དུས་གསུམ་རྒྱལ་བ་མ་ལུས་གཅིག་ཏུ་འདུས་པའི་བདག་ཉིད་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ།
།ཚེ་རབས་ཐམས་ཅད་དུ་འབྲལ་བ་མེད་པར་རྗེས་སུ་བཟུང་དུ་གསོལ།
།དེ་ལ་འདིར་སྐལ་བ་དང་ལྡན་པའི་གདུལ་བྱ་རྣམས་ཀྱི་བྱང་ཆུབ་ལམ་གྱི་རིམ་པའི་གདམས་པ་ཟབ་མོ་རྣམས་ཚིགས་སུ་བཅད་པའི་སྒོ་ནས་ཉམས་སུ་ལེན་ཚུལ་ཅུང་ཟད་བརྗོད་པར་བྱའོ།
།
དེ་ལ་དང་པོ་སྐྱབས་འགྲོའི་རིམ་པ་ནི་འདི་ལྟར།
།
རང་མདུན་རྨད་བྱུང་མཆོད་སྤྲིན་རྒྱ་མཚོའི་དབུས།
།གདོང་ལྔའི་དབང་པོ་བརྒྱད་ཀྱིས་ཉེར་བཏེག་པའི།
།རིན་ཆེན་གདན་ཁྲི་མཆོག་ཏུ་ཡངས་པའི་ཁར།
།ཆུ་སྐྱེས་ཉི་ཟླའི་དཀྱིལ་འཁོར་རྒྱས་པའི་སྟེང་།
།མ་ནོར་ལམ་སྟོན་རྩ་བའི་བླ་མ་དང་། །དབྱེར་མེད་བཅོམ་ལྡན་ཐུབ་པའི་དབང་པོ་ནི།
།གསེར་གྱི་ལྷུན་པོའི་སྤོ་ལྟར་རབ་བརྗིད་ཅིང།
།མཚན་དཔེའི་དཔལ་འབར་ཆོས་གོས་རྣམ་གསུམ་གསོལ།
།ཕྱག་གཡས་ས་གནོན་གཡོན་པ་མཉམ་གཞག་སྟེང་།
།བདུད་རྩིས་རབ་ཏུ་གང་བའི་ལྷུང་བཟེད་བསྣམས།
།བལྟ་བས་མི་ངོམས་གཟི་བརྗིད་ཕུང་པོའི་སྐུ།
།འོད་ཀྱི་དྲ་བའི་དབུས་ན་ལྷམ་མེར་བཞུགས།
།ཟླ་མེད་སྟོན་པ་མཆོག་དེའི་མཐའ་སྐོར་དུ། །བརྒྱུད་པ་གསུམ་གྱི་བླ་མ་མ་ལུས་པ།
།རྒྱུ་སྐར་ཚོགས་ཀྱིས་ཟླ་བའི་དཀྱིལ་འཁོར་ལ།
།ཀུན་ནས་བསྐོར་བ་བཞིན་དུ་བཞུགས་པར་གྱུར།
།དངོས་དང་བརྒྱུད་པའི་བླ་མ་དེ་རྣམས་ཀྱི།
།མཐའ་སྐོར་ཡི་དམ་ལྷ་དང་ཕྱོགས་བཅུ་ཡི།
།སངས་རྒྱས་རྣམས་དང་རྒྱལ་སྲས་ཉན་རང་དང་།
།མཁའ་འགྲོ་ཆོས་སྲུང་ཚོགས་ཀྱི་ཡོངས་སུ་བསྐོར།
།སོ་སོའི་གཡས་གཡོན་བཀོད་ལེགས་སྟེགས་བུའི་ངོས།
།རང་རང་ཞལ་གྱི་སྒོ་ནས་ཉེར་ཐོན་པའི། །རྣམ་དག་ལུང་གི་གླེགས་བམ་ཇི་སྙེད་པ།
།ཡིག་འབྲུས་རང་སྒྲའི་ཆོས་དབྱངས་སྒྲོག་བཞིན་བཞུགས།
།སྐྱབས་ཡུལ་དེ་དག་རྣམས་ཀྱི་སྐུའི་ཆ་ལས།
།འོད་ཟེར་ཕྱོགས་བཅུ་ཀུན་ཏུ་འཕྲོ་བྱེད་ཅིང་།
།འོད་ཟེར་རེ་རེའི་སྣ་ལས་གྲངས་མེད་པའི།
།སྤྲུལ་པ་འགྱེད་ཅིང་སེམས་ཅན་སྨིན་པར་མཛད།
།ཐུགས་རྗེའི་སྤྱན་གྱིས་བདག་ལ་རྗེས་གཟིགསཏེ།
།རིགས་ཀྱི་བུ་ཁྱོད་འཁོར་བའི་སྡུག་བསྔལ་ལས།
།ཐར་བར་འདོད་ན་ང་ཡི་བསྐྱབ་བོ་ཞེས།
།འཛུམ་ལྡན་ཞལ་གྱིས་དགྱེས་པའི་དབུགས་དབྱུང་མཛད།
།རང་གི་མཐའ་སྐོར་ཕ་མ་སེམས་ཅན་རྣམས།
།རིགས་དྲུག་སོ་སོའི་སྡུག་བསྔལ་གྱིས་གཟིར་ཞིང་།
།སྐྱབས་འཚོལ་རིག་རིག་མིག་དང་ཉམ་ཐག་པའི།
།འོ་དོད་སྨྲེ་སྔགས་དང་བཅས་འཁོད་པར་གྱུར། །ཀྱེ་མ་བདག་ནི་ཐོག་མེད་དུས་ཉིད་ནས།
།ད་བར་རིགས་དྲུག་གནས་སུ་འཁོར་འཁོར་ནས།
།སྡུག་བསྔལ་བརྒྱ་ཡིས་རྟག་ཏུ་མནར་མོད་ཀྱང་།
།དེ་ལ་ཐར་བའི་སྐབས་ནི་རྙེད་མ་གྱུར།
།ད་རེས་སྟབས་ལེགས་དལ་འབྱོར་རྟེན་ཐོབ་ཅིང་།
།སྟོན་དང་བསྟན་པ་མཆོག་དང་མཇལ་གྱུར་ཀྱང་།
།ཐོག་མེད་གོམས་པའི་ཉོན་མོངས་བཟློག་དཀའ་བས།
།གཏན་གྱི་བཙན་ས་ཟིན་པའི་རེ་དང་བྲལ། །ད་ནི་དེ་རིང་མི་འཆིའི་གདེངས་མེད་ཅིང་།
།གང་དུ་སྐྱེ་ལ་རང་དབང་མ་མཆིས་པས། །གལ་ཏེ་ངན་འགྲོའི་གཡང་སར་ལྷུང་གྱུར་ན།
།དེ་ཡི་སྡུག་བསྔལ་སྐད་ཅིག་བཟོད་དམ་སོམས།
།བརྒྱ་ལ་མངོན་མཐོ་ལྷ་མིའི་རྟེན་ཐོབ་ཀྱང་།
།སྐྱེ་རྒ་ན་འཆི་ལ་སོགས་སྡུག་བསྔལ་བརྒྱས།
།བར་མཚམས་མེད་པར་མནར་ཞིང་སླར་ཡང་ནི།
།ངན་འགྲོར་ལྟུང་ཕྱིར་མངོན་མཐོར་ཡིད་བརྟན་ཅི།
།དེས་ན་ད་རེས་དལ་འབྱོར་རྟེན་ཐོབ་ཅིང་།
།ལམ་སྟོན་བཤེས་གཉེན་མཆོག་གིས་རྗེས་སུ་བཟུང་།
།འཁོར་འདས་སྐྱོན་ཡོན་རིག་པའི་དུས་སྐབས་འདིར།
།འཇིགས་རུང་འཁོར་བ་འདི་ལས་མྱུར་ཐར་བྱ། །དེ་ཡང་རང་ཉིད་ཐར་བས་མི་ཆོག་སྟེ།
།སྲིད་པར་འཁྱམས་པའི་འགྲོ་བ་འདི་ཀུན་ཀྱང་། །རང་གི་ཕ་མ་ཤ་སྟག་ཉིད་ཡིན་ཕྱིར།
།འདི་དག་ཀུན་ཀྱང་སྲིད་ལས་སྒྲོལ་བར་བྱ། །དེས་ན་རང་གཞན་སེམས་ཅན་མ་ལུས་པ།
།མཐའ་མེད་འཁོར་བའི་རྒྱ་མཚོ་ཆེན་པོ་ལས།
།སྒྲོལ་བའི་སྐྱབས་དང་སྐྱོབ་པ་གཅིག་པུ་ནི།
།མཆོག་གསུམ་ཉིད་ལས་གཞན་དུ་མ་མཆིས་པས། །བདག་དང་མཁའ་མཉམ་འགྲོ་བ་མ་ལུས་པ།
།དེང་ནས་ཇི་སྲིད་བྱང་ཆུབ་སྙིང་པོའི་བར།
།དངོས་རྒྱུད་བླ་མ་རྣམས་ལ་སྐྱབས་སུ་མཆི།
།སྟོན་པ་སངས་རྒྱས་རྣམས་ལ་སྐྱབས་སུ་མཆིའོ།
།ལུང་རྟོགས་དམ་ཆོས་རྣམས་ལ་སྐྱབས་སུ་མཆི།
།འཕགས་ཚོགས་དགེ་འདུན་རྣམ་ལ་སྐྱབས་སུ་མཆིའོ།
།
བདག་དང་མཁའ་མཉམ་མན་ཆད་ལན་གསུམ་མམ་བདུན་ལ་སོགས་པར་བརྗོད།
།
དེ་ལྟར་སྐྱབས་སུ་སོང་བས་སྐྱབས་ཡུལ་ཀུན།
།དགྱེས་བཞིན་སྐུ་ལས་བདུད་རྩིའི་རྒྱུན་བབས་པས།
།བདག་གཞན་སེམས་ཅན་རྣམས་ཀྱི་སྡིག་སྒྲིབ་དང་།
།ནད་གདོན་ཚེ་ཡི་འགལ་རྐྱེན་ཡོངས་བྱང་ཞིང་།
།ཁྱད་པར་མཆོག་གསུམ་ལ་བརྟེན་ཉེས་ཀུན་དག།
།ཚེ་དང་བསོད་ནམས་ལུང་རྟོགས་ཡོན་ཏན་རྣམས།
།ཆེས་ཆེར་འཕེལ་ཞིང་རང་གཞན་སེམས་ཅན་ཀུན།
།མཆོག་གསུམ་རྣམས་ཀྱི་སྐྱབས་འོག་ཚུད་པར་གྱུར། །
སེམས་བསྐྱེད་ནི།
རང་ཉིད་སྲིད་པའི་བཙོན་རར་ལས་ཉོན་གྱི། །ཞགས་པས་བཅིངས་ཏེ་མནར་བ་ཇི་བཞིན་དུ།
།ཡང་ཡང་མར་གྱུར་དྲིན་གྱིས་བསྐྱངས་བསྐྱངས་པའི།
།ཉམ་ཐག་འགྲོ་བ་ཀུན་ཀྱང་དེ་འདྲ་ཉིད། །འགྲོ་འདི་སྒྲོལ་བའི་ཁུར་ནི་བདག་ཅག་ལ།
།བབས་ཀྱང་ད་ལྟའི་གནས་སྐབས་འདི་འདྲར་ནི།
།གཞན་དག་སྒྲོལ་བ་ལྟ་ཞོག་རང་ཉིད་ཀྱང་། །གར་འགྲོའི་གཏོལ་ཡང་ཅུང་ཟད་མི་སྣང་ལ།
།དགྲ་བཅོམ་རྣམ་གཉིས་ཐོབ་ཀྱང་རང་དོན་ཡང་། །མ་རྫོགས་གཞན་གྱི་དོན་ཡང་ཉི་ཚེ་ཙམ།
།དེ་ན་རང་གཞན་དོན་གཉིས་མཐར་ཕྱིན་པར། །རྒྱལ་བའི་གོ་འཕང་ངེས་པར་ཐོབ་དགོས་ཏེ།
།གོ་འཕང་མཆོག་དེ་ཐོབ་ན་རང་ཉིད་ནི། །རྒུད་པ་ཀུན་ཟད་ཡོན་ཏན་མ་ལུས་རྫོགས།
།འབད་རྩོལ་མེད་པར་ནམ་མཁས་གར་ཁྱབ་པའི།
།མ་རྒན་འགྲོ་བའི་དོན་བྱེད་ནུས་པའི་ཕྱིར།
།དེས་ནས་བདག་གིས་རྫོགས་པའི་སངས་རྒྱས་ཀྱི། །གོ་འཕང་མྱུར་བ་ཉིད་དུ་ཐོབ་པར་བྱ།
།དེའི་ཕྱིར་སྦྱིན་སོགས་སྤྱོད་པ་རླབས་པོ་ཆེ།
།ཀུན་ལའང་ཞུམ་མེད་རིམ་གྱིས་བསླབ་པར་བགྱི།
།དེ་ལྟར་བྱང་ཆུབ་སེམས་མཆོག་བསྐྱེད་པའི་མཐུས།
།བླ་མ་རྒྱལ་བ་སྲས་བཅས་རབ་དགྱེས་ཏེ། །ཐུབ་པའི་དབང་པོའི་སྐུ་ལས་རང་འདྲ་ཞིག།
།བདག་ལ་ཐིམ་པས་སྡིག་སྒྲིབ་ཀུན་དག་ནས།
།རང་ཉིད་ཐུབ་པའི་དབང་པོའི་སྐུ་རུ་གྱུར།
།རང་གི་སྐུ་ལས་འོད་ཟེར་ཕྱོགས་བཅུར་འཕྲོས།
།མ་དག་སྣོད་བཅུད་ཉེས་སྐྱོན་ཀུན་སྦྱངས་ཏེ།
།དག་པ་རབ་འབྱམས་འབའ་ཞིག་ཉིད་དུ་གྱུར། །ཚད་མེད་བཞི་ནི།
ཀྱེ་མ་འགྲོ་བ་འདི་དག་ཐམས་ཅད་ནི། །གྲངས་མེད་སྐྱེ་བར་ཕན་ཚུན་་ཕ་མ་རུ།
།གྱུར་ཀྱང་དེ་ལྟར་མ་ཤེས་ཆགས་སྡང་གིས།
།ལས་ངན་བསགས་ནས་སྡུག་བསྔལ་འབའ་ཞིག་མྱོང་། །ད་ནི་ཕན་ཚུན་ཆགས་སྡང་དང་བྲལ་ནས།
།བཏང་སྙོམས་ངང་དུ་གནས་ན་ཅི་མ་རུང་། །གནས་པར་གྱུར་ཅིག་འགྱུར་བ་བདག་གིས་བྱ།
།དེ་ལྟར་ནུས་པར་བྱིན་གྱིས་བརླབ་ཏུ་གསོལ། །ཀྱེ་མ་འགྲོ་བ་འདི་དག་ཐམས་ཅད་ནི།
།རྟག་ཏུ་བདེ་བ་འབའ་ཞིག་འདོད་མོད་ཀྱང་། །བདེ་བའི་རྒྱུ་ནི་དགེ་བར་མ་ཤེས་ཤིང་།
།ཤེས་ཀྱང་དགེ་བ་བསྒྲུབས་པར་མ་ནུས་པས། །བདེ་བས་ཕོངས་སོ་ད་ནི་བདེ་བ་དང་།
།བདེ་བའི་རྒྱུ་དང་ལྡན་ན་ཅི་མ་རུང་། །ལྡན་པར་གྱུར་ཅིག་འགྱུར་བར་བདག་གིས་བྱ།
།དེ་ལྟར་ནུས་པར་བྱིན་གྱིས་བརླབ་ཏུ་གསོལ། །ཀྱེ་མ་འགྲོ་བ་འདི་དག་ཐམས་ཅད་ནི།
།སྡུག་བསྔལ་རྣམ་པ་ཀུན་ཏུ་མི་འདོད་ཀྱང། །ཤིན་ཏུ་གཏི་མུག་བླང་དོར་གོ་ལོག་གིས།
།མི་དགེ་སྡིག་པའི་ལས་ལ་རྟག་གཞོལ་བས།
།སྡུག་བསྔལ་གྱིས་མནར་ད་ནི་སྡུག་བསྔལ་དང་།
།སྡུག་བསྔལ་རྒྱུ་དང་བྲལ་ན་ཅི་མ་རུང་།
།བྲལ་བར་གྱུར་ཅིག་འགྱུར་པ་བདགག་གིས་བྱ།
།དེ་ལྟར་ནུས་པར་བྱིན་གྱིས་བརླབ་ཏུ་གསོལ། །ཀྱེ་མ་འགྲོ་བ་འདི་དག་ཐམས་ཅད་ནི།
།འཁོར་བ་སྤྱི་དང་ཁྱད་པར་ངན་སོང་གི།
།སྡུག་བསྔལ་རྒྱུ་བཅས་ཀུན་དང་བྲལ་གྱུར་ནས།
།མངོན་མཐོ་ངེས་ལེགས་བདེ་བ་རིམ་བཞིན་དུ། །ཐོབ་ནས་ཟག་མེད་བདེ་བ་མཆོག་དེ་དང་།
།ནམ་ཡང་བྲལ་མ་གྱུར་ན་ཅི་མ་རུང་། །མི་འབྲལ་གྱུར་ཅིག་འགྱུར་བ་བདག་གིས་བྱ།
།དེ་ལྟར་ནུས་པར་བྱིན་གྱིས་བརླབ་ཏུ་གསོལ། །
ཁྱད་པར་གྱི་སེམས་བསྐྱེད་ནི།
ཁྱད་པར་མཁམ་མཉམ་འགྲོ་བ་ཀུན་སྒྲོལ་ཕྱིར།
།མྱུར་བ་མྱུར་བར་སངས་རྒྱས་ཐོབ་པར་བྱ། །
།དེའི་ཕྱིར་བྱང་ཆུབ་ལམ་གྱི་རིམ་པ་ཡི། །གདམས་པ་ཟབ་མོ་ཉམས་སུ་བླང་བར་བགྱི།
།
ཚོགས་ཞིང་གསལ་གདབ་པ་ནི་འཇུག་པ་བདེ་ཕྱིར་སྔར་གྱི་སྐྱབས་ཡུལ་དེ་ཉིད་མ་བསྡུས་པར་འདིར་དྲན་ཙམ་བྱས་པས་འཐུས་བར་གསུངས་ཤིང་།
།
སྐབས་འདིར་སྤྱན་འདྲེན་ཁྲུས་གསོལ་རེ་བྱ་བར་གསུངས་པས་འདི་ལྟར།
།
མཁའ་ཁྱབ་ཞིང་བཞུགས་དངོས་རྒྱུད་བླ་མ་དང་།
།ཡི་དམ་ལྷ་ཚོགས་སངས་རྒྱས་བྱང་སེམས་དང་།
།ཉན་རང་དཔའ་བོ་མཁའ་འགྲོ་སྲུང་མའི་ཚོགས།
།མ་ལུས་བདག་ལ་བརྩེ་བས་དགོངས་སུ་གསོལ།
།དཔག་མེད་བསྐལ་པར་བདག་ཅག་རྣམས་ཀྱི་ཆེད།
།ཐུགས་མཆོག་བསྐྱེད་པའི་དམ་བཅའ་མ་བསྙེལ་བར། །འདབ་བཟང་གཙོ་ལྷ་ཡི་ལམ་ལ་བཞིན།
།རྫུ་འཕྲུལ་སྟོབས་ཀྱིས་བརྩེ་བའི་འདིར་གཤེགས་ཤིང་། །ཅེས་སྤྱན་དྲངས།
ཁྲུས་ཀྱི་ཁང་པ་༝༝། །ཇི་ལྟར་བལྟམས་པ་༝༝། །རྒྱལ་བའི་སྐུ་གསུང་ཐུགས་ལ་༝༝།
།དེ་བཞིན་གཤེགས་དང་༝༝། །འདི་ནི་ཁྲུས་མཆོག་༝༝། །དེ་དག་སྐུ་ལ་༝༝།
།སྣ་ཚོགས་དབང་པོའི་༝༝། །རྒྱལ་བ་མཚན་པོའི་༝༝། །བརྩེ་བའི་ཁོར་ཡུག་༝༝།
།བདག་དང་༝༝། །ཞེས་སོགས་བྱ།
།
དེ་ནས་བསགས་སྦྱངས་ཀྱི་གནད་བསྡུས་པ་ཡན་ལག་བདུན་པ་བྱ་ཚུལ་ནི།
རབ་འབྱམས་རྒྱལ་བ་གཞན་གྱིས་མ་ཐུལ་བའི།
།རྩོད་དུས་འགྲོ་རྣམས་བདག་གིས་འདྲེན་བྱ་ཞེས།
།ཞིང་འདིར་གསང་བ་གསུམ་གྱིས་རྣམ་རོལ་པ། །བླ་མ་ཐུབ་པའི་དབང་པོར་ཕྱག་འཚལ་ལོ།
།སྲིད་མཚོ་ཉམ་ངའི་ཀློང་དུ་བྱིང་བ་བདག །ཟབ་རྒྱས་མདོ་སྔགས་གདམས་པའི་ཐབས་མཁས་ཆེས།
།སྐུ་གསུམ་རིན་ཆེན་ཐེམ་སྐས་ལ་འཁྲིད་མཛད། །དངོས་རྒྱུད་བླ་མ་རྣམས་ལ་༝༝།
།གང་ཞིག་བརྩོན་པས་བསྙེན་ཅིང་རབ་བསྒྲུབ་ན།
།བསྐལ་མང་རྙེད་དཀའ་ཟུང་འཇུག་གོ་འཕང་ཡང་།
།སྐད་ཅིག་ཉིད་ལ་སྩོལ་མཛད་རྒྱུད་སྡེ་བཞིའི། །ཡི་དམ་ལྷ་ཚོགས་རྣམས་ལ་༝༝།
།གྲངས་མེད་བསྐལ་པར་ཚོགས་གཉིས་གོམས་པའི་མཐུས།
།སྐྱོན་རྣམས་ཀུན་ཟད་ཡོན་ཏན་མ་ལུས་རྫོགས།
།ལྷུན་གྲུབ་རྒྱུན་ཆད་མེད་པའི་མཛད་པ་ཅན། །སྟོན་པ་སངས་རྒྱས་རྣམས་༝༝།
།གང་ཞིག་བསྟེན་ན་ཉེས་ཀུན་བྱང་བྱེད་ཅིང་། །མངོན་པར་མཐོ་དང་ངེས་པར་ལེགས་པ་ཡི།
།ཕུན་ཚོགས་མ་ལུས་ཡོངས་སུ་སྟེར་བྱེད་པ། །ལུང་རྟོགས་དམ་ཆོས་རྣམས་༝༝།
།རང་བདེ་རྨི་ལམ་དུ་ཡང་མི་སེམས་ཤིང་།
།སྐུ་དང་སྲོག་ལའང་མི་བལྟའི་སྙིང་སྟོབས་ཀྱིས།
།རྟག་ཏུ་གཞན་བདེ་འབའ་ཞིག་བསྒྲུབ་མཛད་པ། །རྒྱལ་བའི་སྲས་མཆོག་རྣམས་ལ་༝༝།
།འཁོར་བའི་གནས་ཀུན་མེ་འོབས་ལྟར་གཟིགས་ཏེ།
།བསླབ་གསུམ་འཁྱོགས་ཀྱི་བཞོན་པ་ལ་བརྟེན་ནས།
།ཐར་པའི་གྲོང་དུ་གཤེགས་ཤིང་སོན་གྱུར་པ། །འཕགས་པ་ཉན་རང་རྣམས་ལ་༝༝།
།ཉི་ཤུ་རྩ་བཞིའི་གནས་མཆོག་དམ་པ་ན། །སྒྲུབ་པ་པོ་ལ་རྟག་ཏུ་བརྩེར་དགོངས་ནས།
།སྣ་ཚོགས་སྤྲུལ་པའི་གར་གྱིས་རྣམ་རོལ་པ། །དཔའ་བོ་མཁའ་འགྲོའི་ཚོགས་ལ་༝༝།
།དམ་ཆོས་ཚུལ་བཞིན་སྒྲུབ་པ་མཐའ་དག་གི། །འདོད་པའི་རེ་བ་ཡིད་བཞིན་སྐོང་བྱེད་ལ།
།མ་རུང་བདུད་སྡེ་ཕྱེ་མར་བརླག་བྱེད་པའི། །དམ་ཅན་ཆོས་སྲུང་རྣམས་ལ་༝༝།
།མདོར་ན་ཕྱག་བྱར་འོས་པ་ཐམས་ཅད་ལ། །ཞིང་གི་གྲངས་དང་མཉམ་པའི་ལུས་སྤྲུལ་ཏེ།
།ཡོན་ཏན་ལ་བསྔགས་བསྟོད་དབྱངས་རྒྱ་མཚོ་བཅས།
།མི་ཕྱེད་དད་གུས་ཆེན་པོས་ཕྱག་འཚལ་ལོ།
།ཕུན་ཚོགས་རིན་ཆེན་བཀོད་ལེགས་སྣོད་ཡངས་སུ།
།འཆི་མེེད་བདུད་རྩིའི་ཆབ་ཀྱི་མཆོད་ཡོན་གཏམས།
།ཡིད་འཕྲོག་པདྨས་བརྒྱན་པའི་རྫིང་བུའི་ངོགས།
།ཡན་ལག་བརྒྱན་ལྡན་ཞབས་བསིལ་རྒྱུན་བཟང་འཁྱིལ། །ཨུཏྤལ་ཀུ་མུ་ད་དང་པདྨ་སོགས།
།ཡིད་འོང་མེ་ཏོག་དུ་མས་ས་གཞི་གང་། །བཟང་པོའི་སྨན་གྱི་བྱེ་བྲག་ལས་བྱུང་བའི།
།དྲི་ཞིམ་བདུག་སྤོས་སྤྲིན་གྱིས་བར་སྣང་ཁྱབ། །ཉི་མ་ཟླ་བ་ནོར་བུའི་སྣང་པ་དང་།
།རྩི་བཅུད་སྒྲོན་མེའི་སྣང་གསལ་ཀུན་ཏུ་བཀྲ།
།ཙྡན་ག་བུར་དྲི་ཡིས་རབ་བསྒོས་པའི། །རབ་བསིལ་དྲི་ཆབ་རླབས་ཕྲེང་དལ་གྱིས་གཡོ།
།ཁ་དོག་དྲི་ནུས་རོ་བརྒྱའི་དཔལ་ལྡན་པའི།
།ལྷ་མིའི་བཟའ་བཅའི་ཞལ་ཟས་མཚར་དུ་དངར། །པི་ཝང་གླིང་བུ་སིལ་སྙན་རྔ་སྒྲ་སོགས།
།སྣ་ཚོགས་རོལ་མོའི་སྒྲ་ཡིས་ས་གསུམ་གཡོ།
།གཟུགས་མཆོག་སྒྲ་སྙན་དྲི་དང་རོ་ཡི་མཆོག།
།རེག་བྱའི་འདོད་ཡོན་བྱེ་བྲག་མཐའ་ཡས་དང་།
།མི་དབང་ནོར་མཆོག་རིན་ཆེན་རྣམ་པ་བདུན།
།རྟགས་རྫས་བརྒྱད་ཀྱི་བཀོད་པས་ཞིང་ཀུན་གང་།
།ལྗོན་ཤིང་མེ་ཏོག་ཆུ་མཚོ་ཡིད་འོང་སོགས།
།བདག་པོས་མ་བཟུང་མཆོད་རྫས་ཅི་ཡོད་དང་།
།བདག་གཞན་ལུས་དང་ལོངས་སྤྱོད་ཅི་མཆིས་པ།
།མ་ཆགས་མི་ཞུམ་སྤྲོ་དགས་དགྱེས་དགུར་འབུལ།
།ཐུབ་གཞུང་མདོ་རྒྱུད་མན་ངག་རྒྱ་མཚོམ་ལ།
།ཐོས་བསམ་སྒོམ་པའི་དགེ་ཚོགས་ཅི་མཆིས་དང་།
།ཀུན་བཟང་མཆོད་སྤྲིན་སྟོབས་ལས་ལེགས་བྱུང་བའི།
།ངོ་མཚར་མཆོད་ཚོགས་ཞིང་ཀུན་ཁྱབ་པར་འབུལ།
།དེ་ལྟར་དད་མོས་ཏིང་འཛིན་གྱིས་བསྐྲུན་པའི།
།རྣམ་མང་མཆོད་སྤྲིན་རྒྱ་མཚོ་འདི་འབུལ་གྱི།
།ཐུགས་རྗེས་བཞེས་ནས་བདག་སོགས་འགྲོ་ཀུན་ལ།
།དངོས་གྲུབ་འདོད་དགུའི་གྲུ་ཆར་དབབ་ཏུ་གསོལ།
།མཚམས་འདིིར་ལྟུང་བཤགས་སོགས་བྱ་མིན་བློ་དང་སྦྱར་ཞིང་དེ་ནས།
།དཔག་མེད་སྡུག་བསྔལ་ཀུན་གྱི་རྒྱུ་གཅིག་པུ།
།སྒོ་གསུམ་བཅས་དང་ཁ་ན་མ་མཐོའི་ལས། །སྔོན་ཆད་བགྱིས་དང་བགྱིད་སྩལ་ཅི་མཆིས་པ།
།མ་ལུས་སྙིང་ནས་བཤགས་ཤིང་སྡོམ་པར་བགྱི།
།དངོས་དང་བརྒྱུད་པའི་བླ་མ་མཆོག་རྣམས་དང་།
།རབ་འབྱམས་རྒྱལ་བ་སྲས་དང་བཅས་པ་ཡི།
།དུས་གསུམ་དང་འབྲེལ་ལེགས་སྤྱད་ཇི་སྙེད་པར། །ཤིན་ཏུ་གུས་ཤིང་དང་བས་ཡི་རང་ངོ།
།སྲིད་པའི་གཅོང་རོང་ཉམ་ངའི་གཏིང་ལྷུངས་ཤིང་།
།སྡུག་བསྔལ་སྨག་རུམ་འཐུག་པོས་ནོན་གྱུར་པས།
།ཅི་བྱ་གཏོལ་མེད་བདག་དང་འགྲོ་རྣམས་ལ། །ཐར་ལམ་ཆོས་ཀྱི་སྣང་བ་བསྟན་དུ་གསོལ།
།ཐབས་མཁས་ཐུགས་རྗེས་མཁའ་ཁྱབ་གདུལ་བྱའི་ངོར།
།གང་འདུལ་གཟུགས་སྐུའི་རྣམ་རོལ་ཇི་སྙེད་པ།
།འགྲོ་ཀུན་བྱང་ཆུབ་མཆོག་ལ་མ་རེག་པར།
།རང་རང་གདུལ་བྱའི་མགོན་དུ་བཞུགས་སུ་གསོལ།
།འདིས་མཚོན་དགེ་བ་ཇི་སྙེད་བསགས་པ་ཀུན།
།སྲིད་ལམ་དུབ་པའི་མ་རྒན་འགྲོ་འདི་རྣམས།
།གཏན་དུ་བདེ་བའི་ལམ་ལ་འགོད་པའི་ཕྱིར།
།བླ་མེད་བྱང་ཆུབ་མྱུར་དུ་ཐོབ་ཕྱིར་བསྔོ། །
མཚམས་འདིར་མཎྜལ་དབུལ།
གསོལ་བ་འདེབས་པ་མན་ངག་བཞིན་བྱ་ཚུལ་ནི།
དཔལ་ལྡན་རྩ་བའི་བླ་མ་རིན་པོ་ཆེ།
།བདག་གི་སྤྱི་བོར་པད་ཟླའི་སྟེང་བཞུགས་ལ།
།བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ།
།སྐུ་གསུངས་ཐུགས་ཀྱི་དངོས་གྲུབ་སྩལ་དུ་གསོལ།
།བསྐལ་བཟང་ཞིང་གི་འདྲེན་པ་སྟོང་གི་དབུས།
།རྩོད་དུས་འགྲོ་ལ་ཐུགས་རྗེ་ཆེས་ལྷག་པ། །བླ་མ་ཐུབ་དབང་རྡོ་རྗེ་འཆང་ཆེན་ལ།
།གསོལ་བ་འདེབས་སོ་བདག་རྒྱུད་བྱིན་གྱིས་རློབས།
།གསང་ཆེན་ལྷ་ཡི་རྣལ་འབྱོར་ལ་བརྟེན་ནས།
།སྐལ་ལྡན་ཚེ་གཅིག་ཟུང་འཇུག་སར་འཁྲིད་མཛད།
།ཉམས་ལེན་བྱིན་རླབས་བླ་མའི་ཚོགས་རྣམས་ལ། །གསོལ་བ་འདེབས་སོ་༝༝།
།ཤེར་ཕྱིན་སྦས་དོན་རྒྱ་ཆེའི་ལམ་གྱི་གནད།
།ཐུགས་རྗེས་བསྐྱོད་ནས་འགྲོ་ལ་རྗེས་བསྟན་པ།
།རྒྱ་ཆེན་སྤྱོད་རྒྱུད་བླ་མའི་ཚོགས་རྣམས་ལ། །གསོལ་བ་འདེབས་སོ་༝༝།
།མ་རིག་འཁྲུལ་བར་འཁྱམས་པ་ལུས་ཅན་རྣམས། །ཟབ་ཞི་སྤྲོས་བྲལ་ལམ་དུ་ངེས་སྦྱོར་བ།
།ཟབ་མོ་ལྟ་རྒྱུད་བླ་མའི་ཚོགས་རྣམས་ལ། །གསོལ་བ་འདེབས་སོ་༝༝།
།ཟབ་དང་རྒྱ་ཆེའི་གདམས་པའི་སྲོལ་བཟུང་སྟེ།
།གངས་ལྗོངས་ཐེག་མཆོག་བསྟན་པ་རྒྱས་མཛད་པ།
།བཀའ་གདམས་རྒྱུད་པའི་བླ་མའི་ཚོགས་རྣམས་ལ། །གསོལ་བ་འདེབས་སོ་༝༝།
།མདོ་རྒྱུད་དགོངས་འགྲེལ་མ་ལུས་གང་ཟག་གཅིག།
།འཚང་རྒྱའི་ལམ་དུ་སྒྲིལ་ནས་ལེགས་འདོམས་པ།
།དགའ་ལྡན་བཀའ་རྒྱུད་བླ་མའི་ཚོགས་རྣམས་ལ། །གསོལ་བ་འདེབས་སོ་༝༝།
།གྲངས་མེད་རྒྱལ་བ་ཀུན་གྱི་ཐུགས་རྗེ་ཉིད།
།ལམ་སྟོན་བཤེས་གཉེན་མཆོག་གི་སྐུར་ཤར་བ། །རྩ་བའི་བླ་མ་བཀའ་དྲིན་ཅན་རྣམས་ལ།
།གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ནས་ཡོན་ཏན་གཞི་གྱུ་མའམ།
།དེ་ལས་ཅུང་རྒྱས་ཙམ་བྱེད་པར་སྤྲོ་ན། མ་ནོར་ལམ་སྟོན་བླ་མ་མཆོག་རྣམས་ལ།
།ཐ་མལ་སྐྱོན་རྟོག་སྐད་ཅིག་མི་སྐྱེ་ཞིང་།
།ཅི་མཛད་ལེགས་པར་མཐོང་ཞིང་བཀའ་དྲིན་ཆེར།
།དྲན་ནས་བཀའ་བཞིན་སྒྲུབ་པར་བྱིན་གྱིས་རློབས།
།དལ་འབྱོར་རྟེན་བཟང་དོན་མེད་ཆུད་གསན་བྱེད།
།བག་མེད་སྙོམས་ལས་བློ་ངན་མྱུར་འགག་ཅིང་།
།རྙེད་དཀའ་དོན་ཆེ་སྙིང་ནས་དྲན་པ་དང་། །དོན་ཆེན་སྙིང་པོ་ལེན་པར་༝༝།
།ངེས་མེད་འཆི་བ་མཐོང་ཡང་ལོ་བརྒྱ་རུ།
།སྡོད་པར་ཞེན་པའི་རྟག་འཛིན་དང་བྲལ་ཞིང་།
།མྱུར་དུ་འཆི་ཞིང་ནམ་འཆི་ངེས་མེད་པའི། །ངང་ཚུལ་སྙིང་ནས་དྲན་པར་༝༝།
།མི་བཟོད་གཡང་ས་གསུམ་ལ་ཅུང་ཟད་ཀྱང་། །ཡ་ང་མེད་པའི་བསམ་སྦྱོར་རྩད་ཐོན་ཞིང་།
།ངན་འགྲོོའི་ངང་ཚུལ་མཐོང་ཐོས་དྲན་ཙམ་གྱིས། །ཤིན་ཏུ་འཇིགས་པ་སྐྱེ་བར་༝༝།
།འཇིགས་ཆེན་མཐོང་ཡང་སྐྱབས་མགོན་མི་འཚོལ་བའི།
།བསམ་རླབ་ཡིད་འདི་ཡོངས་སུ་བྲལ་གྱུར་ཅིང་།
།བསླུ་མེད་སྐྱབས་གཅིག་རིན་ཆེན་མཆོག་གསུམ་ལ། །སྙིང་ནས་སྐྱབས་སུ་བཟུང་བར་༝༝།
།ལས་འབྲས་རྣམ་དབྱེ་བརྒྱ་ཕྲག་ཐོས་མཐོང་ཡང་།
།ཡིད་ཆེས་མེད་པའི་ཐ་རྒོད་བློ་འགག་ཅིང་།
།དཀར་ནག་ལས་དང་འབྲས་བུའི་ཚུལ་རྣམས་ལ། །བཅོས་མིན་ཡིད་ཆེས་རྙེད་པར་༝༝།
།འཁོར་བའི་གནས་ལུས་ལོངས་སྐྱོད་མཐའ་དག་ལ།
།བདེ་བར་མཐོང་ཞིང་ཞེན་པའི་སེམས་བྲལ་ཞིང་།
།སྲིད་གསུམ་མ་ལུས་མེ་འོབས་ལྟར་རྟོགས་ནས། །ཐར་འདོད་དྲག་ཏུ་སྐྱེ་བར་༝༝།
།ཐོག་མེད་དུས་ནས་འཁོར་བའི་བཙོན་ར་འདིར།
།འཆིང་བྱེད་བདག་འཛིན་དགྲ་ཡུལ་ཐོན་ཞིང་། །ཐར་པའི་ལམ་མཆོག་ཚང་ལ་མ་ནོར་བ།
།བསླབ་གསུམ་ཉམས་ལེན་འབྱོངས་པར་༝༝། །འགྲོ་རྣམས་བོར་ནས་རང་ཉིད་ཞི་བའི་བདེ།
།དོན་དུ་གཉེར་བའི་དམན་སེམས་མི་སྐྱེ་ཞིང་།
།གཞན་དོན་འཁུར་དུ་འཁྱེར་བའི་སེམས་མཆོག་ཆེ། །མྱུར་བ་མྱུར་བར་སྐྱེ་བར་༝༝།
།འཁོར་འདས་རྒུད་པ་ཀུན་གྱི་རྒྱུ་གཅིག་པུ།
།བདག་ཉིད་གཅེས་འཛིན་གཅོང་ནད་འདི་ཐོན་ཞིང་།
།རང་གཞན་ཕུན་ཚོགས་ཡོངས་ཀྱི་སྒོ་གཅིག་པུ། །བདག་པས་གཞན་གཅེས་འབྱོངས་བར་༝༝།
།རྒྱལ་སྲས་སྤྱོད་པ་རྒྱ་མཚོར་འཇུག་པ་ལ། །སྐད་ཅིག་ཙམ་ཡང་ཞུམ་པ་མི་སྐྱེ་ཞིང་།
།སར་གནས་དཔའ་བ་རྣམས་ཀྱི་རྣམ་ཐར་ལྟར། །ཕྱིན་དྲུག་སྤྱོད་ལ་སློབ་པར་༝༝།
།རྣམ་དག་བསམ་གཏན་འགྲུབ་ལ་གེགས་ཀྱི་ཕུལ།
།བྱིང་རྒོད་རྣམ་རྟོག་མཚན་མ་ཀུན་ཞི་ཞིང་།
།དམིགས་རྣམ་ཀུན་ལ་འདོད་དགུར་དབང་བསྒྱུར་བའི།
།ཏིང་འཛིན་རྩོལ་མེད་སྐྱེ་བར་༝༝། །རྒྱལ་བའི་དགོངས་ཟབ་དོན་ལས་གཞན་གྱུར་པ།
།རྟག་ཆད་ལོག་པའི་ལྟ་ངན་མི་སྐྱེ་ཞིང་།
།སྣང་སྟོང་གྲོགས་འགྱུར་གདོད་མའི་གནས་ལུགས་ཆེ།
།འཁྲུལ་མེད་མྱུར་དུ་རྟོགས་པར་༝༝། །རླབས་ཆེན་སྤྱོད་ལ་ཞུམ་སྟེ་མྱུར་པའི་ལམ།
།འཚོལ་བའི་ཟོལ་ལ་བསྟན་པའི་ཡིད་བྲལ་ཞིང་།
།འགྲོ་ཀུན་སྒྲོལ་ལ་ཆེས་ཆེར་རིངས་པའི་བློས། །གསང་ཆེན་ཐེག་པར་འཇུག་པར་༝༝།
།དབང་དུས་ཁས་བླང་བཅས་མཚམས་ཕྲ་རགས་ལས།
།འདས་པའི་ཉེས་ལྟུང་དྲི་མ་ཀུན་བྱང་ཞིང་།
།དམ་ཚིག་སྡོམ་པ་ལམ་གྱི་གཞིར་མཐོང་ནས། །སྲོག་བཞིན་གཅེས་པར་བསྲུངས་བར་༝༝།
།སྲིད་པར་ཡུན་དུ་སྡུག་བསྔལ་ལ་སྦྱོར་བ།
།ཐ་མལ་སྐྱེ་ཤི་བར་དོའི་འཇིགས་བྲལ་ཞིང་།
།སྣོད་བཅུད་སྐུད་གསུམ་རྡོ་རྗེའི་རོལ་པ་རུ། །འཆར་བའི་རིམ་གཉིས་འབྱོངས་བར་༝༝།
།གནས་སྐབས་སུ་ཡང་ལམ་བཟང་སྒྲུབ་པའི་གེགས།
།ཕྱི་ནང་བར་གཅོད་མཚན་མ་ཀུན་ཞི་ཞིང་།
།ལེགས་ཚོགས་མཐུན་པའི་རྐྱེན་རྣམས་མ་ལུས་པ།
།འབད་མེད་ལྷུན་གྱིས་གྲུབ་པར་བྱིན་གྱིས་རློབས།
།ཚེ་རབས་ཀུན་ཏུ་འདི་ལྟའི་ལམ་སྟོན་པའི།
།བཤེས་གཉེན་དང་མཇལ་དལ་འབྱོར་རྟེན་ཐོབ་ཅིང་།
།ཐོས་བསམ་སྒོམ་པས་ས་ལམ་མྱུར་བགྲོད་དེ།
།ཀུན་མཁྱེན་ཐོབ་ནས་འགྲོ་ཀུན་སྒྲོལ་བ་ཤོག
།ཅེས་གསོལ་བ་འདེབས་ཤིང་ཞིང་མཆོག་སྒོ་འབྱེད་དང་བྱིན་རླབས་སྤུང་ཞུས་ཀྱི་དམིགས་རིམ་ཡང་མན་ངག་བཞིན་ཉམས་སུ་བླང་ངོ་།
།
དེ་ནས་བདེ་ལམ་ནས་འབྱུང་བ་བཞིན་ཚོགས་ཞིང་བསྡུ་བ་སོགས་བྱ་བ་འམ།
།འཇམ་དཔལ་ཞལ་ལུང་ལས་འབྱུང་བ་ལྟར་དེ་དག་མ་བྱས་ཀྱང་རུང་བས་མོས་པ་དང་བསྟུན་ལ།
།
དངོས་གཞི་བཤེས་གཉེན་བསྟན་པའི་ཕན་ཡོན་ནི།
བྱང་ཆུབ་ལམ་མཆོག་ཚང་ལ་མ་ནོར་བ།
།འདོམས་པའི་དགེ་བའི་བཤེས་གཉེན་དམ་པ་ནི།
།བསམ་དང་སྦྱོར་བས་ཚུལ་བཞིན་བསྟེན་པ་ཡི། །ཕན་ཡོན་དེ་ནི་བསམ་གྱིས་མི་ཁྱབ་སྟེ།
།གྲངས་མེད་བསྐལ་པ་རྒྱ་མཚོར་བརྩོན་པ་བརྒྱས།
།བསྒྲུབས་ཀྱང་ཤིན་ཏུ་རྙེད་དཀའ་ཟུང་འཇུག་ཆེ།
།བླ་མའི་མཐུ་ལ་བརྟེན་ན་སྙིགས་དུས་ཀྱི།
།ཚེ་ཐུང་གཅིག་ལ་བདེ་བླག་འགྲུབ་པར་གསུངས།
།བཤེས་གཉེན་དམ་པ་ཚུལ་བཞིན་བསྟེན་བྱས་ཚེ།
།འདི་ནི་མྱུར་དུ་སྲིད་ལས་གྲོལ་འགྱུར་ཞེས། །བུ་ལ་ཕན་པ་སྒྲུབ་པ་མས་མཐོང་བཞིན།
།རྒྱལ་བ་མ་ལུས་ཐུགས་ཡིད་གཏིང་ནས་དགྱེས།
།སློབ་མས་བླ་མ་ཚུལ་བཞིན་བསྟེན་པའི་ཚེ།
།རྒྱལ་རྣམས་སྤྱན་མ་དྲངས་ཀྱང་བླ་མའི་སྐུར།
།དགྱེས་བཞིན་བཞུགས་ནས་མཆོད་ཚོགས་ཀུན་བཞེས་ཤིང་།
།དེ་ཡི་རྒྱུད་ཀྱང་བྱིན་གྱིས་བརླབས་པར་གསུངས་།
།དེ་ཚེ་སངས་རྒྱས་ཀུན་གྱི་བྱིན་རླབས་དེ།
།དད་པའི་སེམས་ཀྱི་བུ་གར་ཞུགས་པའི་མཐུས།
།བདུད་དང་ཉོན་མོངས་ཚོགས་ཀྱིས་མི་ཚུགས་ཤིང་།
།ས་ལམ་ཉམས་རྟོགས་མོད་ལ་སྐྱེ་ཞིང་འཕེལ། །དེ་ལ་རྟག་ཏུ་གུས་པས་བརྟེན་བྱས་ན།
།ཉོན་མོངས་ཉེས་སྤྱོད་ཐམས་ཅད་རང་ཤུགས་ཀྱིས།
།འགག་ཅིང་དཀར་ཆོས་ངང་གིས་འཕེལ་འགྱུར་པས། །འདི་དང་ཕྱི་མར་བདེ་བ་རྒྱ་ཆེན་ཐོབ།
།ཚེ་འདིར་བླ་མ་ཚུལ་བཞིན་མཉེས་བྱས་པའི།
།རྒྱུ་མཐུན་འབྲས་བུ་ཚེ་རབས་ཐམས་ཅད་དུ།
།དགེ་བའི་བཤེས་གཉེན་མཆོག་དང་མཇལ་འགྱུར་ཞིང་།
།ཚང་ལ་མ་ནོར་དམ་ཆོས་ཐོས་པར་གྱུར། །མདོར་ན་བཤེས་གཉེན་བསྟེན་པས་གནས་སྐབས་སུ།
།མི་ཁོམ་ལས་ཐར་ལྷ་མིའི་རྟེན་བཟང་རྙེད།
།མཐར་ཐུག་འཁོར་བའི་སྡུག་བསྔལ་ཀུན་ཟད་དེ།
།ངེས་ལེགས་གོ་འཕང་དམ་པ་ཐོབ་པར་འགྱུར། །
མ་བསྟེན་པའི་ཉེས་དམིགས་ནི།
དེ་ལྟར་བཤེས་གཉེན་ཚུལ་བཞིན་བསྟེན་བྱས་པའི།
།ཕན་ཡོན་བསམ་མི་ཁྱབ་པ་དེ་བཞིན་དུ། །མ་བསྟེན་པ་དང་བསྟེན་ཚུལ་ལོག་པ་ཡི།
།ཉེས་དམིགས་དེ་ཡང་བསམ་གྱིས་མི་ཁྱབ་སྟེ།
།དགེ་བའི་བཤེས་རྣམས་རྒྱལ་ཀུན་འཕྲིན་ལས་དེ། །རམ་གི་བླ་མར་ཤར་བ་ཉིད་ཡིན་ཕྱིར།
།དེ་ལ་མ་གུས་རྒྱལ་ཀུན་མ་གུས་པར། །གསུང་ཕྱིར་དེ་ལས་རྣམ་སྨིན་ལྕི་བ་གང་།
།བླ་མ་ཁྲོ་སེམས་སྐད་ཅིག་གང་སྐྱེས་བ།
།དེ་སྙེད་བསྐལ་བར་བསགས་པའི་དགེ་བཅོམས་ཏེ།
།སྐད་ཅིག་དེ་ཡི་གྲངས་མཉམ་བསྐལ་པ་རུ།
།དམྱལ་བར་སྐྱེ་ཞེས་དུས་འཁོར་རྒྱུད་ལས་གསུངས།
།མཚམས་མེད་ལྔ་སོགས་སྡིག་པ་ཆེར་བགྱིས་ནའང་།
།སྔགས་ལ་བརྟེན་ན་ཚེ་འདིར་མཆོག་འགྲུབ་ཀྱང་།
།སྙིང་ནས་སློབ་དཔོན་སྨོད་པས་བསྐལ་པ་རུ།
།བསྒྲུབ་ཀྱང་དངོས་གྲུབ་ཅི་ཡང་མི་འགྲུབ་གསུངས།
།ལམ་སྟོན་བཤེས་ལ་བརྙས་སྨོད་ལྷུར་ལེན་པའི།
།གང་ཟག་དེས་ནི་རྒྱུད་དོན་བསྒྲུབ་པའི་མཆོག །གཉིད་རྨུགས་འདུ་འཛི་སྤངས་ཏེ་འབད་གྱུར་ཀྱང་།
།དམྱལ་སོགས་བསྒྲུབ་དང་འདྲ་བར་རྒྱུད་ལས་བཤད། །བླ་མ་མཆོག་ལ་གུས་པ་དང་བྲལ་ན།
།ཡོན་ཏན་མི་སྐྱེ་སྐྱེས་པ་ཉམས་འགྱུར་ཞིང་།
།ཚེ་འདིར་ནད་གདོན་དུས་མིན་འཆི་སོགས་འབྱུང་།
།ཕྱི་མ་ངན་སོང་མུ་མཐའ་མེད་པར་འཁྱམས།
།གལ་ཏེ་བརྒྱ་ལ་བདེ་འགྲོའི་རྟེན་ཐོབ་ཀྱང་།
།མ་གུས་པ་ཡི་རྒྱུ་མཐུན་འབྲས་བུ་དེས། །མི་ཁོམ་གནས་སུ་སྐྱེས་ནས་དམ་ཆོས་དང་།
།དགེ་བའི་བཤེས་ཀྱི་སྒྲ་ཡང་ཐོས་མི་འགྱུར།
།མདོར་ན་བཤེས་གཉེན་བསྟན་པའི་ཚུལ་ལོག་ན།
།འཁོར་བ་སྤྱི་དང་བྱེ་བྲག་ངན་འགྲོ་རུ།
།གཏན་འཁྱམས་སྡུག་བསྔལ་འབའ་ཞིག་མྱོང་བ་ལ།
།མཐོ་རིས་ཐར་པ་ཐོབ་པའི་སྐབས་མེད་འགྱུར།
།དེ་ལྟར་ཕན་ཡོན་ཉེས་དམིགས་བསམ་འདས་ཤིས།
།བདག་གི་ལེགས་ཚོགས་རྩ་བའང་འདིར་སྣང་ཕྱིར།
།ད་ནི་སྐྱོན་རྟོག་ཡིད་ཡུལ་མི་རྒྱུ་བར། །དད་ཅིང་གུས་པས་བསྟེན་པར་མི་བྱེད་རི།
།
རྩ་བ་དད་པ་སྦྱང་བ་ནི།
བདག་གི་ལམ་སྟོན་བཤེས་གཉེན་འདི་རྣམས་ནི།
།ཇི་ལྟར་ནམ་མཁའི་ཟླ་བ་ཅིག་དེ་ཉིད། །འཇིག་རྟེན་ཁམས་ཀྱི་ཆུ་ཀླུང་ཐམས་ཅད་དུ།
།འབད་མེད་གཅིག་ཅར་འཆར་བ་དེ་བཞིན་དུ།
།སངས་རྒྱས་རྣམས་ཀྱི་ཡེ་ཤེས་དེ་ཉིད་ཀྱང་། །དག་དང་མ་དག་གདུལ་བྱ་རྣམས་ཀྱི་ངོར།
།ལོངས་སྤྲུལ་ཐ་མལ་བཤེས་སོགས་གང་འདུལ་སྐུར།
།འབད་མེད་ཉིད་དུ་ཤར་བར་མདོ་ལས་གསུངས། །ཁྱད་པར་སྔགས་ཀྱི་རྒྱུ་སྡེ་དུ་མ་ལས།
།དུས་མཐར་ཁྱབ་བདག་རྡོ་རྗེ་འཆང་དབང་ཉིད།
།ཐ་མལ་དགེ་བའི་བཤེས་ཀྱི་སྐུར་བསྟན་ནས།
།སྙིགས་མའི་འགྲོ་བ་འདྲེན་པར་གསུངས་པའི་ཕྱིར།
།སྐུ་དང་མཛད་པ་ཇི་ལྟར་བསྟན་ན་ཡང་། །དོན་དུ་ཕྱོགས་བཅུའི་རྒྱལ་བ་ཐམས་ཅད་ཀྱིས།
།བདག་ཅག་ཐར་པའི་ལམ་ལ་དྲང་བའི་ཕྱིར། །གང་འདུལ་སྐུ་རུ་བསྟན་པར་གདོན་མི་ཟ།
།སྐྱོན་གྱི་རྣམ་པར་སྣང་བ་འདི་དག་ཀྱང་།
།ལེགས་སྐར་ལྷས་སྦྱིན་མུ་སྟེགས་བྱེད་རྣམས་ཀྱིས།
།སྐྱོན་ཟད་ཡོན་ཏན་རྫོགས་པའི་སྟོན་པ་དེ།
།སྐྱོན་གྱི་གོང་པུར་མཐོང་བ་ཇི་བཞིན་དུ།
།བདག་གི་ལས་ངན་སྒྲིད་གཡོགས་ཆེས་འཐུག་པས།
།མཁྲིས་ལྡན་མི་ཡིས་དུང་སེར་མཐོང་བ་ལྟར།
།སྐྱོན་བྲལ་སྐྱོན་ལྡན་ཉིད་དུ་མཐོང་ཙམ་ལས།
།དོོན་དུ་ཉེས་སྐྱོན་དེ་འདྲ་ཅི་ལ་མངའ། །རྣམ་པ་ཅིག་ཏུ་སྐྱོན་ལྟར་སྣང་འདི་དག །རྒྱལ་བས་སེམས་ཅན་དོོན་དུ་བདུད་སོགས་ཀྱི།
།རོལ་པ་ཅིར་ཡང་སྟོན་པར་གསུངས་པ་ལྟར། །ཆེད་དུ་མ་བསྟན་པ་ཡི་ངེས་པ་ཅི།
།ལས་ངན་སྒྲིབ་གཡོགས་འདི་དང་མ་བྲལ་རིང་།
།སངས་རྒྱས་མ་ལུས་མངོན་སུམ་མདུན་བྱོན་ཡང་། །ད་ལྟའི་སྣང་བ་འདི་ཉིད་མ་གཏོགས་པ།
།ཁྱད་པར་མངོན་མཐོ་ཙམ་གྱིས་མ་ཚིམ་པར།
།བྱང་ཆུབ་བསྒྲུབ་ལ་ས་ཆོད་འབྱུང་བའི་ཕྱིར།
།རྣམ་སྨིན་བརྒྱད་ལྡན་རྟེན་མཆོག་ཐོབ་པའི་རྒྱུ།
།ཀུན་ལའང་བདག་གིས་བརྩོན་པས་བསླབ་པར་བྱ།
།དེ་ལྟར་ནུས་པར་བྱིན་གྱིས་བརླབ་ཏུ་གསོལ།
།
སྐྱེས་བུ་འབྲིང་ལས་མིའི་སྡུག་བསྔལ་སྒོམ་ཚུལ་ནི།
དེ་ལྟར་སྡིག་སྤོང་དགེ་ལ་འབད་ན་མངོན་མཐོའི་རྟེན་ཞིག་རྙེད་མོད་ཀྱང་།
།འཁོར་བའི་སྡུག་བསྔལ་ཡོངས་སུ་ཟད་པའི་ཐར་པའི་གནས་དེ་མ་ཐོབ་ན།
།སླར་ཡང་ངན་འགྲོར་འཁྱམས་པར་འགྱུར་ཕྱིར་ཡིད་བརྟན་མེད་པར་མ་ཟད་དེ།
།རྟེན་དེ་ཉིད་ལའང་བདེ་བའི་སྐབས་མེད་སྡུག་བསྔལ་རང་བཞིན་ཉིད་ཡིན་ཏེ།
།མི་རྣམས་མངལ་དུ་རྣལ་ཁྲག་ལ་སོགས་རབ་ཏུ་མི་གཙང་དྲི་ང་ཞིང་།
།སྲིན་བུས་ཡོངས་གང་ཆེ་ཆེར་དོག་པའི་མུན་ཁུང་ཤིན་ཏུ་ཡ་ངའི་ཁྲོད།
།ལུས་ནི་བཅིང་བ་བཞིན་དུ་བསྐམས་ཤིས་ཤ་མའི་སྣོད་ཀྱིས་ཀུན་ནས་དཀྲིས།
།མ་ཡི་སྤྱོད་ལམ་སོགས་ལ་བརྟེན་པའི་སྡུག་བསྔལ་དུ་མ་རིང་དུ་མྱོང་།
།དེ་ནས་ལས་ཀྱི་རྣམ་སྨིན་ལས་སྐྱེས་རླུང་གིས་ཐུར་དུ་ཁ་བསྟན་ཏེ།
།རུས་པའི་འཁྲུལ་འཁོར་ཤིན་ཏུ་དོག་ཅིང་མི་གཙང་དྲི་ངའི་སྒོ་དག་ལས།
།དྲག་ཅིང་རྩུབ་པའི་ཚེར་བ་བཟོད་དཀས་ཉམ་ཐག་བཞིན་དུ་བཙས་ནས་ཀྱང་།
།མི་འདོད་སྡུག་བསྔལ་ཆར་བཞིན་འབབ་པའི་སྐྱེ་བའི་སྡུག་བསྔལ་འདི་རེ་འཇིགས།
།སྔར་གྱི་ན་ཚོད་གཞོན་ནུའི་ལུས་དེ་རིམ་འགྱུར་རང་ལུས་འཕོས་པ་ལྟར།
།ལུས་སྒུར་མདོག་ཉམས་སྐྲ་རྣམས་དཀར་ཞིང་བདེ་མོར་འགྲོ་ཡང་གོམ་འགྲོས་འཁྱོར།
།ཤ་སྟོབས་བྲི་པས་གཉེར་མས་ཁེབས་ཤིང་པགས་པ་དག་ཀྱང་ལྷག་ལྷུག་འབྱང་།
།སོོ་ཕྲེང་ཐོར་ཞིང་ཟས་ལ་ཡིད་སྨོན་སྨྲ་ལྕེ་ལྡིབ་ཅིང་བརྗེད་ངས་ཆེ། །མིག་གཟུགས་མི་མཐོང་རྣ་བ་མི་གསལ་ལྡང་འདུག་དཀའ་ཞིང་གཞན་གྱིས་བརྙས།
།བཟའ་བཏུང་དག་ཀྱང་འཇུ་དང་སྤྱོད་དཀའ་སྐྱེ་བོ་ཀུན་གྱི་ཡིད་མི་འབབ།
།ད་ནི་ལང་ཚོ་འདི་ལྟར་གྱུར་བས་མྱུར་དུ་འཆི་བར་འགྱུར་སྙམ་བའི།
།སྡུག་བསྔལ་ཆེན་པོས་ཉིན་བཞིན་གཟིར་བའི་རྒས་པའི་སྡུག་བསྔལ་འདི་རེ་སྐྱོ།
།འབྱུང་བ་འཁྲུག་པའི་ནད་ཀྱིས་བཏབ་སྟེ་བསྐུལ་བསྐྱོད་དཀའ་ཞིང་མལ་དུ་ལུས།
།ནད་ཟུག་དྲག་པོས་རྟག་ཏུ་འཁུན་ཞིང་ཉིན་མཚན་མི་འཁྱོལ་ངུ་ཞིང་སྨྲ།
།ཡིད་དགར་འོང་བ་སྤྱོད་པའི་དབང་མེད་མི་འདོད་བཟའ་བཏུང་སྨན་སོགས་སྟེར།
།ནད་ཀྱི་ཟུག་རྔུས་རྟག་ཏུ་མནར་བཞིན་ད་དུང་གཏར་སྲེགས་ལ་སོགས་མྱོང་།
།སྤྱོད་ལམ་དག་ཀྱང་གང་དགར་བྱར་མེད་མདངས་ཉམས་སྐད་དམའ་ལྡང་མི་ཐུབ།
།ནད་ཀྱི་དབང་གིས་གནས་ལུས་ལོངས་སྤྱོད་འཁོར་དང་གྲོགས་ཀུན་དགྲ་རུ་འཆར།
།ཡིད་མི་བདེ་བའི་ཉིན་ཚན་འདའ་ཞིང་ནད་དེས་འཆི་བར་དོགས་པ་ཡི།
།མྱ་ངན་ཤུགས་ཀྱིས་ཆེ་ཆེར་ནོན་པའི་ན་བའི་སྡུག་བསྔལ་འདི་རེ་མཐུ།
།ལུས་ཀྱི་ནད་དམ་རྐྱེན་གཞན་དག་གིས་འཆི་བདག་ཁ་རུ་མངོན་ཕྱོགས་ཏེ།
།གང་དུ་འཆི་ནད་དྲག་པོས་ཟིན་ནས་མལ་གྱི་ཐ་མར་འདྲེ་ལྡོག་ཅིང་།
།སྨན་པས་མ་ཕན་རིམ་གྲོས་མ་བཟློག་རང་གཞན་གསོན་པའི་རེ་ཐག་ཆད།
།གཉེན་བཤེས་ངུ་བས་མཐའ་ནས་བསྐོར་ཞིང་རང་གི་གདོང་རང་མཆི་མས་བཤལ།
།ཁ་ནས་ཐ་མའི་ཚིག་དག་སྨྲ་ཞིང་གཤིན་དགེ་དུར་གྱི་གཤོམ་ར་འདིར།
།སྣ་གཞོམ་ཁ་བསྐམས་མིག་ནི་གྱེན་ལྡོག་ངར་རང་དབུགས་བརྩེགས་ཅི་བྱར་གྱ། །གཉེན་ལུས་ལོངས་སྤྱོད་གྲགས་ལ་ཆགས་པའི་མྱ་ངན་གྱིས་གདུང་སྡིག་པས་འགྱོད།
།གནད་གཅོད་དྲག་པོས་རྐང་ལག་གཡོབ་སོགས་འཆི་བའི་སྡུག་བསྔལ་འདི་རེ་འཇིགས།
།དེ་ལྟར་སྐྱེ་རྒ་ན་འཆིའི་དགྲ་བཞིས་འཁོར་ལོ་བསྐོར་བཞིན་མནར་བ་ཡི།
།བར་སྐབས་སུ་ཡང་སྡུག་བསྔལ་མང་པོས་བདེ་བར་གནས་པའི་སྐབས་མེད་དེ།
།ཞེ་འགྲས་དགྲ་དང་ཆོམ་རྐུན་གཅན་གཟན་མི་མིན་མེ་ཆུའི་འཇིགས་པ་སོགས།
།ཤིན་ཏུ་མི་སྡུག་དག་དང་ཕྲད་པས་ཡིད་ནི་མྱ་ངན་ཁུང་བུར་ཚུད།
།ཆེ་ཆེར་འཕངས་ཤིང་སྙིང་དུ་སྡུག་པའི་གཉེན་བཤེས་ལོངས་སྤྱོད་འཁོར་སོགས་དང་།
།རང་དབང་མེད་པར་བྲལ་བར་གྱུར་ཚེ་དེ་ཉིད་དྲན་པས་ཡིད་གདུངས་ཏེ།
།ངག་ཏུ་སྨྲེ་ངག་ཅི་ཡང་འབྱིན་ཞིང་མཆི་མས་མནངས་ཏེ་བརྒྱལ་ཞིང་འགྱེལ།
།ཡན་ལག་བརྡབས་ཤིང་སྐྲ་ཡང་འབལ་བྱེད་སྨྲ་བ་སྐྱུངས་ཤིང་ཟས་ཀྱང་གཅོད།
།སོ་ནམས་བྱས་ཀྱང་སྟོན་ཐོག་མ་གྲུབ་འཚོ་སྐྱོང་བྱས་ཀྱང་ཕྱུགས་མ་འཕེལ།
།ཚོང་ལ་ཞུགས་ཀྱང་ཁེ་སྤོགས་མ་ཐོན་སྐྱི་དང་སློང་ཡང་རེ་བ་དེ།
།མ་འགྲུབ་པ་སོགས་འདོད་པ་དངོས་པོ་ངལ་བརྒྱས་བཙལ་ཡང་མི་རྙེད་ཅིང་།
།སད་ཐན་གྱོད་ཆགས་ཁམ་ཆུ་ལ་སོགས་མི་འདོད་དངོས་པོ་ཐོག་ཏུ་འབབ།
།འབྱོར་བས་ཕོངས་རྣམས་བཟོ་སོགས་ལས་དང་གཞན་གྱི་བྲན་དང་འཁོལ་པོས་མནར།
།ལོངས་སྤྱོད་ལྡན་རྣམས་དེ་ཉིད་བསྲུང་དང་སྤེལ་བ་སོགས་ཀྱིས་རྟག་ཏུ་ངལ།
།གཞན་ཡང་ཚ་གྲང་བསྐྲེས་སྐོམ་དབུལ་ཕོངས་ཕན་ཚུན་འཐབ་ཅིང་རྩོད་པ་སོགས།
།མི་ཡི་གནས་ནའང་སྡུག་བསྔལ་མང་འཁྲུག་ངན་འགྲོའི་འཇིག་རྟེན་དག་དང་མཚུངས།
།
ལྷ་མ་ཡིན་གྱི་སྡུག་བསྔལ་སྒོམ་ཚུལ་ནི།
ལྷ་མིན་རྣམས་ཀྱང་ལྷ་ཡི་དཔལ་འབྱོར་ཕུན་སུམ་ཚོགས་པ་གང་དེ་ཉིད།
།སྙིང་ལ་ཚེར་མ་ལྟ་བུར་ཟུག་པའི་ཕྲག་དོག་མེ་ལྕེས་ཡིད་གདུངས་ནས།
།ལྷ་དང་འཐབ་ཅིང་འདོད་ལ་བརྟེན་པའི་སྡུག་བསྔལ་མི་བཟད་ཉམས་སུ་མྱོང་།
།ཤེས་རབ་ལྡན་ཡང་རྣམ་སྨིན་སྒྲིབ་པས་ཐར་ལམ་བསྒྲུབ་པས་སྐལ་བ་བྲལ།
།
འདོད་ལྷའི་སྡུག་བསྔལ་སྒོམ་ཚུལ་ནི།
འདོད་པའི་ལྷ་རྣམས་གནས་ལུས་ལོངས་སྤྱོད་ཕུན་སུམ་ཚོགས་པའི་མོད་ཉིད་དུ།
།གློ་བུར་ལུས་ཀྱི་གཟི་མདངས་ཉམས་ཤིང་འདུག་པའི་སྟན་ལ་ཡིད་མི་དགའ།
།མེ་ཏོག་ཕྲེང་རྙིང་གོས་ལ་དྲི་ཆགས་སྔོན་མེད་ལུས་ལ་རྡུལ་འབྱུང་སོགས།
།མྱུར་དུ་འཆི་བའི་་ལྟས་ཀྱིས་ཟིན་ཚེ་མི་རྣམས་འཆི་ལྟས་གྱིས་ཟིན་ལྟར།
།རིན་ཆེན་ལས་གྲུབ་གནས་དང་ཁང་བཟང་བདུད་རྩིའི་ཟས་དང་གྲོགས་ལ་སོགས།
།ཆེས་ཆེར་སྙིང་དུ་འབབ་པ་རྣམས་དང་བྲལ་ནས་འཇིག་རྟེན་ཕ་རོལ་ཏུ།
།འགྲོ་བར་ཤེས་ཤིང་གང་དུ་སྐྱེ་བའི་གནས་ཀྱང་མངོན་པར་རིག་གྱུར་ནས།
།སྡུག་དང་བྲལ་བའི་མྱ་ངན་དྲག་པོ་ཤིན་ཏུ་བཟོད་དཀའ་རིང་དུ་མྱོང་།
།གཞན་ཡང་ལྷ་མིན་དཔུང་དང་འཐབ་ཚེ་ཡན་ལག་ཉིང་ལག་ཆད་པ་དང་།
།ལུས་ནི་བྲལ་དང་གསོད་པས་སྡུག་བསྔལ་བསོད་ནམས་ཆུང་བའི་ལྷ་དག་ནི།
།ལྷ་གཞན་ལོངས་སྤྱོད་རྒྱ་ཆེན་མངའ་བའི་དཔལ་འབྱོར་མཐོང་ཚེ་སྤ་ཡང་བཀོང་།
།སྟོབས་ལྡན་མཐུ་ཡིས་ཉམས་ཆུང་ལྷ་རྣམས་གནས་ནས་སྐྲོད་སོགས་སྡུག་བསྔལ་ཅན།
།མདོར་ན་འདོད་ལ་ལྷག་པར་ཆགས་བས་ལན་ཚྭའི་ཆུ་རྒྱུན་འཐུང་བ་ལྟར།
།ངོམས་པ་མེད་པས་རྟག་ཏུ་མནར་ཕྱིར་དེ་ལ་བདེ་བའི་གོ་སྐབས་ཅི།
།སེམས་ཀྱི་གླང་ཆེན་འདོད་འདུན་མྱོས་ཆུས་ཆེས་ཆེར་མྱོས་པར་གྱུར་པ་ཡི།
།དམ་ཆོས་ཞི་བའི་ལྕགས་ཀྱུས་འདུལ་བའི་སྐལ་བ་དག་ཀྱང་ཤིན་ཏུ་དམན།
།
ཁམས་གོང་མ་གཉིས་ཀྱི་ལྷའི་སྡུག་བསྔལ་སྒོམ་ཚུལ་ནི།
ཁམས་གོང་གཉིས་ན་སྡུག་བསྔལ་དེ་དག་མངོན་གྱུར་མེད་པར་བག་ཉལ་ཡང་། །སྡུག་བསྔལ་དང་ནི་ཉེས་པའི་རྩ་བ་ཉོན་མོངས་དང་ལྡན་སྒྲིབ་པར་བཅས།
།འཆི་འཕོ་གནས་ལ་རང་དབང་དང་བྲལ་འདུ་བྱེད་སྡུག་བསྔལ་ཟུག་རྔུ་ཆེས།
།རྟག་ཏུ་མནར་བའི་རང་བཞིན་ཉིད་ལས་སླར་ཡང་ཕྱིར་ལྟུང་ཡིད་བརྟན་བྲལ།
།མདོར་ན་ལྷ་དང་མི་ཡི་རྟེན་བཟང་ཇི་ལྟ་བུ་ཞིག་ཐོབ་གྱུར་ཀྱང་།
།མཁའ་ལ་ལྡིང་བའི་བྱ་ཡི་ཚུལ་བཞིན་དགེ་བའི་ལས་མཐུ་ཟད་པ་ན།
།སླར་ཡང་དམྱལ་བ་ཡི་དྭགས་དུད་འགྲོའི་གནས་སུ་ལྷུང་ནས་སྡུག་བསྔལ་ན།
།ཀྱེ་མ་མཐོ་རིས་དང་དཔལ་འབྱོར་དེ་ཡང་མི་རྟག་བསླུ་བའི་རང་བཞིན་ཉིད།
།
སྡུག་བསྔལ་དྲུག་བསམས་ཚུལ་ནི།
སྔོན་ཆད་བདག་གིས་ལུས་བླངས་པ་ཡི་ཤ་རུས་མ་དགོད་ལྷུན་པོར་མཉམ།
།ཁྲག་དག་ཆུ་སེར་གཅིག་ཏུ་བསྐྱིལ་ན་རྒྱ་མཚོའི་གཏིང་མཐའ་དང་མཚུངས་ཤིང་།
།ཚངས་དང་བརྒྱ་བྱིན་འཁོར་ལོས་བསྒྱུར་དང་ལྷ་མི་ཕལ་པའི་ལུས་བླངས་པའང་།
།བགྲང་བར་དཀའ་ཡང་མ་ལུས་འདོར་ཟིན་ལུས་ཐོབ་པ་ལ་ཡིད་བརྟན་ཅི།
།ཚེ་རབས་སྔོན་མའི་མི་བསྲུན་དགྲ་ཡང་ཚེ་འདིའི་གཉེན་གྱུར་ཕན་པ་སྒྲུབ།
།སྔོན་མའི་གཉེན་ཡང་ཚེ་འདིའི་དགྲ་ཡི་དང་མར་གྱུར་ནས་སྲོག་ལའང་རྒོལ།
།འདི་ཉིད་དུ་ཡང་དགྲ་དང་གཉེན་རྣམས་ཚེ་ཡི་སྟོད་སྨད་ལོ་ཟླ་དང་།
།ཞག་རེར་སྐད་ཅིག་གིས་འགྱུར་ཕན་གནོད་བྱེད་ལ་ཡིད་བརྟན་ཅི།
།ཚངས་དབང་འཁོར་བསྒྱུར་སྟོབས་ལ་དབང་བསྒྱུར་ནམ་ཞིག་བྲན་དང་འཁོལ་བོར་གྱུར།
།གླིང་བཞིར་སྣང་བྱེད་ཉི་ཟླར་གྱུར་ནས་ནམ་ཞིག་མུན་པའི་ཁུང་བུར་ཉལ།
།ལྷ་ཡི་བདུད་རྩིའི་རོ་ལ་སྤྱད་ནས་ནམ་ཞིག་ཟངས་ཞུན་རྣག་ཁྲག་ཟ།
།རིན་ཆེན་ཁང་བཟང་ཉིད་དུ་གནས་བཅས་ནམ་ཞིག་ལྕགས་ཁང་འབར་བར་བསྲེགས།
།མཐོ་རིས་བུ་མོས་འདོད་ཡོན་གྱིས་བསྟེན་ནམ་ཞིག་དམྱལ་སྲུང་དག་གིས་གཙེ། །ཚེ་སྟོད་སྟོབས་འབྱོར་མངའ་ཐང་གིས་བསྙེམས་ཚེ་སྨད་དབུལ་ཕོངས་ཟས་མི་རྙེད།
།རིན་ཆེན་དར་ཟབ་ནོར་གྱིས་ཕྱུག་ཀྱང་འཆི་དུས་གཅིག་བུ་ལག་སྟོང་འགྲོ།
།ཀྱེ་ཧུད་འཁོར་བའི་ཕུན་ཚོགས་ཐོབ་ལ་ཡིད་བརྟན་རུང་བ་ཅི་ཞིག་མཆིས།
།ཆོས་མཐུན་གྲོགས་དང་བློ་མཐུན་མཛའ་བཤེས་ཡིད་འོང་གཉེན་འཁོར་ལ་སོགས་དང་།
།རིང་དུ་འདྲིས་ཤིས་བཤེས་པར་གྱུར་ནས་ནམ་ཞིག་རང་ཉིད་གཅིག་པུ་རུ།
།མར་གྱི་གསེབ་ནས་སྤུ་དྲངས་ཇི་བཞིན་འཇིག་རྟེན་ཕ་རོལ་རྒྱུས་མེད་སར།
།འཁྱམས་པར་འགྱུར་ན་འགྲོགས་ཤིང་བཤེས་ལ་ཡིད་བརྟན་རུང་བའི་དངོས་མཆིས་སམ།
།སྔོན་ཆད་ལྷ་ཡི་ཁང་བཟང་བསྐྱེད་ཚལ་ན་ཆུང་བདུད་རྩིའི་རོར་སྤྱད་དང་།
།མི་ཡི་གནས་ནའང་གོས་བཟང་གྱོན་དང་བཟའ་བཏུང་སྤྱད་དང་གྲོགས་བསྟེན་སོགས།
།འདོད་པའི་ཡོན་ཏན་ལྔ་ལ་སྤྱད་པའི་གྲངས་དེ་རྡུལ་དང་རབ་མཚུངས་ཀྱང་།
།སྤྱོད་བཞིན་སྲེད་འཕེལ་སྡུག་བསྔལ་མང་འདྲེན་ངོམས་མེད་སྡུག་བསྔལ་འདི་རེ་སྐྱོ། །དམྱལ་བར་སྐྱེས་ནས་ཟངས་ཞུན་འཐུང་དང་སྲིན་པོར་གྱུར་ནས་ས་ལུད་དང་།
།ཁྱི་ཕག་སོགས་གྱུར་མི་གཙང་ཟོས་གང་སྤུངས་ནས་འཇིག་རྟེན་ཁྱོན་འགེངས་ཤིང་།
།སྡུག་བསྔལ་ཤུགས་ཀྱིས་དུས་པའི་མཆི་མའང་རྒྱ་མཚོའི་ཁྱོན་ལས་མང་གསུངས་ན།
།ད་དུང་སྐྱོ་བསུན་འཇིགས་པ་མ་སྐྱེ་ཡིད་འདི་ལྕགས་ལས་བྱས་སམ་ཅི།
།ས་ཆེན་ཁྱོན་འདི་འཇིམ་པར་བྱས་ནས་དེ་ལས་ཤུག་འབྲུའི་ཆེ་ཆུང་ཙམ།
།རིལ་ལུར་བྱས་པས་རབ་ཏུ་བགྲངས་ཀྱང་སྐྱེ་བ་གཅིག་གི་མ་ཡི་ཡང་།
།ཐོགས་མའི་མཐའ་ནི་མི་མངོན་གསུངས་ན་ཐོག་མ་མེད་པ་ནས།
།སྲིད་འདིར་ཉིད་མཚམས་སྦྱར་བའི་མཐའ་ནི་གང་གིས་མངོན་ནུས་ལེགས་པར་སོམས།
།
སྡུག་བསྔལ་གསུམ་བསམ་ཚུལ་ནི།
དེ་ལྟར་སྡུག་བསྔལ་སྡུག་བསྔལ་གྱིས་ནི་ལུས་སེམས་མནར་བ་ཙམ་མ་ཟད།
།འཁོར་བའི་གནས་ན་ཟག་བཅས་ཚོར་བ་བདེ་བར་སྣང་བ་ཐམས་ཅད་ཀྱང་།
།སྡུག་བསྔལ་འགགས་ལ་བདེ་བར་སྣང་ལས་ངོ་བོ་ཉིད་ཀྱི་བདེ་མིན་ཞིང་།
།ཁྱད་པར་འདུ་བྱེད་སྡུག་བསྔལ་གྱིས་ནི་རྟག་ཏུ་ཟིན་པ་ཉིད་དུ་གསུངས།
།མདོར་ན་འདེགས་དཀའི་ཁུར་ཆེན་འཁུར་དགོས་དེ་སྲིད་བདེ་བའི་སྐབས་མེད་བཞིན།
།ཉེར་ལེན་ཕུང་འདིའང་ཇི་སྲིད་བཟུང་དགོས་དེ་སྲིད་བདེ་བའི་སྐབས་མེད་དེ།
།ཕུང་པོ་འདི་ནི་ལས་དང་ཉོན་མོངས་སྔ་མའི་གཞན་དབང་དུ་གྱུར་ཅིང་།
།ཕྱ་མའི་སྡུག་བསྔལ་ཉོན་མོངས་ཀུན་སྐྱེའི་ས་བོན་རྒྱུན་ཆགས་དང་ལྡན་པས།
།ཚེ་རབས་ཕྱི་མའི་སྐྱེ་སྲིད་དང་ནི་སྡུག་བསྔལ་ཀུན་ཀྱང་འདིས་འདྲེན་ཞིང་།
།ཚེ་འདིའི་སྐྱེ་རྒ་ན་འཆི་སོགས་ཀྱི་སྡུག་བསྔལ་ཡོངས་ཀྱི་རྟེན་དུ་གྱུར།
།སྡུག་བསྔལ་དང་ནི་འགྱུར་བའི་སྡུག་བསྔལ་ཆུ་ལས་ཆུ་བུར་ཚུལ་གྱིས་བསྐྱེད།
།གྲུབ་ཙམ་ཉིད་ནས་ལས་ཉོན་དབང་གྱུར་བདེ་མེད་སྡུག་བསྔལ་རང་བཞིན་ནོ།
།དེ་ཕྱིར་ཕུང་པོའི་སྡུག་བསྔལ་ཀུན་ཟང་ཞི་བ་མཆོག་དེ་མ་ཐོབ་ན།
།ཁམས་གསུམ་རིགས་དྲུག་གང་དུ་སྐྱེས་ཀྱང་ཚེར་མའི་དོང་དུ་གནས་པ་བཞིན།
།སྡུག་བསྔལ་གསུམ་གྱི་རང་བཞིན་ཉིད་ལས་བདེ་བའི་གོ་སྐབས་མ་མཆིས་པས།
།ད་ནི་འཁོར་བའི་བཙོན་ར་འདི་ལས་བདག་ནི་ནམ་ཞིག་ཐར་བར་འགྱུར།
།འཁོར་བའི་འཇུག་རིམ་བསམ་པ་དང་ཐར་བར་བགྲོད་པའི་ལམ་ཉམས་སུ་ལེན་ཚུལ་ནི།
དེ་ལྟར་རང་དབང་མེད་པར་རིགས་དྲུག་ཏུ། །འགལ་མེ་ལྟ་བུར་རྟག་ཏུ་རབ་འཁོར་ནས།
།སྡུག་བསྔལ་གསུམ་གྱིས་བར་མཚམས་མེད་པར་ནི། །མནར་བ་འདི་ཡི་རྒྱུ་ནི་ཅི་སྙམ་ན།
།ཐོག་མ་མེད་ནས་སྙིང་གི་ཕུག་གནས་པའི། །ང་ང་སྙམ་པའི་བདག་འཛིན་གདོན་ཆེན་འདིས།
།བདག་གཞན་རིས་སུ་བཅད་ནས་ཆགས་སྡང་བསྐྱེད།
།དེ་ཡིས་ལས་བསགས་ལས་དེས་འཁོར་བར་འཁོར། །དེ་ཕྱིར་བདག་འཛིན་དེ་ཉིད་མ་ལྡོག་ན།
།སྲིད་ལས་མི་འགྲོལ་དེ་ཡང་བདག་མེད་པར།
།རྟོགས་པའི་ཤེས་རབ་གྱིིས་ནི་བཟློག་དགོས་ཕྱིར།
།ལྷག་པའི་ཤེས་རབ་བསླབ་པ་བསྐྱེད་པར་བྱ།
།དེ་ཡང་རང་སེམས་བྱིང་རྒོད་ཀྱིས་གཡེངས་ན།
།བདག་མེད་གནས་ལུགས་ཇི་བཞིན་མི་མཐོང་བས། །གཡེང་བ་ཞི་ནས་ཟབ་མོའི་གནས་ལུགས་ལ།
། རྩེ་གཅིག་གནས་པའི་ཏིང་འཛིན་བསླབ་པ་དགོས།
།ཏིང་འཛིན་དེ་ཡང་དྲན་ཤེས་བག་ཡོད་དང་། །བྲལ་ལ་ནམ་ཡང་སྐྱེ་བ་མི་སྲིད་ཕྱིར།
།དྲན་ཤེས་བརྟན་པོས་སྒོ་གསུམ་ལེགས་སྡོམ་པའི།
།ལྷག་པའི་ཚུལ་ཁྲིམས་བསླབ་དང་ལྡན་པ་དགོས།
།དེ་ཕྱིར་གཡོ་མེད་ཏིང་འཛིན་མྱུ་གུའི་རྩེར།
།ཤེས་རབ་བསླབ་པའི་སྙེ་མ་རབ་དུད་པ།
།འཁྲུངས་པའི་ཞིང་ས་ཚུལ་ཁྲིམས་ཉིད་ཡིན་ཕྱིར།
།བསྟན་པའི་རྩ་བ་སོ་སོ་ཐར་པར་གསུངས། །དེ་བས་བདག་གི་སོ་ཐར་བསླབ་པའི་གཞིར།
།བསླབ་བྱ་མཉན་དང་སྟོན་དང་དེའི་བཅས་པར།
།གུས་པ་བསྐྱེད་དང་དྲན་ཤེས་བག་ཡོད་དང་།
།ཉོན་མོངས་སོ་སོའི་གཉེན་པོ་བསྟན་པ་སྟེ།
།ལྟུང་བ་འབྱུང་བའི་སྒོ་བཞི་ལེགས་བསྡམ་ནས།
།ཟླ་མེད་སྟོན་མཆོག་ཐུགས་རྗེ་ཅན་དེ་ཡིས། །ཇི་ལྟར་བཅས་པའི་བཀའ་ལས་མི་འདའ་བར།
།བསྒྲུབ་སྟེ་བསྟན་པའི་རྩ་བ་ཚུགས་པར་བྱ།
།དེ་ལྟར་ནུས་པར་བྱིན་གྱིས་བརླབ་ཏུ་གསོལ།
།
སྐྱེས་བུ་ཆེན་པོ་ལས་དེར་འཇུག་དགོས་པའི་རྒྱུ་མཚན་བསམ་ཚུལ་ནི།
དེ་ལྟར་བསླབ་པ་གསུམ་ལ་ལེགས་བསླབ་ན། །རང་ཉིད་སྲིད་པའི་མཚོ་ལས་གྲོལ་མོད་ཀྱང་།
། སེམས་ཅན་འཁོར་བར་མནར་ལ་མི་སེམས་པར། །རང་ཉིད་དེ་ལས་གྲོལ་ཕྱིར་བརྩོན་པ་ནི།
།མ་རྒན་བཙོན་རར་ཚུད་པ་ཡལ་བོར་ནས། །རང་ཉིད་ཅི་ཐར་བྱེད་པ་ཇི་བཞིན་དུ།
།དེ་ལས་ཁྲེལ་གཞུང་ཆུང་བ་སུ་ཞིག་ཡོད། །དེ་བས་འགྲོ་ཀུན་བདག་གིས་སྒྲོལ་བར་བྱ།
།
སེམས་སྙོམས་པ་བསྒྲུབ་ཚུལ་ནི།
དེ་ཡང་ད་ལྟ་འགྲོ་བ་འདི་དག་ཀུན།
།དགྲ་གཉེན་བར་མར་སྣང་ཞིང་དེར་ཞེན་ཏེ། །དགྲ་ལ་སྡང་དང་གཉེན་ལ་ཆགས་པ་དང་།
།བར་མའི་འགྲོ་ལ་བཏང་སྙོམས་སྐྱེ་མོད་ཀྱང་། །ད་ལྟ་དགྲ་རུ་སྣང་བ་འདི་དག་གིས།
།སྔོན་ཚེ་ལན་གྲངས་མང་དུ་མ་བྱས་ཏེ། །འོ་མས་གསོས་ཤིང་བརྩེ་བས་བསྐྱངས་པ་སོགས།
།ཕན་པ་བསྒྲུབ་ཅིང་གནོད་པ་ཀུན་ལས་སྐྱོབ། །ད་ལྟ་གཉེན་དུ་སྣང་བ་འདི་ཀུན་ཀྱང་།
།སྔོན་ཚེ་དགྲ་ཡི་དྭང་མར་གྱུར་ནས་ནི། །གསོད་དང་བརྡེགས་དང་གསོན་པོར་ཟ་བ་དང་།
།ལན་གྲངས་དུ་མར་བྱས་པ་ཉིད་དུ་གསུངས། །ད་ལྟ་བར་མར་སྣང་བ་འདི་དག་ཀྱང་།
།ཚེ་རབས་དུ་མར་དགྲ་གཉེན་སྣ་ཚོགས་སུ། །གྱུར་ནས་ཁྲོ་བས་གནོད་པ་བསྐྱལ་པ་དང་།
།བརྩེ་བས་ཕན་བཏགས་པ་ཡང་བགྲངས་མཐའ་ཡས། །དེ་ཕྱིར་འགྲོ་བ་འདི་དག་ཐམས་ཅད་ནི།
།གང་ལ་ཆགས་ཤིང་གང་ལ་སྡང་བར་བྱ། །ད་ནི་ཆགས་སྡང་རིས་སུ་མི་གཅོད་པར།
།ཐམས་ཅད་རང་གི་གཉེན་དུ་སེམས་སྙོམས་བགྱི།
།གལ་ཏེ་དགྲ་གཉེན་ངེས་པ་མེད་པའི་ཕྱིར། །གནོད་པ་བྱ་དང་ཕན་པ་སྒྲུབ་པ་ནི།
།གང་ཡང་མི་རིགས་བཏང་སྙོམས་སུ་སྡོད་པ། །རིགས་སོ་སྙམ་ན་དེ་ནི་རིགས་མིན་ཏེ།
།སྔོན་ཚེ་དགྲར་གྱུར་ཀུན་ནས་འཚེ་བ་ནི། །ཕ་མར་མ་ཤེས་འཁྲུལ་པས་ཁྲོ་མི་རིགས།
།སྔོན་ཚེ་གཉེར་གྱུར་ཕན་པ་བསྒྲུབ་པ་ནི། །དོན་ལ་གནས་ཕྱིར་ཕན་ལན་ཅིས་མི་བྱ།
།
མར་ཤེས་སྒོམ་ཚུལ་ནི།
འོ་ན་སེམས་ཅན་ཐམས་ཅད་དོན་དུ་ན།
།རང་གི་མ་རུ་གྱུར་བ་ཅི་ཞེ་ན། །རང་གི་སྐྱེ་བའི་ཐོག་མའི་མཐའ་མེད་པར།
།གྲངས་མཐའ་མི་མངོན་ལུས་བླངས་དེ་ཕྱིར་རོ། །གལ་ཏེ་སེམས་ཅན་མཐའ་ཡས་དེ་ཡི་ཕྱིར།
།ཐམས་ཅད་རང་གི་མར་གྱུར་མི་འཐད་དོ། །སྙམ་ན་འཐད་དེ་སེམས་ཅན་གྲངས་མེད་བཞིན།
།རང་གི་སྐྱེ་བའང་བགྲངས་མཐའ་མེད་པས་སོ། །དེ་ཡི་རྒྱུ་མཚན་སེམས་འདི་འདི་ཙམ་ནས།
།གྲུབ་ཅེས་ཐོག་མཐའ་བསྟན་དུ་མེད་པའི་ཕྱིར།
།ལུས་བླངས་པ་ཡི་མཐའ་ཡང་མི་མངོན་ལ།
།དེ་ཚེ་དྲོད་གཤེར་སྐྱེས་དང་རྫུས་སྐྱེས་སུ།
།སྐྱེ་བར་གྱུར་པའི་སྐབས་རྣམས་མ་གཏོགས་པ།
།མངལ་སྐྱེས་སྒོང་སྐྱེས་གང་དུ་ལུས་བླངས་ཀྱང་།
།ཕ་དང་མ་རེ་ངེས་པར་དགོས་པའི་ཕྱིར། །ཐམས་ཅད་རང་གི་མ་རུ་རིགས་པས་འགྲུབ།
།ཀུན་མཁྱེན་རྫུན་མི་གསུང་བ་དེ་ཡིས་ཀྱང་།
།འཁོར་བར་འཁྱམས་པའི་འགྲོ་བ་ཐམས་ཅད་ཀྱིས།
།སྔོན་ཆད་གནས་འདིར་མ་སྐྱེས་ཞེས་བྱ་དང་། །ལུས་ནི་འདི་འདྲ་བ་ཞིག་མ་བླངས་དང་།
།ཕན་ཚུན་ཕ་མ་སྤུན་ཟླ་གཉེན་བཤེས་སུ། །གྱུར་མ་མྱོང་བ་ང་ཡི་མ་མཐོང་ཞེས།
།གསུངས་ཕྱིར་ལུང་གིས་གྲུབ་པ་དེ་བས་ན། །འགྲོ་བ་འདི་ཀུན་བདག་གི་མར་གྱུར་ཏོ།
།རྒྱུ་མཚན་དེས་ན་ཚེ་འདིའི་ཕ་མ་ཡང་། །ཤི་ནས་ངོ་མི་ཤེས་ལྟར་འགྲོ་ཀུན་ཀྱང་།
།སྐྱེ་ཤི་འཕོས་པས་ངོ་མ་ཤེས་མ་གཏོགས། །དོན་དུ་དྲིན་གྱིས་བསྐྱངས་པའི་མ་ཤ་སྟག།
།
དྲིན་དྲན་སྒོམ་ཚུལ་ནི།
འོ་ན་དྲིན་གྱིས་ཇི་ལྟར་བསྐྱངས་སྙམ་ན།
།དེ་ཡང་ཚེ་འདིའི་མ་རྒན་འདི་ཉིད་ཀྱིས། །དང་པོ་ཁོག་ཏུ་ཟླ་དགུ་ངོ་བཅུའི་བར།
།ཇི་ལྟར་ལག་ན་རིན་ཆེན་སྣོད་ཐོགས་ལྟར།
།འགྲོ་འཆག་ཉལ་འདུག་སྤྱོད་ལམ་ཐམས་ཅད་དུ། །བདག་ལ་གནོད་དོགས་བག་ཟོན་ཆེན་པོདང་།
།བཟའ་བཏུང་སོགས་ཀྱང་གང་དགའ་བྱར་མེད་པར།
།ཕན་རྣམས་བསྟེན་ཅིང་གནོད་རྣམས་འབད་ནས་སྤོང་།
།དེ་ནས་བཙས་ཚེ་སྡུག་བསྔལ་བཟོད་དཀའ་བས། །མནར་ཡང་རང་གི་སྡུག་བསྔལ་མི་སེམས་པར།
།ཡིད་བཞིན་ནོར་བུ་རྙེད་པ་ཇི་ལྟར་བར། །གཅེས་པར་བཟུང་བས་ཐོག་མར་དྲིན་དུ་ཆེ།
།བཙས་པར་གྱུར་ནས་བ་སྤུ་ཟིང་ངེ་བ། །རང་གི་མི་གཙང་དོར་བའང་མི་ཤེས་ཤིང་།
།ཕན་དང་གནོད་པ་ཕྲ་མོའང་མི་ཤེས་པ། །དེ་ཉིད་འབད་པ་དུ་མས་གསོ་བར་བྱེད།
།དེ་ཡང་ལུས་བཅུད་འོ་མ་ལྡུད་བྱེད་ཅིང་།
།ཤ་ཡི་དྲོད་བཅར་འཇམ་པའི་གོས་ཀྱིས་སྒྲིལ།
།འགྲོ་ཚེ་རྒྱབ་དང་འདུག་ཚེ་པང་དུ་ཁུར།
།ལྕེ་ཡི་ཟས་བསྙོད་བསྣབས་ཀྱང་ཁ་ཡིས་ཕྱིས། །མི་གཙང་བ་ཡང་ལག་པས་སེལ་བྱེད་ཅིང་།
།ང་ཡི་བུ་ཞེས་སོར་མོ་བཅུ་ཡིས་གཡེང་།
།བརྩེ་སེམས་ཀྱིས་བསྐྱངས་བྱམས་པའི་མིག་གིས་བལྟས།།སྙན་པའི་མིང་ནས་བོས་ཤིང་འཛུམ་གྱིས་བསུས།
།མེ་ཆུ་གཡང་སའི་འཇིགས་པ་ལས་སྐྱོབ་ཅིང་། །བདག་ནི་ན་ལས་མ་རང་ན་བ་དང་།
།བདག་ནི་ཤི་ལས་མ་རང་ཤི་དགའ་སོགས། །སྙིང་ནས་བྱེད་པས་བར་དུ་དྲིན་རེ་ཆེ།
།དེ་ནས་རིམ་གྱིས་ན་རུ་སོན་པའི་ཚེ།
།ཟ་ལུགས་ཐུང་ལུགས་འགྲོ་ལུགས་སྡོད་ལུགས་སློབ།
།འཁྱགས་དུས་གོས་དང་བཀྲེས་དུས་ཟས་སྐོམ་བྱིན།
།སྡིག་སྡུག་གིས་བསྒྲུབ་ནོར་་རྫས་རང་གིས་ཀྱང་།
།སྤྱོད་མི་ཕོད་པ་ཀུན་ཀྱང་འཕང་མེད་དུ། །བདག་ལ་སྦྱིན་སོགས་ཐ་མར་དྲིན་ཆེ་ཞིང་།
།ཚེ་འདི་ཁོ་ནར་མ་ཟད་ཚེ་རབས་གཞན། །མང་པོར་ཡང་ནི་དེ་ལྟར་དྲིན་གྱིས་བསྐྱངས།
།འདི་ཡིས་ཇི་ལྟར་དྲིན་གྱིས་བསྐྱངས་པ་བཞིན།
།རྒྱུད་ལྔའི་འགྲོ་བ་འདི་དག་ཀུན་གྱིས་ཀྱང་།
།མི་རུ་གྱུར་བའི་གནས་སྐབས་ཐམས་ཅད་དུ།
།དེ་དེ་བཞིན་དུ་ཡང་ཡང་དྲིན་གྱིས་བསྐྱངས།
།མི་ལས་གཞན་པའི་མངལ་སྐྱེས་སྒོང་སྐྱེས་ཀྱི།
།སྐྱེ་བར་གྱུར་པའི་སྐབས་ནའང་འདི་བདག་གིས།
།རང་གི་ཤེས་ཚོད་ནུས་ཚོད་དང་བསྟུན་པའི།
།གནོད་སེལ་ཕན་པ་སྒྲུབ་པའང་དཔག་ཏུ་མེད། །
