བླ་མའི་རྣལ་འབྱོར།
མདུན་གྱི་ནམ་མཁའི་གནས་སུ། སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲིའི་སྟེང་དུ། སྣ་ཚོགས་པད་མ་དང་ཟླ་བ་དང་ཉི་མའི་གདན་ལ། རྩ་བའི་བླ་མ། ངོ་བོ་བླ་མ་ལ། རྣམ་པ་བཅོམ་ལྡན་འདས་རྡོ་རྗེ་འཆང་ཆེན་པོ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་པས་རྡོ་རྗེ་དང་། གཡོན་པས་དྲིལ་བུ་ཐུགས་ཀར་བསྣོལ་ནས་འཛིན་པ། མཚན་སོ་གཉིས་དང་དཔེ་བྱད་བརྒྱད་ཅུས་བརྒྱན་པ། དབུ་སྐྲ་རལ་བ་ཐོར་ཚུགས་སུ་བྱས་པ། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། ཕྱག་གདུབ། ཞབས་གདུབ་ཀྱིས་བརྒྱན་པ། དར་སྣ་ཚོགས་ཀྱི་ཤམ་ཐབས་ཅན། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། ཐུགས་ཀའི་ཧཱུཾ་ལས་འོད་འཕྲོས། རྩ་བ་དང་བརྒྱུད་པར་བཅས་པའི་བླ་མ་རྣམས་དང་། ཡི་དམ་དཀྱིལ་འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་སྤྱན་དྲངས། དེ་ཉིད་ལ་ཐིམ། མཁའ་འགྲོ་ཆོས་སྐྱོང་དྲག་པོའི་མཚོན་ཆ་སྣ་ཚོགས་བཟུང་ནས། རང་གི་ཕྱོགས་བཞི་མཚམས་དང་བརྒྱད། སྟེང་འོག་གཉིས་དང་བཅུར་གནས་པས། རང་གི་བར་ཆད་ཐམས་ཅད་སེལ་བར་གྱུར།
མཎྜལ་ཕུལ། གསོལ་བ་བཏབ་པས། བླ་མའི་དཔྲལ་བའི་ཨོཾ་དཀར་པོ་ལས་འོད་ཟེར་དཀར་པོ་བྱུང་རང་གི་དཔྲལ་བར་ཐིམ། ལུས་ཀྱི་སྡིག་སྒྲིབ་དག བུམ་པའི་དབང་ཐོབ། སྐུའི་དབྱིབས་ཞུགས། མགྲིན་པའི་ཨཱཿ་དམར་པོ་ལས་འོད་ཟེར་དམར་པོ་བྱུང་། རང་གི་མགྲིན་པར་ཐིམ། ངག་གི་སྒྲིབ་པ་དག གསང་བའི་དབང་ཐོབ། གསུང་གི་དབྱིབས་ཞུགས། ཐུགས་ཀའི་ཧཱུཾ་ལས་འོད་ཟེར་སྔོན་པོ་བྱུང་། རང་གི་སྙིང་ཁར་ཐིམ། སེམས་ཀྱི་སྡིག་སྒྲིབ་དག ཤེས་རབ་ཡེ་ཤེས་ཀྱི་དབང་ཐོབ། ཐུགས་ཀྱི་དབྱིབས་ཞུགས། སྐུ་གསུང་ཐུགས་ཀྱི་ཡེ་གེ་གསུམ་ལས། འོད་ཟེར་དཀར་དམར་སྔོ་གསུམ་བྱུང་། རང་གི་ལུས་ངག་ཡིད་གསུམ་སྤྱི་ལ་ཐིམ། ལུས་ངག་ཡིད་གསུམ་སྤྱིའི་སྡིག་སྒྲིབ་དང་། བག་ཆགས་ཀྱི་སྡིག་སྒྲིབས་ཐམས་ཅད་སྦྱངས། དབང་བཞི་པ་ཆིག་དབང་རིན་པོ་ཆེ་ཐོབ། སྐུ་གསུང་ཐུགས་དབྱེར་མི་ཕྱེད་པ་རྡོ་རྗེ་འཆང་ཆེན་པོའི་དབྱིབས་ཞུགས་པར་བསམ་ལ། རང་ཐ་མལ་དུ་གནས་པའི་རྣམ་པར་ཤེས་པ་ཧཱུཾ་དུ་གྱུར་པ་སྤྱི་བོ་ཚངས་བུག་ནས་ཐོན་པ། རྡོ་རྗེ་རྣལ་འབྱོར་མ་དམར་མོ་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པར་གྱུར།
རང་གི་མདུན་དུ་ཡཾ་ལས་རླུང་གི་དཀྱིལ་འཁོར་སྔོན་པོ། གཞུའི་དབྱིབས་ཅན། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ། དེའི་སྟེང་དུ་ཨཱཿལས་མི་མགོའི་སྒྱེད་པུ་གསུམ། རྡོ་རྗེ་རྣལ་འབྱོར་མས་རང་གི་ལུས་ཐ་མལ་དུ་གནས་པའི་སྨིན་མཚམས་ནས་བྲེག་པའི་ཐོད་པ། མི་མགོའི་སྒྱེད་པུ་གསུམ་གྱི་སྟེང་དུ་བཀལ་བས། སྟོང་གསུམ་འཇིག་རྟེན་གྱི་ཁམས་དང་མཉམ་པར་གྱུར། ལག་པ་གཡོན་པ། རྐང་པ་གཡོན་པ། ལག་པ་གཡས་པ། རྐང་པ་གཡས་པ། བུམ་ལྡིར་རྣམས་རིམ་པ་བཞིན་དུ། ཐོད་པའི་ནང་དུ་བསྐྱུར། འོག་གི་རླུང་གཡོས་མེ་སྦར། ཐོད་པའི་རྫས་རྣམས་བསྐོལ་བའི་ནང་དུ། ཨོཾ་ཨཱཿཧཱཾ་གསུམ་གྱི་ཡི་གེ་གསུམ་གནས་པ་ལས་འོད་འཕྲོས། སངས་རྒྱས་བྱང་ཆུབ་སེམས་དཔའི་ཡེ་ཤེས་ཀྱི་བདུད་རྩི་སྤྱན་དྲངས། ཡི་གེ་གསུམ་ལ་ཐིམ། ཡི་གེ་དང་བཅས་པ་ཐོད་པའི་ནང་དུ་ལྷུང་བས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར།
རྡོ་རྗེ་རྣལ་འབྱོར་མའི་ཐུགས་ཀ་ནས། རྡོ་རྗེ་རྣལ་འབྱོར་མ་ཐོད་པ་ཐོགས་པ་དཔག་ཏུ་མེད་པ་འཕྲོས། ཐོད་པའི་ནང་གི་བདུད་རྩི་ཐོད་ཕོར་གྱིས་བཅུས་ཏེ། རྩ་བའི་བླ་མ་ལ་དྲངས། ཐུགས་དགྱེས་པར་བསམ། ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་ལ་དྲངས། དེ་རྣམས་ཐུགས་དགྱེས། མཁའ་འགྲོ་ཆོས་སྐྱོང་དཔག་ཏུ་མེད་པ་ལ་དྲངས། དེ་རྣམས་ནུས་པ་དང་ལྡན་པར་གྱུར། གཞན་ཡང་རིགས་དྲུག་སེམས་ཅན་ཐམས་ཅད་ལ་དྲངས། དེ་རྣམས་སྡུག་བསྔལ་མཐའ་དག་དང་བྲལ་བར་གྱུར། གནོད་བྱེད་འབྱུང་པོ་ལན་ཆགས་རྣམས་ལ་དྲངས། དེ་རྣམས་གནོད་པ་དང་། གདུག་པའི་བསམ་པ་ཐམས་ཅད་དང་བྲལ་བར་གྱུར།
རིགས་དྲུག་ཕྱིན་གྱི་མགྲོན་སྟོང་པ་ཉིད་དུ་གྱུར།
རྡོ་རྗེ་རྣལ་འབྱོར་མ་ཐམས་ཅད་ཀྱང་རང་ལ་ཐིམ། བླ་མ་ཁྲི་དང་བཅས་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་འོད་དུ་ཞུ་ནས། རང་ལ་ཐིམ་པས་རང་གི་ལུས་ངག་ཡིད་གསུམ་དང་བླ་མའི་སྐུ་གསུང་ཐུགས་དབྱེར་མེད་དུ་གྱུར། རང་ཡང་འོད་དུ་ཞུ་ནས་སྟོང་པ་ཉིད་དུ་གྱུར། དམིགས་མེད་ཀྱི་ངང་ལ་བཞག བསྔོ་བ་སྨོན་ལམ་བྱ།
ཅེས་པའི་བླ་མའི་རྣལ་འབྱོར་ཐམས་ཅད་མཁྱེན་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའོ། །
