༄༅། །རྗེ་བཙུན་མ་ཡིད་བཞིན་འཁོར་ལོའི་སྒོ་ནས་ཚེ་དབང་བསྐུར་ཚུལ་བླ་མ་དམ་པའི་མན་ངག་འཆི་མེད་བདུད་རྩིའི་ཆུ་རྒྱུན་ཞེས་བྱ་བ་བཞུགས་སོ། །
ན་མཿཨཱརྱ་ཏཱ་རེ་བྷྱཿ
རྒྱལ་ཀུན་འཕྲིན་ལས་གཅིག་ཏུ་བསྡུས་པའི་དཔྱིད། །
ཏཱཾ་ཡིག་ཟླ་ཞུན་འཕྲོ་འདུའི་སྒྱུ་མའི་གར། །
འཇོ་སྒེག་ལང་ཚོར་དཔལ་ཡོན་མཛེས་པའི་དཔལ། །
ཚེ་སྦྱིན་ལྷ་མོས་ཤིས་པའི་དཔལ་སྩོལ་ཅིག །
གང་དེའི་ཐུན་མོང་མིན་པའི་གདམས་པའི་སྲོལ། །
མཚན་ལྡན་དམ་པའི་སྙན་ནས་སྙན་ཁུང་དུ། །
རིམ་བརྒྱུད་སྙིང་གི་ཡོལ་གོར་གཏམས་པའི་རྒྱུན། །
བརྗེད་འཕངས་ཡི་གེའི་ལམ་དུ་སྤེལ་ལ་སྤྲོ། །
དེ་ལ་འདིར་བྱིན་རླབས་ཉེ་བརྒྱུད་ཐུན་མོང་མ་ཡིན་པའི་ལུགས་ཀྱི་རྗེ་བཙུན་མ་འཕགས་མ་སྒྲོལ་མ་ཡིད་བཞིན་འཁོར་ལོ་ལ་བརྟེན་ནས་ཚེ་དབང་བསྐུར་བའི་ཆོ་ག་ལ་གསུམ། སྔོན་འགྲོ། དངོས་གཞི། མཇུག་གི་བྱ་བའོ། །
དང་པོ་ནི། ཡིད་མཐུན་གྱི་གནས་སུ་བྲིས་འབུར་གྱི་སྐུ་ཅི་རིགས་བཀྲམ། སྟེགས་ཀྱི་ཁར་མཎྜལ་པདྨ་འདབ་བརྒྱད་ཀྱི་སྟེང་དུ་ཚེ་གཏོར་པད་འདབ་དཀར་པོ་རྗེ་བཙུན་མའི་སྐུ་ཙག་དང་བཅས་པ་བཞུགས། དེའི་གཡས་སུ་ཤེལ་ལམ་དངུལ་གྱི་ཕོར་བར་འོ་མ་ལ་ཀ་ར་བཏབ་པའི་ཚེའི་བདུད་རྩི། གཡས་སུ་ཚེ་རྫས་བཏབ་པའི་ཚེ་རིལ་རྣམས་ཕྱག་ལེན་ལྟར་བཤམས། དེའི་མདུན་དུ་ཟླུམ་གཏོར་དཀར་པོ་པད་འདབ་ཅན་དང་། བདག་མདུན་གྱི་ཆུ་གཉིས་ཉེར་སྤྱོད་སོགས་བཤམས། རང་གི་མདུན་དུ་རྡོར་དྲིལ། ལས་བུམ། འཐོར་ནས་སོགས་ཡོ་བྱད་རྣམས་སྟ་གོན་བྱའོ། །
གཉིས་པ་དངོས་གཞི་ལ་གསུམ། བདག་བསྐྱེད། མདུན་བསྐྱེད། ཚེ་དབང་བསྐུར་བའི་ཚུལ་ལོ། །དང་པོ་ལ། སྐྱབས་སུ་འགྲོ་བ་ནི། མདུན་གྱི་ནམ་མཁར་སྐྱབས་ཡུལ་རྣམས་དང་། མཐའ་སྐོར་དུ་སེམས་ཅན་ཐམས་ཅད་འཁོད་པར་མོས་ལ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། ། ཞེས་ལན་གསུམ་མམ་བདུན་སོགས་ཀྱི་མཐར། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། ། ཞེས་བརྗོད།
སེམས་བསྐྱེད་པ་ནི། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་ཚེ་སྦྱིན་ཡིད་བཞིན་འཁོར་ལོའི་བསྒོམ་བཟླས་ཉམས་སུ་བླང་བར་བགྱིའོ། ། ཞེས་ལན་གསུམ་སོགས་བརྗོད།
དེ་ནས། རང་ཉིད་སྐད་ཅིག་གིས་རྗེ་བཙུན་མར་གསལ་བའི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཏཱཾ་ཡིག་དཀར་པོ། དེ་ལས་འོད་ཟེར་འཕྲོས་པས། རང་བཞིན་གྱི་གནས་ནས་བླ་མ་ཚེ་དཔག་མེད་རིགས་ཀྱི་བདག་པོར་བཞུགས་པའི་རྗེ་བཙུན་མ་ཡིད་བཞིན་འཁོར་ལོ་ལ་ཚེ་ཁྲིད་བརྒྱུད་པའི་བླ་མ་རྣམས་དང་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་ༀ་བཛྲ་ས་མཱ་ཛཿ ཞེས་པས་ཚོགས་ཞིང་སྤྱན་དྲངས། ན་མོ་གུ་རུ་བྷྱཿ ན་མ་ཨཱརྱ་ཏཱ་རེ་ས་པ་རི་ཝཱ་ར་བྷྱཿ ཞེས་པས་ཕྱག་བྱ། ༀ་གུ་རུ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་ནས། ཤཔྟ་པྲ་ཏཱིཙྪ་སྭཱཧཱའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། ། ཞེས་སོགས་ཀྱིས་རྒྱུན་བཤགས་ལན་གསུམ་བྱ་ཞིང་། སེམས་ཅན་ཐམས་ཅན་བདེ་བ་དང་། ཞེས་སོགས་ཚད་མེད་བཞི་བསྒོམ།
ༀ་སྭ་བྷཱ་ཝ་ཤུདྡྷཱཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཏཱཾ་ཡིག་དཀར་པོ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་བ་ལས་རང་ཉིད་རྗེ་བཙུན་མ་ཡིད་བཞིན་འཁོར་ལོ་སྐུ་མདོག་སྟོན་ཀའི་ཟླ་བ་ལྟར་དཀར་ཞིང་ནོར་བུ་ཆུ་ཤེལ་དྲི་མ་མེད་པ་ལྟར་དྭངས་ཤིང་འོད་འཕྲོ་བ། ཞལ་གཅིག་ཕྱག་གཉིས་སྤྱན་གསུམ་དང་ལྡན་པ། ལང་ཚོ་བཅུ་དྲུག་ལོན་པའི་ན་ཚོད་ཅན། ཕྱག་གཡས་མཆོག་སྦྱིན་གྱི་ཕྱག་རྒྱ་མཛད་ཅིང་། གཡོན་ཨུཏྤལ་དཀར་པོའི་ཡུ་བ་མཐེབ་སྲིན་གྱིས་ཐུགས་ཀར་བཟུང་བའི་འདབ་མ་སྙན་གྱི་ཐད་ཀར་དུས་གསུམ་གྱི་སངས་རྒྱས་མཚོན་པའི་བརྡར་རྩ་བ་གཅིག་ལ་རྩེ་མོ་གསུམ་དུ་གྱེས་པའི་དབུས་ཀྱི་མེ་ཏོག་ཁ་ཕྱེ་བ། གཡས་འབྲས་བུ། གཡོན་གང་བུའི་རྣམ་པར་ཡོད་པ་དབུ་སྐྲ་ཐོན་མཐིང་རལ་བའི་ཟུར་ཕུད་ལྟག་པར་བཅིངས་ཤིང་། ལན་བུ་རིང་དུ་འཕྱང་བ། ནུ་འབུར་རྒྱས་ཤིང་། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དར་སྣ་ཚོགས་ཀྱི་སྟོད་གཡོགས་དང་། དར་དམར་པོའི་ཤམ་ཐབས་ཅན། ཕྱག་ཞབས་ཀྱི་མཐིལ་རྣམས་ལ་སྤྱན་རེ་རེ་སྟེ་ཡེ་ཤེས་ཀྱི་སྤྱན་བདུན་མངའ་བ། ཟླ་བའི་དཀྱིལ་འཁོར་ལ་སྐུ་དྲང་པོར་བརྟེན་ཅིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཏཱཾ་ཡིག་དཀར་པོ་ལ་ཧཱུཾ་སྔོན་པོས་མཚན་པར་གྱུར། ཐུགས་ཀའི་ས་བོན་ལས་འོད་ཟེར་འཕྲོས་པས་རང་བཞིན་གྱི་གནས་ནས་རྗེ་བཙུན་མ་ཡིད་བཞིན་འཁོར་ལོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ༀ་བཛྲ་ས་མཱ་ཛཿ ཞེས་པས་སྤྱན་དྲངས། ཛཿཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་རྒྱལ་བ་ཚེ་དཔག་མེད་ཀྱིས་དབུ་བརྒྱན་པར་གྱུར་པར་བསམ།
མཆོད་པ་རྣམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ནས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའ་དང་མཉམ་པ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ༀ་ཨརྒྷཾ་ཨཱཿཧཱུཾ། ནས། ཤཔྟ་ཨཱཿཧཱུཾ་གི་བར་གྱིས་བྱིན་གྱིས་བརླབས། རང་གི་སྙིང་ག་ནས་སྤྲོས་པའི་མཆོད་པའི་ལྷ་མོ་རྣམས་ཀྱིས་མཆོད་པར་བསམས་ལ། ༀ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཡེ་སྭཱཧཱ། ནས། ཤཔྟའི་བར་གྱིས་མཆོད། གང་གིས་ཁྱོད་ཞབས་པདྨོ་གུས་མཆོད་ནས། །ཏཱ་རེ་ལ་སོགས་རིག་སྔགས་ཟློས་ཙམ་གྱིས། །འཆི་མེད་ཚེ་དང་ཡེ་ཤེས་བསོད་ནམས་སོགས། །ཅི་འདོད་དངོས་གྲུབ་སྩོལ་ལ་ཕྱག་འཚལ་ལོ། ། ཞེས་བསྟོད། ལྷའི་སྐུ་སྣང་སྟོང་དབྱེར་མེད་ལ་སེམས་གཏད་དེ་ཇི་ཙམ་གནས་ཀྱི་བར་མཉམ་པར་བཞག །
དེ་ནས། རང་ཉིད་འཕགས་མ་སྒྲོལ་དཀར་དུ་གསལ་བའི་སྙིང་གར་འཁོར་ལོ་དཀར་པོ་རྩིབས་བརྒྱད་པ་ལྟེ་བ་དང་མུ་ཁྱུད་རིམ་པ་གསུམ་དང་བཅས་པ་ལྟེ་བར་ཟླ་བའི་སྟེང་དུ་རང་གི་སེམས་ཏཱཾ་ཡིག་དཀར་པོའི་མཐར་ༀ་དང་ཧཱའི་བར་དུ་ཆུད་པའི་སྤེལ་ཚིག་གིས་བསྐོར་བ་རྩིབས་བརྒྱད་ལ་ཏཱ་རེ་ཏུཏྟཱ་རེ་ཏུ་རེ་སྭཱ་ཞེས་པའི་ཡིག་འབྲུ་བརྒྱད། མུ་ཁྱུད་ནང་མ་ལ་ཨཱ་ལི་གཡོན་སྐོར། བར་པ་ལ་ཀཱ་ལི་གཡས་སྐོར། ཕྱི་མ་ལ་རྟེན་འབྲེལ་སྙིང་པོ་གཡས་སྐོར་དུ་འཁོད་པའི་ས་བོན་དང་ཡིག་འབྲུ་ཐམས་ཅད་འོད་ཟེར་བདུད་རྩིའི་རང་བཞིན་ཟིལ་བ་ཕྲོམ་མེ་བ་དང་། རང་གི་སྤྱི་བོར་རིགས་བདག་རྒྱལ་བ་ཚེ་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་ཀྱིས་གསེར་གྱི་བུམ་པ་འཆི་མེད་ཚེའི་བདུད་རྩིའི་རྒྱུན་གྱིས་གང་བ་མཉམ་གཞག་གི་སྟེང་ན་འཛིན་པ། དར་དང་རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེ་སྐྱིལ་ཀྲུང་གིས་བཞུགས་པའི་ཐུགས་ཀར་ཧྲཱིཿཡིག་དམར་པོས་མཚན་པ། དེ་ལས་འོད་ཟེར་དམར་པོ་ལྕགས་ཀྱུ་ལྟ་བུ་ཕྱོགས་བཅུར་འཕྲོས། རང་གི་ཚེ་མི་དང་མི་མ་ཡིན་རྣམས་ཀྱིས་འཕྲོག་པ་དང་། བརྐུས་པ་དང་། ཡར་བ་དང་། འཐོར་བ་ཐམས་ཅད་དང་། འབྱུང་བ་ཆེན་པོ་ལྔའི་བཅུད། སེམས་ཅན་ཐམས་ཅད་ཀྱི་ཚེ་དང་བསོད་ནམས། སྲིད་པ་གསུམ་གྱི་བཀྲག་མདངས་གཟི་བརྗིད་སོགས་འཇིག་རྟེན་ཁམས་ཀྱི་དཔལ་འབྱོར་ཕུན་སུམ་ཚོགས་པ་ཐམས་ཅད་དང་། བླ་མ་རྒྱལ་བ་སྲས་བཅས་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཁ་དོག་དང་རྣམ་པ་སྣ་ཚོགས་པའི་བདུད་རྩི་འོད་ཟེར་དང་བཅས་པའི་རྣམ་པར་བསྡུས་ཏེ་བཀུག །ཕྱག་གི་བུམ་པའི་ནང་དུ་ཐིམ། ཐིམ་པ་ལས་ཀྱང་བདུད་རྩི་དཀར་ཆིལ་གྱིས་ལུད་ནས་རང་གི་སྤྱི་བོའི་ཚངས་བུག་ནས་ཞུགས་ཏེ་སྙིང་གའི་འཁོར་ལོ་སྔགས་ཕྲེང་ས་བོན་དང་བཅས་པ་ལ་ཐིམ། དེ་ལས་བདུད་རྩིའི་རྒྱུན་བབས་པ་ལུས་ཀྱི་ནང་ཐམས་ཅད་གང་ཞིང་ཕྱི་ཐམས་ཅད་བཀྲུས་པས། ཐོག་མེད་ནས་བསགས་པའི་སྡིག་སྒྲིབ་ནད་གདོན་ཚེའི་བར་ཆད་དང་བཅས་པ་ཐམས་ཅད་བྱང་ཞིང་དག །ཚེ་དང་བསོད་ནམས་དམ་སྡོམ་ཉམས་པ་ཐམས་ཅད་སོར་ཆུད། འཆི་མེད་ཚེའི་དངོས་གྲུབ་ཐོབ་པར་གྱུར་པར་བསམས་ལ། ༀ་ཏཱ་རེ་ཏུཏྟཱ་རེ་ཏུ་རེ་མ་མ་ཨ་ཡུ་པུཎྱེ་ཛྙཱ་ན་པུཥྚིཾ་ཀུ་རུ་སྭཱཧཱ། ཞེས་བཟླའོ། །
དེ་ནས། སླར་ཡང་སྙིང་གའི་སྔགས་འཁོར་ལས་འོད་ཟེར་དཀར་པོའི་ཚོགས་དཀར་ཕྲོམ་གྱིས་འཕྲོས། ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་དང་ཚེའི་བར་ཆད་ཐམས་ཅད་ཞི་བར་བྱས། འོད་ཟེར་བ་སྤུའི་སྒོ་ནས་ཕྱིར་འཕྲོས། ལུས་ཀྱི་ཕྱི་ནས་འོད་ཟེར་དཀར་པོའི་གུར་ཁྱིམ་གྱིས་བསྐོར་བས་ཞི་བའི་ལས་ཐམས་ཅད་གྲུབ་པར་བསམ། ཡང་འོད་ཟེར་སེར་པོའི་ཚོགས་འཕྲོས། ལུས་གང་ཚེ་དང་བསོད་ནམས་ཐོས་བསམ་སྒོམ་གསུམ་གྱི་ཤེས་རབ་ལ་སོགས་རྒྱས་པར་བྱས། ཕྱིར་འཕྲོས་གུར་ཁྱིམ་དཀར་པོའི་མཐའ་ནས་འོད་ཟེར་སེར་པོའི་གུར་ཁྱིམ་གྱིས་བསྐོར་བས་རྒྱས་པའི་ལས་གྲུབ་པར་བསམ། ཡང་འོད་ཟེར་དམར་པོའི་ཚོགས་འཕྲོས། ཁམས་གསུམ་དབང་དུ་བསྡུད་པའི་མཐུ་དང་ལྡན་པར་བྱས། ཕྱིར་འཕྲོས་སེར་པོའི་མཐའ་ནས་འོད་ཟེར་དམར་པོའི་གུར་ཁྱིམ་གྱིས་བསྐོར་བས་དབང་གི་ལས་ཐམས་ཅད་གྲུབ་པར་བསམ། ཡང་འོད་ཟེར་མཐིང་གའི་ཚོགས་འཕྲོས། མངོན་སྤྱོད་ཀྱི་ལས་ཐམས་ཅད་འགྲུབ་པའི་མཐུ་དང་ལྡན་པར་བྱས། ཕྱིར་འཕྲོས་དམར་པོའི་མཐའ་ནས་འོད་ཟེར་མཐིང་གའི་གུར་ཁྱིམ་གྱིས་བསྐོར་བས་དྲག་པོའི་ལས་ཐམས་ཅད་གྲུབ་པར་བསམ། ཡང་འོད་ཟེར་ལྗང་གུའི་ཚོགས་འཕྲོས། ལས་རབ་འབྱམས་ཐམས་ཅད་འགྲུབ་པ་ལ་དབང་བར་བྱས། ཕྱིར་འཕྲོས་མཐིང་གའི་མཐའ་ནས་འོད་ཟེར་ལྗང་གུའི་གུར་ཁྱིམ་གྱིས་བསྐོར་བས་ལས་རབ་འབྱམས་ཐམས་ཅད་གྲུབ་པར་བསམ། ཡང་འོད་ཟེར་མཆིན་ཁའི་ཚོགས་འཕྲོས། ལས་དང་དངོས་གྲུབ་ཐམས་ཅད་ཀྱི་ནུས་པ་བརྟན་པར་བྱས། ཕྱིར་འཕྲོས་ལྗང་གུའི་མཐའ་ནས་འོད་ཟེར་མཆིན་ཁའི་གུར་ཁྱིམ་གྱིས་བསྐོར་བས་དེ་ཐམས་ཅད་བརྟན་པར་བྱས་པར་བསམ། འོད་ཀྱི་གུར་ཁང་དྲུག་པོ་ཐམས་ཅད་ཀྱང་དབྱིབས་སྒོ་ང་ལྟ་བུ་དུམ་བུ་གཅིག་ཏུ་གྱུར་པ། སྲ་ཞིང་མཁྲེགས་པ་བསྐལ་བའི་རླུང་གིས་ཀྱང་གཞིག་པར་མི་ནུས་པ། བར་མཚམས་ཐམས་ཅད་ཨུཏྤལ་སྔོན་པོའི་མེ་ཏོག་ཁ་ཕྱེ་མ་ཐག་པ་གསར་ཞིང་མཉེན་ལྕུག་དང་ལྡན་པས་བུན་ལོང་གིས་གཏམས་པར་བསམས། སྤྲོ་ན། ཡང་སྙིང་གའི་སྔགས་འཁོར་ལས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས། འོད་ཟེར་དྲུག་སྦྲགས་ཀྱི་ཕྱི་རོལ་ཏུ་རྡོ་རྗེའི་ས་གཞི་ར་བ་གུར་བླ་རེ་དང་བཅས་པའི་བསྲུང་བའི་འཁོར་ལོས་ཕྱོགས་ཀུན་བར་མཚམས་མེད་པར་བསྐོར་བར་གྱུར་པར་བསམས་ལ། རང་ཉིད་རྗེ་བཙུན་མར་གསལ་བ་ནས་བཟུང་། གུར་ཁྱིམ་དྲུག་དང་། བསྲུང་འཁོར་གྱི་བར་ལ་སེམས་འཛིན་ཅིང་། སྔགས་བཟླ་བ་དང་རླུང་བཟུང་བ་སོགས་གང་མོས་མན་ངག་ལྟར་གྲུབ་རྗེས། ཡིག་བརྒྱ་བརྗོད་ཅིང་ལྷག་ཆད་བསྐང་། མཆོད་བསྟོད་བྱ། དགེ་བ་འདི་ཡིས་མྱུར་དུ་བདག །ཡིད་བཞིན་འཁོར་ལོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག ། ཅེས་དགེ་རྩ་བསྔོའོ། །
གཉིས་པ་མདུན་བསྐྱེད་བསྒྲུབ་པ་ལ་ཐོག་མར་བསང་ཆུ་བསྒྲུབ་དགོས་པས་དེའི་ཚུལ་ནི། ལས་བུམ་གྱི་ནང་དུ་ཉི་གདན་ལ་ཧཱུཾ་ཡིག་གི་མཐར་ལས་སྔགས་ཀྱིས་བསྐོར་བ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་བྱིན་རླབས་ནུས་མཐུ་ཐམས་ཅད་འོད་ཟེར་གྱི་རྣམ་པར་སྤྱན་དྲངས་ཏེ་ཧཱུཾ་ཡིག་སྔགས་ཕྲེང་དང་བཅས་པ་ལ་ཐིམ། དེ་ལས་བདུད་རྩིའི་རྒྱུན་བབས་པས་བུམ་པའི་ཆུ་ལ་ཐིམ་པར་བསམས་ལ། ༀ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཅེས་ཅི་འགྲུབ་བཟླས་མཐར། ཧཱུཾ་ཡིག་སྔགས་ཕྲེང་དང་བཅས་པ་འོད་དུ་ཞུ་ནས་བུམ་པའི་ཆུ་ལ་ཐིམ་པར་བསམ། དེ་ནས་མདུན་བསྐྱེད་ཀྱི་མཆོད་པ་བྱིན་གྱིས་བརླབས་ལ། གཏོར་མ་ལ་བུམ་ཆུ་གཏོར་ཏེ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་རང་གི་མདུན་དུ་པདྨ་དང་ཟླ་བའི་གདན་གྱི་སྟེང་དུ་ཏཱཾ་ཡིག་དཀར་པོ་ཡོངས་སུ་གྱུར་པ་ལས་གཏོར་མ་དང་གཉིས་སུ་མེད་པའི་རྗེ་བཙུན་མ་འཕགས་མ་སྒྲོལ་མ་ཡིད་བཞིན་འཁོར་ལོ། ཞེས་པ་ནས། དབང་བསྐུར་རྒྱས་གདབ་ཀྱི་བར་བདག་བསྐྱེད་བཞིན་དང་། མཆོད་པ་སྔགས་རྐྱང་གིས་འབུལ་བའམ། སྤྲོ་ན། ཚིགས་བཅད་ཀྱིས་ཀྱང་རུང་ངོ་། ། འཕགས་མ་ཁྱེད་ཀྱི་མཚན་ཙམ་ཐོས་པས་ཀྱང་། །འཆི་བདག་བདུད་ཀྱི་དཔུང་རྣམས་འཇོམས་མཛད་ཅིང་། །འཆི་མེད་ཚེ་ཡི་དངོས་གྲུབ་མཆོག་སྩོལ་བ། །ཡིད་བཞིན་འཁོར་ལོའི་ཞབས་ལ་ཕྱག་འཚལ་ལོ། ། ཞེས་པས་བསྟོད། མདུན་བསྐྱེད་ཀྱི་རྗེ་བཙུན་མའི་ཐུགས་ཀར་འཁོར་ལོ་དཀར་པོ་རྩིབས་བརྒྱད་པ་ལྟེ་བ་དང་མུ་ཁྱུད་རིམ་པ་གསུམ་པ་དང་བཅས་པ། ལྟེ་བར་ཟླ་བའི་སྟེང་དུ་ཏཱཾ་ཡིག་དཀར་པོའི་མཐར་ༀ་ཧཱའི་བར་དུ་ཆུད་པའི་སྤེལ་ཚིག་གིས་བསྐོར་བ། རྩིབས་བརྒྱད་ལ་ཏཱ་རེ་ཏུཏྟཱ་རེ་ཏུ་རེ་སྭཱ་ཞེས་པའི་ཡིག་འབྲུ་བརྒྱད། མུ་ཁྱུད་ནང་མ་ལ་ཨཱ་ལི་གཡོན་བསྐོར། བར་པ་ལ་ཀཱ་ལི་གཡས་བསྐོར། ཕྱི་མ་ལ་རྟེན་འབྲེལ་སྙིང་པོ་གཡས་སྐོར་དུ་འཁོད་པ་ཐམས་ཅད་ཀྱང་སྔགས་ཀྱི་རང་སྒྲ་སྒྲོག་ཅིང་ཚེའི་བདུད་རྩིའི་ཆར་འབེབས་བཞིན་པ་དང་། རིགས་བདག་ཚེ་དཔག་མེད་ཀྱི་ཐུགས་ཀའི་ཧྲཱིཿཡིག་ལས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས། སློབ་མ་རྣམས་ཀྱི་ཚེ་དང་བསོད་ནམས་མི་མ་ཡིན་རྣམས་ཀྱིས་བརྐུས་པ་དང་། ཡར་བ་དང་། འཐོར་བ་ཐམས་ཅད་དང་། འབྱུང་བ་ཆེན་པོ་ལྔའི་བཅུད། སེམས་ཅན་ཐམས་ཅད་ཀྱི་ཚེ་དང་བསོད་ནམས། བླ་མ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་བདུད་རྩི་འོད་ཟེར་དང་བཅས་པའི་རྣམ་པར་བསྡུས། མདུན་གྱི་རྗེ་བཙུན་མའི་རིགས་བདག་གི་ཕྱག་གི་བུམ་པ་དང་ཐུགས་ཀའི་ཚེ་འཁོར་ལ་ཐིམ་པས་གཟི་བརྗིད་དང་། འཆི་བ་འཇོམས་པའི་ནུས་མཐུ་ཕུན་སུམ་ཚོགས་པར་གྱུར་པར་བསམས་ལ། ༀ་ཏཱ་རེ་ཏུཏྟཱ་རེ་ཏུ་རེ་སློབ་མ་རྣམས་ཀྱི་ཚེ་དང་བསོད་ནམས་ཡེ་ཤེས་འཕེལ་བར་གྱུར་ཅིག་སྭཱཧཱ། ཞེས་ཅི་མང་བཟླ། ཚེ་ཡི་བདུད་རྩི་དང་ཚེ་རིལ་བསངས་སྦྱངས། སྟོང་པའི་ངང་ལས་བྷྲཱུཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་ཨཱཿཧཱུཾ་ཞུ་བ་ལས་བྱུང་བའི་ཚེའི་བདུད་རྩི་དང་། ཚེ་རིལ་རྣམས་ནད་རིགས་བཞི་བརྒྱ་རྩ་བཞིའི་གཉེན་པོར་གྱུར་པའི་རྩི་བཅུད་དང་སྨན་སྣ་ཚོགས་ལས་གྲུབ་པའི་འཆི་མེད་བདུད་རྩིའི་བཏུང་བ་དང་རིལ་བུ་སོ་སོའི་རྣམ་པར་གྱུར། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་འཇིག་རྟེན་དང་འཇིག་རྟེན་ལས་འདས་པའི་བཅུད་དང་ནུས་མཐུ་ཐམས་ཅད་བཀུག་ནས་ཚེའི་བདུད་རྩི་དང་རིལ་བུ་ལ་ཐིམ་པར་གྱུར་པར་བསམས་ལ། འབྲུ་གསུམ་གང་མང་དང་། གོང་གི་སྔགས་ཅི་མང་བཟླས་མཐར་ཡིག་བརྒྱས་བརྟན་པར་བྱ། གཏོར་མ་རྣམས་བསངས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་ཨཱཿཧཱུཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་གཏོར་མ་དྭངས་ཤིང་ཐོགས་པ་མེད་པ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ ཆེན་པོར་གྱུར་པར་བསམས་ལ། འབྲུ་གསུམ་ལན་གསུམ་བརྗོད་དེ་བྱིན་གྱིས་བརླབས། མདུན་བསྐྱེད་ཀྱི་རྗེ་བཙུན་མའི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་བསམས་ལ། ༀ་ཨཱརྱ་ཏཱ་རེ་ས་པ་རི་ཝཱ་ར་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་པ་ལན་གསུམ་མམ་བདུན་གྱིས་ཕུལ། ཨརྒྷཾ་སོགས་ཀྱིས་མཆོད། འཁོར་བ་ལས་སྒྲོལ་ཏཱ་རེ་མ། ། ཞེས་སོགས་ཀྱིས་བསྟོད་ཅིང་སློབ་མའི་དོན་དུ་གསོལ་བ་བཏབ།
གསུམ་པ་ཚེ་དབང་བསྐུར་བའི་ཚུལ་ལ་གཉིས། སྔོན་འགྲོ་དང་། དངོས་གཞིའོ། །དང་པོ་ནི། སློབ་མ་རྣམས་ཁྲུས་བྱས། ཕྱག་འཚལ་ཏེ་གྲལ་དུ་འཁོད་པ་ལ། མེ་ཏོག་བཀྱེ་བསྡུ་བྱ། བགེགས་གཏོར་བཏང་། སློབ་དཔོན་ཡིད་བཞིན་འཁོར་ལོར་གསལ་བ་ལ་ཚེ་དབང་ཞུ་བའི་དོན་དུ་མཎྜལ་དབུལ་དུ་གཞུག །དེ་ནས། འོ་ལགས་སོ། །རང་ཅག་རྣམས་ཀྱིས་དལ་འབྱོར་གྱི་རྟེན་བཟང་པོ་ལན་གཅིག་རྙེད་པ་འདི་ཆུད་མ་ཟོས་པར་སྙིང་པོ་ཅི་ལོན་རེ་མཛད་དགོས། སྙིང་པོར་གྱུར་པ་ནི་རྒྱལ་བའི་བསྟན་པའི་སྙིང་པོ་ཡོངས་སུ་རྫོགས་པ་ཚང་ལ་མ་ནོར་བ་ཞིག་ལ་ཐོས་བསམ་སྒོམ་གསུམ་བྱས་ཏེ་རང་གཞན་གཉིས་ཀའི་དོན་མཐར་ཕྱིན་པ་བྱེད་པ་ཞིག་ཡིན་ལ། དེ་ལྟ་བུ་ཞིག་བྱེད་པ་ལ་ཐོག་མར་ཁོ་ནར་ཚེའི་ལྷ་ཁྱད་པར་ཅན་ཞིག་བརྟེན་ནས་ཚེ་བསྲིང་པར་བྱ་བ་གནད་ཆེ་བས། དེ་ཡང་རྗེ་བཙུན་སྒྲོལ་མ་འདི་ནི་སྤྱིར་སངས་རྒྱས་ཐམས་ཅད་ཀྱི་འཕྲིན་ལས་ལྷ་མོའི་གཟུགས་སུ་ཤར་བ་ཡིན་ཅིང་། ལྷག་པར་འབྲོམ་ཆོས་ཀྱི་རྒྱལ་པོ་ལ་རྗེ་བཙུན་མ་ཉིད་ཀྱིས། ཁྱོད་ཀྱི་རྗེས་འབྲངས་ཁོ་མོས་སྐྱོངས། །ཞེས་བཀའ་གདམས་ཀྱི་རྣམ་ཐར་གཙང་མ་འཛིན་པ་རྣམས་བུ་ལྟར་སྐྱོང་བ་ཞལ་གྱིས་བཞེས་ཤིང་། འདི་ཉིད་ཁུངས་གང་ལས་བྱུང་བ་ནི། སློབ་དཔོན་ངག་གི་དབང་ཕྱུག་གྲགས་པས་འཆི་བདག་བསླུ་བ་བསྡུས་པའི་རྟོག་པ་ནས་འདི་ཕྱུང་ནས་མཛད། མན་ངག་རྣམས་སྒྲོལ་མ་ཉིད་ཀྱིས་གསུངས། དེ་ལ་བླ་མ་རྡོ་རྗེ་གདན་པས་གསན། སྒྲུབ་ཐབས་ཀྱང་མང་དུ་མཛད། དེ་ནས་བླ་མ་བ་རི་ལོ་ཙཱ་བས་གསན་ནས་སྒྲུབ་ཐབས་མང་པོ་བོད་དུ་བསྒྱུར། དེ་ལ་བླ་མ་སླེ་ནག་པས་གསན། སྒྲུབ་པ་ལོ་དྲུག་མཛད་པས་ཞལ་མངོན་སུམ་དུ་གཟིགས་ཏེ་ཆོས་གསུང་སྐད། དེ་ལ་སྒྲེ་པ་རིན་པོ་ཆེས་གསན་ཏེ། དང་པོར་ཐོས་བསམ་མཛད་དུས་སུ། ལ་སྟོད་པའི་སྟག་རིས་ཡིན་ཟེར་བའི་རྣལ་འབྱོར་པ་ཞིག་ལ་ལག་རིས་བསྟན་པས་ཇོ་བོ་བཙུན་པ་ཁྱོད་ལ་ཆོས་ཀྱི་ལས་འཕྲོ་གཤའ་མ་ཞིག་འདུག་སྟེ་ཚེ་ལོ་གསུམ་ལས་མི་ཐུབ་པར་འདུག་ཟེར་བ་དང་། སྔར་ནས་ཁོ་རང་གི་རྨི་ལམ་ན་ལྟས་ཡང་མང་དུ་བྱུང་བ་གཉིས་འཛོམས་པས་ཚེ་འདི་ལ་གཤའ་མར་ཐུགས་བྱུང་སྟེ། ལོ་གཅིག་ཐུབ་བམ་ཅི་ཙམ་གང་ཐུབ་ཐུབ་ཀྱི་ཚེ་ལྷག་མ་འདི་ལ་ཆོས་ལག་ལེན་གཤའ་མ་ཞིག་བྱས་ན་བཟང་བར་གདའ། གདམས་ངག་ཁྱད་པར་ཅན་སྟོན་པའི་དགེ་བའི་བཤེས་གཉེན་གཅིག་བཙལ་དགོས་སྙམ་དུ་དགོངས་ནས་གསན་འཕྲོ་བཅད་དེ། དབུས་སུ་བྱོན་པའི་ལམ་ཁར་སྙེ་མོ་གཞུ་མཁར་གོང་དུ་བླ་མ་སླེ་ནག་པ་དང་མཇལ་ནས་ལོ་རྒྱུས་ཞུས་པས་བྱང་ཆུབ་བསྒྲུབ་པ་ལ་ལམ་གྱི་བར་ཆད་སེལ་བའི་ཐབས་ཁྱད་པར་ཅན་ང་ལ་ཡོད་ཀྱི། སྟོན་པ་ཁྱེད་ཐུགས་བདེ་འབོལ་གྱིས་ཤིག་གསུངས་ནས་འདིའི་སྒྲུབ་ཐབས་གདམས་ངག་དང་བཅས་པ་མ་ལུས་པ་གནང་། ད་ཁྱེད་ཀྱིས་གཞན་དུ་མ་འགྲོ་བར་འདི་ག་རང་དུ་སྡོད་ལ་སྒོམས་ཤིག་གསུངས་ནས། ལུང་པ་དེ་རང་གི་ལུང་ལག་མཁར་ལུང་བྱ་བ་ཞིག་གི་ཕུར་སྒྲུབ་པ་ལ་རྩེ་གཅིག་ཏུ་མཛད་པས་ཟླ་བ་གཅིག་ལོན་ཙ་ན་རྗེ་བཙུན་མའི་ཞལ་མངོན་སུམ་དུ་གཟིགས་ནས་ཁྱོད་ཀྱིས་ལོ་དྲུག་ཅུ་ཐུབ། སེམས་ཅན་ལ་ཕན་ཐོག་པར་འོང་གསུངས། དེ་ནས་ཕྱིས་དགུང་ལོ་དྲུག་ཅུ་ལོན་པའི་དུས་སུ་རྗེ་བཙུན་མ་ལ་གསོལ་བ་བཏབ་པས་ངའི་སྐུ་གཅིག་བཞེངས་དང་། ལོ་བཅུ་གཅིག་སྡོད་པར་འདུག་གི་གསུངས་པས་རས་བྲིས་གཅིག་བཞེངས་སྐད། དགུང་ལོ་བདུན་ཅུ་བཞེས་པའི་དུས་སུ་གསོལ་བ་བཏབ་པས་ཡང་སྐུ་གཅིག་བཞེངས་དང་། ལོ་བཅུ་ཐུབ་པར་འདུག་གསུངས་པས་ལུགས་མ་གཅིག་བཞེངས་སྐད། སྐུ་དེ་གཉིས་བྱིན་རླབས་ཆེ་བར་གྲགས་ཏེ། རས་བྲིས་དེ་ད་ལྟའང་རྭ་སྒྲེང་ན་བཞུགས་སྐད། དགུང་ལོ་བརྒྱད་ཅུ་བཞེས་པའི་དུས་སུ་རྗེ་བཙུན་མ་ལ་གསོལ་བ་བཏབ་པས་ད་དུང་ངའི་སྐུ་གཅིག་བཞེངས་ན་ལོ་མང་དུ་ཐུབ་པར་འདུག་གསུངས་པ་ལ། ཁོ་རང་བཞུགས་པའི་མདུན་གྱི་གྱང་ལོགས་ལ་གཅིག་བཞེངས་ཏེ་དགུང་ལོ་དགུ་བཅུ་གོ་ལྔ་བཞུགས་པར་གྲགས། ལྷ་མོ་འདི་ལ་གསོལ་བ་བཏབ་ན་ཚེ་རིང་བར་མ་ཟད་ཤེས་རབ་ཀྱང་ཆེས་ཆེར་འཕེལ་བར་འགྱུར་བ་རྒྱལ་བ་དགེ་འདུན་གྲུབ་པ་སོགས་དམ་པ་གོང་མ་རྣམས་ཀྱི་རྣམ་ཐར་ལས་འབྱུང་བ་ལྟར་ཡིན་ལ། དེ་ལྟ་བུའི་རྗེ་བཙུན་ཡིད་བཞིན་འཁོར་ལོའི་ཚེ་དབང་དབེན་ས་སྙན་བརྒྱུད་ཀྱི་མན་ངག་ལ་བརྟེན་ནས་གྲུབ་རྒྱལ་ཚེ་དབང་གི་རྒྱས་འགེབས་མཛད་པའི་བཀའ་སྲོལ་ཞིག་སློབ་བརྒྱུད་ཐུན་མོང་མིན་པ་དག་ལ་སྙན་ནས་སྙན་དུ་བརྒྱུད་དེ། བདག་གི་དྲིན་ཅན་རྩ་བའི་བླ་མའི་བར་བྱིན་རླབས་ཀྱི་རྒྱུན་མ་ཉམས་པར་བྱོན་པའི་གདམས་པ་ཁྱད་པར་ཅན་ཡིན་པས། ཡིད་ཆེས་ཀྱི་དད་པ་བརྟན་པོ་མཛོད་ལ། ཚེ་དབང་ཟབ་མོ་འདི་ཞུ་བའི་ཆེད་དུ་གསོལ་བ་འདེབས་པ་འདིའི་རྗེས་ཟློས་མཛོད། བྱས་ལ། དུས་གསུམ་སངས་རྒྱས་ཐམས་ཅད་ཀྱི། །ངོ་བོ་དཔལ་ལྡན་བླ་མ་ཡིས། །བདག་ལ་ཡིད་བཞིན་འཁོར་ལོ་ཡི། །ཚེ་དབང་ཟབ་མོ་སྩལ་དུ་གསོལ། ། ལན་གསུམ་རྗེས་ཟློས་བྱ། དེ་ནས་ཁྱེད་རང་རྣམས་ཐུགས་བསམ་འདི་བཞིན་དུ་མཛོད། མཁའ་ཁྱབ་ཀྱི་སེམས་ཅན་ཐམས་ཅད་རང་གི་དྲིན་ཅན་གྱི་མ་ཤ་སྟག་ཡིན་ཞིང་། མ་དེ་རྣམས་འཁོར་བའི་གནས་ན་སྡུག་བསྔལ་དུ་མས་ཉམ་ཐག་པ་ལ་ཤས་མི་བཟོད་པའི་སྙིང་རྗེ་ཆེན་པོ་བསྐྱེད་ནས་སེམས་ཅན་ཐམས་ཅད་ཀྱི་དོན་དུ་མྱུར་བ་མྱུར་བར་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ངེས་པར་ཐོབ་དགོས་པར་འདུག །དེའི་ཕྱིར་དུ་ཚེ་དབང་ཟབ་མོ་ཞུ་སྙམ་པའི་འདུན་པ་ཤུགས་དྲག་པོ་དང་། དེའི་ངང་ནས་འདུག་གནས་འདི་ཉིད་ཀྱང་ཐ་མལ་པ་མ་ཡིན་པར་ནུབ་ཕྱོགས་བདེ་བ་ཅན་གྱི་ཞིང་གི་བཀོད་པ་ལྟ་བུའི་རྗེ་བཙུན་མའི་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་དངོས་ཡིན་སྙམ་པ་དང་། བླ་མ་ཡང་ཐ་མལ་པ་འདི་ལྟ་བུ་མ་ཡིན་པར་རྗེ་བཙུན་ཡིད་བཞིན་འཁོར་ལོ་དངོས་སུ་བཞུགས་པར་མོས་ཤིང་། མདུན་གྱི་ཚེ་གཏོར་འདི་ཉིད་ཀྱང་རྗེ་བཙུན་མ་ཡིད་བཞིན་འཁོར་ལོ་སྐུ་མདོག་ཟླ་གཞོན་ལྟར་དཀར་ཞིང་ཞལ་གཅིག་ཕྱག་གཉིས་གཡས་མཆོག་སྦྱིན་གྱི་ཕྱག་རྒྱ་མཛད་ཅིང་། གཡོན་སྐྱབས་སྦྱིན་གྱི་ཕྱག་རྒྱས་ཨུཏྤ་ལའི་ཡུ་བ་བསྣམས་པ། རིན་པོ་ཆེའི་རྒྱན་དང་དར་གྱི་ན་བཟའ་ཅན། ཡེ་ཤེས་ཀྱི་སྤྱན་བདུན་དང་ལྡན་ཞིང་ཞབས་རྡོ་རྗེ་སྐྱིལ་ཀྲུང་གིས་བཞུགས་ཤིང་རིགས་བདག་རྒྱལ་བ་ཚེ་དཔག་དུ་མེད་པས་དབུ་བརྒྱན་པ་འོད་ཟེར་ཕྱོགས་བཅུར་འཕྲོ་བཞིན་པ་དང་། དེ་ཉིད་ཀྱི་སྟེང་གི་ནམ་མཁར་ཚེ་ཁྲིད་བརྒྱུད་པའི་བླ་མ་རྣམས་མཐོ་བརྩེགས་དང་། མཐའ་སྐོར་དུ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་རྣམས་སྤྲིན་ཕུང་འཐིབ་པ་ལྟར་བཞུགས་པར་གསལ་ཐོབ་ལ། དེ་རྣམས་ཀྱི་སྤྱན་སྔར་དཀོན་མཆོག་གསུམ་ལ་སྐྱབས་སུ་འགྲོ་བ་དང་། སྡིག་པ་བཤགས་ཤིང་དགེ་ལ་རྗེས་སུ་ཡི་རང་བ་སྔོན་དུ་བཏང་ནས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་བྱང་ཆུབ་སེམས་དཔའི་སྡོམ་པ་བཟུང་ལ་བྱང་ཆུབ་མ་ཐོབ་ཀྱི་བར་དུ་རྒྱལ་སྲས་ཀྱི་སྤྱོད་པ་མཐའ་དག་ལ་ཚུལ་བཞིན་དུ་བསླབ་པར་བགྱིའོ་སྙམ་པའི་སྒོ་ནས་བྱང་སྡོམ་འཛིན་པ་འདིའི་རྗེས་ཟློས་མཛོད། ཅེས་བརྡ་སྤྲད་ལ། དཀོན་མཆོག་གསུམ་ལ་བདག་སྐྱབས་མཆི། ། ཞེས་སོགས་རྗེས་ཟློས་ལན་གསུམ་བྱ། དེ་ནས་ཚེ་དབང་གི་གཞི་བསྒྲུབ་པའི་སླད་དུ་ཁྱེད་རང་རྣམས་ལྷར་བསྐྱེད་དགོས་པས་ངེད་ཀྱིས་ཆོ་གའི་ཚིག་བརྗོད་པ་ལྟར་ཁྱེད་རྣམས་སྟོང་པའི་ངང་ལས་རྒྱལ་ཡུམ་སྒྲོལ་མ་དཀར་མོའི་སྐུར་བཞེངས་པའི་མོས་པ་མཛོད། བྱས་ལ། སློབ་མ་ལ་བུམ་ཆུ་གཏོར་ཞིང་། ཨ་མྲྀ་ཏས་བགེགས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པད་ཟླའི་གདན་ལ་སློབ་མ་རྣམས་རྗེ་བཙུན་མ་ཡིད་བཞིན་འཁོར་ལོ། ཞེས་པ་ནས། ཧཱུཾ་སྔོན་པོས་མཚན་པར་གྱུར། ཅེས་བརྗོད། གཉིས་པ་དངོས་གཞི་ཚེའི་དབང་བསྐུར་བ་ལ། ཚེ་གཏོར་ལ་བརྟེན་ནས་བསྐུར་བ། ཚེའི་བདུད་རྩི་ལ་བརྟེན་ནས་བསྐུར་བ། ཚེ་རིལ་ལ་བརྟེན་ནས་བསྐུར་བ། ཚེ་སྤེལ་བ་དང་བཞི། དང་པོ་ལ་ཡར་བ་དགུག་པ། ཉམས་པ་གསོ་བ། ཚེ་བསྟིམ་པ་དང་གསུམ་མོ། །དང་པོ་ཚེ་ཡར་བ་དགུག་པ་ནི། ཁྱེད་རང་རྣམས་བླ་མ་ལ་མོས་གུས་གདུང་ཤུགས་དྲག་པོ་མཛད་པའི་རྐྱེན་གྱིས། བླ་མ་རྗེ་བཙུན་མ་ཡིད་བཞིན་འཁོར་ལོར་གསལ་བའི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་རྗེ་བཙུན་མ་ཡིད་བཞིན་འཁོར་ལོའི་ཐུགས་ཀར་ཕོག་པས་ཐུགས་རྒྱུད་བསྐུལ། དེའི་རིགས་བདག་ཚེ་དཔག་མེད་ཀྱི་ཐུགས་ཀའི་ཧྲཱིཿཡིག་དང་ཕྱག་གི་བུམ་པ་ལས་འོད་ཟེར་ལྕགས་ཀྱུ་ལྟ་བུ་ཁམས་གསུམ་ཐམས་ཅད་ཁྱབ་པར་འཕྲོས། ཁྱེད་རང་རྣམས་ལ་གནོད་ཅིང་འཚེ་བར་བྱེད་པའི་འཆི་བདག་གཤིན་རྗེ་བདུད་བཙན་མ་མོ་རྒྱལ་པོ་ལ་སོགས་པ་གདོན་བགེགས་འབྱུང་པོ་མི་མ་ཡིན་རྣམས་ཀྱིས། ཁྱེད་རང་རྣམས་ཀྱི་ཚེ་སྲོག་དང་བསོད་ནམས་ལ་སོགས་པ་འཕྲོག་ཅིང་བརྐུས་ཏེ་ཁྱེར་བ་དང་ཡར་བ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་ལེན་པ་ལྟར་འུབས་ཀྱིས་བསྡུས་ཏེ་འཆི་མེད་ཚེའི་གང་བའི་བུམ་པ་དང་ཐོད་པ་དང་ལྷུང་བཟེད་བདུད་རྩིས་གང་བའི་རྣམ་པར་བཀུག་པ་རྣམས། མདུན་གྱི་གནས་ན་བཞུགས་པའི་རྗེ་བཙུན་མ་ཡིད་བཞིན་འཁོར་ལོའི་ཐུགས་ཀའི་ཚེའི་འཁོར་ལོ་དང་སྐུའི་ཆ་རྣམས་ལ་ཐིམ། དེ་དག་ལས་བདུད་རྩིའི་རྒྱུན་དཀར་ལ་དམར་བའི་མདངས་ཅན་དཔག་ཏུ་མེད་པ་བབས། ཁྱེད་རང་རྣམས་ཀྱི་སྤྱི་བོའི་ཚངས་པའི་བུ་ག་ནས་ཞུགས། ལུས་ཀྱི་ནང་ཐམས་ཅད་ཁྲིག་མེར་གྱིས་གང་བས། སྡིག་སྒྲིབ་ནད་གདོན་ཚེའི་བར་ཆད་སྦྱངས། ཚེ་ཡར་ཞིང་ཉམས་པ་རྣམས་སོར་ཆུད། འཆི་བ་མེད་པ་ཚེའི་དངོས་གྲུབ་ཐོབ་བྱུང་སྙམ་པའི་མོས་པ་མཛོད། ཅེས་བརྡ་སྤྲོད་ཅིང་རང་ཡང་དེ་ལྟར་བསྒོམས་ནས་ཚེ་གཏོར་བཏེག་ལ། དྲིལ་བུ་གསིལ་ཞིང་། ཏཱ་རེ་སྤེལ་ཚིག་དང་བཅས་གང་མང་དང་། སྐལ་ལྡན་རིགས་ཀྱི་བུ་འདི་དག་ལ་ཚེ་དབང་དུ་གྱུར་ཅིག །དངོས་གྲུབ་ཏུ་གྱུར་ཅིག །ཚེ་མི་འགྱུར་བའི་གཡུང་དྲུང་དུ་གྱུར་ཅིག །མི་ཤིགས་པའི་རྡོ་རྗེར་གྱུར་ཅིག །ཚེ་མི་ནུབ་པའི་རྒྱལ་མཚན་དུ་གྱུར་ཅིག །འཆི་བ་མེད་པ་ཚེའི་རིག་འཛིན་ཐོབ་པར་གྱུར་ཅིག ། ཅེས་པ་དང་། རྒྱན་མཚན་རྩེ་མོར་དབང་གི་རྒྱལ་པོ་ལྟར། ། ཞེས་སོགས་ཤོ་ལོ་ཀ་གཅིག་བརྗོད་ཅིང་མེ་ཏོག་འཐོར། དེས་ཚེ་ཡར་བ་འགུགས་པ་སོང་། གཉིས་པ་ཉམས་པ་གསོ་བ་ལ་གསུམ་ལས། ཚེ་ཉམས་པ་གསོ་བ་ནི། སླར་ཡང་མདུན་གྱི་རྗེ་བཙུན་མའི་རིགས་བདག་ཚེ་དཔག་མེད་ཀྱི་ཕྱག་གི་བུམ་པ་ལས་འོད་ཟེར་ལྕགས་ཀྱུ་ལྟ་བུ་དཔག་ཏུ་མེད་པ་འཕྲོས་པས། འཇིག་རྟེན་ཁམས་ཀྱི་འབྱུང་བ་སའི་རོ་བཅུད་ནུས་མཐུ་ཐམས་ཅད་འོད་དང་བདུད་རྩི་སེར་པོ་གསེར་ཞུན་མའི་མདོག་ཅན་གྱི་རྣམ་པ་དང་། ཆུའི་བཅུད་ཐམས་ཅད་འོད་དང་བདུད་རྩི་དཀར་པོ་འོ་མའི་མདོག་ཅན་གྱི་རྣམ་པ་དང་། མེའི་བཅུད་ཐམས་ཅད་འོད་དང་བདུད་རྩི་དམར་པོ་དྲོད་ཀྱི་རང་བཞིན་མཚལ་ཅོག་ལ་མའི་མདོག་ཅན་གྱི་རྣམ་པ་དང་། རླུང་གི་བཅུད་ཐམས་ཅད་འོད་དང་བདུད་རྩི་ལྗང་གུ་མརྒད་ཀྱི་མདོག་ཅན་གྱི་རྣམ་པ་དང་། ནམ་མཁའི་བཅུད་ཐམས་ཅད་འོད་དང་བདུད་རྩི་སྔོན་པོ་མཐིང་ཞུན་མའི་མདོག་ཅན་གྱི་རྣམ་པ་ཅན་དཔག་ཏུ་མེད་པ་བཀུག་སྟེ། རྗེ་བཙུན་མའི་སྐུ་དང་ཚེའི་འཁོར་ལོ་ལ་ཐིམ། དེ་ལས་ཀྱང་འཆི་མེད་ཚེའི་བདུད་རྩིའི་རྒྱུན་བབས་པ་ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་། སྡིག་སྒྲིབ་ནད་གདོན་ཚེའི་བར་ཆད་ཐམས་ཅད་སྦྱངས། འབྱུང་བ་ལྔའི་བཅུད་དང་ཚེ་ཉམས་པ་རྣམས་སོར་ཆུད། ལུས་བཀྲག་མདངས་གཟི་བརྗིད་ཕུན་སུམ་ཚོགས་པ་དང་ལྡན་ཞིང་འཆི་བ་མེད་པ་ཚེའི་རིག་འཛིན་ཐོབ་བྱུང་སྙམ་པའི་མོས་པ་བརྗོད། ཅེས་དང་། སྔགས་དང་བདེན་བརྗོད་སྔར་བཞིན་ལ། ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་བ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག ། ཅེས་བརྗོད། དེ་ལྟར་ཚེ་ཉམས་པ་གསོས་ནས། ད་སྟོབས་དང་བསོད་ནམས་ཉམས་པ་གསོ་བ་ནི། སྔར་བཞིན་མདུན་གྱི་རྗེ་བཙུན་མའི་རིགས་བདག་ཚེ་དཔག་མེད་ཀྱི་ཕྱག་གི་བུམ་པ་ལས་འོད་ཟེར་མཐའ་ཡས་པ་འཕྲོས་པས། ཚངས་པ་དང་བརྒྱ་བྱིན་ལ་སོགས་པ་ལྷ་མཐུ་བོ་ཆེ་རྣམས་ཀྱི་དཔལ་འབྱོར་དང་མཐུ་སྟོབས། ཉི་ཟླ་གཟའ་སྐར་ལ་སོགས་པའི་བཀྲག་མདངས་གཟི་བརྗིད། བླ་མ་དགེ་བའི་བཤེས་གཉེན་ཁྱད་པར་ཅན་རྣམས་ཀྱི་བྱིན་རླབས། གྲུབ་ཐོབ་རྣལ་འབྱོར་པ་རྣམས་ཀྱི་ཉམས་རྟོགས། མཁས་པ་པཎྜི་ཏ་རྣམས་ཀྱི་མཁྱེན་རབ། སྟོང་འཁོར་ལོས་སྒྱུར་བའི་རྒྱལ་པོ་སོགས་རྒྱལ་བློན་བཙན་ཕྱུག་ལ་སོགས་པའི་བསོད་ནམས་དང་མངའ་ཐང་། འཆི་མེད་ཚེའི་རིག་འཛིན་བརྙེས་པ་རྣམས་ཀྱི་འཆི་མེད་ཚེའི་ཡེ་ཤེས་དང་། འཆི་བ་འཇོམས་པའི་སྔགས་དང་ཏིང་ངེ་འཛིན་གྱི་ནུས་མཐུ་ལ་སོགས་པ་འཇིག་རྟེན་ཁམས་ཀྱི་ལེགས་ཚོགས་དཔལ་འབྱོར་ཡོན་ཏན་ཕུན་སུམ་ཚོགས་པ་ཐམས་ཅད་བཀྲ་ཤིས་པའི་རྟགས་བརྒྱད་དང་རྫས་བརྒྱད། རྒྱལ་སྲིད་རིན་པོ་ཆེ་སྣ་བདུན། འོད་དང་བདུད་རྩི་ལ་སོགས་པའི་རྣམ་པར་རང་དབང་མེད་པར་བསྡུས་ཏེ། མདུན་གྱི་རྗེ་བཙུན་མའི་ཐུགས་ཀའི་ཚེ་འཁོར་ལ་ཐིམ། དེ་ལས་འཆི་མེད་ཚེའི་བདུད་རྩིའི་རྒྱུན་བབས་པ་ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་། སྡིག་སྒྲིབ་ནད་གདོན་ཚེའི་བར་ཆད་སྦྱངས། སྟོབས་དང་བསོད་ནམས་ཉམས་པ་ཐམས་ཅད་སོར་ཆུད། དེ་རྣམས་ཀྱི་ཡོན་ཏན་ཐམས་ཅད་ཐོབ། འཆི་མེད་ཚེའི་དངོས་གྲུབ་ལ་མངའ་བརྙེས་པར་གྱུར་སོང་སྙམ་པའི་མོས་པ་མཛོད། ཅེས་དང་། སྔགས་དང་བདེན་བརྗོད་སྔར་བཞིན་དང་། བསོད་ནམས་དར་རྒྱས་རི་རྒྱལ་ལྷུན་པོ་བཞིན། ། ཞེས་ཤོ་ལོ་ཀ་གཅིག་བརྗོད། དེ་ལྟར་སྟོབས་དང་བསོད་ནམས་ཉམས་པ་གསོས་ནས། ད་དམ་ཚིག་དང་སྡོམ་པ་ཉམས་པ་གསོ་ཞིང་སྐུ་གསུང་ཐུགས་ཀྱི་རྗེས་གནང་གི་སྒོ་ནས་ཚེ་བསྲིང་བར་བྱ་བ་ནི། ཁྱེད་རང་རྣམས་བླ་མ་ལ་མོས་གུས་ཤུགས་དྲག་པོ་མཛད་པའི་རྐྱེན་གྱིས། བླ་མའི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་རྗེ་བཙུན་མའི་ཐུགས་ཀར་ཕོག་པས་ཐུགས་རྒྱུད་བསྐུལ། དེའི་ཐུགས་ཀའི་ཏཱཾ་ཡིག་ལས་འོད་ཟེར་འཕྲོས་པས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཐམས་ཅད་དང་། ཁྱད་པར་དུ་བདེ་བ་ཅན་སོགས་ན་བཞུགས་པའི་རྒྱལ་ཡུམ་སྒྲོལ་དཀར་ཡིད་བཞིན་འཁོར་ལོ། རྒྱལ་བ་ཚེ་དཔག་མེད་སོགས་ཚེ་ཁྲིད་བརྒྱུད་པའི་བླ་མ་རྣམས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་རྣམས་སངས་རྒྱས་བྱང་སེམས་ཀྱི་སྐུ་གཟུགས་དང་སྔགས་དང་ཡིག་འབྲུ་ཕྱག་མཚན་ས་བོན་ལ་སོགས་པ་དང་། འཆི་མེད་ཚེའི་བདུད་རྩི་འོད་ཟེར་དང་བཅས་པ་དཀར་དམར་མཐིང་གསུམ་གྱི་རྣམ་པར་སྤྱན་དྲངས། མདུན་བསྐྱེད་ཀྱི་རྗེ་བཙུན་མའི་གནས་གསུམ་དུ་ཐིམ། ཐིམ་པ་ལས་ཀྱང་ཚེའི་བདུད་རྩི་དཀར་དམར་མཐིང་གསུམ་གྱི་རྒྱུན་བབས། ཁྱེད་རང་རྣམས་ཀྱི་སྤྱི་བོ་མགྲིན་པ་སྙིང་ག་གསུམ་དུ་ཐིམ་པས། ལུས་ཀྱི་ནང་ཐམས་ཅད་གང་། ཚེ་འཁོར་བ་ཐོག་མ་མེད་པ་ནས་གཞན་གྱི་སྲོག་བཅད་པ་སོགས་ལུས་ངག་ཡིད་གསུམ་ལ་བརྟེན་པའི་སྡིག་སྒྲིབ་དང་དམ་ཚིག་ཉམས་ཆག་ཐམས་ཅད་བྱང་ཞིང་དག །སྐུ་གསུང་ཐུགས་ཀྱི་བྱིན་རླབས་ཐོབ། སྒོ་གསུམ་རྡོ་རྗེ་གསུམ་གྱི་བདག་ཉིད་དུ་གྱུར་པའི་སྒོ་ནས་འཆི་མེད་ཚེའི་དངོས་གྲུབ་ཐོབ་བྱུང་སྙམ་པའི་མོས་པ་མཛོད། ཅེས་དང་། སྔགས་དང་བདེན་བརྗོད་གོང་བཞིན་བྱ། མི་འགྱུར་ལྷུན་པོ་སོགས། གསུམ་པ་ཚེ་བསྟིམ་པ་ནི། བླ་མ་རྗེ་བཙུན་མར་གསལ་བའི་ཐུགས་ཀའི་འོད་ཟེར་གྱིས་མདུན་བསྐྱེད་ཀྱི་རྗེ་བཙུན་མ་ཡིད་བཞིན་འཁོར་ལོ་རྒྱལ་བ་སྲས་བཅས་ཀྱིས་བསྐོར་བ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཏེ་བཞུགས་པ་ལ། ངེད་ཀྱིས་གསོལ་བ་བཏབ་པའི་ཚེ་རྩ་བརྒྱུད་ཀྱི་བླ་མ་རྣམས་དང་རྗེ་བཙུན་མའི་སྐུའི་ཆ་ལས་འཆི་མེད་ཚེའི་བདུད་རྩིའི་རྒྱུན་དཔག་ཏུ་མེད་པ་བབས། ཁྱེད་རྣམས་ཀྱི་སྤྱི་བོ་ཚངས་པའི་བུ་ག་ནས་ཞུགས་ཏེ། ལུས་ཀྱི་ནང་ཐམས་ཅད་གང་བས་ཐོག་མེད་ནས་བསགས་པའི་སྡིག་སྒྲིབ་ནད་གདོན་ཐམས་ཅད་དང་། ཁྱད་པར་དུ་ཚེ་ཐུང་འགྱུར་གྱི་སྡིག་སྒྲིབ་དང་ཚེའི་བར་ཆད་ཐམས་ཅད་དུད་ཁུ་དང་སོལ་ཁུ་ལ་སོགས་པའི་རྣམ་པར་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་ནག་འདུར་གྱིས་ཐོན་ནས་བྱང་ཞིང་དག །ལུས་ཤེལ་གོང་གཡའ་དག་པ་ལྟ་བུར་གྱུར། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་རྒྱས། མཐར་ངེད་ཀྱིས་ཛཿཧཱུཾ་བཾ་ཧོཿ ཞེས་བརྗོད་པའི་ཚེ་སྟེང་གི་རྩ་བརྒྱུད་ཀྱི་བླ་མ་རྣམས་དང་། མཐའ་སྐོར་གྱི་ཞི་ཁྲོ་རབ་འབྱམས་ཐམས་ཅད་རྗེ་བཙུན་མ་ལ་ཐིམ། དེ་ཉིད་ཀྱི་སྐུ་ལས་རང་འདྲ་གཉིས་པ་རེ་ཆད་དེ་འཆི་མེད་བདུད་རྩིའི་རང་བཞིན་དུ་ཞུ་བ་ཁྱེད་རང་རྣམས་ཀྱི་སྤྱི་བོ་ནས་ཐིམ་པས། ཁྱེད་རང་རྣམས་ཀྱི་ལུས་ངག་ཡིད་གསུམ་དང་། རྗེ་བཙུན་མ་ཡིད་བཞིན་འཁོར་ལོའི་སྐུ་གསུང་ཐུགས་དབྱེར་མེད་རོ་གཅིག་ཏུ་གྱུར་ཏེ། འཆི་མེད་ཚེའི་རིག་འཛིན་ལ་སོགས་པ་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་བྱུང་སྙམ་པའི་མོས་པ་མཛོད་ཅིག ། ཅེས་བརྡ་སྤྲད་དེ་གཏོར་མ་མགོར་བཞག་ལ། ཕྱོགས་བཅུ་དུས་གསུམ་གྱི་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱིས་བྱིན་གྱིས་རློབས་ཤིག །རྒྱལ་བ་ཚེ་དཔག་ཏུ་མེད་པས་བྱིན་གྱིས་རློབས་ཤིག །རྒྱལ་ཡུམ་ཡིད་བཞིན་འཁོར་ལོས་བྱིན་གྱིས་རློབས་ཤིག །མཉམ་མེད་སྒྲེ་པ་ཆེན་པོས་བྱིན་གྱིས་རློབས་ཤིག །སྒམ་པོ་པ་ཟླ་འོད་གཞོན་ནུས་བྱིན་གྱིས་རློབས་ཤིག །ཕག་མོ་གྲུ་པ་རྡོ་རྗེ་རྒྱལ་པོས་བྱིན་གྱིས་རློབས་ཤིག །གྲུབ་ཆེན་ལས་ཀྱི་རྡོ་རྗེས་བྱིན་གྱིས་རློབས་ཤིག །རྗེ་བཙུན་འཇམ་དཔལ་སྙིང་པོས་བྱིན་གྱིས་རློབས་ཤིག །ཕྱག་ན་པདྨོ་དགེ་འདུན་གྲུབ་པས་བྱིན་གྱིས་རློབས་ཤིག །མཁས་གྲུབ་ནོར་བཟང་རྒྱ་མཚོས་བྱིན་གྱིས་རློབས་ཤིག །རྒྱལ་དབང་དགེ་འདུན་རྒྱ་མཚོས་བྱིན་གྱིས་རློབས་ཤིག །པཎ་ཆེན་བསོད་ནམས་གྲགས་པས་བྱིན་གྱིས་རློབས་ཤིག །ཨེ་པ་ཤེས་རབ་རྒྱལ་པོས་བྱིན་གྱིས་རློབས་ཤིག །མཁས་གྲུབ་སངས་རྒྱས་ཡེ་ཤེས་ཀྱིས་བྱིན་གྱིས་རློབས་ཤིག །པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་བྱིན་གྱིས་རློབས་ཤིག །རྒྱལ་དབང་ལྔ་པ་བློ་བཟང་རྒྱ་མཚོས་བྱིན་གྱིས་རློབས་ཤིག །པཎ་ཆེན་བློ་བཟང་ཡེ་ཤེས་ཀྱིས་བྱིན་གྱིས་རློབས་ཤིག །རྒྱལ་དབང་བསྐལ་བཟང་རྒྱ་མཚོས་བྱིན་གྱིས་རློབས་ཤིག །རྒྱལ་མཁན་ཆེན་སྐལ་བཟང་རབ་རྒྱས་ཀྱིས་བྱིན་གྱིས་རློབས་ཤིག །སྤྲུལ་སྐུ་བློ་བཟང་འཕྲིན་ལས་རྒྱ་མཚོས་བྱིན་གྱིས་རློབས་ཤིག །མང་ཐོས་སྐལ་བཟང་ཡོན་ཏན་གྱིས་བྱིན་གྱིས་རློབས་ཤིག །མཁན་ཆེན་གྲགས་པ་མཁས་གྲུབ་ཀྱིས་བྱིན་གྱིས་རློབས་ཤིག །བཤེས་གཉེན་གྲགས་པ་ཀླུ་སྒྲུབ་ཀྱིས་བྱིན་གྱིས་རློབས་ཤིག །རྡོ་རྗེ་འཆང་བློ་བཟང་ཚུལ་ཁྲིམས་བྱམས་པ་རྒྱ་མཚོ་དཔལ་བཟང་པོས་བྱིན་གྱིས་རློབས་ཤིག །འཇོག་རི་ངག་དབང་འབྱོར་ལྡན་གྱིས་བྱིན་གྱིས་རློབས་ཤིག །དྲིན་ཅན་རྩ་བའི་བླ་མ་བྱམས་པ་བསྟན་འཛིན་འཕྲིན་ལས་རྒྱ་མཚོ་དཔལ་བཟང་པོས་བྱིན་གྱིས་རློབས་ཤིག ། ཅེས་པ་ལྟ་བུ་རང་རང་གིས་གང་ལས་ཐོབ་པའི་བླ་མ་བརྒྱུད་པའི་རིམ་པ་ཇི་ལྟ་བ་བཞིན་སྦྱོར། དེ་ནས། བཅོམ་ལྡན་འདས་མ་སྒྲོལ་དཀར་ཡིད་བཞིན་འཁོར་ལོའི་ལྷ་ཚོགས་ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་འཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། སློབ་མ་འདི་རྣམས་ཀྱི་ལུས་ཀྱི་ན་ཚ། སེམས་ཀྱི་སྡུག་བསྔལ། བར་ཆད་དང་ཆགས་སྒོ་ཉམ་ང་ཡོད་པ། སྟེང་འོག་བར་གསུམ་གྱི་གདོན་བགེགས་འབྱུང་པོའི་གནོད་པ་དང་། དུས་མ་ཡིན་པར་འཆི་བའི་འཇིགས་པ་སོགས་ཉེ་བར་ཞི་ཞིང་དེ་དག་ཐམས་ཅད་ལས་བསྲུང་ཞིང་བསྐྱབ་པ་དང་སྦ་བར་མཛད་དུ་གསོལ། ཚེ་དང་བསོད་ནམས་དཔལ་འབྱོར་ལོངས་སྤྱོད་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་རྒྱས་པ་དང་། མདོར་ན་མཆོག་དང་ཐུན་མོང་གི་དངོས་གྲུབ་མ་ལུས་པ་ད་ལྟ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཞེས་དང་། ཏཱ་རེ་སྤེལ་ཚིག་ཅན་གྱི་མཐར། ཛཿཧཱུཾ་བཾ་ཧོཿ ཞེས་བརྗོད་དེ་བསྟིམ་ལ། སུ་པྲ་ཏིཥྛས་བརྟན་པར་བྱ། དེས་ཚེ་གཏོར་ལ་བརྟེན་ནས་དབང་བསྐུར་བ་དེ་སོང་། གཉིས་པ་ཚེའི་བདུད་རྩི་ལ་བརྟེན་ནས་དབང་བསྐུར་བ་ནི། ཕྱིའི་བདུད་རྩི་རྣམ་ལྔ་སྦྱངས་རྟོགས་སྦར་གསུམ་བྱས་པའི་དམ་རྫས་ཁྱད་པར་ཅན་འདི་ཉིད་ཁྱེད་རང་རྣམས་ཀྱིས་ཞལ་དུ་གསོལ་བས་ལུས་ཀྱི་ནང་ཐམས་ཅད་བྱང་ཆུབ་ཀྱི་སེམས་ཀྱི་བདུད་རྩིས་གང་། རྩ་རླུང་ཐིག་ལེའི་ནུས་པ་ཉམས་པ་ཐམས་ཅད་སོར་ཆུད། ལུས་སེམས་བདེ་བས་ཁྱབ། ཚེའི་བར་ཆད་ཐམས་ཅད་ལས་གྲོལ་ཏེ། འཆི་མེད་ཚེའི་རིག་འཛིན་ཐོབ་པར་གྱུར་བའི་མོས་པ་མཛོད། བྱས་ལ། འགྱུར་མེད་ཡེ་ཤེས་ལྔ་ཡི་རང་བཞིན་གྱི། །དམ་རྫས་འཆི་མེད་ཚེ་ཡི་བདུད་རྩི་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་པས། །འཆི་མེད་ཚེ་ཡི་དངོས་གྲུབ་ཐོབ་གྱུར་ཅིག ། ཅེས་དང་། སྙིང་པོ་བརྗོད་ལ་བྱིན། དེས་ཚེའི་བདུད་རྩི་ལ་བརྟེན་ནས་དབང་བསྐུར་བ་དེ་སོང་། གསུམ་པ་ཚེ་རིལ་ལ་བརྟེན་ནས་དབང་བསྐུར་བ་ནི། སྨན་སྣ་བཞི་བརྒྱ་རྩ་བཞིའི་རང་བཞིན་འཁོར་འདས་ཀྱི་བཅུད་ཐམས་ཅད་བསྡུས་པའི་འཆི་མེད་ཚེའི་བཅུད་ལེན་གྱི་རིལ་བུ་འདི་ཉིད་ཁྱེད་རང་རྣམས་ཀྱིས་གསོལ་བ་ལ་བརྟེན་ནས། ནད་རིགས་བཞི་བརྒྱ་རྩ་བཞི་ཐམས་ཅད་སྦྱོང་ཞིང་། ལུས་ཀྱི་ཟུངས་སྲོག་གི་རྟེན་རྒྱས། དུས་མ་ཡིན་པའི་འཆི་རྐྱེན་ལས་གྲོལ་ཏེ་འཆི་མེད་ཚེའི་དངོས་གྲུབ་ཐོབ་པའི་མོས་པ་མཛོད། བྱས་ལ། བཀྲ་ཤིས་ཚེ་བརྟན་དཔལ་གྱི་ཟས། །སྙིང་པོ་བསྡུས་པའི་བཅུད་འདི་ནི། །དེ་རིང་བུ་ཡིས་ཟ་བར་གྱིས། །འདི་ཟོས་རྒྱལ་ཡུམ་ཚེ་སྦྱིན་མ། །ཞལ་ཟས་བསྟེན་པས་ནད་ཀུན་ལས། །གྲོལ་འགྱུར་ཐེ་ཚོམ་བྱ་མི་དགོས། ། ཞེས་དང་སྙིང་པོ་བརྗོད་ལ་སྦྱིན། དེས་ཚེ་རིལ་ལ་བརྟེན་ནས་དབང་བསྐུར་བ་དེ་སོང་། བཞི་པ་ཚེ་སྤེལ་བའི་ཕྱིར་བདེན་ཚིག་གི་ཤིས་པ་བརྗོད་པ་ནི། ཁྱེད་རང་རྣམས་ཀྱི་སྟེང་གི་ནམ་མཁར་རྒྱལ་ཡུམ་ཡིད་བཞིན་འཁོར་ལོ་ལ་ཆོས་འདིའི་བརྒྱུད་པའི་བླ་མ་རྣམས་དང་། གཞན་ཡང་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ལྷ་དང་མིའི་རིག་འཛིན་བརྙེས་པ་རྣམས་ཀྱིས་བསྐོར་ནས་བཞུགས་པ་རྣམས། ཁྱེད་རྣམས་ཀྱི་ཚེ་སྤེལ་བའི་ཕྱིར་སློབ་དཔོན་དང་ལྷན་ཅིག་མེ་ཏོག་གི་ཆར་འབེབས། རོལ་མོའི་སྒྲ་སྒྲོག །སྙན་པའི་གླུ་དབྱངས་ཀྱིས་ཤིས་བརྗོད་མཛད་པའི་མོས་པ་མཛོད། བྱས་ལ། སྦྱིན་པའི་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་སྦྱིན་པའི་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །སྦྱིན་པའི་སྟོབས་ཀྱི་སྒྲ་ནི་གྲགས་པར་འགྱུར། །སྦྱིན་པ་མཐར་ཕྱིན་ཚེ་ཡང་འཕེལ་བར་ཤོག ། ཅེས་དང་། དེ་བཞིན་དུ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ། ཅེས་རིམ་བཞིན་སྦྱར་ཏེ་བདེན་སྟོབས་བརྗོད་ལ་མེ་ཏོག་གི་ཆར་དབབ་བོ། །བསྡུ་ན། ཕྱིན་དྲུག་སྟོབས་ཀྱིས་ཞེས་སོགས་སྤྱི་ལྟར་བྱའོ། ། འོ་དེ་ལྟར་ཁྱེད་རྣམས་ཀྱིས་ཚེ་དབང་ཟབ་མོ་ལེགས་པར་ཐོབ་པ་ཡིན་པས་དགའ་སྤྲོ་ཆེན་པོ་མཛད་པ་དང་། ད་ནས་བཟུང་སྟེ་རྒྱལ་ཡུམ་ཡིད་བཞིན་འཁོར་ལོ་ཡི་དམ་དུ་བཟུང་ཞིང་། སྤྱི་དང་བྱེ་བྲག་གི་དམ་ཚིག་དང་སྡོམ་པ་རྣམས་ཚུལ་བཞིན་དུ་བསྲུང་བར་བྱའོ་སྙམ་པའི་སྒོ་ནས་འདིའི་རྗེས་ཟློས་མཛོད། བྱས་ལ། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། ། ཞེས་ལན་གསུམ་བརྗོད་དུ་གཞུག ། དེས་བྱིན་རླབས་ཉེ་བརྒྱུད་ཐུན་མོང་མ་ཡིན་པའི་ལུགས་ཀྱི་རྗེ་བཙུན་འཕགས་མ་སྒྲོལ་དཀར་ཡིད་བཞིན་འཁོར་ལོ་ལ་བརྟེན་པའི་ཚེ་དབང་ཟབ་མོ་བླ་མ་དམ་པའི་ཕྱག་བཞེས་བཞིན་ལེགས་པར་ཕུལ་གྲུབ་པ་ཡིན་པས་གཏང་རག་གི་ཡོན་དུ་མཎྜལ་ཞིག་འབུལ་བར་ཞུ། ཞེས་བརྡ་སྤྲད་ལ་མཎྜལ་འབུལ་དུ་གཞུག་གོ །གསུམ་པ་མཇུག་གི་བྱ་བ་ནི། སློབ་དཔོན་གྱིས་གཏང་རག་གི་མཆོད་པ་བྱིན་གྱིས་བརླབས་ཏེ་མདུན་བསྐྱེད་ཀྱི་ལྷ་ལ་མཆོད་ཅིང་བསྟོད། ཡིག་བརྒྱ་བཟླས་ལ། མ་རྙེད་ཡོངས་སུ་མ་ཤེས་དང་། ། ཞེས་སོགས་བརྗོད་དེ་ནོངས་པ་བཟོད་པར་གསོལ། དགེ་བ་འདི་ཡིས་མྱུར་དུ་བདག །རྒྱལ་ཡུམ་སྒྲོལ་མ་འགྲུབ་གྱུར་ནས། ། ཞེས་སོགས་དང་། རྗེ་བཙུན་བླ་མའི་སྐུ་ཚེ་རབ་བརྟན་ཅིང་། ། ཞེས་སོགས་དང་། དུས་མིན་འཆི་བའི་མཚན་མ་མཐོང་བ་ན། །དེ་ཡི་མོད་ལ་ཡིད་བཞིན་འཁོར་ལོའི་སྐུ། །གསལ་བར་མཐོང་ནས་འཆི་བདག་དཔའ་བཅོམ་སྟེ། །འཆི་མེད་རིག་འཛིན་མྱུར་དུ་ཐོབ་པར་ཤོག ། ཅེས་བསྔོ་སྨོན་ཅི་རིགས་སུ་བྱ། ཚེ་བུམ་གྱི་ཡེ་ཤེས་པ། ༀ་ཁྱེད་ཀྱིས་སེམས་ཅན་དོན་ཀུན་མཛད། ། ཅེས་སོགས་ཀྱིས་གཤེགས་སུ་གསོལ་བའམ། འདིར་ནི་རྟེན་དང་ལྷན་ཅིག་ཏུ། ། ཞེས་སོགས་ཀྱི་མཐར། སུ་པྲ་ཏིཥྛ་བརྗོད་དེ་རྟེན་ལ་བརྟན་བཞུགས་བྱས་ལ། དམ་ཚིག་པ་བདག་ཉིད་ལ་བསྟིམ། ཤིས་བརྗོད་གང་རིགས་ཀྱིས་མཐའ་བརྒྱན་པར་བྱའོ། །
སྨྲས་པ། གང་གི་མཚན་སྙན་རྣ་བར་ལྷུང་བའི་མོད། །འཆི་བདག་སྡེ་བཅས་མིང་གི་མཐར་མཛད་པའི། །ལྷག་པའི་ལྷ་མོ་གངས་རིའི་མདངས་འཕྲོག་མས། །ཚེ་ཡི་དཔལ་སྟེར་ཤིས་པའི་མཆོག་སྩོལ་ཅིག །གང་དེའི་འཕྲིན་ལས་རབ་འབྱམས་བསྒྲུབ་པའི་ཚུལ། །ཐུགས་ཀྱི་ཡོལ་གོར་གཏམས་པའི་བདུད་རྩིའི་དཔྱིད། །བརྒྱུད་ལྡན་བླ་མའི་ཞལ་ཆབ་མངར་བོའི་རྒྱུན། །ཅི་དགར་མྱོང་བའི་སྐལ་བཟང་འདི་ན་ཀོ །འདི་ལ་འགལ་འཁྲུལ་ནོངས་པ་ཅི་མཆིས་པ། །བླ་མ་ལྷ་ཡི་སྤྱན་སྔར་མཐོལ་བཤགས་ནས། །དགེ་བའི་འབྲས་བུས་བསྟན་འཛིན་མཆོག་རྣམས་དང་། །འགྲོ་ཀུན་འཆི་མེད་དཔལ་ལ་སྤྱོད་གྱུར་ཅིག །
ཅེས་རྗེ་བཙུན་མ་ཡིད་བཞིན་འཁོར་ལོའི་སྒོ་ནས་ཚེ་དབང་བསྐུར་ཚུལ་བླ་མ་དམ་པའི་མན་ངག་འཆི་མེད་བདུད་རྩིའི་ཆུ་རྒྱུན་ཞེས་བྱ་བ་འདི་ནི། མང་ཐོས་གདམས་པའི་མངའ་བདག་ལྷ་བཙུན་མཆོག་སྤྲུལ་རིན་པོ་ཆེས་ཆོག་སྒྲིག་ཅིག་དགོས་ཞེས་བཀའ་སྩལ་བའི་ཐོག །ལུང་རྟོགས་ཡོན་ཏན་དུ་མའི་མཛོད་འཛིན་བྱང་རྩེ་ཆོས་རྗེ་ལྷུན་གྲུབ་བརྩོན་འགྲུས་རིན་པོ་ཆེ་ནས་ཀྱང་ནན་ཏན་ཆེན་པོས་བཀའ་སྩལ་དང་དུ་བླངས་ཏེ། ཁྲི་ཆེན་ངག་དབང་ཆོས་འཕེལ་གྱི་སྐྱེ་མིང་འཛིན་པ་ངག་དབང་གསུང་རབ་མཐུ་སྟོབས་ཏུ་འབོད་པས་དབེན་ས་སྙན་བརྒྱུད་ཀྱི་མན་ངག་ལ་བརྟེན་ནས་གྲུབ་རྒྱལ་ལུགས་ཚེ་དབང་གི་རྒྱས་འགེབས་མཛད་པའི་ཕྱག་བཞེས་མ་ཉམས་པ་ཡོངས་འཛིན་ཕུར་ལྕོག་རིན་པོ་ཆེའི་གསུང་རྒྱུན་བླ་མ་དམ་པའི་ཞལ་ལུང་ལྟར་ནོར་གླིང་རང་ཤག་ཏུ་བཀོད་པ་ཛ་ཡནྟུ།།
