Tuesday, 4 March 2025

༄༅། །གནད་ཀྱི་གདམས་ངག་གསུམ་ཚན་གསུམ་བཞུགས།

༄༅། །གནད་ཀྱི་གདམས་ངག་གསུམ་ཚན་གསུམ་བཞུགས།

ན་མོ་བུདྡྷཱ་ཡ། 

སྡིག་པ་ཆུང་ཡང་དུག་བཞིན་བསྲུང་། །

དཀའ་ཡང་དགེ་བ་འབད་པས་བསྒྲུབ། །

རྩ་བ་བདག་འཛིན་རྣམ་རྟོག་གཞོམ། །

འདི་གསུམ་ལྡན་ན་མཁས་པ་ལགས། །

གཞན་གྱི་སྡིག་སྡུག་བདག་གིས་བླང་། །

བདག་གི་དགེ་བདེ་གཞན་ལ་གཏང་། །

སྟོང་ཉིད་སྙིང་རྗེ་རྟག་ཏུ་བསྒོམ། །

འདི་གསུམ་ལྡན་ན་བྱང་སེམས་ལགས། །

ཅིར་སྣང་སྒྱུ་མ་ལྷ་སྐུར་ཤེས། །

དྲན་རིག་བདེ་གསལ་མི་རྟོག་པ། །

བྱིན་རླབས་བླ་མའི་རྣལ་འབྱོར་བསྒོམ། །

འདི་གསུམ་ལྡན་ན་སྔགས་པ་ལགས། །

གནད་ཀྱི་གདམས་ངག་གསུམ་ཚན་གསུམ་འདི་ནི་ཆོས་རྗེ་ཐམས་ཅད་མཁྱེན་པ་བུ་སྟོན་རིན་པོ་ཆེས། དྭགས་པོ་རིན་ཆེན་ལ་གནང་བའི་གདམས་པ་ཡིན་ནོ།། །།

༄༅། །ལམ་གྱི་ཆོས་མཆོག་ཉེར་གཅིག


 

༄༅། །ལམ་གྱི་ཆོས་མཆོག་ཉེར་གཅིག

ཁུ་རྔོག་འབྲོམ་གསུམ་གྱིས། ཇོ་བོ་ལ།
ལམ་གྱི་ཆོས་ཐམས་ཅད་ཀྱི་མཆོག་གང་ལགས་ཞུས་པས།
ཇོ་བོའི་ཞལ་ནས།

མཁས་པའི་མཆོག་བདག་མེད་ཀྱི་དོན་རྟོགས་པ་ཡིན།
བཙུན་པའི་མཆོག་སེམས་རྒྱུད་ཐུལ་བ་ཡིན།
ཡོན་ཏན་གྱི་མཆོག་ཕན་སེམས་ཆེ་བ་ཡིན།
གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན།
གཉེན་པོའི་མཆོག་གང་ཡང་རང་བཞིན་མེད་པར་ཤེས་པ་ཡིན།
སྤྱོད་པའི་མཆོག་འཇིག་རྟེན་དང་མི་མཐུན་པ་ཡིན།
དངོས་གྲུབ་ཀྱི་མཆོག་ཉོན་མོངས་པ་ཇེ་ཆུང་ལ་སོང་བ་ཡིན།
གྲུབ་རྟགས་ཀྱི་མཆོག་འདོད་པ་ཇེ་ཆུང་ལ་སོང་བ་ཡིན།
སྦྱིན་པའི་མཆོག་མ་ཆགས་པ་ཡིན།
ཚུལ་ཁྲིམས་ཀྱི་མཆོག་སེམས་ཞི་བ་ཡིན།
བཟོད་པའི་མཆོག་དམན་ས་བཟུང་བ་ཡིན།
བརྩོན་འགྲུས་ཀྱི་མཆོག་བྱ་བ་ཐོངས་པ་ཡིན།
བསམ་གཏན་གྱི་མཆོག་བློ་མ་བཅོས་པ་ཡིན།
ཤེས་རབ་ཀྱི་མཆོག་གང་ལ་ཡང་ངར་འཛིན་མེད་པ་ཡིན།
དགེ་བའི་བཤེས་གཉེན་གྱི་མཆོག་འཚང་ལ་རྒོལ་བ་ཡིན།
གདམས་ངག་གི་མཆོག་འཚང་ཐོག་ཏུ་འབེབས་པ་ཡིན།
གྲོགས་ཀྱི་མཆོག་དྲན་པ་དང་ཤེས་བཞིན་ཡིན།
བསྐུལ་མའི་མཆོག་དགྲ་བགེགས་དང་ན་ཚ་སྡུག་བསྔལ་ཡིན།
ཐབས་ཀྱི་མཆོག་བཅས་བཅོས་མེད་པ་ཡིན།
ཕན་བཏགས་བའི་མཆོག་ཆོས་ལ་བཙུད་པ་ཡིན།
ཕན་ཐོགས་པའི་མཆོག་ཆོས་ལ་བློ་སྣ་འགྱུར་བ་ཡིན།

ཞེས་གསུངས་སོ། །