༆ འབྲོམ་རིན་པོ་ཆེའི་ཞབས་དྲུང་དུ་སྐུ་མཆེད་གསུམ་འཚོགས་ནས་འབྲོམ་རིན་པོ་ཆེ་ཞིང་གཤེགས་ཀྱི་བར་དུ་འབྲལ་མེད་དུ་བཞུགས་ཀྱང་ཇོ་བོ་ཡབ་སྲས་ཀྱི་གསང་བའི་ཆོས་རྫོགས་པར་མངའ་བ་ནི་ཕུ་ཆུང་བ་ཉིད་ཡིན་ཏེ། འབྲོམ་རིན་པོ་ཆེའི་ཞལ་ནས་ཀྱང༌། ཚུལ་ཁྲིམས་འབར་བ་རིན་ཆེན་འོད་གསལ་བ། །རིན་ཆེན་གསལ་བས་ཚུལ་ཁྲིམས་རྒྱན་མཛེས་པ། །ང་ཡི་རྣམ་ཐར་མི་ནུབ་སྐྱོང་བར་མཛོད། །གཞོན་ནུ་རྒྱལ་མཚན་ང་དང་གཉིས་སུ་མེད། །ཐུགས་རྗེ་ཆེན་པོ་ཀུན་ཏུ་སྦས་པའི་བུ། །འཇིག་རྟེན་ཁམས་རྣམས་རྒྱལ་མཚན་འདི་ཡིས་གང༌། །པདྨའི་སུལ་རྣམས་གཞོན་ནུ་འདི་ཡིས་བརྒྱན། །ཅེས་གསུངས་ཏེ་ལེགས་པར་བསྔགས་པའི་སེམས་དཔའ་ཆེན་པོ་འདིས་ཇོ་བོ་ཡབ་སྲས་ཀྱི་གསང་ཆོས་བཀའ་གདམས་ཐིག་ལེ་བཅུ་དྲུག་གི་དབང་དང་གདམས་ངག་ཇི་ལྟར་གསན་པ་དང༌། ཉམས་ལེན་ཇི་ལྟར་མཛད་པ་དང༌། བདག་ཉིད་ཆེན་པོ་འདིའི་ཕྱག་ཏུ་སྤྲུལ་པའི་གླེགས་བམ་ཇི་ལྟར་བྱུང་ཚུལ་སོགས་ལོ་རྒྱུས་རྣམ་ཐར་ཅུང་ཟད་བརྗོད་ན། ཇོ་བོ་ཡབ་སྲས་གཉིས་ཡེར་པ་ལྷ་རི་སྙིང་པོའི་མགུལ་ན་བཞུགས་དུས་མདོ་སྔགས་གསུང་རབ་དགོངས་འགྲེལ་དང་བཅས་པ་ཐམས་ཅད་ཀྱི་སྙིང་པོའི་དོན་བྱང་ཆུབ་ལམ་གྱི་རིམ་པའི་གནད་རྣམས་ལ་བཀའ་བགྲོ་བར་མཛད་པའི་ཚེ་རྒྱུད་པ་གསུམ་གྱི་བླ་མ་གོང་མ་ཐམས་ཅད་ཀྱང་དངོས་སུ་བྱོན་ཏེ་ཞལ་འཛོམ། མགོན་པོ་སྤྱན་རས་གཟིགས་དང་རྗེ་བཙུན་མ་སྒྲོལ་མ་སོགས་ལྷག་པའི་ལྷ་རྣམས་ཀྱིས་ཀྱང་དངོས་སུ་ཞལ་བསྟན། དེའི་ཚེ་མགོན་པོ་གསེར་གླིང་པས་བྱང་ཆུབ་ལམ་གྱི་རིམ་པའི་སྙིང་པོ་དང་སྲོག་ཤིང་དང་ལམ་གྱི་རྩ་བ་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང༌། སྐྱེས་ཟིན་གོང་ནས་གོང་དུ་སྤེལ་བ་དང༌། ཉམས་ལེན་མཐར་ཕྱིན་པར་བྱེད་པ་ལ་སྙིང་རྗེའི་ལྷ་མགོན་པོ་སྤྱན་རས་གཟིགས་ལྷག་པའི་ལྷར་བསྟེན་ནས་གསོལ་བ་གདབ་དགོས་པ་དང༌། མགོན་པོ་སྤྱན་རས་གཟིགས་ཀྱི་སྐུའི་བཀོད་པ་བསམ་གྱིས་མི་ཁྱབ་པ་ཐིག་ལེ་བཅུ་དྲུག་གི་མན་ངག་ལས་འབྱུང་བ་ལྟར་ཡོད་ཚུལ་རྣམས་གསུངས། རྗེ་བཙུན་མ་སྒྲོལ་མས་ཀྱང་གསུང་རབ་དགོངས་འགྲེལ་དང་བཅས་པ་ཐམས་ཅད་སྐྱབས་གནས་བླ་མ་རྗེས་དྲན། རང་ལུས་ལྷ་སྐུར་རྗེས་དྲན། ངག་བཟླས་བརྗོད་དུ་རྗེས་དྲན། འགྲོ་ཀུན་ཕ་མར་རྗེས་དྲན། གནས་ལུགས་སྟོང་པ་རྗེས་དྲན་ཏེ་རྗེས་དྲན་ལྔར་བསྡུས་ནས་ཉམས་སུ་ལེན་ཚུལ་རྒྱས་པར་གསུངས་ཏེ། དེ་ནི་ཐིག་ལེ་བཅུ་དྲུག་གི་གདམས་ངག་འདིའི་ཉམས་ལེན་བྱ་ཚུལ་ཉིད་དོ།། །།
ཇོ་བོ་རྗེ་ཨ་ཏི་ཤ་ནས་བརྒྱུད་པའི་བཀའ་གདམས་ཐིག་ལེ་བཅུ་དྲུག་གི་དབང་སྟེ། གྲུབ་མཐའ་རིས་མེད་ལ་དར་ཆེ་ཞིང་། དབང་གི་ཆོ་ག་ནི། དགེ་ལུགས་ཕྱོགས་ཏཱ་ལའི་བླ་མ་སྐུ་ཕྲེང་ལྔ་པ་ཆེན་པོས་མཛད་པའི《བཀའ་གདམས་ཐིག་ལེ་བཅུ་དྲུག་གི་རྒྱུན་ཁྱེར་དབང་ཁྲིད་ཀྱི་ལེགས་བཤད་དགོངས་རྒྱན》ཤོག་གྲངས༡༦(གསུང་འབུམ་པོད[ཐ]པའི་ནང་དུ་ཡོད)འཇམ་དབྱངས་བདེ་བའི་རྡོ་རྗེས་མཛད་པའི《བཀའ་གདམས་ཐིག་ལེ་བཅུ་དྲུག་གི་སྒྲུབ་དཀྱིལ་ལེགས་བཤད་སྒྲོན་མེ》ཤོག་གྲངས༢༦(གསུང་འབུམ་ནང་དུ་ཡོད)ཡོངས་འཛིན་ཡེ་ཤེས་རྒྱལ་མཚན་གྱིས་མཛད་པའི《བཀའ་གདམས་ཐིག་ལེ་བཅུ་དྲུག་གི་ཆོ་ག་ངག་འདོན་གྱི་རིམ་པར་བསྒྲིགས་པ》ཤོག་གྲངས༢༨(གསུང་འབུམ་པོད[ད]པའི་ནང་དུ་ཡོད)དེས་མཛད་པའི《བཀའ་གདམས་ཐིག་ལེ་བཅུ་དྲུག་གི་དཀྱིལ་ཆོག་བཀའ་གདམས་གསལ་བྱེད》ཤོག་གྲངས་༡༠༠(གསུང་འབུམ་པོད[ཙ]པའི་ནང་དུ་ཡོད)བཅས་གང་རུང་གི་སྟེང་ནས་གནང་གི་ཡོད། གྲུབ་མཐའ་གཞན་ཕྱོགས་ལ། འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་མཛད་པའི《བཀའ་གདམས་ཐིག་ལེ་བཅུ་དྲུག་གི་སྒྲུབ་དཀྱིལ་དབང་ཆོག་དང་བཅས་པ་ཐུགས་རྗེ་རྣམ་པར་རོལ་པའི་རྒྱན》ཤོག་གྲངས༢༠གསང་བདག་བློ་གཏེར་དབང་པོས་ཕྱོགས་བསྒྲིགས་མཛད་པའི《རྒྱུད་སྡེ་རབ་འབྱམས་ཀྱི་སྨིན་གྲོལ་ཀུན་བཏུས》པོད[ཟ]པའི་ནང་དུ་བཞུགས་པ་དེའི་སྟེང་ནས་གནང་སྲོལ་འདུགབཀའ་གདམས་ཐིག་ལེ་བཅུ་དྲུག་གི་ཉམས་ལེན་ནི་རྗེས་དྲན་ལྔ་སྟེ། ༡བླ་མ་རྗེས་སུ་དྲན་པའི་བླ་མའི་རྣལ་འབྱོར། ༢ལུས་ལྷའི་རང་བཞིན་དུ་སྒོམ་པ། ༣ངག་ལ་སྔགས་ཀྱི་བཟླས་བརྗོད་དང་མ་བྲལ་བ། ༤སེམས་ཀྱི་གནས་ལུགས་སྟོང་པ་ཉིད་དུ་སྒོམ་པ་དང་། བྱམས་སྙིང་རྗེ་སྒོམ་པ། ༥དགེ་རྩ་རྫོགས་བྱང་དུ་བསྔོ་བ་བཅས་ཡིན་པས་མདོ་སྔགས་ཟུང་འབྲེལ་གྱི་ཉམས་ལེན་ཡིན། (དགེ་ལུགས་པའི་དྲ་བ་ནས)
