས་ཀྱི་དབྱིངས་ཞེས་བརྗོད་དོ། །ཞེས་གསུངས་སོ། །མ་སྐྱེས་པ། ཕུང་པོ་ལྔ་པོ་དེ་བདག་དང་གཞན་དང་གཉིས་ཀ་དང་རྒྱུ་མེད་པ་ལས་སྐྱེད་པས་སྟོང་པ་སྟེ། གསེར་འོད་ཀྱི་འཕྲོས་སུ། །རིགས་ཀྱི་ལྷ་མོ། ཕུང་པོ་ལྔ་ལ་ཆོས་ཀྱི་དབྱིངས་སུ་ཇི་ལྟར་གདགས་ཞེ་ན། ཕུང་པོ་ལྔ་པོ་དེ་ནི་རྒྱུ་དང་རྐྱེན་གྱིས་མ་སྐྱེས་པ་སྟེ། དེ་ཡང་གལ་ཏེ་རྒྱུ་དང་རྐྱེན་ལས་སྐྱེ་བ་ཞིག་ཡིན་ན་ནི། སྐྱེས་ཟིན་པ་སྐྱེའམ། མ་སྐྱེས་པ་སྐྱེ་ཞེས་བྱ། གལ་ཏེ་སྐྱེས་ཟིན་པ་སྐྱེ་ན་ནི་རྒྱུ་དང་རྐྱེན་ཀྱང་མི་དགོས་པར་རིགས་སོ། །གལ་ཏེ་མ་སྐྱེས་པ་སྐྱེ་ན་ནི་སྐྱེ་བ་དམིགས་སུ་མེད་པར་འགྱུར་རོ། དེ་ཅིའི་ཕྱིར་ཞེ་ན། གང་མ་སྐྱེས་པའི་ཆོས་རྣམས་ནི་ཡོད་པ་མ་ཡིན་པས། མིང་མེད་པ། མཚན་མ་མེད་པ། གཞལ་བ་དང་། དམིགས་པ་མེད་པ་དང་། དཔེར་བྱ་བས་བརྗོད་དུ་མེད་པ་སྟེ་རྒྱུ་དང་རྐྱེན་གྱིས་བསྐྱེད་པར་བྱ་བ་མ་ཡིན་ནོ། །ཞེས་སོ། མ་འགགས་པ་དུས་གསུམ་དུ་མ་གྲུབ་ཅིང་མི་སྐྱེ་བ་དེའི་ཕྱིར་འགག་པས་སྟོང་པ་སྟེ། གསེར་འོད་ཀྱི་འཕྲོས་སུ། རིགས་ཀྱི་ལྷ་མོ། དཔེར་ན་རྔའི་སྒྲ་ནི་ཤིང་དང་ཀོ་བ་དང་ལག་པ་ལ་བརྟེན་ཏེ་སྒྲ་འབྱུང་མོད་ཀྱི། རྔའི་སྒྲ་དེ་ནི་འདས་པ་ཡང་སྟོང་། མ་འོངས་པ་ཡང་སྟོང་། ད་ལྟར་གནས་པ་ཡང་སྟོང་སྟེ། རྔ་སྒྲ་དེ་ནི་ཤིང་ལས་མ་བྱུང་། ཀོ་བ་དང་ལག་པ་ལས་ཀྱང་མ་བྱུང་། དུས་གསུམ་གྱིས་མ་སྐྱེད་པས་མི་སྐྱེ་བ་སྟེ། གང་མི་སྐྱེ་བ་དེ་ནི་མི་འགོག་པའོ། །གང་མི་འགོག་པ་དེ་ནི་གང་ནས་ཀྱང་མ་འོངས་པའོ། །གང་ནས་ཀྱང་མ་འོངས་པ་དེ་ནི་གང་དུ་ཡང་མི་འགྲོ་བའོ། །ཞེས་སོ། །དྲི་མ་མེད་པ། ཕུང་པོ་ལྔ་དང་སྟོང་པ་ཉིད་ཐ་དད་པས་སྟོང་ངོ་། །དྲི་མ་དང་བྲལ་བ་མེད་པ། དེ་གཉིས་དོན་གཅིག་ཡིན་པས་སྟོང་ངོ་། །དེ་གསེར་འོད་ཀྱི་འཕྲོས་སུ། གང་དུ་ཡང་མི་འགྲོ་བ་དེ་ནི་རྟག་པ་དང་ཆད་པ་མ་ཡིན་པས་གཅིག་པ་ཡང་མ་ཡིན། ཐ་དད་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་གཅིག་པ་ཡིན་ན་ཆོས་ཀྱི་དབྱིངས་དང་ཐ་མི་དད་པས། འོ་ན་ནི་བྱིས་པ་སོ་སོ་སྐྱེ་བོ་རྣམས་ཀྱིས་ཀྱང་དོན་དམ་པའི་བདེན་པ་མངོན་དུ་གྱུར་ནས་མྱ་ངན་ལས་འདས་པའི་བདེན་པ་དམ་པ་ཐོབ་པར་འགྱུར་བ་ཞིག་ན། དེ་ལྟ་མ་ཡིན་པས་དེ་གཅིག་པ་མ་ཡིན་ནོ། །གལ་ཏེ་ཐ་དད་པ་ཡིན་ན་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྤྱོད་པ་དང་མཚན་མ་དེ་ཉིད་འཛིན་པ་ཡིན་པས་རྣམ་པར་གྲོལ་བར་མི་འགྱུར་ཞིང་། ཉོན་མོངས་པའི་འཆིང་བ་དང་མ་བྲལ་པས་དེ་བླ་ན་མེད་པའི་བྱང་ཆུབ་ཏུ་འཚང་མི་རྒྱའོ། །དེ་ཅིའི་ཕྱིར་ཞེ་ན། འཕགས་པ་རྣམས་ནི་འདུ་བྱེད་པ་དང་། འདུ་བྱེད་མ་ཡིན་པ་ཡང་དག་པའི་ངོ་བོར་གཅིག་པའི་ཕྱིར་ཐ་དད་པ་མ་ཡིན་ནོ། །ཞེས་གསུངས་པས། འདིས་མ་རྟོགས་པ་ལ་དེ་ཁ་འཁྲུལ་པ་དང་། རྟོགས་ན་དེ་ཁ་སྟོང་པ་ཉིད་དུ་བཤད་པ་སྟེ། དམིགས་པ་ལ་བརྟེན་ནས་རབ་ཏུ་མི་གནས་པ་ལ་རྩལ་སྦྱོང་དགོས་པའོ། །དེའི་ཕྱིར་རྣམ་རྟོག་ཆོས་སྐུ་ཞེས་པའི་ཆོས་སྐད་ཀྱི་དོན་ས་དེ་ནའོ། །བྲི་བ་མེད་པ། ཕུང་པོ་ལྔ་འབྲི་བ་ནི་འཛད་པ་སྟེ་མེད་པའི་མཐའོ། །མེད་པས་སྟོང་པའི་ཕྱིར་མཐའ་དེ་དང་བྲལ་ལོ། །གང་བ་མེད་པའོ། །གང་བ་ནི་འཕེལ་བའམ་རྫོགས་པ་སྟེ་ཡོད་པའི་མཐའོ། །དེས་སྟོང་པ་སྟེ་ཡོད་པ་མ་ཡིན་པས་སོ། །དེ་ལྟར་ཡང་གསེར་འོད་ཀྱི་འཕྲོས་སུ། དེ་བས་ན་ཕུང་པོ་ལྔ་པོ་དེ་ནི་ཡོད་པ་ཡང་མ་ཡིན། མེད་པ་ཡང་མ་ཡིན། རྒྱུ་དང་རྐྱེན་གྱིས་བསྐྱེད་པའང་མ་ཡིན། རྒྱུ་དང་རྐྱེན་མེད་པ་ལས་སྐྱེས་པ་ཡང་མ་ཡིན། ཚིག་གིས་ཐོག་ཏུ་མི་ཕེབས་པ། མིང་དང་མཚན་མ་མེད་པ། རྒྱུ་དང་རྐྱེན་མེད་པ། དཔེས་བསྟན་དུ་མེད་པ། ཐོག་མ་དང་མཐའ་མར་དབེན་པ། རང་གི་ངང་གིས་སྟོང་པ་སྟེ། དེ་ནི་འཕགས་པ་རྣམས་ཀྱིས་མཁྱེན་པར་བྱ་བ་ཡིན་གྱི། གཞན་གྱི་སྤྱོད་ཡུལ་དུ་མ་གྱུར་པའོ། །དེ་བས་ན་ཕུང་པོ་ལྔ་ལ་ཆོས་ཀྱི་དབྱིངས་སུ་འདོགས་སོ་ཞེས་གསུངས་སོ། །ཤཱ་རིའི་བུ་དེ་ལྟ་བས་ན། སྟོང་པ་ཉིད་ལ་གཟུགས་མེད། ཚོར་བ་མེད། འདུ་ཤེས་མེད། འདུ་བྱེད་རྣམས་མེད། རྣམ་པར་ཤེས་པ་མེད་དོ། །མཚན་མ་དེ་དང་མེད་པའི་རྒྱུ་མཚན་ཡང་གཉིས་ཏེ། མིག་མེད། རྣ་བ་མེད། སྣ་མེད། ལྕེ་མེད། ལུས་མེད། ཡིད་མེད། ནང་གི་སྐྱེ་མཆེད་དྲུག་མེད་པས་དང་། གཟུགས་མེད། སྒྲ་མེད། དྲི་མེད། རོ་མེད། རེག་བྱ་མེད། ཆོས་མེད་དོ། །ཕྱིའི་སྐྱེ་མཆེད་དྲུག་མེད་པས་སོ། །དེ་ལྟར་སྐྱེ་མཆེད་བཅུ་གཉིས་པོ་དེ་ནི་མཚན་མ་རྣམས་སྐྱེ་བའི་གོ་འབྱེད་མཁན་ཡིན་པས། དེ་དག་མི་དམིགས་པས་མཚན་མ་ཡོད་པའི་སྐབས་མེད་པས་སོ། །དེ་སྐྱེ་སྒོ་ཡིན་པའང་མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་བ་སོགས་ཀྱིས་གཏན་ལ་ཕབ་བོ། །རྒྱུ་མཚན་གཉིས་པ། མིག་གི་ཁམས་མེད་པ་ནས། ནས་ཞེས་པས། ལྷག་མ་དག་འདྲེན་པ། ཡིད་ཀྱི་ཁམས་མེད། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་མེད་དོ། །བར་ཞེས་པས་བཅུ་དྲུག དེ་ལྟར་ཁམས་བཅོ་བརྒྱད་དེ་ནང་གི་དྲུག ཕྱིའི་དྲུག རྣམ་པར་ཤེས་པའི་དྲུག་གོ །དེ་དག་མཚན་མ་རྣམས་ཀྱི་ས་བོན་ནམ། རིགས་སམ་རྒྱུ་((དྲུག)དཔྱད་)པོ་ཡིན་ལ། དེ་དག་མེད་པས་རྒྱུ་མེད་པས་འབྲས་བུ་མི་སྲིད་པའི་དོན་གྱིས་སོ། །དེས་ན་སྐྱེ་མཆེད་ཞིང་ས་ལྟ་བུ། ཁམས་ས་བོན་ལྟ་བུ་མེད་པས་མཚན་མ་མྱུ་གུ་ལྟ་བུར་མི་དམིགས་པ་འདི་ནི་རྣམ་པར་ཐར་པའི་སྒོ་མཚན་མ་མེད་པ་ཞེས་བྱའོ། །མ་རིག་པ་མེད། དེ་ནི་རྟེན་འབྲེལ་ཡན་ལག་བཅུ་གཉིས་ཀྱི་ཐོག་མ་སྟེ། དེ་རབ་ཏུ་མི་གནས་པས། མ་རིག་པ་ཟད་པ་མེད་པ་ནས། དེའི་ཟད་པ་དང་མི་སྐྱེ་བ་ཤེས་པ་མེད་ལ་ལྷག་མ་བཅུ་ཡང་དེ་བཞིན་དུ་སྦྱར་ནས། རྒ་ཤི་མེད། རྒ་ཤི་ཟད་པའི་བར་དུ་ཡང་མེད་དོ། །འདི་ནི་ལུགས་འབྱུང་གི་རྟེན་འབྲེལ་མེད་པས་ལུགས་ལས་ཟློག་པ་དེ་ལ་བལྟོས་པ་ཡིན་པའི་གནད་ཀྱིས་མེད་པར་བསྟན་ནོ། །སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མེད། འཕགས་པའི་བདེན་པ་མི་དམིགས་པར་དང་། ཡེ་ཤེས་མེད། འབྲས་བུ་གཉིས་སུ་མེད་པའི་ཡེ་ཤེས་ཀྱང་མི་དམིགས་པར་དང་། ཐོབ་པ་མེད། ཐོབ་བྱ་སངས་རྒྱས་མེད་ལ། དེས་མ་ཐོབ་པ་ཡང་མེད་དེ་ཐོབ་པར་བྱ་བ་ལ་སློབ་པའང་མེད་དོ། །དེའི་ཕྱིར་འདིས་འབྲས་བུ་མེད་པས། དེ་ཐོབ་པར་བྱའོ་སྙམ་པའི་འདོད་པ་དང་འདུན་པ་མི་དམིགས་པས་སྨོན་རྒྱུ་མེད་དེའི་ཕྱིར་རྣམ་པར་ཐར་པའི་སྒོ་འདི་ལ་སྨོན་པ་མེད་པ་ཞེས་བྱའོ། །དེ་ཡང་ཡོད་པ་དང་མེད་པ་ནི་འགལ་བས། ཡོད་པས་མེད་པ་དང་། མེད་པས་ཡོད་པ་དགག་ནུས་པའི་ཕྱིར། འདིར་མེད་ཅེས་གང་གསུངས་པ་དེ་ནི་ཡོད་པ་དགག་པའི་ཕྱིར་བསྟེན་ནོ། །འོན་ཀྱང་ཡོད་པ་མ་ཡིན་ན་མེད་པ་ཡིན་པར་འགྲོ་བ་ལྟ་བུ་ནི་མ་ཡིན་ཏེ། དེ་ལྟ་ན། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་མིན་པའང་མིན། །ཞེས་པ་དང་འགལ་བར་འགྱུར་རོ། །སྟོང་ཉིད་ཀྱང་ཡོད་པ་བཀག་ཙམ་དེ་ལ་བྱས་ན། སྟོང་པ་ཉིད་མེད་དགག་ཏུ་འགྱུར་ལ། དེ་ཆད་སྟོང་ཡིན་པས་མི་རུང་ངོ་། །དེ་ཡང་ཀླུ་གྲུབ་ཀྱིས། ཤིན་ཏུ་ཕྲ་བའི་དངོས་ལ་ཡང་། །གང་གིས་ཆད་པར་རྣམ་བརྟགས་པ། །རྣམ་པར་མི་མཁས་དེ་ཡིས་ནི། །རྐྱེན་ལས་བྱུང་བའི་དོན་མ་མཐོང་། །ཞེས་གསུངས་པས། སྟོང་ཉིད་དེ་ནི་རྟེན་འབྱུང་ངོ་། རྟེན་འབྱུང་གི་དོན་ཡང་རྒྱུ་རྐྱེན་ལས་སྐྱེ་བར་བྱེད་པ་ནི་ནོར་བ་སྟེ། འདིར་ནི་རྒྱུ་རྐྱེན་ལས་སྐྱེ་བ། དེ་དགག་པ་ལ་གཙོ་བོར་རྟེན་འབྲེལ་གསུངས་པ་ཡིན་པས་ན། སྟོང་ཉིད་དང་། རྟེན་འབྲེལ་དང་། །དབུ་མའི་བཤུལ་ཞེས་བྱ་བ་གཅིག་པས། དེ་ཕྱིར་སྟོང་དང་རྟེན་འབྱུང་དག །དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །ཐུབ་དབང་དེ་ལ་ཕྱག་འཚལ་ལོ། །ཞེས་འཕགས་པ་ཀླུ་སྒྲུབ་ཀྱིས་སོ། །དེ་དག་ཀྱང་འདིའི་སྒྲུབ་ཐབས་སློབ་དཔོན་དྷ་རི་ཀ་པས་མཛད་པར། གཟོད་ནས་ཞི་བའི་ཆོས་ཀུན་ནི། །རྐྱེན་དབང་འཁྲུལ་པར་རབ་སྣང་བ། །དེ་ཉིད་ཚེ་ན་ཞི་བ་ཉིད། །ཅེས་གསུངས་པས་སོ།། །། གཉིས་པ་སྒོམ་པའི་གནད་གོམ་པ་དོར་བ་ལྟ་བུ་ནི། ཤཱ་རིའི་བུ། དེ་ལྟ་བས་ན་བྱང་ཆུབ་སེམས་དཔའ་རྣམས། ཐོབ་པ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ཅིང་གནས་ཏེ། དེ་ཡང་གསེར་འོད་ཀྱི་འཕྲོས་སུ། གཞན་ཡང་རིགས་ཀྱི་ལྷ་མོ། གང་རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དམ་པ་དང་། ཀུན་རྫོབ་གཞན་དང་གཞན་མ་ཡིན་པར་འདོད་པ་དེ་ནི་དཔག་པར་དཀའ་སྟེ། འཕགས་པ་དང་ཡ་རབས་རྣམས་ཀྱི་སྤྱོད་ཡུལ་ནི། གཅིག་པ་དང་ཐ་དད་པའི་རང་བཞིན་མ་ཡིན་ཏེ། ཀུན་རྫོབ་ཀྱང་མ་སྤངས་དོན་དམ་པ་ཡང་བྲལ་བར་མ་གྱུར་པ་དེ་ནི་ཆོས་ཀྱི་དབྱིངས་ལ་གནས་ཤིང་བྱང་ཆུབ་སེམས་དཔའི་སྤྱད་པ་སྤྱོད་པའོ། །ཞེས་པས། དམིགས་པ་ཐམས་ཅད་ཉེ་བར་ཞི་བར་གནས་པ་དེ་ཉིད། གོམས་པར་བྱ་བ་ཡིན་པས་སྒོམ་པ་སྟེ། ཆོས་ཀྱི་དབྱིངས་ལ་གནས་པའམ། སྣང་བ་མེད་པ་ལ་གནས་པ་ཞེས་བྱའོ། །དེའི་ཕྱིར་ལྟ་བ་ཉིད་ལས་ལོགས་ན་སྒོམ་པ་མེད་པས་ལྟ་སྒོམ་ཟུང་འཇུག་གོ །སེམས་ལ་སྒྲིབ་པ་མེད་པས། དེ་ལས་ལངས་པའི་ཚེ་ཡང་། ལུས་དང་ངག་གི་འདུ་བྱེད་པ་ཡོད་ཀྱང་སེམས་འཁོར་གསུམ་དུ་རྟོག་པ་མེད་པས་སྒྱུ་མའི་སྐྱེས་བུ་བྱ་བ་བྱེད་པ་ལྟ་བུ་དེ་ནི་སྤྱོད་པ་སྟེ། དེའི་ཚེ་ལྟ་སྤྱོད་ཟུང་དུ་འཇུག་གོ །དེ་ལ་སྒྱུ་མ་ལྟ་བུའི་ཏིང་ངེ་འཛིན་ཞེས་བྱའོ། །སྐྲག་པ་མེད་དེ། དེས་ཁ་བ་ཞུ་རིམ་གྱིས་ཆུ་རྒྱས་པ་བཞིན་དམིགས་པ་ཇེ་ཉུང་དུ་སོང་། རྣམ་པར་མི་རྟོག་པ་ཇེ་རིང་དུ་གྱུར་པས་ས་ནས་སར་འགྲོ་བ་ལ་མི་ཞུམ་པའི་ཁར་དཔའ་བས། དེ་ནི་དཔའ་བར་འགྲོ་བའི་ཏིང་ངེ་འཛིན་ནོ། །བྱང་ཆུབ་སེམས་དཔའ་དེ་ནམ་སྒོམ་པ་ཐ་མ་ལ་གནས་པ་ན། སྔར་གཞོམ་པར་མ་ནུས་པའི་ཤེས་སྒྲིབ་ཕྲ་མོ་དེ་ཡང་རྨེག་མེད་པར་འཇོམས་པས། དེ་ནི་རྡོ་རྗེ་ལྟ་བུའི་ཏིང་ངེ་འཛིན་ནོ། །དེ་ལྟར་གསུམ་ཡང་བྱིས་པ་དང་གཞོན་ནུ་དང་དར་མའི་གནས་སྐབས་ལྟ་བུ་ཡིན་ནོ། །དེ་ཡང་དྷ་རི་ཀ་པས། སྔར་གྱི་འཕྲོས་སུ། ཞི་ཚེ་སྒྱུ་མ་ལྟ་བུར་སྣང་། །མཐའ་བཞིར་མི་རྟོག་བྲལ་བར་མིན། །བྱིང་རྒོད་མི་གནས་སེམས་ཉིད་ནི། །འོད་གསལ་ཅིར་ཡང་མི་སྒོམ་པ། །མཚན་མེད་རྣལ་འབྱོར་ཞེས་པས་གསུངས་སོ།། །། གསུམ་པ་འབྲས་བུའི་གནད་འདོད་སར་བརྟོལ་བ་ལྟ་བུ་ནི། ཕྱིན་ཅི་ལོག་ལས་ཤིན་ཏུ་འདས་ནས། མཐོང་བའི་ལམ་མངོན་དུ་བྱས་པའི་དུས་སུ་ནི་ཕྱིན་ཅི་ལོག་ལས་འདས་ལ། འདིའི་སྔ་ལོགས་དེ་མ་ཐག་ནས་ནི་ཤིན་ཏུ་འདས་པ་སྟེ་མ་རིག་པའི་གཉིད་ཐམས་ཅད་སངས་པའི་དོན་ནོ། །མྱ་ངན་ལས་འདས་པའི་མཐར་ཕྱིན་ཏོ། །སྲིད་པ་དང་ཞི་བ་ལ་མི་གནས་པས་མི་གནས་པའི་མྱ་ངན་ལས་འདས་པར་ཕྱིན་པ་སྟེ། ཤེས་བྱ་ཐམས་ཅད་ལ་བློ་རྒྱས་པའི་དོན་ནོ། །དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །སངས་རྒྱས་ཐམས་ཅད། སངས་རྒྱས་སུ་བྱེད་པའི་ཆོས་དེ་ལ་བརྟེན་ནས་སངས་རྒྱས་པ་སྟེ། དེའི་ཕྱིར་འདི་སངས་རྒྱས་ཐམས་ཅད་ཀྱི་ཡུམ་ངོ་མའོ། །དེ་ཡང་སྔ་མའི་འཕྲོས་སུ། ཕ་རོལ་ཕྱིན། །རྒྱལ་བ་ཞི་བར་རབ་གསུངས་པ། །ཞེས་པས་བསྟན་ནོ།། །། བཞི་པ་སྤྱོད་པའི་གནད་གསེང་ལམ་ལྟ་བུར་བཤད་པ་ལ། བསྟན། བཤད། བསྡུ་བ་གསུམ་ལས་དང་པོ་ནི། དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས། ཕ་རོལ་ཏུ་ཕྱིན་པ་ཉིད་སྔགས་ཀྱི་ཐེག་པར་སྟོན་པ་སྟེ། སྔགས་ཀྱི་སྤྱོད་པ་རྗེས་སྤྱད་ན། །སྐྱེ་འདི་ཉིད་ལ་སངས་རྒྱས་འགྱུར། །ཞེས་པའི་དགོས་པས་སོ། །ལྟ་བས་ནི་ངོ་བོ་ཉིད་གཏན་ལ་ཕབ་ནས་དམིགས་པ་ཐམས་ཅད་ཞི་བར་བྱེད་པ་སྟེ་སྔར་གྱི་དེའོ། །འདིར་སྤྱོད་པས་དམིགས་པ་ཉིད་ལྷུར་བླངས། དེས་དམིགས་པ་མེད་པ་བསྒྲུབ་པ་སྟེ། སོ་སོ་སྐྱེ་བོ་དུག་ལྔ་རགས་པོ་ཅན་གྱིས་བཙན་ཐབས་སུ་དམིགས་པ་ཞི་བར་བྱེད་མི་ནུས་པས། དེ་ལ་ནི། འདི་མཆོག་ཏུ་འགྱུར་རོ། །དེ་ཡང་ཡུམ་གསུམ་གནོད་འཇོམས་ལས། མ་ན་ནི་ཤེས་པ་ཡིན་ལ། ཏྲ་ཡ་ཞེས་བྱ་བ་ནི་སྐྱོབ་པ་ཡིན་པར་བཤད་པས་ཤེས་པ་དང་སྙིང་རྗེ་ལ་གསང་སྔགས་ཞེས་བྱ་བར་བརྗོད་དོ། །དེ་གཉིས་ཀྱི་རྒྱུ་མཐུན་པ་ཡིན་པའི་ཕྱིར་ཡི་གེ་དེ་དག་ལ་ཡང་གསང་སྔགས་ཞེས་བྱའོ། །ཞེས་དང་། རིག་པ་ཆེན་པོའི་སྔགས་དེར། མ་རིག་པ་སྤོང་བར་བྱེད་པ་དང་། རིག་པ་བསྐྱེད་པར་བྱེད་པའི་ཕྱིར་དེ་ཉིད་ལ་རིག་པ་ཞེས་བྱའོ། ཞེས་གསུངས། བླ་ན་མེད་པའི་སྔགས། འཁོར་གསུམ་དུ་རྟོག་པ་ནི། བླ་ན་ཡོད་པ། སྐབས་ཡོད་པ་ཞེས་བྱ། དེ་དང་བྲལ་པས་བླ་ན་མེད་པའོ། །མི་མཉམ་པ་དང་མཉམ་པའི་སྔགས། སངས་རྒྱས་ཐམས་ཅད་མི་མཉམ་པ་ནི་གཟུགས་ཀྱི་སྐུ། སངས་རྒྱས་ཐམས་ཅད་མཉམ་པ་ནི་ཆོས་ཀྱི་སྐུའོ། །སྡུག་བསྔལ་ཐམས་ཅད་ཞི་བར་བྱེད་པའི་སྔགས། སྡུག་བསྔལ་ནི་འཁོར་བ་པ་སྟེ། དེ་ཐམས་ཅད་ཉེ་བར་ཞི་བ་ལ་འགོད་པ་སྟེ། སྐྱོབ་པ་ཉིད་གཟིགས་ལམ་གསུང་བ་ཞེས་པའི་དབང་གིས་སོ།། །། གཉིས་པ་བཤད་པ་ནི། མི་རྫུན་པས་ན་བདེན་པར་ཤེས་པར་བྱ་སྟེ། འདོད་པ་ཐམས་ཅད་འགྲུབ་པ་ལ་མི་བསླུ་བའི་ཕྱིར་མི་རྫུན་པའོ། །དེ་ཡང་གསང་སྔགས་ཀྱི་དགྲ་ཐེ་ཚོམ། དེ་ཡོད་པས་མི་འགྲུབ་པས་ཐེ་ཚོམ་དགག་པའོ། །བདེན་ནོ་སྙམ་སུ་གུས་པ་དེས་འགྲུབ་པར་བསྒྲུབ་བོ། །དེ་ཡང་སངས་རྒྱས་ཀྱིས་བསྟན་པའི་སྔགས་རྣམས་ནི་འགྲུབ་དཀའ་སྟེ། དགོས་པ་དང་ཉིང་དགོས་མཐའ་ཡས་པས་རིན་ཐང་ཆེ་བ། མུ་སྟེགས་ཅན་གྱི་ནི་འགྲུབ་སླ་དེ་མཐུ་ཆུང་། དེ་ཡང་སྤྲང་པོས་ཟས་ཙམ་ཐོབ་སླའི། རིན་པོ་ཆེ་རྙེད་དཀའ་བ་ལྟ་བུའོ་སྙམ་དུ་ཤེས་ནས་གསང་སྔགས་ཅི་བཤད། བཤད་ཚོད་དུ་མི་བསམ་པར་ཉམས་ལེན་དུ་བྱའོ། །རིག་པའི་དབང་ཕྱུག་དག་ཀྱང་། ཤིན་ཏུ་ཕྲ་མོའི་གནས་སྟོན་པ་ལ་ལུང་ཚད་མར་བྱེད་དེ། སངས་རྒྱས་ལས་མཁས་པ་སུ་ཡང་མེད་པས་དེའི་ཚིག་ཚད་མར་གྱུར་པ་དཔང་དུ་གྱུར་པའོ་སྙམ་དགོངས་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་སྨྲས་པ། སྔགས་རེ་རེས་ཀྱང་ལས་སྣ་ཚོགས་འགྲུབ་པ་ནི་བྱེད་པ་པོ་དང་བྱ་བའི་ཡུལ་རྐྱེན་གྱིས་ཏེ། སྐྱེས་བུ་གཅིག་ཀ་དགྲ་གཉེན་བར་མ་སྐྱོང་བ་ལ་ཞུགས་པ་བཞིན་ནོ། །ཨོཾ་ནས་བརྩམས་པའི་ཡིག་འབྲུ་རེ་རེས་ཀྱང་ཆོས་ཀྱི་སྒོ་མཐའ་ཡས་པ་སྟོན་པས་དེ་དག་སྟོང་པ་ཉིད་དུ་བཞག་པ་སྟེ། དྷ་རི་ཀ་པས། སྟོང་པ་བཅོ་བརྒྱད་བརྗོད། ཞེས་གསུངས། དེས་ན་གཟུངས་འདིའི་དོན་ནི་བསམ་པར་དཀའ་བས་བསྡུས་ཏེ་བསྟན་ནོ། ཏདྱ་ཐཱ། འགའ་ཞིག་ལས། འདི་ཐོག་མར་བརྗོད་པ་དག་ནི་རིག་སྔགས་ཞེས་དང་། གསང་སྔགས་ནི་ལྷ་ཕོ། རིག་སྔགས་ནི་ལྷ་མོ་ཞེས་བཤད་པའི་སྐབས་ཡོད་པ་བཞིན། གང་སྔོན་དུ་སོང་བའི་ལྷག་མ་ཐམས་ཅད་རིག་སྔགས་ཡིན་པ་བཞིན། སྔགས་ཀྱི་སྒོར་སེམས་བསྐྱེད་ན། ཕྱིན་ཆད་དེའི་ལས་སུ་བྱ་བ་ཅི་གསུངས་པ་ཐམས་ཅད་སྔགས་སུ་འགྱུར་བར་བསྟན་པ་དང་། སེམས་བསྐྱེད་པ་དེ་ཡང་། དཀོན་མཆོག་གསུམ་རྗེས་སུ་དྲན་པའི་དུས་དེར། སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་གཟུང་བ་ཉིད་དུ་སློབ་དཔོན་ཀུན་དགའ་སྙིང་པོས་བཤད་པ་ལྟར་ཡིན་ལ། དེ་འཛིན་པའང་མ་འོངས་པ་ན་ཐོབ་པར་བྱའོ་སྙམ་པ་ནི་མ་ཡིན་ནོ། །འོ་ན་གང་ཞེ་ན། ད་ལྟ་ཉིད་དུ་དེ་ལ་བསླབ་པར་དམ་བཅའ་བ་སྟེ། དེ་ཡང་ཤེས་རབ་ཉིད་ཡིན་ལ། དེའི་སྐད་ལ་མོ་རྟགས་ཡོད་པས་མ་ཞེས་བཞག་པས་འདི་རིག་པ་དང་། དེ་ལྷ་མོར་བཞག་པའི་གནད་གོ་བར་བྱའོ། །ཨོཾ་ག་ཏེ་ག་ཏེ། ཨོཾ་རིག་བྱེད་ཐམས་ཅད་འདུས་པ་དང་། དེའི་མ་མོ་ཡིན་པ་བཞིན། སངས་རྒྱས་ཐམས་ཅད་འདུས་པ་དེས་བྱིན་གྱིས་བརླབ་པ་དང་། བྱིན་རླབས་དེས་མ་རིག་པ་འཐོར་པ་དང་རིགས་པ་ཆེན་པོ་བསྐྱེད་པའམ་བླུགས་པས་གཏོར་བ་དང་བླུགས་པའི་ཕྱིར་དེ་ལ་དབང་བསྐུར་བ། དེས་ག་ཏེ་ཟློས་ཏེ་གསུངས་སོ། །དབང་བསྐུར་བ་དེ་ལ་སྔགས་ཀྱི་མ་མོ་ཞེས་བྱའོ། །པ་ར་ག་ཏེ། ཕ་རོལ་ནི་བླ་ན་མེད་པ། དེར་འགྲོ་བ་ནི་རྩ་བའི་མདོ་དོན་བསྒོམ་པ་ཡིན་ལ། དེ་ཡང་ནམ་མཁའ་ལ་སྦྱོར་བ་དང་། ལོངས་ན་ཡང་སླར་ཤེས་རབ་ཀྱི་དམིགས་པ་སྟེ། སྦྱངས་པས་བླ་མེད་པ་ལ་རྣལ་འབྱོར་བྱ་བ་གཉིས་སོ། །འདིས་ཕྱིས་ཐབས་ཅི་ལ་སྦྱངས་ཀྱང་འཇིག་རྟེན་དུ་མི་འཆིང་བར་ཐར་པའི་རྒྱུར་འགྱུར་རོ། །ཨོཾ་སྭ་བྷཱ་ཝ་དང་ཤཱུནྱ་ཏའི་སྔགས་དོན་ཀྱང་རིམ་པ་དེའོ། །པ་ར་སམ་ག་ཏེ། ཕ་རོལ་ཙམ་ནི་ཉན་རང་དག་ལའང་ཡོད་དེ། འཁོར་བའི་ཕ་རོལ་མཐར་སོན་པ་ཞེས་བྱ་བས་སོ། །དེས་ན་ཕ་རོལ་དེ་ཙམ་དུ་སླེབ་པས་མི་ཆོག་པས་སམ་ཉེ་སྒྱུར་དེས། ལུས་མཚན་དཔེས་བརྒྱན་པའི་སངས་རྒྱས་ཀྱི་སྐུར་དང་། ངག་ཆོས་ཀྱི་གཎྜྻཱིའམ་ཆོས་ཀྱི་དུང་ངམ། ཆོས་ཀྱི་རྔ་དང་། ཡིད་ཏིང་ངེ་འཛིན་གྱི་རྩལ་སྦྱོང་བ་སྟེ། དང་པོ་གཉིས་ཀྱིས་མི་མཉམ་པ་དེ་ལམ་དུ་འཁྱེར་ཕྱི་མས་མཉམ་པ་དེ་ལམ་དུ་འཁྱེར་བ་བསྟན་པ་ཡིན་ནོ། །འདི་ལ་ཀླུ་སྒྲུབ་ཉིད་ཀྱིས་སྲས་གཙོ་བོ་དང་། དྷ་རི་ཀས་དེའི་ལུགས་བཀོད་པར་ཡུམ་གཙོ་བོར་བྱེད་པའི་ལྷ་ལྔའི་དཀྱིལ་འཁོར་བཤད་དེ་གང་མོས་གཟུང་ངོ་། །ཏིང་ངེ་འཛིན་ལ་མཚན་མ་ཅན་ཀམ་པ་ལས་དང་། མཚན་མེད་དེའི་ཡུམ་གྱིས་མཛད་པའང་ཀླུ་སྒྲུབ་ཀྱི་ལུགས་ཁོ་ནའོ། བོ་དྷི་སྭཱ་ཧཱ། ལམ་དེ་ལ་བྱང་ཆུབ་ནས་བྱ་བ་ཐམས་ཅད་གཞན་སྡུག་བསྔལ་ཞི་བའི་དོན་ལ་སྦྱོར་བ་སྟེ། དེ་ལ་བསྲུང་བ་དང་། ཟློག་པ་དང་། བསད་པ་དང་། སྡེ་རེངས་པ་རྣམས་ནི་མངོན་སྤྱོད་དེ། འདིར་བསྲུང་བ་རབ་ཀྱིས་བཟློག་པར་དང་། བཟློག་པ་རབ་ཀྱིས་བསད་པར་འགྱུར་པས་དྲག་ལས་སུ་བསྡུས་ཏེ་ཚར་གཅོད་ཀྱི་འཕྲིན་ལས། ཞི་བ་དང་རྒྱས་པ་གཉིས་ནི་ཕན་འདོགས་པ་སྟེ་རྗེས་སུ་འཛིན་པའི་འཕྲིན་ལས་སོ། །ཇི་སྐད་བཤད་པའི་དྲག་པོ་ལ་སོགས་པ་དེ་ཡང་དེ་ཉིད་ལ་སྙིང་རྗེའི་བསམ་པ་ཁོ་ནས་ཏེ། དེ་མི་དགེ་བ་ལ་ཞུགས་པ་ཐབས་གཞན་གྱིས་ལྡོག་མི་ཐུབ་ན་བྱ་བ་ཡིན་ལ་དེས་རྒྱུ་དགགས་པའི་ཕྱིར་འབྲས་བུ་སྡུག་བསྔལ་ཞི་བ་ཡིན་ནོ། །གསུམ་པ་བསྡུ་བ་ནི། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་བསླབ་པར་བྱའོ།། །། གསུམ་པ་དོན་བསྡུ་བ་ནི། དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ཏེ། དེ་ལ་ཞུགས་པའི་དགོས་པ་གྲུབ་ཟིན་པའི་ཕྱིར་དེ་ལས་བཞེངས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ནས། དེ་འཆད་པ་པོ་ཡིན་པས་སོ། །ལེགས་སོ་ལེགས་སོ། །རིགས་ཀྱི་བུ་དེ་དེ་བཞིན་ནོ། །རིགས་ཀྱི་བུ་དེ་དེ་བཞིན་ཏེ། ལེགས་སོ་ཇི་ལྟར་མཛད་པའི་ཚུལ་ལོ། །དེ་ལྟར་ཁྱོད་ཀྱིས་བསྟན་པ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་སྤྱད་པར་བྱ་སྟེ། ད་ལྟ་ཡོད་པ་དང་འབྱུང་བར་འགྱུར་བའི་གདུལ་བྱ་རྣམས་ཀྱིས་སོ། །དེ་བཞིན་གཤེགས་པ་རྣམས་ཀྱང་རྗེས་སུ་ཡི་རང་ངོ་། །སངས་རྒྱས་རྣམས་ཀྱིས་མཁྱེན་ཅིང་གཟིགས་པ་དེ་ལྟར་བཤད་པས་དེ་ལ་དགྱེས་པ་ཡིན་ནོ། །མདོ་རིལ་པོའི་མཇུག་སྡུད་ནི། དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རི་དྭ་ཏིའི་བུ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འགྱུར་ཡང་བསམ་ཡས་སུ་བསྒྱུར་བ་ཕྱིས་འོན་ལྗང་རྡོར་སྐད་གསར་བཅད་ཀྱིས་བཅོས་ནས་གཏན་ལ་ཕབ་པའོ། །འགའ་ཞིག་ཀ་ཅོག་གི་འགྱུར་ལ་སྒྲ་དང་མི་མཐུན་པ་འདུག་གོ་ཞེས་ཟེར་བ་དང་། དཔེར་ན་བརྒྱད་སྟོང་པ་བཟོ་སྦྱངས་ལས་འཕྲེང་བ་ཅན་འགྱུར་མང་པོ་སྙམ་ནས་དེ་ལ་མགུ་བ་ནི་ཕྱིན་ཅི་ལོག་སྟེ་ཀ་ཅོག་གི་དུས་གསུང་རབ་ཀྱི་བརྡ་ཕལ་ཆེ་བ་བཟོས། དེ་ལ་བརྡ་རྙིང་པ་གོ་དཀའ་བ་རྣམས་གཉགས་ཛྙྱཱ་ན་དང་ཞང་ཡེ་ཤེས་ལ་སོགས་པས་སྐད་གསར་དུ་བཅོས་དེ་ཡང་སྒྲ་གཙོ་བོ་དེའི་གཞུང་ལུགས་བཞིན་དང་། དོན་གཙོ་བོ་བདག་ཉིད་ཆེན་པོ་རྣམས་ཀྱི་འགྲེལ་པ་དང་བསྟུན་ནས་འགའ་ཞིག་བོད་སྐད་ལ་གླ་ཐབས་སུ་སྣོན་དགོས་བཅོས་ཏེ་ཞུས་ཤིང་གཏན་ལ་ཕབ་པས་ཚད་མར་འོས། དཔང་པོར་འོས་པ་དེ་ཁོ་ནའོ། །ཀློག་པ་ཕལ་ཆེར་བླ་མཆོད་བཞིན། །ཡིག་ནག་ཉིད་ཀྱི་ཕྱི་རྗེས་འབྲང་། །གཟུང་ཡང་ཞིབ་མོས་མི་གཞལ་བར། །གཞུང་ཀུན་ངང་ཚུལ་སྟོན་མི་སྤྲོ། །སྔོན་གྱི་རབས་སུ་མཛའ་བས་ན། །བདག་ལ་བག་ཕབ་དེས་འཕྲོས་བྱིན། །གསུང་རབ་དགོངས་འགྲེལ་བཅས་ལྟ་ལ། །ཆགས་བྲལ་ཚིག་འཁྲིའི་གླུ་ཆུང་འཐེན། །རྩོམ་པའི་སྔོན་ལ་ཆགས་པའང་ཕལ། །བདེར་འཁྱུག་དོགས་འབྲང་ལ་བྱོལ་ཕྱིར། །དཀའ་གནས་གར་སོང་གར་འདེད་པ། །ང་འདྲ་ཚོལ་དང་རྙེད་ན་མཚར། །དོན་མིན་ཚད་གདུངས་སྙིང་ལ་ཞེན་པའི་རྨོངས་པས་རྨོངས་ནས་དྲན་སྟོར་ལ། །དོན་འབྱེད་དྲི་བཟང་ག་པུར་ཆུས་གཉིད་སད་ལྟར་སད་པའི་ཕྱིར་སྤྲོ་བ། །དོན་བཞིན་རྣམ་བཤད་ཙཱུ་ཏའི་ལྗོན་པས་ས་འགོ་ས་དང་མཐོ་རིས་སར། །དོན་འབྲས་ཅི་འདོད་ལན་རེ་མ་ཡིན་དུས་དང་དུས་སུ་སྟེར་གྱུར་ཅིག །ཤེས་རབ་སྙིང་པོའི་རྣམ་བཤད་ཀླུ་སྒྲུབ་ཀྱི་མན་ངག་རིག་ནས་པདྨ་དཀར་པོས་བྱམས་པ་ཆེན་པོའི་ཆོས་གླིང་དུ་སྦྱར་བའོ།། །།མངྒལམ།། །།
