༄༅། །དཔལ་གསང་བ་འདུས་པའི་སྒྲུབ་ཐབས་ཀྱི་ལྷན་ཐབས་སོ། །
༄༅༅། །སངས་རྒྱས་ཐམས་ཅད་གཅིག་བསྡུས་པ། །བླ་མའི་ཞབས་ལ་ཕྱག་འཚལ་ནས། །རྡོ་རྗེ་འཆང་དབང་མཉེས་བྱེད་པའི། །སྒྲུབ་ཐབས་ཆོ་གའི་བརྗོད་ཚུལ་བཤད། །
དཔལ་གསང་བ་འདུས་པ་ལྷ་སུམ་ཅུ་རྩ་གཉིས་ཀྱི་སྒྲུབ་པའི་ཐབས། བདག་གི་བླ་མ་རྡོ་རྗེ་འཆང་དེ་ཉིད་ཀྱི་ཞལ་སྔ་ནས་མཛད་པ་རྣལ་འབྱོར་དག་པའི་རིམ་པའི་ཆོ་ག་ངག་ཏུ་འདོན་པའི་ཚེ་བརྗོད་ཚུལ་མཐའ་གཅིག་ཏུ་ངེས་པར་བྱ་བ་ནི་འདི་ལྟར་ཤེས་པར་བྱའོ། །
དང་པོར་ཡིད་དང་མཐུན་པའི་གནས་སུ་བྲིས་སྐུ་དང་མཆོད་རྫས། གཏོར་མ་ནང་མཆོད་རྡོར་དྲིལ་ལ་སོགས་པ་རྣམས་ཆོགས་པར་བྱས་ཏེ། སྒྲུབ་པ་པོ་རྣམས་རིམ་པ་ཇི་ལྟ་བར་འཁོད་ནས། སྒྲུབ་པ་པོའི་མདུན་དུ་ཆུ་གཉིས་སྔོན་དུ་འགྲོ་བའི་མཆོད་པ་ཉེར་སྤྱོད་ལྔ་རང་གི་གཡས་ནས་བརྩམས་ཏེ་དགོད་ཅིང༌། ནང་མཆོད་གཡོན། དྲིལ་བུ་གཡས། རྡོ་རྗེ་གཡོན་དུ་བཤམ། དམའ་བའི་ཕྱོགས་སུ་སྔོན་འགྲོ་གཏོར་མ་དང༌། ཕྱོགས་སྐྱོང་ལ་འབུལ་བའི་ཆུ་བཞི་སྔོན་དུ་འགྲོ་བའི་ཉེར་སྤྱོད་རྣམས་ཕྱོགས་སྐྱོང་གི་གཡས་རང་གི་གཡོན་ནས་བརྩམས་ཏེ་བཤམས།
དེ་ནས་ལས་ཀྱི་རྡོ་རྗེས་ཕྱག་བཙལ། ནང་མཆོད་བྱིན་རླབས་མཛད་པར་ཞུ། ཞེས་བརྗོད་ནས་ཆོ་ག་ལ་འཇུག་པ་ནི།
རང་ཉིད་ཞེ་སྡང་རྡོ་རྗེ་མཐིང་ནག ། ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པད་མ། གཡོན་དྲིལ་བུ་རིན་ཆེན་རལ་གྲི་འཛིན་པ་རང་དང་འདྲ་བའི་རེག་བྱ་རྡོ་རྗེ་མས་འཁྱུད་པ། གཉིས་ཀའང་རིན་པོ་ཆེའི་རྒྱན་བརྒྱད་ཀྱིས་བརྒྱན་པ། སྐུ་སྟོད་ལྷ་རྫས་ཀྱི་གོས་ཀྱི་ག་ཤལ་བྱས་ཤིང༌། སྐུ་སྨད་ལྷ་རྫས་ཀྱི་དར་གྱི་ཤམ་ཐབས་འཕྱར་(བར་གྱུར།)
ཨོཾ་ཨཱཿབིགྷྣནྟ་ཀྲིཏ་ཧཱུཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། སྟོང་བར་གྱུར། སྟོང་བའི་ངང་ལས་ཧཱུཾ་ཡཾ་ཧཱུཾ་གི་ཡཾ་སྔོ་སྐྱ་ལས་བྱུང་བའི་རླུང་གི་དཀྱིལ་འཁོར་ལྗང་སྔོན་ཟླ་གཾ། (ཞེས་པ་ནས།) ཨོཾ་ཨཱཿཧཱུཾ། (ལན་བདུན་བརྗོད་པའི་བར་གྱིས་ནང་མཆོད་འོག་ནས་འབྱུང་བ་ལྟར་བྱིན་གྱིས་བརླབས།
ཡང་ཕྱག་འཚལ།) སྔོན་འགྲོ་གཏོར་མའི་བྱིན་རླབས་མཛད་པར་ཞུ། (ཞེས་བརྗོད་ནས་ཐོག་མར་སྔོན་འགྲོའི་མཆོད་པ་བྱིན་གྱིས་བརླབ་པ་ནི༌།) ཨོཾ་ཨཱཿབིགྷྣནྟ་ཀྲིཏ་ཧཱུཾ། ཨོཾ་ཤཱུ་ནྱ་ཏཱ། (ཞེས་པ་ནས།) ཧཾ། སྟོང་བར་གྱུར། སྟོང་བའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨཾ་པཱཾ་པུཾ་ལ་སོགས་པ་སོ་སོའི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་མཆོད་ཡོན། ཞབས་བསིལ། ཞལ་བསིལ། བསང་གཏོར། མེ་ཏོག བདུག་སྤོས། མར་མེ། དྲི། ཞལ་ཟས། རོལ་མོ་རྣམས་རང་བཞིན་སྟོང་བ་རྣམ་པ་མཆོད་རྫས། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ཨོཾ་ཨརྒྷཾ་ཨཱཿཧཱུཾ། (ཞེས་པ་ནས།) ཨོཾ་ཤཔྟ་ཨཱཿཧཱུཾ། (ཞེས་པའི་བར་གྱིས་བྱིན་གྱིས་བརླབས།
དེ་ནས་)ཨོཾ་ཨཱཿབིགྷྣནྟ་ཀྲིཏ་ཧཱུཾ། (ཞེས་པ་ནས། ཡི་གེ་གསུམ་ལན་བདུན་བརྗོད་པའི་བར་གྱིས་གཏོར་མ་ནང་མཆོད་ལྟར་བྱིན་གྱིས་བརླབས། དེ་ནས་འབུལ་བ་ནི།) རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ཕྱོགས་སྐྱོང་བཅོ་ལྔ་འཁོར་དང་བཅས་པ་བཀུག་སྟེ། ཕྱོགས་མཚམས་རྣམས་སུ་གནས་པ་ནི། ཤར་དུ་རྡོ་རྗེ་མཚོན་ཆ་སེར་པོ། (ཞེས་པ་ནས།) འདུས་པའི་ལྷ་ཤེས་རབ་མ་དང་བཅས་པའི་སྐུར་བཞེངས་པའི་མགྲོན་རྣམས་ཀྱི་ལྗགས་ཧཱུཾ་ལས་སྐྱེས་པའི་རྡོ་རྗེ་དམར་པོ་རྩེ་གཅིག་པ་འོད་ཀྱི་སྦུ་གུ་ཅན་དུ་གྱུར། ཨོཾ་ཨཱཿཧྲཱིཿཔྲ་ཝ་ར། (ཞེས་སོགས་ཀྱིས་ཆུ་བཞི་ཕུལ་ནས།) ཨོཾ་ཨཱཿདུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །(ཞེས་པ་ནས།) ཞི་བ་དང་ནི་བསྲུང་བར་མཛད་དུ་གསོལ། །ཧཱུཾ་སྭཱཧཱ། ཨོཾ་ཨཱཿཧྲཱིཿཔྲ་ཝ་ར་སད་ཀ་རཾ་ཨཱཉྩ་མ་ཎཾ་པྲ་ཏཱིཙྪ་ཧཱུཾ་སྭཱཧཱ། ཨོཾ་ཨཱཿཧྲཱིཿཔྲ་ཝ་ར་སད་ཀ་རཾ་ཨརྒྷཾཔྲ་ཏཱིཙྪ་ཧཱུཾ་སྭཱཧཱ། ཨོཾ་བཛྲ་ཏཾ་བུ་ལ་ཡེ་སྭཱཧཱ། (ཞེས་པ་རྣམས་ཀྱིས་ཞབས་བསིལ་མཆོད་ཡོན་སོ་རྩི་དབུལ།) ཨོཾ་ད་ཤ་དི་ཀ་ལོ་ཀ་པཱ་ལ་ས་པ་རི་ཝཱ་ར་པུཥྤཾ་པྲ་ཏཱིཙྪ་ཧཱུཾ་སྭཱཧཱ། (ཞེས་པ་ནས། དེ་བཞིན་དུ་སྦྱར་བའི་)ཤཔྟ་པྲ་ཏཱིཙྪ་ཧཱུཾ་སྭཱཧཱ། (ཞེས་པའི་བར་གྱིས་ཉེར་སྤྱོད་དང༌།) ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨོམ་ཨཱཿཧཱུཾ། (ཞེས་པས་ནང་མཆོད་དབུལ།) མ་རྙེད་ཡོངས་སུ་མ་ཤེས་དང༌། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་ཁྱེད་ཀྱིས་བཟོད་མཛད་རིགས། །ཡི་གེ་བརྒྱ་པ་ལན་ཅིག་བརྗོད། །ཨོཾ་ཨཱཿཧཱུཾ་བཛྲ་མུཿཕྱོགས་སྐྱོང་འཁོར་བཅས་རང་གནས་སུ་གཤེགས་པར་གྱུར། (ཞེས་བརྗོད་སེ་གོལ་གཏོག
དེ་ནས་ཕྱག་འཚལ།)བདག་བསྐྱེད་ཀྱི་མཆོད་པ་བྱིན་རླབས་མཛད་པར་ཞུ། (ཞེས་བརྗོད། དེ་ནས།) ཨོཾ་ཨཱཿབིགྷྣནྟ་ཀྲིཏ་ཧཱུཾ། (ཞེས་པ་ནས།) ཨཱ་ཉྩ་མ་ཎཾ་དང་པྲོཀྵ་ཎཾ་གཉིས་བོར་བ་མ་གཏོགས་ཉེར་སྤྱོད་བྱིན་རླབས་སྔོན་འགྲོ་བཞིན་བྱས་པའི་མཇུག་ཏུ། ཨོཾ་ཨཱཿརཱུ་པ་བཛྲ་ཧཱུཾ། (ཞེས་པ་ནས།)ཨོམ་ཨཱཿསྤརྴ་བཛྲ་ཧཱུཾ། (ཞེས་པའི་བར་བརྗོད།
དེ་ནས་སློབ་མས། གྲལ་གྱི་མཐའ་ལོགས་སུ་སོང་སྟེ། ཕྱག་གསུམ་བཙལ་ནས་མཎྜལ་སྤྱིར་བཤམས། ཕྱག་གསུམ་བཙལ་ནས་གཙོ་བོའི་ཕྱག་ཏུ་མེ་ཏོག་སྤོས་རེད་དང་བཅས་པ་ཕུལ་ནས། གཞན་སོ་སོའི་ཕྱག་ཏུ་མེ་ཏོག་ཡས་རིམ་གྱིས་དབུལ། ཕྱག་གསུམ་འཚལ། མེ་ཏོག་དང་བཅས་པའི་ཐལ་མོ་སྦྱར་ཏེ།) སེམས་ཅན་དོན་དུ་སེམས་དགེ་བས། །རྣལ་འབྱོར་པ་ཡི་ཚོགས་རྣམས་ཀུན། །ཚུལ་བཞིན་ཆོ་གར་ལྡན་པ་ཡིས། །དམ་ཚིག་ལ་ནི་ཉེར་གནས་མཛོད། །(ཅེས་པ་ལན་གསུམ་གྱིས་སྒྲུབ་པ་པོ་སྤྱི་ལ་གསོལ་བ་བཏབ། ཕྱག་གསུམ་བཙལ་ཏེ། བླ་མ་མ་གཏོགས་པའི་མེ་ཏོག་མས་རིམ་གྱིས་བསྡུས།
ཕྱག་གསུམ་བྱས་ནས་མཎྜལ་བཀོད་དེ། ཐམས་ཅད་ཀྱིས་ཐུན་མོང་དུ་བླ་མ་ལ་ཐུགས་དམ་ལ་གནས་པ་ཞུ་བའི་ཡོན་དུ་དབུལ། གཙོ་བོས་ཀྱང་རང་རང་གི་མེ་ཏོག་བླ་མ་གོང་མ་ལ་དབུལ་བའི་ཕྱིར་མཎྜལ་གྱི་སྟེང་དུ་སྦུངས་ལ། སློབ་མས་མཎྜལ་རྟེན་གྱི་དྲུང་དུ་བཞག་སྟེ། ཕྱག་གསུམ་བྱས་ནས་རང་གི་གྲལ་ལ་འཁོད། གཙོ་བོས།) བཤགས་པ་དང་བསྡོམ་པ་སྔོན་དུ་འགྲོ་བ་ཅན་གྱིས་ལྷའི་རྣལ་འབྱོར་ལ་གནས་པར་ཞུ། (ཞེས་བརྗོད་ནས།) ཡིད་ཀྱི་རོལ་པ་དྲི་མེད་ཟླ་འདྲས་བསྒྲུབས། །(ཞེས་པ་ནས།)ཡང་དག་ཉིད་དུ་ད་ནི་གནས་པར་བགྱི། །(ཞེས་པའི་བར་གྱིས་སྐྱབས་འགྲོ་སོགས་བྱ།
དེ་ནས་རྡོ་རྗེ་སེམས་དཔའི་སྒོམ་བཟླས་ནི།) རང་གི་སྤྱི་བོར་པཾ་ལས་པདྨ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་ལྟེ་བ་ཧཱུཾ་གིས་མཚན་པ། དེ་ལས་འོད་འཕྲོས་འདུས་ཡོངས་སུ་གྱུར་པ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་དཀར་མོ་རྡོ་རྗེ་དང་དྲིལ་བུ་འཛིན་པས་འཁྱུད་པ། རིན་པོ་ཆེའི་རྒྱན་སྣ་ཚོགས་པས་བརྒྱན་པ། རྡོ་རྗེ་སྐྱིལ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་དཀར་པོ། དེ་ལས་འོད་འཕྲོས་རང་འདྲའི་ཡེ་ཤེས་པ་སྤྱན་དྲངས། ཨོཾ་བཛྲ་སཏྭ་ས་པ་རི་ཝཱ་ར་ཨརྒྷཾཔྲ་ཏཱིཙྪ་ཧཱུཾ། (ཞེས་པ་ནས།)ཤཔྟ་པྲ་ཏཱིཙྪ་ཧཱུཾ་སྭཱཧཱ། ཛཿཧཱུཾ་བཾ་ཧོཿསླར་ཡང་ཐུགས་ཀའི་ཧཱུཾ་ལས་འོད་འཕྲོས། དབང་གི་ལྷ་རྣམས་སྤྱན་དྲངས། ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ། (ཞེས་པ་ནས།) ཤཔྟ་པྲ་ཏཱིཙྪ་ཧཱུཾ། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། (ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས།) ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། (ཞེས་དབང་བསྐུར།) སྐུ་ཡེ་ཤེས་ཀྱི་བདུད་རྩིས་གང༌། མི་བསྐྱོད་པས་དབུ་བརྒྱན་པར་གྱུར། བཅོམ་ལྡན་འདས་རྡོ་རྗེ་སེམས་དཔའ་བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་དང༌། དམ་ཚིག་ཉམས་པ་ཐམས་ཅད་བྱང་ཞིང་དག་པར་མཛད་དུ་གསོལ། (ཞེས་གསོལ་བ་བཏབ་པས།) ཐུགས་ཀའི་ཧཱུཾ་ལས་འོད་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་དག ། སངས་རྒྱས་སྲས་བཅས་ལ་མཉེས་པའི་མཆོད་པ་དབུལ། དེ་རྣམས་ཀྱི་ཡོན་ཏན་ཐམས་ཅད་འོད་ཀྱི་རྣམ་པར་བསྡུས་ནས། ཐུགས་ཀའི་ཧཱུཾ་ལ་ཐིམས་པས་གཟི་བརྗིད་དང་མཐུ་སྟོབས་ཕུན་སུམ་ཚོགས་པར་གྱུར། ཨོཾ་བཛྲེ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པྲ་ཏི་ཥྛ་ཌི་ཌྷོ་མེ་བྷ་ཝ། སུ་ཏོ་ཥྱོ་མེ་བྷཱ་ཝ། སུ་པོ་ཥྱོ་མེ་བྷཱ་ཝ། ཨ་ནུ་རཀྟོ་མེ་བྷཱ་ཝ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙི་ཏྟཾ་ཤྲི་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན་སརྦ་ཏ་ཐཱ་ག་ཏ་བཛྲ་མ་མེ་མུཉྩ། བཛྲེ་བྷཱ་ཝ་མཧཱ་ས་མ་ཡ་སཏྭ་ཨཱཿཧཱུཾ་ཕཊ། (ཅེས་བཟླས། ཐུགས་ཀའི་ཧཱུཾ་ལས་ཡི་གེ་བརྒྱ་པས་བསྐོར་བའི་ཡིག་འབྲུ་ལས་འོད་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཆོད་པ་ཕུལ། དེའི་སྐུ་གསུང་ཐུགས་ཀྱི་བྱིན་རླབས་རྣམས་བསྡུས་ཡིག་འབྲུ་ལ་ཐིམས་པས། དེ་ལས་བྱང་ཆུབ་ཀྱི་སེམས་ཀྱི་རྒྱུན་དཀར་པོ་བབས། སྦྱོར་མཚམས་ནས་འཐོན་པའི་བྱང་སེམས་བདག་གི་སྤྱི་བོའི་སྒོ་ནས་ཞུགས། བདག་གི་ལུས་ཐམས་ཅད་གང༌། སྡིག་སྒྲིབ་མ་ལུས་པར་དབང་པོའི་སྒོ་དང་བ་སྤུའི་སྒོ་རྣམས་ནས་དུད་ཁུའི་རྣམ་པར་འཐོན། སྡིག་སྒྲིབ་ཐམས་ཅད་དག རྟགས་པ་དང༌། ཡོན་ཏན་བདག་གཞན་ཐམས་ཅད་ཀྱི་རྒྱུད་ལ་སྐྱེས་པར་བསམ་མོ། །
བཟླས་པའི་མཐར།)བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག ། གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཚན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །རྡོ་རྗེ་སེམས་དཔའི་ཞལ་ནས་རིགས་ཀྱི་བུ་ཁྱོད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་དག་གོ། །ཞེས་གསུངས་ནས་རང་ལ་ཐིམས་པས། རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མེད་པར་གྱུར། (ཅེས་བརྗོད་ཅིང༌། སྡིག་པའི་འཁོར་གསུམ་བདེན་པར་མི་དམིགས་པར་བསམ་པ་རྣམས་མངོན་རྟོགས་ཀྱི་ཐོག་མར་སྦྱར་རོ། །
དེ་ནས་མངོན་རྟོགས་དངོས་ནི།) རང་མི་བསྐྱོད་རྡོ་རྗེར་གསལ་བའི། །(ཞེས་པ་ནས།) དཀྱིལ་འཁོར་སྤྱན་དྲངས། ཨོཾ་སརྦ་ཏ་ཐཱ་ག་ཏ་ཨརྒྷཾཔཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུཾ། (ཞེས་པ་ནས།) སྤརྴ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུཾ། གང་ཞིག་གཟུགས་དང༌། (ཞེས་པ་ནས།) ད་ནི་གནས་པར་བགྱི། སངས་རྒྱས་བྱང་ཆུབ་སེམས་དཔའ་ཀུན། (ཅེས་པ་ནས།)མྱ་ངན་འདས་ལ་དགོད། ཚོགས་ཞིང་རང་གནས་སུ་གཤེགས་པར་གྱུར།
ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ་྅ཧཾ། ཆོས་རྣམས་ཀྱི་ངོ་བོ་རྒྱུ་འབྲས་གསུམ་རང་གི་མཚན་ཉིད་ཀྱིས་གྲུབ་པས་སྟོང་བའི་སྟོང་བ་ཉིད་དུ་གྱུར། སྟོང་བའི་ངང་ལས་པཾ་ལས་སྣ་ཚོགས་པདྨའི་ལྟེ་བར། ཨ་ལས་བྱུང་བའི། (ཞེས་པ་ནས།) སྣ་ཚོགས་པད་མ་དང་ཉི་མའི་གདན་རེ་རེ། གདན་དབུས་མའི་སྟེང་དུ་རང་ཉིད། (ཅེས་པ་ནས།)གཡོན་དྲིལ་བུ་རིན་ཆེན་རལ་གྲི་འཛིན་པ། མཚན་སུམ་ཅུ་རྩ་གཉིས་དང༌། དཔེ་བྱད་བརྒྱད་ཅུས་བརྒྱན་པ། རྡོ་རྗེ་དབྱིངས་ཀྱི་དབང་ཕྱུག་མ་དཀར་མོ། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉིས་ཀའང་འོད་ཀྱི་དཀྱིལ་འཁོར་གྱིས་མཛེས་པ། རིན་པོ་ཆེའི་རྒྱན་དང༌། དར་སྣ་ཚོགས་ཀྱི་ན་བཟའ་ཅན་དུ་གྱུར། རང་གི་ཐུགས་ཀར་སྣ་ཚོགས་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་སྐུ་མདོག་དམར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་སྣང་གི་ཤེས་རབ་མ་ལ་འཁྱུད་པ། དེའི་ཐུགས་ཀར་ཟླ་བའི་གདན་ལ་རྡོ་རྗེ་སྔོན་པོ་རྩེ་ལྔ་པའི་ལྟེ་བའི་ནང་དུ་ཏིང་ངེ་འཛིན་སེམས་དཔའ་ཧཱུཾ་ཡིག་སྔོན་པོ། རང་གི་སྤྱི་བོར་སྐུ་རྡོ་རྗེའི་ངོ་བོ་ཨོཾ་དཀར་པོ། མགྲིན་པར་གསུང་རྡོ་རྗེའི་ངོ་བོ་ཨཱཿདམར་པོ། ཐུགས་ཀར་ཐུགས་རྡོ་རྗེའི་ངོ་བོ་ཧཱུཾ་སྔོན་པོ། ཡབ་ཡུམ་སྙོམས་པར་ཞུགས་པའི་སྙིང་ཁའི་ཏིང་ངེ་འཛིན་སེམས་དཔའི་འོད་ཟེར་གྱིས་མི་བསྐྱོད་པ་ལ་ཁྲོ་བོ་བཅུས་བསྐོར་བ་སྤྱན་དྲངས། ཞལ་ནས་ཞུགས། རྡོ་རྗེའི་ལམ་ནས་ཡུམ་གྱི་པདྨར་ཞུ་བའི་ཐིག་ལེ་བཅུ་གཅིག་ཧཱུཾ་རིང་པོ་བཅུ་གཅིག་ཏུ་གྱུར། དེ་རྣམས་ཡོངས་སུ་གྱུར་པ་ལས། མི་བསྐྱོད་པ་དང་ཁྲོ་བོ་བཅུར་གྱུར་པའི་མི་བསྐྱོད་པ་ནག་པོ། ནག་དཀར་དམར་བའི། (ཞེས་པ་ནས།) རལ་གྲི་འཛིན་པ་རང་གི་ཐུགས་ཀར་དྲངས་བཛྲ་དྷྲིཀ་ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས། ཆོས་འཁོར་བསྐོར་བ་ལ་སོགས་པའི་མཛད་པ་མཛད། ཁྱད་པར་དུ་ཡང་སེམས་ཅན་ཞེ་སྡང་ཅན་རྣམས་ཀྱི་ཞེ་སྡང་སྦྱངས། མི་བསྐྱོད་པའི་གོ་འཕང་ལ་བཀོད། སྤྲུལ་པ་རྣམས་གཅིག་ཏུ་འདུས། མི་བསྐྱོད་པ་ཡེ་ཤེས་པ་དང་དབྱེར་མེད་དུ་འདྲེས་ནས་རང་ལ་རྗེས་སུ་ཞུགས། སྔར་གྱི་ཟླ་བ་ཉི་གདན་དུ་གྱུར་པའི་སྟེང་ན། རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག ཁྲོ་བ་དང་འདོད། (ཅེས་པ་ནས།) ཕྱག་དྲུག་གི་གཡས་རྡོ་རྗེ་རྩེ་དགུ་པ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། མཚན་བཟང་པོ་སོ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ། རྡོ་རྗེ་དབྱིངས་ཀྱི་དབང་ཕྱུག་མ་རེག་བྱ་རྡོ་རྗེ་མ་སྔོན་མོར་གྱུར་པ་ནི། སྔོ་དཀར་དམར་བའི་ཞལ་གསུམ། (ཞེས་པ་ནས།) རལ་གྲི་འཛིན་པ། དབུ་སྐྲ་རལ་པ་ཕྱེད་བཅིངས་སུ་བྱས་པ། ཤིན་ཏུ་སྒེག་ཅིང་། (ཞེས་པ་ནས།)འདོད་ཡོན་ལྔའི་དགའ་བས་རོལ་པ། ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉིས་ཀའང་རིན་པོ་ཆེའི་དབུ་རྒྱན་གསོལ་བ། (ཞེས་པ་ནས།) ཤམ་ཐབས་འཕྱར་བ། འོད་དམར་པོ་འབར་ཞིང་འཁྲུག་པའི་དབུས་ན་སྙོམས་པར་འཇུག་པའི་ཚུལ་གྱིས་བཞུགས་པ། སེམས་དཔའ་གསུམ་གྱི་བདག་ཉིད་ཅན་དུ་གྱུར། གཤིན་རྗེའི་གཤེད་ནག་པོ་རྣམ་སྣང་གི་དབུ་རྒྱན་ཅན། (ཞེས་པ་ནས།) དགྲ་སྟ་འཛིན་པ་རང་གི་ཐུགས་ཀར་དྲངས། ཡ་མཱན་ཏ་ཀྲིཏ་ཐུགས་ཀ་ནས་ཕྱིར་ཕྱུང༌། ཤར་གྱི་རྩིབས་ཀྱི་རྩེ་མོའི་སྟེང་གི་རང་གི་གདན་ལ་གཡོན་བརྐྱངས་ཀྱིས་འཁོད། (ཅེས་པ་ནས།) རྩེ་གསུམ་དགྲ་སྟ་འཛིན་པ། མཧཱ་བཱ་ལ་ཐུགས་ཀ་ནས་ཕྱིར་ཕྱུང༌། བྱང་ཤར་གྱི་རྩིབས་ཀྱི་རྩེ་མོའི་སྟེང་གི་རང་གི་གདན་ལ་གཡོན་བརྐྱངས་ཀྱིས་འཁོད། གཙུག་ཏོར་འཁོར་ལོས་བསྒྱུར་བ། (ཞེས་པ་ནས།) ཐུགས་ཀ་ནས་ཕྱིར་ཕྱུང༌། སྟེང་གི་རྩིབས་ཀྱི་ནང་གི་རང་གི་གདན་ལ་གཡོན་བརྐྱངས་ཀྱིས་འཁོད། གནོད་མཛེས་རྒྱལ་པོ་སྔོན་པོ། (ཞེས་པ་ནས།) འོག་གི་རྩིབས་ཀྱི་ནང་གི་རང་གི་གདན་ལ་གཡོན་བརྐྱངས་ཀྱིས་འཁོད། ཁྲོ་བོ་བཅུ་པོ་ཐམས་ཅད་ཀྱང༌། (ཞེས་པ་ནས།) གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར།
དེ་ནས་བདག་གིས་གནོད་མཛེས་ལ་བལྟས་པས། (ཞེས་པ་ནས།) བིདྱཱ་རཱ་ཛཱ་ཧཱུཾ་ཕཊ། ཅེས་གནོད་མཛེས་ལ་བོས་ནས། (ཞེས་པ་ནས།) འབྲུབ་ཁུང་གི་རྣམ་པ་ཅན་རྣམས་སུ་བཅུག་པར་གྱུར། དེ་ནས་བྱང་གི་བདུད་རྩི་འཁྱིལ་པས་སྤྲུལ་པའི་བདུད་རྩི་འཁྱིལ་པ་གཉིས་པ་དེ་ཡོངས་སུ་གྱུར་པ་ལས། སྟོད་ཁྲོ་བོ་བདུད་རྩི་འཁྱིལ་པ་སྔོན་པོ་དོན་གྲུབ་ཀྱི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་སྣ་ཚོགས་རྡོ་རྗེ་འཁོར་ལོ་གཏུན་ཤིང༌། གཡོན་ཐུགས་ཀར་ཞགས་པ་བཟུངས་ནས་སྡིགས་མཛུབ་མཛད་ཅིང༌། དྲིལ་བུ་དགྲ་སྟ་འཛིན་པ། ལྟེ་བ་མན་ཆད་མདུང་རྩེ་གཅིག་པའི་དབྱིབས་ཅན་གྱི་ཕུར་བུ་མེ་དཔུང་རབ་ཏུ་འབར་བ་ཅན་བཅུར་གྱུར་ཏེ། ཕྱོགས་སྐྱོང་འཁོར་དང་བཅས་པའི་མགོ་བོར་ཟུག ཨོཾ་གྷ་གྷ། (ཞེས་པ་ནས།)ཕཊ་ཕཊ། (ལན་བདུན་བརྗོད།) གནོད་མཛེས་ཀྱི་ཕྱག་མཚན་རྡོ་རྗེ་ལྕགས་ཀྱུ་དེ། རྡོ་རྗེ་ཐོ་བ་མེ་རབ་ཏུ་འབར་བར་གྱུར་པས། ཤར་ནས་བརྩམས་ཏེ་ཕྱོགས་བཞི་དང༌། མེ་ནས་བརྩམས་ཏེ་མཚམས་བཞི་དང༌། སྟེང་འོག་གི་ཕུར་བུ་རྣམས་ཀྱི་སྤྱི་བོ་ནས་བརྡུངས་པས། བགེགས་རྣམས་ཀྱི་སྤྱི་བོ་ནས་རྐང་མཐིལ་གྱི་བར་དུ་ཕུར་བུ་བཏབ་པས་ལུས་ངག་ཡིད་གསུམ་གཡོ་འགུལ་མེད་པར་གྱུར། སྤྲུལ་པའི་གནོད་མཛེས་འོག་གི་གནོད་མཛེས་ལ་ཐིམ། སླར་ཡང་ཁྲོ་བོ་དང་ཕུར་བུ་ལས་རྡོ་རྗེའི་མེ་འོད། (ཅེས་པ་ནས།)ཕན་ཚུན་དུ་བྲོས་པར་གྱུར། ཊཱཀྐི་ཧཱུཾ་ཛཿཁྲོ་བོ་རྣམས་ཀྱི་ཕྱི་རོལ་ཏུ་ལྕགས་ཀྱི་རྡོ་རྗེའི་ར་བ། ཊཱཀྐི་ཧཱུཾ་ཛཿདེའི་ཕྱི་རོལ་ཏུ་ཆུའི་ར་བ། ཊཱཀྐི་ཧཱུཾ་ཛཿདེའི་ཕྱི་རོལ་ཏུ་མེའི་ར་བ། ཊཱཀྐི་ཧཱུཾ་ཛཿདེའི་ཕྱི་རོལ་ཏུ་རླུང་གི་ར་བ། ཧཱུཾ་ལས་ལྕགས་ཀྱི་ར་བའི་སྟེང་དུ། (ཞེས་པ་ནས།)རབ་ཏུ་འབར་བ་འཕྲོ་བར་གྱུར། ལྷ་རྣམས་ཀྱི་སྤྱི་བོར། (ཞེས་པ་ནས།) ཧཱུཾ་སྔོན་པོ་ཨོཾ་ཨཱཿཧཱུཾ། ཞེས་བརྗོད། དངོས་པོ་མེད་པས། (ཞེས་པ་ནས།)དམིགས་སུ་མེད་པའོ། །
སྣོད་བཅུད་ཀྱིས་བསྡུས་པའི་ཆོས་ཐམས་ཅད། (ཅེས་པ་ནས།) སྨོན་པ་མེད་པའི་རང་བཞིན་དུ་གྱུར། སྟོང་བའི་ངང་ལས་སྐད་ཅིག་གིས་རྡོ་རྗེའི་ས་གཞི། (ཞེས་པ་ནས།) སའི་དཀྱིལ་འཁོར་སེར་པོ་གྲུ་བཞི་པ་ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། སྤྱན་སོགས་ལྷ་མོ་བཞིའི་ངོ་བོར་གྱུར། དཀྱིལ་འཁོར་བཞི་པོ་གཅིག་ཏུ་འདྲེས་པ་ལས། སྣ་ཚོགས་རྡོ་རྗེར་གྱུར་པའི་ལྟེ་བའི་སྟེང་དུ་བྷྲཱུཾ་དཀར་པོ་སངས་རྒྱས་ཀྱི་སྤྲིན་གྱི་འོད་ཟེར་འཕྲོ་བ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་པ། སྒོ་བཞི་པ་ཕྱི་ནས་རིམ་པ་བཞིན། (ཅེས་པ་ནས།) བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན། གདན་དེ་རྣམས་ཀྱི་སྟེང་དུ་སྐད་ཅིག་གིས་ལྷག་པར་མོས་པ་ཙམ་གྱིས་ལྷ་སུམ་ཅུ་རྩ་གཉིས་དུས་གཅིག་ཏུ་རྫོགས་པར་གྱུར་པ་ནི། དབུས་ཀྱི་གདན་ལ་རང་ཉིད་རྡོ་རྗེ་འཆང་སྔོན་པོ། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ། རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི། (ཞེས་པ་ནས།) རལ་གྲི་འཛིན་པ་དབུ་སྐྲ་རལ་པ་ཕྱེད་བཅིངས་སུ་བྱས་པ། ཤིན་ཏུ་སྒེག་ཅིང་བཞིན་འཛུམ་བག་དང་ལྡན་པ། ཟུར་གྱིས་བལྟ་བ་ལ་སོགས་པའི་རྣམ་འགྱུར་གྱིས་མཛེས་པ། ལང་ཚོ་དར་ལ་བབ་ཅིང༌། འདོད་ཡོན་ལྔའི་དགའ་བས་རོལ་པ། ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉིས་ཀའང་རིན་པོ་ཆེའི་དབུ་རྒྱན་གསོལ་བ། རིན་པོ་ཆེའི་སྙན་རྒྱན་དང༌། (ཞེས་པ་ནས།) ཤམ་ཐབས་འཕྱར་བ། འོད་ཀྱི་དཀྱིལ་འཁོར་གྱིས་བསྐོར་བའི་དབུས་ན་ཡབ་སེམས་དཔའི་སྐྱིལ་མོ་ཀྲུང་གིས་བཞུགས་པ། ཤར་དུ་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། དཀར་ནག་དམར་བའི། (ཞེས་པ་ནས།) བྱང་དུ་དོན་གྲུབ་ལྗང་ཁུ་མི་བསྐྱོད་པའི་དབུ་རྒྱན་ཅན། ལྗང་ནག་དམར་བའི། (ཞེས་པ་ནས།) ཤར་ལྷོར་སྤྱན་མ་དཀར་མོ་རྣམ་སྣང་གི་དབུ་རྒྱན་ཅན། (ཅེས་པ་ནས།) ལྷོ་ནུབ་ཏུ་མཱ་མ་ཀཱི་སྔོན་མོ་མི་བསྐྱོད་པའི་དབུ་རྒྱན་ཅན། (ཅེས་པ་ནས།)ནུབ་བྱང་དུ་གོས་དཀར་མོ་དམར་མོ་འོད་དཔག་མེད་ཀྱི་དབུ་རྒྱན་ཅན། (ཅེས་པ་ནས།)བྱང་ཤར་དུ་སྒྲོལ་མ་ལྗང་ཁུ་དོན་གྲུབ་ཀྱི་དབུ་རྒྱན་ཅན། (ཅེས་པ་ནས།) རིམ་པ་གཉིས་པའི་ཤར་ལྷོར་གཟུགས་རྡོ་རྗེ་མ་དཀར་མོ་རྣམ་སྣང་གི་དབུ་རྒྱན་ཅན། (ཅེས་དང༌།) ལྷོ་ནུབ་ཏུ་སྒྲ་རྡོ་རྗེ་མ་སེར་མོ་རིན་འབྱུང་གི་དབུ་རྒྱན་ཅན། (ཅེས་དང༌།) ནུབ་བྱང་དུ་དྲི་རྡོ་རྗེ་མ་དམར་མོ་འོད་དཔག་མེད་ཀྱི་དབུ་རྒྱན་ཅན། (ཅེས་དང༌།)བྱང་ཤར་དུ་རོ་རྡོ་རྗེ་མ་ལྗང་ཁུ་དོན་གྲུབ་ཀྱི་དབུ་རྒྱན་ཅན། (ཅེས་པ་ནས།) རལ་གྲི་འཛིན་པ། ལྷ་མོ་བརྒྱད་པོ་ཐམས་ཅད་ཀྱང་དབུ་སྐྲ་རལ་པ་ཕྱེད་བཅིངས་སུ་བྱས་པ། རིན་པོ་ཆེའི་དབུ་རྒྱན་གསོལ་བ། (ཞེས་པ་ནས།) ཤམ་ཐབས་ཅན། ཤིན་ཏུ་སྒེག་ཅིང༌། (ཞེས་པ་ནས།) དགའ་བས་རོལ་པ། འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན། རང་རང་གི་གདན་ལ་རྡོ་རྗེའི་སྐྱིལ་མོ་ཀྲུང་གིས་བཞུགས་པའོ། །ཤར་སྒོའི་གཡས་གཡོན་གྱི་གདན་ལ་རིམ་པ་བཞིན་བྱམས་པ་དང༌། ས་སྙིང་དཀར་པོ་རྣམ་སྣང་གི་དབུ་རྒྱན་ཅན། དཀར་ནག་དམར་བའི། (ཞེས་པ་ནས།)རལ་གྲི་འཛིན་པ། བྱམས་པའི་ཕྱག་གཡས་ཀྱི་དང་པོས་ཀླུ་ཤིང་གི་མེ་ཏོག་སྡོང་བུ་དང་བཅས་པ་འཁོར་ལོས་མཚན་པ་འཛིན་པ། ལྷོ་སྒོའི་གཡས་གཡོན་གྱི་གདན་ལ་རིམ་པ་བཞིན་ཕྱག་རྡོར་དང་ནམ་སྙིང་སེར་པོ་རིན་འབྱུང་གི་དབུ་རྒྱན་ཅན། (ཅེས་པ་ནས།)ནུབ་སྒོའི་གཡས་གཡོན་གྱི་གདན་ལ་རིམ་པ་བཞིན། (ཅེས་དང༌།) བྱང་སྒོའི།)ཞེས་པ་ནས།) པད་ལྗང་ནོར་བུ་འཛིན་པ། རྣམ་སྣང་ནས་ཀུན་བཟང་གི་བར་གྱི་ལྷ་ལྷག་མ་ཐམས་ཅད་ཀྱང་དབུ་སྐྲ་རལ་པའི་ཐོར་ཚུགས་ཅན། རིན་པོ་ཆེའི་དབུ་རྒྱན་གསོལ་བ། (ཞེས་པ་ནས།) ཤམ་ཐབས་ཅན། མཚན་བཟང་པོ་སོ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ། ཞི་བ་འོད་ཀྱི་དཀྱིལ་འཁོར། (ཞེས་པ་ནས།)བཞུགས་པར་གྱུར། ཤར་སྒོར་གཤིན་རྗེའི་གཤེད་ནག་པོ་རྣམ་སྣང་གི་དབུ་རྒྱན་ཅན། (ཅེས་པ་ནས།) འོག་ཏུ་གནོད་མཛེས་རྒྱལ་པོ་སྔོན་པོ་མི་བསྐྱོད་པའི་དབུ་རྒྱན་ཅན། (ཅེས་པའི་བར་ཕྱག་མཚན་རྣམས་སྔར་བཞིན་བསྐྱེད།) ཁྲོ་བོ་བཅུ་པོ་ཐམས་ཅད་ཀྱང༌། (ཞེས་པ་ནས།) གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར། རང་གི་ཐུགས་ཀའི་ཧཱུཾ་ལས་འོད་འཕྲོས། སེམས་ཅན་ཐམས་ཅད་བཀུག་ནས། (ཞེས་པ་ནས།) ཞིང་དུ་གཤེགས་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྣམ་སྣང་ནས་གནོད་མཛེས་ཀྱི་བར་གྱི་ལྷ་རྣམས་སྤྱན་དྲངས་ཏེ། སྤྱི་བོ་ལ་སོགས་པའི་གནས་རྣམས་སུ་འཁོད་ནས། གཟུགས་ཀྱི་ཕུང་པོ་ལ་སོགས་པ་དང་ངོ་བོ་དབྱེར་མེད་དུ་གྱུར་པ་ནི་སྤྱི་བོར་རྣམ་སྣང༌། (ཞེས་པ་ནས།) རྐང་མཐིལ་གཉིས་སུ་གནོད་མཛེས་རྒྱལ་པོ། ལུས་ཀྱི་ལྷ་རྣམ་སྣང༌། སྤྱན་མ། (ཞེས་པ་ནས།) གཙོ་བོ་ཡང་འོད་གསལ་དུ་ཐིམ་པར་གྱུར། ཨོཾ་ཤཱུ་ནྱ་ཏཱ། (ཞེས་པ་ནས།) ཨཱདྨ་ཀོ྅ཧཾ། གདན་དབུས་མའི་སྟེང་དུ། (ཞེས་པ་ནས།) སྟེང་ནས་སྟེང་དུ་བརྩེགས་པ། དེ་ཐམས་ཅད་གཅིག་ཏུ་འདྲེས་པ་ལས་ཟླ་བའི་དཀྱིལ་འཁོར་ཆ་ཐམས་ཅད་ཡོངས་སུ་རྫོགས་པ་ཅིག་ཏུ་གྱུར། དེ་ལས་འོད་འཕྲོས་པས་སྣོད་བཅུད་ཐམས་ཅད་བསྡུས་ཏེ་ཟླ་བ་ལ་ཐིམས། ཨོཾ་དྷརྨཱ་དྷཱ་ཏུ་སྭ་བྷཱ་ཝ་ཨཱདྨ་ཀོ྅ཧཾ། སྣོད་བཅུད་ཀྱི་ཆོས་ཐམས་ཅད་ཀྱི་རྩ་བ་རླུང་སེམས་ཟླ་བར་སྣང་བ་དེ་ངའོ། །ཟླ་བའི་སྟེང་དུ་ཆུ་ལས། (ཞེས་པ་ནས།) ཧཱུཾ་སྔོན་པོ་དེ་ལས་འོད་འཕྲོས། (ཞེས་པ་ནས།)ཨོཾ་ཨཱཿཧཱུཾ་གིས་མཚན་པ། བཛྲ་ཨཱདྨ་ཀོ྅ཧཾ། རྡོ་རྗེ་ཡི་གེ་དང་བཅས་པ་ཡོངས་སུ་གྱུར་པ་ལས། རང་ཉིད་དང་པོའི་མགོན་པོ་སྐུ་མདོག་དཀར་པོ། དཀར་ནག་དམར་བའི། (ཞེས་པ་ནས།) རལ་གྲི་འཛིན་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། དེ་ནས་རང་བཞིན་གྱི་གནས་ནས། (ཞེས་པ་ནས།) གཅིག་ཏུ་འདྲེས་པ་ལ་རང་ཉིད་རྗེས་སུ་ཞུགས་པས། སྤྲུལ་སྐུ་རྡོ་རྗེ་སེམས་དཔའ་སྔོན་པོ། སྔོ་དཀར་དམར་བའི། (ཞེས་པ་ནས།) རལ་གྲི་འཛིན་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། རང་གི་ལུས་ཀྱི་མདུན་རྒྱབ་དང་གཡས་གཡོན་བཞི་དཀྱིལ་འཁོར་གྱི་ཟུར་བཞི། (ཞེས་པ་ནས།) དེ་ལྟར་ལུས་ཀྱི་ཆ་ཐམས་ཅད་གཞལ་ཡས་ཁང་དུ་གྱུར། རང་གི་སྤྱི་གཙུག་ནས་སྐྲ་མཚམས་གྱི་བར་དུ་གཟུགས་ཕུང་གི་ངོ་བོ། ཨོཾ་དཀར་པོ་ཡོངས་སུ་གྱུར་པ་ལས་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། (ཅེས་དང།) སྐྲ་མཚམས་ནས་མགྲིན་པའི་བར་དུ་འདུ་ཤེས་ཀྱི་ཕུང་པོའི་ངོ་བོ། ཨཱཿདམར་པོ་ཡོངས་སུ་གྱུར་པ་ལས། (ཞེས་དང་།) མགྲིན་པ་ནས་ནུ་མ་གཉིས་ཀྱི་དབུས་ཀྱི་སྙིང་ཁའི་བར་དུ་རྣམ་ཤེས་ཀྱི་ཕུང་པོའི་ངོ་བོ། ཧཱུཾ་སྔོན་པོ་ཡོངས་སུ་གྱུར་པ་ལས། (ཞེས་དང་།)སྙིང་ཁ་ནས་ལྟེ་བའི་བར་དུ་ཚོར་བའི་ཕུང་པོའི་ངོ་བོ། སྭཱ་སེར་པོ་ཡོངས་སུ་གྱུར་པ་ལས། (ཞེས་དང་།) ལྟེ་བ་ནས་བརླའི་རྩ་བའི་བར་དུ་འདུ་བྱེད་ཀྱི་ཕུང་པོའི་ངོ་བོ། ཧཱ་ལྗང་ཁུ་ཡོངས་སུ་གྱུར་པ་ལས་དོན་གྲུབ་ལྗང་ཁུ། (ཞེས་དང་།) ལྟེ་བར་ལུས་ཀྱི་སའི་ཁམས་ཐམས་ཅད་ཀྱི་ངོ་བོ། ལཾ་ཡོངས་སུ་གྱུར་པ་ལས་སྤྱན་མ་དཀར་མོ། (ཞེས་པ་ནས།)སྤྱི་གཙུག་ཏུ་ལུས་ཀྱི་རླུང་གི་ཁམས་ཐམས་ཅད་ཀྱི་ངོ་བོ། ཏཱཾ་ཡོངས་སུ་གྱུར་པ་ལས། (ཞེས་དང་།)རལ་གྲི་འཛིན་པ། མིག་གཉིས་སུ་མིག་གི་དབང་པོའི་ངོ་བོ། ཐླཱིཾ་ཡོངས་སུ་གྱུར་པ་ལས་ས་སྙིང་དཀར་པོ་རྣམ་སྣང་གི་དབུ་རྒྱན་ཅན། (ཅེས་པ་ནས།)རལ་གྲི་འཛིན་པ། མིག་གི་སྒོར་ལུས་ཀྱི་གཟུགས་ཀྱི་རང་བཞིན་ཛཿཡོངས་སུ་གྱུར་པ་ལས་གཟུགས་རྡོ་རྗེ་མ་དཀར་མོ་རྣམ་སྣང་གི་དབུ་རྒྱན་ཅན། དཀར་ནག་དམར་བའི་ཞལ་གསུམ་ཕྱག་དྲུག་གི་རྩ་ཕྱག་གཉིས་ཀྱིས་མེ་ལོང་དམར་པོ་འཛིན་ཅིང༌། ལྷག་མ་གཡས་རྡོ་རྗེ་ཨུད་པ་ལ་དཀར་པོ། གཡོན་རིན་ཆེན་རལ་གྲི་འཛིན་པ། ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། (ཞེས་པ་དང་།) རྣ་བར་རྣ་བའི་དབང་པོའི་ངོ་བོ། (ཞེས་པ་ནས།)ལྕེར་འཇིག་རྟེན་དབང་ཕྱུག་ལ་རོ་རྡོ་རྗེ་མས་འཁྱུད་པའི་བར་སྔ་མ་བཞིན་སྦྱར་ལ། སྙིང་ཁར་ཡིད་དབང་གི་ངོ་བོ། ཧཱུཾ་ཡོངས་སུ་གྱུར་པ་ལས་འཇམ་དཔལ་དམར་པོ་འོད་དཔག་མེད་ཀྱི། (ཞེས་པ་ནས།) རལ་གྲི་འཛིན་པ། རྡོ་རྗེར་ལུས་དབང་གི་ངོ་བོ། ཨོཾ་ཡོངས་སུ་གྱུར་པ་ལས་སྒྲིབ་སེལ་ལྗང་ཁུ། (ཞེས་པ་ནས།) རྡོ་རྗེའི་སྒོར་ལུས་ཀྱི་རེག་བྱའི་ངོ་བོ། ཁཾ་ཡོངས་སུ་གྱུར་པ་ལས། རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན། (ཅེས་པ་ནས།) རལ་གྲི་འཛིན་པ། ཡབ་ཡུམ་གཉིས་ཀྱི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། ཚིགས་རྣམས་ལ་ཚིགས་ཀྱི་ངོ་བོ། སཾ་ཡོངས་སུ་གྱུར་པ་ལས་ཀུན་བཟང་ལྗང་ཁུ། (ཞེས་པ་ནས།) སྤྱི་གཙུག་ཏུ་ལུས་ཀྱི་རྩ་དང་རྒྱུས་པའི་ངོ་བོ། མེཾ་ཡོངས་སུ་གྱུར་པ་ལས། བྱམས་པ་དཀར་པོ་རྣམ་སྣང་གི་དབུ་རྒྱན་ཅན། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་ཀླུ་ཤིང་གི་མེ་ཏོག་སྡོང་བུ་དང་བཅས་པ་འཁོར་ལོས་མཚན་པ་རྡོ་རྗེ་པདྨ་དཀར་པོ། གཡོན་དྲིལ་བུ་རིན་ཆེན་རལ་གྲི་འཛིན་པ། རྣམ་སྣང་ནས་བྱམས་པའི་བར་གྱི་ལྷ་ཐམས་ཅད་ཀྱང་རིན་པོ་ཆེའི་རྒྱན་དང༌། དར་སྣ་ཚོགས་ཀྱི་ན་བཟའ་ཅན་དུ་གྱུར། ལག་པ་གཡས་ལ་དེའི་ངོ་བོ། ཧཱུཾ་ཡོངས་སུ་གྱུར་པ་ལས་གཤིན་རྗེའི་གཤེད་ནག་པོ། (ཞེས་པ་ནས།)རྐང་མཐིལ་གཉིས་སུ་དེའི་ངོ་བོ། ཧཱུཾ་ཡོངས་སུ་གྱུར་པ་ལས་གནོད་མཛེས་རྒྱལ་པོ། (ཞེས་པ་ནས།) རལ་གྲི་འཛིན་པ་ཁྲོ་བོ་བཅུ་པོ་ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྫེས་པ་ལ་སོགས་པ་ཁྲོ་བོའི་ཉམས་ཐམས་ཅད་དང་ལྡན་པར་གྱུར་པ་ཡོངས་སུ་རྫོགས་པར་གྱུར། རང་གི་སྤྱི་བོར་ཨོཾ་ལས་བྱུང་བའི་ཟླ་བའི་དཀྱིལ་འཁོར་ཡོངས་སུ་རྫོགས་པའི་ལྟེ་བར། (ཞེས་པ་ནས།) རྣམ་པར་སྣང་མཛད་སྤྱན་མ་དང་སྦྱོར་བའི་མདུན་ན་རང་ཉིད་གནས་པས། དཔལ་ལྡན་སངས་རྒྱས་སྐུ་འཆང་བ། (ཞེས་པ་ནས།) རྡོ་རྗེའི་སྐུ་ནི་མཛད་དུ་གསོལ། །ཅེས་རྣམ་སྣང་གཙོ་འཁོར་ལ་གསོལ་བ་བཏབ་པས་སྤྲོས་པའི་སྤྱན་མ་དང༌། (ཞེས་པ་ནས།) སྐུའི་དབང་ཕྱུག་ཐོབ་པར་གྱུར། སངས་རྒྱས་ཀུན་གྱི། (ཞེས་པ་ནས།)འདྲ་བར་ཤོག ཨོཾ་སརྦ། (ཞེས་པ་ནས།) ཨཱདྨ་ཀོ྅ཧཾ། ལྕེའི་དབུས་སུ། (ཞེས་པ་ནས།) སྐད་ཅིག་གིས་གསུང་རྡོ་རྗེ་འོད་དཔག་མེད་ཀྱི་ཚོགས། (ཞེས་པ་ནས།)མདུན་དུ་རང་ཉིད་གནས་པས། ཆོས་ཀྱི་གསུང་ལམ། (ཞེས་པ་ནས།) མཛད་དུ་གསོལ། ཞེས་འོད་དཔག་མེད་གཙོ་འཁོར་ལ་གསོལ་བ་བཏབ་པས། སྤྲོས་པའི་གོས་དཀར་མོ་དང༌། སྤྱན་དྲངས་པའི་འོད་དཔག་མེད་ཀྱི་ལྷའི་ཚོགས་གཉིས་པོ་ཐམས་ཅད། (ཅེས་པ་ནས།) ཐོབ་པར་གྱུར། རྡོ་རྗེ་ཆོས་ཀྱི། (ཞེས་པ་ནས།) འདྲ་བར་ཤོག ཨོཾ་སརྦ། (ཞེས་པ་ནས།) ཨཱདྨ་ཀོ྅ཧཾ། སྙིང་ཁའི་དབུས་སུ་(ཞེས་པ་ནས།) སྐད་ཅིག་གིས་ཐུགས་རྡོ་རྗེ་མི་བསྐྱོད་པའི་ཚོགས། (ཞེས་པ་ནས།)རང་ཉིད་གནས་པས། དཔལ་ལྡན་རྡོ་རྗེ་ཐུགས་འཆང་བ། (ཞེས་པ་ནས།)མཛད་དུ་གསོལ། ཅེས་མི་བསྐྱོད་པ་གཙོ་འཁོར་ལ་གསོལ་བ་བཏབ་པས། སྤྲོས་པའི་མཱ་མ་ཀཱི་དང༌། སྤྱན་དྲངས་པའི་མི་བསྐྱོད་པའི་ལྷའི་ཚོགས་སོ་གཉིས་པོ་ཐམས་ཅད་(ཅེས་པ་ནས།)ཐོབ་པར་གྱུར། ཀུན་ཏུ་བཟང་པོའི་(ཞེས་པ་ནས།)མཚུངས་པར་ཤོག ཨོཾ་སརྦ། (ཞེས་པ་ནས།) ཨཱདྨ་ཀོ྅ཧཾ། སྐུ་གསུང་ཐུགས་ཀྱི་རྡོ་རྗེ་གསུམ་མི་ཕྱེད་པ་རྡོ་རྗེ་འཆང་ཆེན་པོར་གྱུར། ཨོཾ་སརྦ་(ཞེས་པ་ནས།)ཨཱདྨ་ཀོ྅ཧཾ། རང་དམ་ཚིག་སེམས་དཔའ་རྡོ་རྗེ་འཆང་སྔོན་པོའི་ཐུགས་ཀར། (ཅེས་པ་ནས།)ལུས་རྒྱས་པར་བྱེད་པ། དེའི་ཐུགས་ཀར། (ཅེས་པ་ནས།)སྣང་བའི་ཕུང་པོ་ཆེན་པོ་ལྟ་བུར་གྱུར། དམ་ཚིག་སེམས་དཔའི་རལ་པའི་ཅོད་པན་ལ། རྡོ་རྗེ་འཆང་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། རྡོ་རྗེ་དབྱིངས་ཀྱི་དབང་ཕྱུག་མ་དང༌། (ཞེས་པ་ནས།) ཚིམ་པར་བྱེད་པར་གྱུར། སྙིང་ཁ་ནས་རང་རིགས་ཀྱི་རིག་མ་ཕྱུང༌། ཨོཾ་ཤཱུ་ནྱ་ཏཱ། (ཞེས་པ་ནས།) སྟོང་བར་གྱུར། སྟོང་བའི་ངང་ལས་ཁཾ་ལས་རྡོ་རྗེ་ཁཾ་གྱིས་མཚན་པ། དེ་ཡོངས་སུ་གྱུར་པ་ལས། རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི། (ཞེས་པ་ནས།) རལ་གྲི་འཛིན་པ། དབུ་སྐྲ་རལ་པ་ཕྱེད་བཅིངས་སུ་བྱས་པ། (ཞེས་པ་ནས།) དགའ་བས་རོལ་པ། དེའི་སྤྱི་གཙུག་ནས་སྐྲ་མཚམས་ཀྱི་བར་དུ་ཨོཾ་དཀར་པོ་ཡོངས་སུ་གྱུར་པ་ལས། རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། དཀར་ནག་དམར་བའི། (ཞེས་པ་ནས།)པད་ལྗང་ནོར་བུ་འཛིན་པ། ལྟེ་བར་ལཾ་ལས་སྤྱན་མ། (ཞེས་པ་ནས།) སྤྱི་གཙུག་ཏུ་ཏཱཾ་ལས་སྒྲོལ་མ། མིག་གཉིས་སུ་ཛཿལས་གཟུགས་རྡོ་རྗེ་མ་ལ་ས་སྙིང་གིས་འཁྱུད་པ། (ཞེས་པ་ནས།) བྷ་གར་ཁཾ་ལས་རེག་བྱ་རྡོ་རྗེ་མ་ལ་སྒྲིབ་སེལ་གྱིས་འཁྱུད་པ། ལག་པ་གཡས་ལ་ཧཱུཾ་ལས་རོ་ལངས་མ། (ཞེས་པ་ནས།)རྐང་མཐིལ་གཉིས་སུ་ཧཱུཾ་ལས་ས་འཛིན་ལྷ་མོ་ནག་མོ་རྣམས་སུ་གྱུར། (ཅེས་བརྗོད། རྒྱས་པར་བྱེད་ན། ཞལ་ཕྱག་སོགས་སྔར་ལུས་དཀྱིལ་བཞིན་བརྗོད།)རྣམ་སྣང་ནས་སྒྲིབ་སེལ་གྱི་བར་གྱི་ལྷ་ཐམས་ཅད་ཀྱང་རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། (ཅེས་དང༌།) ཁྲོ་མོ་བཅུ་པོ་ཐམས་ཅད་ཀྱང༌། དབུ་སྐྲ་དམར་སེར་གྱེན་དུ་བརྫེས་པ་ལ་སོགས་པ་ཁྲོ་མོའི་ཉམས་ཐམས་ཅད་ཡོངས་སུ་རྫོགས་པར་གྱུར། (ཅེས་བརྗོད།) རང་གི་གསང་གནས་མི་དམིགས་པ་ལས། (ཞེས་པ་ནས།) འདབ་མ་བརྒྱད་པ། བུ་ག་ཡི་གེ་ཕཊ྄་ཀྱིས་བཀག་པ། རྡོ་རྗེ་དང་བདྨའི་ནང་འོད་ཟེར་ལྔས་གང་བར་གྱུར། རང་ཉིད་རིན་འབྱུང་དུ་གྱུར། ཨོཾ་སརྦ། (ཞེས་པ་ནས།) ཨཱདྨ་ཀོ྅ཧཾ། རང་ཉིད་རྡོ་རྗེ་འཆང་དུ་གྱུར། ཧཱུཾ་སྙོམས་པར་འཇུག་པའི་ལས་ལ་གནས་པར་བྱས་པས། མཆོག་ཏུ་དགའ་བའི་བདེ་བ་ཐོབ། རང་ཉིད་དོན་གྲུབ་ཏུ་གྱུར། ཕཊ྄། ཨོཾ་སརྦ། (ཞེས་པ་ནས།) ཨཱདྨ་ཀོ྅ཧཾ། ལུས་དཀྱིལ་གྱི་ལྷ་ཐམས་ཅད་ཚིམས་ནས་ཞུ་བའི་ཐིག་ལེ་ཡུམ་གྱི་པདྨར་ཕབ་པ་དེ་ཉིད། དེ་བཞིན་གཤེགས་པ་རིགས་ལྔ་ལ་སོགས་པ་ལྷ་ཐམས་ཅད་ཀྱི་འབྱུང་གནས་སུ་གྱུར། ཐིག་ལེ་ཆ་གཅིག་བྷཱུཾ་དང་དེ་ཡོངས་སུ་གྱུར་པ་ལས། གཞལ་ཡས་ཁང་གྲུ་བཞི་སྒོ་བཞི་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པ་གདན་དང་བཅས་པར་གྱུར། ཐིག་ལེ་ཆ་གཅིག་གདན་དེ་རྣམས་ཀྱི་སྟེང་དུ་ཆ་སོ་གཉིས་སུ་གྱུར། དེ་རྣམས་ཡོངས་སུ་གྱུར་པ་ལས། ཨོཾ་ཨཱཿཧཱུཾ་ཧཱུཾ། ཨོཾ་ཨཱཿཁཾ་ཧཱུཾ། ཨོཾ་ཨཱཿཨོཾ་ཧཱུཾ། ཨོཾ་ཨཱཿསྭཱ་ཧཱུཾ། ཨོཾ་ཨཱཿཨཱཿཧཱུཾ། ཨོཾ་ཨཱཿཧཱ་ཧཱུཾ། ཨོཾ་ཨཱཿལཾ་ཧཱུཾ། ཨོཾ་ཨཱཿམཱཾ་ཧཱུཾ། ཨོཾ་ཨཱཿཔཾ་ཧཱུཾ། ཨོཾ་ཨཱཿཏཱཾ་ཧཱུཾ། ཨོཾ་ཨཱཿཛཿཧཱུཾ། ཨོཾ་ཨཱཿཧཱུཾ་ཧཱུཾ། ཨོཾ་ཨཱཿབཾ་ཧཱུཾ། ཨོཾ་ཨཱཿཧོཿཧཱུཾ། ཨོཾ་ཨཱཿམེེཾཧཱུཾ། ཨོཾ་ཨཱཿཐླཱིཾ་ཧཱུཾ། ཨོཾ་ཨཱཿཨོཾ་ཧཱུཾ། ཨོཾ་ཨཱཿཨོཾ་ཧཱུཾ། ཨོཾ་ཨཱཿཨོཾ་ཧཱུཾ། ཨོཾ་ཨཱཿཧཱུཾ་ཧཱུཾ། ཨོཾ་ཨཱཿཨོཾ་ཧཱུཾ། ཨོཾ་ཨཱཿསཾ་ཧཱུཾ། ཨོཾ་ཨཱཿཧཱུཾ་ཧཱུཾ། བཅུ་རྣམས་སུ་གྱུར། དེ་རྣམས་ཡོངས་སུ་གྱུར་པ་ལས། རྡོ་རྗེ་གཉིས། འཁོར་ལོ། རིན་པོ་ཆེ། པདྨ། སྣ་ཚོགས་རྡོ་རྗེ། འཁོར་ལོ། རྡོ་རྗེ། ཨུདྤལ། སྣ་ཚོགས་རྡོ་རྗེ། མེ་ལོང་དམར་པོ། པི་ཝང་སྔོན་པོ། དྲིའི་དུང་ཆོས། རོའི་སྣོད། ཀླུ་ཤིང་གི་མེ་ཏོག་སྡོང་བུ་དང་བཅས་པ་འཁོར་ལོས་མཚན་པ། འཁོར་ལོ་རིན་པོ་ཆེ་གཉིས། པདྨ་གཉིས། རལ་གྲི་གཉིས། དབྱུག་པ་རྡོ་རྗེ། པདྨ། སྣ་ཚོགས་རྡོ་རྗེ། རལ་གྲི། རྡོ་རྗེ། རྡོ་རྗེས་མཚན་པའི་དབྱུག་པ་སྔོན་པོ། རྡོ་རྗེས་མཚན་པའི་དབྱུག་པ་ནག་པོ། རྡོ་རྗེ་དང་རྡོ་རྗེ། དེ་རྣམས་ཡོངས་སུ་གྱུར་པ་ལས། ལྷ་སུམ་ཅུ་སོ་གཉིས་སུ་རིམ་གྱིས་གྱུར་པ་ནི། གདན་དབུས་མའི་སྟེང་དུ་རང་ཉིད་མི་བསྐྱོད་པ་མཐིང་ནག་མི་བསྐྱོད་པའི་དབུ་རྒྱན་ཅན། (ཅེས་པ་ནས།) ཡབ་སེམས་དཔའི་སྐྱིལ་མོ་ཀྲུང་གིས་བཞུགས་པར་གྱུར། (ཅེས་པའི་བར་སྔར་ཇི་ལྟ་བ་བཞིན་བསྐྱེད།) ཤར་དུ་རང་ཉིད་རྣམ་སྣང་དཀར་པོ། (ཞེས་པ་ནས།)པད་ལྗང་ནོར་བུ་འཛིན་པ། ཤར་ལྷོར་རང་ཉིད་སྤྱན་མ་དཀར་མོ། (ཞེས་པ་དང་།) རིམ་པ་གཉིས་པའི་ཤར་ལྷོར་རང་ཉིད་གཟུགས་རྡོ་རྗེ་མ། (ཞེས་པ་ནས།)སྐྱིལ་མོ་ཀྲུང་གིས་བཞུགས་པར་གྱུར། (ཅེས་པའི་བར་སྔར་བཞིན།) རང་ཉིད་ཤར་སྒོའི་གཡས་སུ་བྱམས་པ་དང༌། གཡོན་དུ་ས་སྙིང༌། (ཞེས་དང་།) རང་ཉིད་ལྷོ་སྒོའི་གཡས་སུ་ཕྱག་རྡོར་དང༌། གཡོན་དུ་ནམ་སྙིང༌། (ཞེས་དང་།) རང་ཉིད་ནུབ་སྒོའི་གཡས་སུ་འཇིག་རྟེན་དབང་ཕྱུག་དང༌། གཡོན་དུ་འཇམ་དཔལ། (ཞེས་དང་།) རང་ཉིད་བྱང་སྒོའི་གཡས་སུ་སྒྲིབ་སེལ་དང༌། གཡོན་དུ་ཀུན་བཟང༌། (ཞེས་པ་ནས།) སྐྱིལ་མོ་ཀྲུང་གིས་བཞུགས་པར་གྱུར། ཤར་སྒོར་རང་ཉིད་གཤིན་རྗེ། (ཞེས་པ་ནས།) ཚར་གཅོད་པའི་ཚུལ་གྱིས་བཞུགས་པར་གྱུར། མི་བསྐྱོད་པ་རང་གི་ཐུགས་ཀར་དྲངས། བཛྲ་དྷྲིཀ་ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས། (ཞེས་པ་ནས།) སླར་བྱོན། རང་གི་མདུན་ན་འདུག་པ་རང་གི་སྙིང་ཁར་ཞུགས་ནས་འདྲེས་པས། རང་རྡོ་རྗེ་འཆང་ཞི་བ་དེ་ཡོངས་སུ་གྱུར་པ་ལས་སྔར་གྱི་ཟླ་བ་ཉི་གདན་ལ་ཐིམ་པའི་སྟེང་ན། ཞེ་སྡང་རྡོ་རྗེ་སྐུ་མདོག་མཐིང་ནག ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་རྩེ་དགུ་པ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། འོད་དམར་པོ་འབར་ཞིང་འཁྲུག་པའི་དབུས་ན་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། རེག་བྱ་རྡོ་རྗེ་མ་རང་གི་ཐུགས་ཀར་དྲངས། སྤརྴ་བཛྲ་ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས། སེམས་ཅན་རེག་བྱ་ལ་ཞེན་པ་རྣམས་སྦྱངས། རྒྱལ་བ་རྣམས་རེག་བྱའི་བདེ་བས་མཆོད། སྤྲུལ་པ་རྣམས་གཅིག་ཏུ་འདུས། རེག་བྱ་རྡོ་རྗེ་མ་ཡེ་ཤེས་པ་དང་དབྱེར་མེད་དུ་འདྲེས། རང་གི་རིགས་བདག་ཡབ་ཡུམ་གྱི་བྱང་ཆུབ་སེམས་ཀྱིས་དབང་བསྐུར། སླར་བྱོན། སྔར་གྱི་རེག་བྱ་རྡོ་རྗེ་མ་ལ་ཐིམ་པར་གྱུར། རྣམ་པར་སྣང་མཛད་རང་གི་ཐུགས་ཀར་དྲངས། ཛི་ན་ཛི་ཀ་ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས། ཆོས་འཁོར་བསྐོར་བ་ལ་སོགས་པའི་སངས་རྒྱས་ཀྱི་མཛད་པ་མཛད། ཁྱད་པར་དུ་ཡང་སེམས་ཅན་གཏི་མུག་ཅན་རྣམས་ཀྱི་གཏི་མུག་སྦྱངས། རྣམ་པར་སྣང་མཛད་ཀྱི་གོ་འཕང་ལ་བཀོད། སྤྲུལ་པ་རྣམས་གཅིག་ཏུ་འདུས། རྣམ་པར་སྣང་མཛད་ཡེ་ཤེས་པ་དང་དབྱེར་མེད་དུ་འདྲེས། སེམས་ཅན་ནད་དང་གདོན་གྱིས་གདུངས་པ་རྣམས་ཞི་པར་མཛད། སྤྲུལ་པ་རྣམས་གཅིག་ཏུ་འདུས། (ཞེས་པ་ནས།) རིམ་པ་དང་པོའི་བྱང་ཤར་དུ་འཁོད། གཟུགས་རྡོ་རྗེ་མ། (ཞེས་པ་ནས།) སྔར་གྱི་རེག་བྱ་རྡོ་རྗེ་མའི་སྐབས་བཞིན་སྦྱར་ལ། རིམ་པ་གཉིས་པའི་བྱང་ཤར་དུ་འཁོད། བྱམས་པ་རང་གི་ཐུགས་ཀར་དྲངས། མཻ་ཏྲི་ཐུགས་ཀ་ནས་ཕྱིར་ཕྱུང་། ཕྱོགས་བཅུར་འཕྲོས། སེམས་ཅན་རྣམས་ཀྱི་རྩ་དང་རྒྱུས་པ་སྦྱངས། སྤྲུལ་པ་རྣམས་གཅིག་ཏུ་འདུས། (ཞེས་པ་ནས།)ཤར་སྒོའི་གཡས་སུ་འཁོད། སའི་སྙིང་པོ་རང་གི་ཐུགས་ཀར་དྲངས། (ཞེས་པ་ནས།) བྱང་སྒོའི་གཡོན་དུ་འཁོད། གཤིན་རྗེའི་གཤེད་རང་གི་ཐུགས་ཀར་དྲངས། ཡ་མཱནྟ་ཀྲིཏ་ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས། དབང་པོ་ལ་སོགས་པའི་གདོན་བཅོམ། སྤྲུལ་པ་རྣམས་གཅིག་ཏུ་འདུས། (ཞེས་པ་ནས།) ཤར་སྒོར་འཁོད། ཤེས་རབ་མཐར་བྱེད་རང་གི་ཐུགས་ཀར་དྲངས། (ཞེས་པ་ནས།) སླར་བྱོན། འོག་ཏུ་འཁོད། གཞལ་ཡས་ཁང་རང་གི་ཐུགས་ཀར་དྲངས། ཨོཾ་ཨཱཿཧཱུཾ། ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས། སྣོད་ཀྱི་འཇིག་རྟེན་གྱི། (ཞེས་པ་ནས།) ཐིམ་པར་གྱུར། བཟླས་བྱའི་སྔགས་ཀྱིས་བསྐོར་བའི་ལྷ་རྣམས་ཀྱི་ཐུགས་ཀའི་རང་རང་གི་ས་བོན་ལས་དཀྱིལ་འཁོར་གྱི་ལྷ་ཚོགས་སྤྲོས་ཏེ། འགྲོ་བའི་དོན་བྱས་ནས་སྔགས་དང་ལྷན་ཅིག་ཏུ་འཇུག་པའི་རླུང་གིས་རང་རང་གི་ས་བོན་ལ་འཇུག་པའི་སྤྲོ་བ་དང་བསྡུ་བའི་མཛད་པ་ཅན་དུ་གྱུར། ཨོཾ་ཨཱཿཧཱུཾ། ཨོཾ་ཨཱཿབཛྲ་དྷྲིཀ་ཧཱུཾ་ཧཱུཾ། ( ཞེས་སོགས་བཟླས་པ་བྱ། བཟླས་པ་རྫོགས་པ་ན།)
དེ་ནས་ཡབ་ཡུམ་སྙོམས་པར་ཞུགས་པའི་རྐྱེན་གྱིས། (ཞེས་པ་ནས།) ནཱ་ད་འོད་གསལ་དུ་ཐིམ་པར་གྱུར། དེ་ནས་ཚད་མེད་པ་བཞིའི་ངོ་བོར་གྱུར་པའི་ལྷ་མོ་བཞིས་གཙོ་བོ་མ་མཐོང་བས་གདུང་བའི་ཡིད་ཀྱིས་ལྟ་བར་འདོད་དེ། སྙན་པའི་གླུ་དབྱངས་ཀྱིས་བསྐུལ་བ་ནི། སེམས་ཅན་ཁམས་ན། (ཞེས་པ་ནས།) མཛད་དུ་གསོལ། རྡོ་རྗེའི་སྐུ་ཁྱེད། (ཅེས་པ་ནས།)མཛད་དུ་གསོལ། ཁྱོད་ནི་རྡོ་རྗེའི་གསུང་སྟེ། (ཞེས་པ་ནས།)དགྱེས་པར་མཛོད། ཁྱོད་ནི་རྡོ་རྗེའི་འདོད་པ། (ཞེས་པ་ནས།)བདག་ལ་དགྱེས་པར་མཛོད། ཅེས་བསྐུལ་བས། སྔོན་གྱི་སྨོན་ལམ་དང་ཐུགས་རྗེའི་ཤུགས་ཀྱིས་འོད་གསལ་ལས་སེམས་དཔའ་གསུམ་གྱི་བདག་ཉིད་ཅན་གྱི་སྐུར་བཞེངས་ཏེ། དཀྱིལ་འཁོར་བ་ཐམས་ཅད་ཀྱིས་མཐོང་བར་གྱུར། མི་བསྐྱོད་རྡོ་རྗེ་ཡེ་ཤེས་ཆེ། །(ཞེས་པ་ནས།)རྡོ་རྗེ་སེམས་དཔའ་ཕྱག་འཚལ་ལོ། །ཨོཾ་སརྦ་ཏ་ཐཱ་ག་ཏ་ཨརྒྷཾ་པཱུ་ཇ་མེ་གྷ་ས་མུ་དྲ་སྥ་ར་ཎ་ས་མ་ཡ་ཡེ་ཨཱཿཧཱུཾ། (ཞེས་པ་ནས།) ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུཾ། (ཞེས་པའི་བར་གྱིས་སྔར་བྱིན་གྱིས་བརླབས་པའི་མཆོད་པས་བདག་ཉིད་ལ་མཆོད།
དེ་ནས་ནང་མཆོད་གཏོར་མ་ལྟར་བྱིན་གྱིས་བརླབས། ཐོད་པ་ལག་པ་གཡས་པར་བཟུངས། བདག་བསྐྱེད་ཀྱི་སྐབས་སུ་དཔྲལ་བ་རང་ལ་བསྟན། མདུན་བསྐྱེད་མཆོད་པའི་སྐབས་སུ་དཔྲལ་བ་ཕར་བསྟན། ལག་པ་གཡོན་པའི་སྲིན་ལག་གིས་མེ་ལོང་ངམ་ས་ལ་སོགས་པ་ལ་ཆང་གི་ཆོས་འབྱུང་རྩེ་མོ་རང་ལ་བསྟན་པའི་དབུས་སུ་ཟླུཾ་སྐོར་གཅིག་དང་བཅས་པ་བྲི། ལག་པ་གཡོན་པའི་མཐེབ་སྲིན་སྦྱར་བས་ནང་མཆོད་གཡས་སྐོར་དུ་ལན་གསུམ་དཀྲུགས་ཏེ། བླ་མ་རྣམས་རང་གི་སྤྱི་གཙུག་ན་ཡར་ཁྲོམ་ཚོགས་སམ་མཐོ་རྩེགས་སུ་བཞུགས་པར་དམིགས་ལ། སྨིན་མཚམས་ཀྱི་ཐད་ནས་ལག་པ་ཁ་གྱེན་དུ་བལྟས་པས་འཐར་ཞིང་ངག་འདོན་འདི་ལྟར་བརྗོད་དོ། །)ལག་པ་གཡོན་པའི་མཐེ་བོང་ཀྵུཾ་ལས་ས་གཞི། མིང་མེད་སུཾ་ལས་རི་རབ་ཏུ་གྱུར་པས་རྒྱ་མཚོ་ཆེན་པོའི་དབུས་ནས་བདུད་རྩིའི་སྙིང་པོ་བླངས། མགྲོན་རྣམས་ཀྱི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་དུ་གྱུར། མཆོད་དོ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག་རྩ་བའི་དཔལ་ལྡན་བླ་མ་ཆེ་གེ་མོའི་ཞལ་དུ་ཨོཾ་ཨཱཿཧཱུཾ། རྒྱལ་བ་རྡོ་རྗེ་འཆང་གི་ཞལ་དུ་ཨོཾ་ཨཱཿཧཱུཾ། རྒྱལ་སྲས་བློ་གྲོས་རིན་ཆེན་གྱི། དཔལ་མགོན་འཕགས་པ་ཀླུ་སྒྲུབ་ཀྱི། རྒྱལ་སྲས་མ་ཏངྒི་པའི། གྲུབ་ཆེན་ཏཻ་ལོ་པའི། པཎ་ཆེན་ནཱ་རོ་ཏ་པའི། སྒྲ་བསྒྱུར་མར་པ་ལོ་ཙྪའི། མཚུར་སྟོན་དབང་གི་རྡོ་རྗེའི། འཁོན་སྟོན་གད་པ་ཀཱརྟིའི། སྒྲ་བསྒྱུར་ནམ་མཁའ་བཟང་པོའི། བྱ་སྒང་བ་བསོད་ནམས་རིན་ཆེན་གྱི། ཐུར་ལྷ་བ་ཚུལ་ཁྲིམས་སྐྱབས་ཀྱི། ཐང་སྤེ་བ་འཕགས་པ་སྐྱབས་ཀྱི། གསེར་སྡིངས་པ་གཞོན་ནུ་འོད་ཀྱི། ཀུན་མཁྱེན་ཆོས་སྐུ་འོད་ཟེར་གྱི། ཀུན་མཁྱེན་འཕགས་པ་འོད་ཀྱི། ཆོས་རྗེ་བུ་སྟོན་རིན་ཆེན་གྲུབ་ཀྱི། ཁྱུང་པོ་ལྷས་པ་གཞོན་ནུ་བསོད་ནམས་ཀྱི། ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་ཞལ་དུ་ཨོཾ་ཨཱཿཧཱུཾ། སླར་ཡང་རྒྱལ་བ་རྡོ་རྗེ་འཆང་གི། རྒྱལ་སྲས་ཕྱག་ན་རྡོ་རྗེའི། རྒྱལ་པོ་ཨིནྡྲ་བྷཱུ་ཏིའི། ཀླུ་ལས་སྐྱེས་པའི་རྣལ་འབྱོར་མའི། མངའ་བདག་བི་སུ་ཀལྤའི། དཔལ་ལྡན་ས་ར་ཧ་པའི། དཔལ་མགོན་འཕགས་པ་ཀླུ་སྒྲུབ་ཀྱི། དཔལ་ལྡན་ཟླ་བ་གྲགས་པའི། སློབ་པའི་རྡོ་རྗེའི། གྲུབ་ཆེན་ནག་པོ་སྤྱོད་པའི། བླ་མ་སྤྲིན་གྱི་ཤུགས་ཅན་གྱི། རྗེ་རིན་པོ་ཆེ་འགོས་ཀྱི། མང་ར་བ་སེང་གེ་རྒྱལ་མཚན་གྱི། རྔོག་ཡེ་ཤེས་སེང་གེའི། རྔོག་ཨཱརྱ་དེ་བའི། གླན་ཙྪ་པ་ཉི་མ་ལྕམ་གྱི། ལྟག་པ་རིན་ཆེན་གྲགས་ཀྱི། ཐུར་ལྷ་བ་ནས་བུ་སྟོན་པར་སྔར་ལྟར། བླ་མ་དམ་པ་བསོད་ནམས་རྒྱལ་མཚན་གྱི། མཉམ་མེད་རྗེ་བཙུན་རེད་མདའ་པའི། ཆོས་ཀྱི་རྒྱལ་པོ་ཙོང་ཁ་པ་ཆེན་པོའི། གཞན་ཡང་དབང་བསྐུར་རྒྱུད་བཤད་མན་ངག་གནང་བའི་བླ་མ་དམ་པ་བརྒྱུད་པ་དང་བཅས་པའི་ཞལ་དུ་ཨོཾ་ཨཱཿཧཱུཾ། (མཐེབ་སྲིན་གྱིས་ནང་མཆོད་སྙིང་ཁའི་ཐད་ནས་གཏོར་ཅིང༌། ངག་ཏུ་འདི་ལྟར།) རང་གི་སྙིང་ཁའི་འོད་ཟེར་གྱིས་དཀྱིལ་འཁོར་གྱི་ལྷ་ཚོགས་སྤྱན་དྲངས་ཏེ། ཆོས་འབྱུང་གི་དབུས་སུ་མེ་ལོང་གི་ནང་དུ་གཟུགས་བརྙན་བཞིན་གསལ་བར་གྱུར། བཛྲ་དྷྲིཀ་ཨོཾ་ཨཱཿཧཱུཾ། (ཞེས་པ་ནས།) སུཾབྷ་རཱ་ཛ་ཨོཾ་ཨཱཿཧཱུཾ། གཞན་ཡང་རྒྱུད་སྡེ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་ཐམས་ཅད་ཀྱི་ཞལ་དུ་ཨོཾ་ཨཱཿཧཱུཾ། (དེ་ནས་རང་གི་ལྕེ་རྩེ་སྨིན་མཚམས་སྤྱི་གཙུག་གསུམ་དུ་ཆང་གི་ཐིགས་རེ་བྱས་ལ།) ཨོཾ་ཨཱཿཧཱུཾ། (ཞེས་བརྗོད། དེ་ནས་མཆོད་སྦྱིན་གྱི་ཕྱག་རྒྱས་ལྟེ་བའི་ཐད་ནས་གཏོར་ལ།)སྔོན་སངས་རྒྱས་མཐོང་བ། དམ་པའི་ཆོས་ཐོས་པ། འཕགས་པའི་དགེ་འདུན་ལ་བརྟེན་པ། བསྟན་པ་དང་འཁོར་རྣམ་བཞི་སྐྱོང་བར་ཞལ་གྱིས་བཞེས་པ་བླ་མ་གོང་མ་རྣམས་ཀྱིས་བསྟེན་ཅིང་བསྒྲུབས་པའི་བསྲུང་མ་དམ་ཚིག་ཅན་རྣམས་ཀྱི་ཞལ་དུ་ཨོཾ་ཨཱཿཧཱུཾ། (པུས་མོའི་ཐད་ནས་གཏོར་ལ།) ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། དུར་ཁྲོད་ཆེན་པོ་བརྒྱད་ན་གནས་པའི་དཔའ་བོ་དང་རྣལ་འབྱོར་མ་དང༌། ཕྱོགས་སྐྱོང་དང་ཞིང་སྐྱོང་དང་ཀླུ་ལ་སོགས་པ་ཐམས་ཅད་ཀྱི་ཞལ་དུ་ཨོཾ་ཨཱཿཧཱུཾ། གཞི་བདག་གཉུག་མར་གནས་པ་དང་སེམས་ཅན་ཐམས་ཅད་ལྷར་གྱུར་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། (ཞེས་བརྗོད། ནང་མཆོད་རང་གི་ལྕེ་ལ་བཞག་ལ།) ཨོཾ་ཨ་མྲྀ་ཏ་སྭ་ད་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། མགྲོན་རྣམས་ཡེ་ཤེས་ཀྱི་བདུད་རྩིས་མཉེས་པར་གྱུར། རང་གི་གསང་གནས་མི་དམིགས་པ་ལས། (ཞེས་པ་ནས།) མཆོད་པའི་ང་རྒྱལ་འཛིན་པའི་བར་སྔར་བཞིན་བྱས་ནས། ལྷ་ཐམས་ཅད་མཆོག་ཏུ་དགའ་བའི་བདེ་བ་ཆེན་པོས་མཉེས་ཤིང་ཚིམ་པར་གྱུར། (ཅེས་པ་གསང་བས་མཆོད།) ཐུགས་ཀའི་ཧཱུཾ་གི་འོད་ཟེར་གྱིས་རྣམ་སྣང་ནས་གནོད་མཛེས་ཀྱི་བར་གྱི་ལྷ་རྣམས་སྤྱན་དྲངས་ཏེ། རང་གི་སྤྱི་བོ་ལ་སོགས་པའི་གནས་རྣམས་སུ་འཁོད་པ་ནི། སྤྱི་བོར་རྣམ་སྣང་(ཞེས་པ་ནས།)བརླའི་རྩ་བར་དོན་གྲུབ། ལྟེ་བར་སྤྱན་མ། (ཞེས་པ་ནས།) སྤྱི་གཙུག་ཏུ་སྒྲོལ་མ། མིག་གཉིས་སུ་ས་སྙིང༌། (ཞེས་པ་ནས།) སྤྱི་གཙུག་ཏུ་བྱམས་པ། མིག་གི་སྒོར་གཟུགས་རྡོ་རྗེ་མ། (ཞེས་པ་ནས།) ཁའི་སྒོར་རོ་རྡོ་རྗེ་མ། ལག་པ་གཡས་ལ་གཤིན་རྗེའི་གཤེད། (ཅེས་པ་ནས།) རྐང་མཐིལ་གཉིས་སུ་གནོད་མཛེས་རྒྱལ་པོ། གཞལ་ཡས་ཁང་གི་ཆ་སོ་སོ་ཡང་རང་གི་ལུས་ཀྱི་ཆ་སོ་སོ་ལ་ཐིམ་པར་གྱུར། ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས། (ཞེས་པ་ནས།) རྡོ་རྗེ་འཆང་དུ་གྱུར་པ་རྣམས་རང་གི་འོད་ཟེར་གྱིས་དྲངས་ནས་རང་ལ་ཐིམ་པར་གྱུར། (ཅེས་བརྗོད་པར་བྱའོ། །
ཐུན་གྱི་མཐར་གཏོར་མ་གཏོང་བའི་ཚུལ་ནི། དཀྱིལ་འཁོར་གྱི་ལྷ་དང་ཕྱོགས་སྐྱོང་གི་གཏོར་མ་གཉིས་རིམ་པ་བཞིན་ཆང་ཆུ་ནང་མཆོད་བྱིན་གྱིས་བརླབས་པས་སྦྱངས་ནས།) ཨོཾ་ཨཱཿབིགྷྣནྟ་ཀྲིཏ་ཧཱུཾ། ཨོཾ་ཤཱུ་ནྱ་ཏཱ། (ཞེས་པ་ནས།) ཨཱདྨ་ཀོ྅ཧཾ། སྟོང་བར་གྱུར། སྟོང་བའི་ངང་ལས་ཧཱུཾ་ཡཾ་ཧཱུཾ་གི་ཡཾ་སྔོ་སྐྱ་ལས་བྱུང་བའི་རླུང་གི་དཀྱིལ་འཁོར་ལྗང་སྔོན་ཟླ་གམ་ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། དེའི་སྟེང་དུ་ཧཱུཾ་རཾ་ཧཱུཾ་གི་རཾ་དམར་པོ་ལས་བྱུང་བའི། (ཞེས་པ་ནས།) འདབ་མ་བརྒྱད་པ་ཨས་མཚན་པ། དེའི་དབུས་སུ་ཧཱུཾ་ལས་མིའི་ཤ་ཧཱུཾ་གིས་མཚན་པ། ཤར་དུ་བྲུཾ་ལས་གླང་པོ་ཆེའི་ཤ་བྲུཾ་གྱིས་མཚན་པ། ལྷོར་ཨཾ་ལས་རྟའི་ཤ་ཨཾ་གྱིས་མཚན་པ། ནུབ་ཏུ་ཛྲིཾ་ལས་བ་གླང་གི་ཤ་ཛྲིཾ་གྱིས་མཚན་པ། བྱང་དུ་ཁཾ་ལས་ཁྱིའི་ཤ་ཁཾ་གྱིས་མཚན་པ། སླར་ཡང་དབུས་སུ་ཧཱུཾ་ལས་དྲི་ཆུ་ཧཱུཾ་གིས་མཚན་པ། ཤར་དུ་བྲུཾ་ལས་དྲི་ཆེན་བྲུཾ་གྱིས་མཚན་པ། ལྷོར་ཨཾ་ལས་རཀྟ་ཨཾ་གྱིས་མཚན་པ། ནུབ་ཏུ་ཛྲིཾ་ལས་བྱང་སེམས་དཀར་པོ་ཛྲིཾ་གྱིས་མཚན་པ། བྱང་དུ་ཁཾ་ལས་ཤ་ཆེན་ཁཾ་གྱིས་མཚན་པ། བདུད་རྩི་ལྔ་ལ་ཨོཾ་ཡིག་གིས་མཚན་པ། དེའི་སྟེང་གི་བར་སྣང་ལ། (ཞེས་པ་ནས།)ཤེལ་ལྟར་དག་པར་གྱུར། པདྨ་ཨཱཿདང་བཅས་པ། (ཞེས་པ་ནས།)ཨོཾ་ཡིག་གི་འོད་ཟེར་ལྕགས་ཀྱུ་ལྟ་བུས། (ཞེས་པ་ནས།) སྤེལ་བར་འགྱུར། ཨོཾ་ཨཱཿཧཱུཾ། ཞེས་པ་ལན་བདུན་བརྗོད། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུ་ལྟ་བུས། ཁྲོ་བོ་བཅུ་དང་བཅས་པའི་བསྲུང་བའི་འཁོར་ལོ་རྩིབས་བཅུ་པའི་ལྟེ་བའི་ནང་དུ་འདུས་པའི་དཀྱིལ་འཁོར་རྟེན་དང་བརྟེན་པར་བཅས་པ་སྤྱན་དྲངས་ཤིང༌། བསྲུང་འཁོར་གྱི་ཕྱི་རོལ་ཏུ། (ཞེས་པ་ནས།)སེམས་ཅན་ཐམས་ཅད་བཀུག་པའི་གཞལ་ཡས་ཁང་གི་དབུས་སུ་མི་བསྐྱོད་པ་ཡབ་ཡུམ། ཤར་དུ་རྣམ་སྣང་། (ཞེས་པ་ནས།) འོག་ཏུ་གནོད་མཛེས་རྒྱལ་པོ། ཕྱིའི་ཤར་དུ་རྡོ་རྗེ་མཚོན་ཆ་སེར་པོ། (ཞེས་པ་ནས།) འདུས་པའི་ལྷ་ཤེས་རབ་མ་དང་བཅས་པའི་སྐུར་བཞེངས་པའི་མགྲོན་རྣམས་ཀྱི་ལྗགས་ཧཱུཾ་ལས་བྱུང་བའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་རྣམས་སུ་གྱུར། ཨོཾ་ཨཱཿཧྲཱིཿ(ཞེས་སོགས་ཀྱིས་ཆུ་བཞི་ཕུལ་ནས་དྲིལ་བུ་དཀྲོལ་ཅིང༌།) ཨ་ཨཱཿབཛྲ་དྷྲིཀ་ཧཱུཾ། (ཞེས་པ་ནས།)རཀྵ་ཙ་ཀུ་རུ་སྭཱཧཱ། ཨོཾ་ཨཱཿདུས་གསུམ་སྐྱེས་པ་ཀུན་དང༌། (ཞེས་པ་ནས།) བསྲུང་བར་མཛད་དུ་གསོལ་ཧཱུཾ་སྭཱཧཱ། ཨོཾ་ཨཱཿཧྲཱིཿ པྲ་ཝ་ར་སད་ཀ་རཾ་ཨཱཉྩ་མ་ཎཾ་པྲ་ཏཱིཙྪ་ཧཱུཾ་སྭཱཧཱ། ཨོཾ་ཨཱཿཧྲཱིཿཔྲ་ཝ་ར་སད་ཀ་རཾ་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། ཨོཾ་བཛྲ་ཏཾ་པུ་ལ་ཧཱུཾ་སྭཱཧཱ། ཨོཾ་སརྦ་ཏ་ཐཱ་ག་ཏ་པུཥྤཾ་པྲ་ཏཱིཙྪ་ཧཱུཾ་སྭཱཧཱ། (ཞེས་པ་ནས།) ཤཔྟ་པྲ་ཏཱིཙྪ་ཧཱུཾ་སྭཱཧཱ། བཛྲ་དྷྲིཀ་ཨོཾ་ཨཱཿཧཱུཾ། (ཞེས་པ་ནས།) སུཾབྷ་རཱ་ཛ་ཨོཾ་ཨཱཿཧཱུཾ། ཨོཾ་ད་ཤ་དི་ཀ་ལོ་ཀ་པཱ་ལ་ས་པ་རི་ཝཱ་ར་པུཥྤཾ། (ཞེས་པ་ནས།)ཤཔྟ་པྲ་ཏཱིཙྪ་ཧཱུཾ་སྭཱཧཱ། ཨོཾ་ད་ཤ་དི་ཀ་ལོ་ཀ་པཱ་ལ་ས་པ་རི་ཝཱ་ར་ཨོཾ་ཨཱཿཧཱུཾ། ཨོཾ་བཛྲ་ས་ཏྭ་ས་མ་ཡ། (ཞེས་པ་ནས།) མ་ཧཱ་ས་མ་ཡ་ས་ཏྭ་ཨཱཿཧཱུཾ་ཕཊ྄། མ་རྙེད་ཡོངས་སུ་མ་ཤེས་དང༌། (ཞེས་པ་ནས།) བཟོད་མཛད་རིགས། ཨོཾ་ཡོ་ག་ཤུདྡྷཱ་སརྦ། (ཞེས་པ་ནས།)ཤུདྡྷོ྅ཧཾ། ཨོཾ་ཨཱཿཧཱུཾ་བཛྲ་མུཿ
དགེ་བ་འདི་ཡིས་མྱུར་དུ་བདག ། (ཅེས་པ་ནས།) སྤྱོད་དེ་གཉིས་ཀའང་བདག་སྤྱོད་ཤོག ། (ཅེས་བརྗོད་པར་བྱས་ཏེ་ལངས་ནས་སྤྱོད་ལམ་ལ་འཇུག་པར་བྱའོ། །)
དཔལ་ལྡན་འདུས་པའི་སྒྲུབ་ཐབས་ཀྱི་ཆོ་གའི་ངག་འདོན་གྱི་ཚུལ་གོ་བདེ་བར་བརྗོད་པའི་ལྷན་ཐབས་རྗེ་རིན་པོ་ཆེ་རྒྱལ་བ་གཉིས་པ་རང་ཉིད་ཀྱི་གསུང་ངག་ལྟར། མང་དུ་ཐོས་པའི་བཙུན་པ་དགེ་ལེགས་དཔལ་བཟང་པོས། བློ་དམན་པ་དག་ལ་ཕན་གདགས་པའི་སླད་དུ་ཡི་གེར་བྲིས་པའོ། ། མངྒལཾ། །
