༄༅། །བཀའ་གདམས་པའི་དགེ་བའི་བཤེས་གཉེན་ཆེན་པོའི་ཕྱག་བཞེས་
ཐེག་པ་ཆེན་པོ་བློ་སྦྱོང་དོན་བདུན་མ་བཞུགས་སོ། །
༄༅། །སྔོན་འགྲོ་རྟེན་གྱི་ཆོས་བསྟན་པ།
དང་པོ་སྔོན་འགྲོ་དག་ལ་བསླབ། །
དངོས་གཞི་བྱང་ཆུབ་ཀྱི་སེམས་སྦྱོང་བ།
ཆོས་རྣམས་རྨི་ལམ་ལྟ་བུ་བསམ། །
མ་སྐྱེས་རིག་པའི་གཤིས་ལ་དཔྱད། །
གཉེན་པོ་ཉིད་ཀྱང་རང་སར་གྲོལ། །
ངོ་བོ་ཀུན་གཞིའི་ངང་ལ་བཞག །
ཐུན་མཚམས་སྒྱུ་མའི་སྐྱེས་བུ་བྱ། །
གཏོང་ལེན་གཉིས་པོ་སྤེལ་མར་སྦྱང༌། །
དེ་གཉིས་རླུང་ལ་བསྐྱོན་པར་བྱ། །
ཡུལ་གསུམ་དུག་གསུམ་དགེ་རྩ་གསུམ། །
སྤྱོད་ལམ་ཀུན་ཏུ་ཚིག་གིས་སྦྱང་། །
ལེན་པའི་གོ་རིམ་རང་ནས་བརྩམ། །
རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བ།
སྣོད་བཅུད་སྡིག་པས་གང་བའི་ཚེ། །
རྐྱེན་ངན་བྱང་ཆུབ་ལམ་དུ་བསྒྱུར། །
ལེ་ལེན་ཐམས་ཅད་གཅིག་ལ་བདའ། །
ཀུན་ལ་བཀའ་དྲིན་ཆེ་བར་སྒོམས། །
འཁྲུལ་སྣང་སྐུ་བཞིར་སྒོམ་པ་ཡི། །
སྟོང་ཉིད་སྲུང་བ་བླ་ན་མེད། །
སྦྱོར་བ་བཞི་ལྡན་ཐབས་ཀྱི་མཆོག །
འཕྲལ་ལ་གང་ཐུག་བསྒོམ་དུ་སྦྱར། །
ཚེ་གཅིག་གི་ཉམས་ལེན་དྲིལ་ནས་བསྟན་པ།
མན་ངག་སྙིང་པོ་མདོར་བསྡུས་པ། །
སྟོབས་ལྔ་དག་ལ་སྦྱར་བར་བྱ། །
ཐེག་ཆེན་འཕོ་བའི་གདམས་ངག་ནི། །
སྟོབས་ལྔ་ཉིད་ཡིན་སྤྱོད་ལམ་གཅེས། །
བློ་འབྱོངས་པའི་ཚད།
ཆོས་ཀུན་དགོས་པ་གཅིག་ཏུ་འདུས། །
དཔང་པོ་གཉིས་ཀྱི་གཙོ་བོར་གཟུང༌། །
ཡིད་བདེ་འབའ་ཞིག་རྒྱུན་དུ་བསྟེན། །
ཡེངས་ཀྱང་ཐུབ་ན་འབྱོངས་པ་ཡིན། །
བློ་སྦྱོང་གི་དམ་ཚིག
སྤྱི་དོན་གསུམ་ལ་རྟག་ཏུ་བསླབ། །
འདུན་པ་བསྒྱུར་ལ་རང་སོར་བཞག །
ཡན་ལག་ཉམས་པར་བརྗོད་མི་བྱ། །
གཞན་ཕྱོགས་གང་ཡང་མི་བསམ་མོ། །
ཉོན་མོངས་གང་ཆེ་སྔོན་ལ་སྦྱང༌། །
འབྲས་བུའི་རེ་བ་ཐམས་ཅད་སྤངས། །
དུག་ཅན་གྱི་ཟས་སྤངས།
གཞུང་བཟང་པོ་མ་བསྟེན།
ཤག་ངན་མ་རྒོད།
འཕྲང་མ་བསྒུག
གནད་ལ་མི་དབབ།
མཛོ་ཁལ་གླང་ལ་མི་འབྱོ།
མགྱོགས་ཀྱི་རྩེ་མི་གཏོད།
གཏོ་ལོག་མི་བྱ།
ལྷ་བདུད་དུ་མི་དབབ།
སྐྱིད་ཀྱི་ཡན་ལག་ཏུ་སྡུག་མ་ཚོལ། །
བློ་སྦྱོང་གི་བསླབ་བྱ།
རྣལ་འབྱོར་ཐམས་ཅད་གཅིག་གིས་བྱ། །
ལོག་གནོན་ཐམས་ཅད་གཅིག་གིས་བྱ། །
ཐོག་མཐའ་གཉིས་ལ་བྱ་བ་གཉིས། །
གཉིས་པོ་གང་བྱུང་བཟོད་པར་བྱ། །
གཉིས་པོ་སྲོག་དང་བསྡོས་ལ་བསྲུང༌། །
དཀའ་བ་གསུམ་ལ་བསླབ་པར་བྱ། །
རྒྱུ་ཡི་གཙོ་བོ་རྣམ་གསུམ་བླང༌། །
ཉམས་པ་མེད་པ་རྣམ་གསུམ་བསྒོམ། །
འབྲལ་མེད་གསུམ་དང་ལྡན་པར་བྱ། །
ཡུལ་ལ་ཕྱོགས་མེད་དག་ཏུ་སྦྱོང༌། །
ཁྱབ་དང་གཏིང་འབྱོངས་ཀུན་ལ་གཅེས། །
བཀོལ་བ་རྣམས་ལ་རྟག་ཏུ་བསྒོམ། །
རྐྱེན་གཞན་དག་ལ་ལྟོས་མི་བྱ། །
ད་རེས་གཙོ་བོ་ཉམས་སུ་བླང༌།
གོ་ལོག་མི་བྱ།
རེས་འཇོག་མི་བྱ།
དོལ་ཆོད་དུ་སྦྱང༌།
རྟོག་དཔྱད་གཉིས་ཀྱིས་ཐར་བར་བྱ། །
ཡུས་མ་བསྒོམ།
ཀོ་ལོང་མ་སྡོམ།
ཡུད་ཙམ་པར་མི་བྱ།
འོར་ཆེ་མ་འདོད། །
སྙིགས་མ་ལྔ་པོ་བདོ་བ་འདི། །
བྱང་ཆུབ་ལམ་དུ་བསྒྱུར་བ་ཡིན། །
མན་ངག་བདུད་རྩིའི་སྙིང་པོ་འདི། །
གསེར་གླིང་པ་ནས་བརྒྱུད་པ་ཡིན། །
སྔོན་སྦྱངས་ལས་ཀྱི་འཕྲོ་སད་པས། །
རང་གི་མོས་པ་མང་བའི་རྒྱུས། །
སྡུག་བསྔལ་གཏམ་ངན་ཁྱད་བསད་ནས། །
བདག་འཛིན་འདུལ་བའི་གདམས་ངག་ཞུས། །
ད་ནི་ཤི་ཡང་མི་འགྱོད་དོ།། །།
