ལྷ་རམས་པ་དགེ་བཤེས་དགེ་འདུན་མཐར་ཕྱིན་གྱི་དྲ་རྒྱ།
ཆོས་ཀྱི་སྦྱིན་པ་ནི་སྦྱིན་པའི་མཆོག་ཡིན།
བོད་ཀྱི་ལྟ་གྲུབ།
༆ བོད་ཀྱི་དམ་པའི་ཆོས་ནི་རྒྱ་གར་ནས་ཁ་ཆེའི་ཡུལ་གྱི་སྔགས་འཆང་གུ་རུ་པདྨ་སམ་བྷ་བ་དང་ནལེནྡྲ་ནས་ཕེབས་པའི་མཁན་ཆེན་ཞི་བ་འཚོ་དང་བྷེང་གྷ་ལིའི་སློབ་དཔོན་དཔལ་ལྡན་ཨ་ཏི་ཤ་སོགས་བོད་ནང་དངོས་སུ་ཕེབས་པ་དང་། ཡང་མར་པ་ལོ་ཙྭ་བ་བརྒྱུད་གྲུབ་ཆེན་ཏི་ལོ་པ་དང་ན་རོ་པ་དང་མཻ་ཀྲི་པ་སོགས་ཀྱི་གདམ་པ་དང་། གཞན་ཡང་བོད་ཀྱི་ལོ་ཙྭ་བ་ལོ་ཆེན་བྷེ་རོ་ཙ་ན་དང་ཀ་ཅོག་ཞང་གསུམ་དང་ལོ་ཆེན་རིན་ཆེན་བཟང་པོ་སོགས་ཁག་གཅིག་རྒྱ་གར་ནལེནྡྲར་བསླབ་གཉེར་དུ་ཕེབས་ནས་བླངས་པའི་གདམ་པ་བཅས་ལས་བྱུང་བ་ཞིག་ཡིན། ཆོས་ཀྱི་བརྒྱུད་རིམ་རྣམས་ཕྱལ་སྲོལ་གྱི་རྒྱུད་པའི་གསོལ་འདེབས་ཁག་ལས་ཤེས་ཐུབ། དེ་ལྟར་བསྟན་པ་སྔ་དར་དང་ཕྱི་དར་སོགས་དུས་སྐབས་སོ་སོར་བོད་ནང་ཐེག་པ་གསུམ་སྔགས་དང་བཅས་པ་དང་རྒྱ་གར་གྱི་ནང་པའི་གྲུབ་མཐའ་བཞི་བཅས་ཀྱི་་གདམ་པའི་རྒྱུན་དུས་ད་ལྟའི་བར་གནས་མུས་རེད། རིམ་པས་མཁས་པ་སོ་སོའི་རྒྱུད་རིམ་གྱི་ཕྱག་སྲོལ་འདྲ་མིན་ལ་བརྟེན་ནས་བོད་ནང་དམ་པའི་ཆོས་ཀྱི་ལུགས་སྲོལ་ཆེ་བ་བཞི་སྟེ་སྙིང་མ་དང་བཀའ་རྒྱུད་དང་ས་སྐྱ་དང་དགེ་ལུགས་བཅས་དང་དེ་དག་གི་ནང་ཁུལ་དུ་ཡང་ཚན་པ་དུ་མ་ཡོད། དེ་དག་དབར་གྱི་ཁྱད་པར་ནི་ཨིན་སྐད་དུ་ (same, same, but different) ཟེར་བ་ལྟར་ནང་དོན་གཅིག་ཡིན་རུང་མི་འདྲ་བའི་ཁྱད་པར་ཡང་ཡོད།
མདོར་ན་སྐབས་འདིར་བརྗོད་པར་འདོད་པ་ཞིག་ནི་མི་ལོ་སྟོང་ལས་ལྷག་པ་བོད་པས་ནང་པའི་ལྟ་གྲུབ་ལ་སྦྱོང་དར་བྱས་པའི་མཐའ་མའི་གྲུབ་དོན་ཨིན་སྐད་དུ་ "Thesis" འདྲ་བ་གང་ཞིག་རྣམ་དཔྱོད་གསར་པ་གང་ཞིག་བསྐྲུན་ཐུབ་ཡོད་དམ་ཞེས་པ་འདི་དུས་རབས་ཀྱི་དྲི་པ་གནད་དོན་ཅན་ཞིག་རེད། དཔེར་ན། མགོན་པ་ཀླུ་སྒྲུབ་ཀྱིས་ཡུམ་གྱི་མདོ་དོན་དབུ་མའི་ལམ་དུ་སྲོལ་གཏོད་པར་མཛད་པ་དང་། ཟླ་བ་གྲགས་པས་ཡུམ་གྱི་མདོ་དོན་དབུ་མ་ཐལ་འགྱུར་བར་སྤྲོས་པ་དང་། ལེགས་ལྡན་འབྱེད་ཀྱིས་ཡུམ་གྱི་མདོ་དོན་དབུ་རང་རྒྱུད་པར་སྤྲོས་པ་དང་། སློབ་དཔོན་ཐོག་མེད་ཀྱིས་མདོ་དོན་སེམས་ཙམ་པའི་ལྟ་བར་གསལ་བ་སོགས་རྒྱ་གར་ལྟ་གྲུབ་མཁས་པས་ཐུབ་པའི་དགོངས་པ་རང་རང་གི་ལྟ་གྲུབ་སྣ་ཚོགས་སུ་སྲོལ་གཏོད་པ་ལྟར། བོད་ཀྱི་མཁས་པས་ཐུབ་པའི་དགོངས་པ་བོད་རང་གི་ལྟ་གྲུབ་གང་ཞིག་དུ་སྲོལ་གཏོད་པ་བྱུང་ཡོད་དམ། དེ་མིན་སྔར་གྱི་རྒྱ་གར་གྱི་ལྟ་གྲུབ་སྙིང་པ་དེ་དག་བོད་སྐད་ཐོག་དུས་རབས་ནས་དུས་རབས་སྐྱར་བཟློས་ཡང་བཟློས་བྱས་ནས་བོད་རང་གི་ལྟ་གྲུབ་གང་ཡང་མེད་པར་ཇི་སྲིད་ནམ་གནས་བར་དུ་གནས་རྒྱུ་ཡིན་ནམ།། །།
བོད་རང་གི་ལྟ་གྲུབ་མེད་པ་དང་། བོད་ཀྱི་ངོ་བོ་མཚོན་བྱེད་ཀྱི་རིག་གཞུང་ཐུན་མོང་མ་ཡིན་པ་ཞིག་མེད་པ་ནི་བོད་མི་རིགས་ཀྱི་འདས་པའི་ལོ་རྒྱུས་ཀྱི་སྟོང་ཆ་ཆེ་ཤོས་ལྷག་པ་དེ་ཡིན་པར་མངོན་ནོ།།
