Thursday 20 December 2018

བོད་ལོ་ ༢༡༤༦ གསར་ཚེས་ཀྱི་དགའ་སྟོན་དུ་བཀྲིས་བདེ་ལེགས།

བོད་ལོ་ ༢༡༤༦ གསར་ཚེས་ཀྱི་དགའ་སྟོན་དུ་བཀྲིས་བདེ་ལེགས།
HAPPY LOSAR TIBETAN NEW YEAR 2146
February 5, 2019
FELICE LOSAR CAPODANNO TIBETANO 2146
5, Febbraio 2019


Sunday 16 December 2018

རིག་པ་ངོ་སྤྲོད་ཅེར་མཐོང་རང་གྲོལ།

རིག་པ་ངོ་སྤྲོད་ཅེར་མཐོང་རང་གྲོལ།

Jump to navigationJump to search
༁ྃ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ རིག་པ་ངོ་སྤྲོད་ཅེར་མཐོང་རང་གྲོལ་ཞེས་བྱ་བ་བཞུགས་སོ༔ རིག་པ་རང་གསལ་སྐུ་གསུམ་ལྷ་ལ་འདུད༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ རིག་པ་ངོ་སྤྲོད་ཅེར་མཐོང་རང་གྲོལ་བསྟན༔ འདི་ལྟར་རང་གི་རིག་པ་ངོ་སྤྲོད་གྱིས༔ ལེགས་པར་དགོངས་ཤིག་སྐལ་ལྡན་རིགས་ཀྱི་བུ༔ ས་མ་ཡ༔ རྒྱ་རྒྱ་རྒྱ༔ ཨེ་མ་ཧོ༔ འཁོར་འདས་ཡོངས་ལ་ཁྱབ་པའི་སེམས་གཅིག་པུ༔ ཡེ་ནས་རང་ཉིད་ཡིན་ཀྱང་ངོ་མ་ཤེས༔ གསལ་རིག་རྒྱུན་ཆད་མེད་ཀྱང་ཞལ་མ་མཇལ༔ འགག་མེད་ཅིར་ཡང་འཆར་ཏེ་ངོས་མ་ཟིན༔ འདི་ཉིད་རང་ངོ་ཤེས་པར་བྱ་བའི་ཕྱིར༔ དུས་གསུམ་རྒྱལ་བས་ཆོས་སྒོ་བརྒྱད་ཁྲི་དང་༔ བཞི་སྟོང་ལ་སོགས་བསམ་གྱིས་མི་ཁྱབ་པ༔ གསུངས་པ་ཐམས་ཅད་འདི་ཉིད་རྟོགས་ཕྱིར་ལས༔ གཞན་དུ་ཅི་ཡང་རྒྱལ་བས་གསུངས་པ་མེད༔ གསུང་རབ་ནམ་མཁའི་མཐའ་མཉམ་དཔག་མེད་ཀྱང་༔ དོན་ལ་རིག་པ་ངོ་སྤྲོད་ཚིག་གསུམ་པོ༔ རྒྱལ་བའི་དགོངས་པ་མངོན་སུམ་ངོ་སྤྲོད་འདི༔སྦ་འཕྲི་མེད་པར་མཛུབ་ཚུགས་འདི་ཀ་ཡིན༔ ཀྱེ་ཧོ་སྐལ་ལྡན་བུ་དག་ཚུར་ཉོན་དང་༔སེམས་ཞེས་ཟེར་བའི་ཡོངས་གྲགས་སྒྲ་བོ་ཆེ༔ འདི་ཉིད་མ་རྟོགས་ལོག་རྟོགས་ཕྱོགས་རྟོགས་དང་༔ ཡང་དག་ཅི་བཞིན་ཉིད་དུ་མ་རྟོགས་པས༔ གྲུབ་མཐའི་འདོད་པ་བསམ་གྱིས་མི་ཁྱབ་བྱུང་༔ དེ་ཡང་སོ་སོའི་སྐྱེ་བོ་ཐ་མལ་པས༔ མ་རྟོགས་རང་ངོ་རང་གི་མ་ཤེས་པས༔ ཁམས་གསུམ་རྒྱུད་དྲུག་འཁྱམས་ཤིང་སྡུག་བསྔལ་སྤྱོད༔ དེ་ཡང་རང་སེམས་འདི་ཉིད་མ་རྟོགས་སྐྱོན༔ ཕྱི་རོལ་མུ་སྟེགས་ལོག་པར་རྟོག་པ་སྟེ༔རྟག་ཆད་མཐའ་ལ་ལྟུང་བས་ཕྱིན་ཅི་ལོག༔ དེ་ཡང་རང་སེམས་འདི་ཉིད་མ་རྟོགས་སྐྱོན༔ ཉན་ཐོས་རང་རྒྱལ་ཕྱོགས་ཙམ་བདག་མེད་པར༔ རྟོགས་པར་འདོད་ཀྱང་ཅི་བཞིན་ཉིད་མ་རྟོགས༔ གཞན་ཡང་རང་རང་གཞུང་དང་གྲུབ་མཐའ་ཡི༔ འདོད་པས་བཅིངས་པས་འོད་གསལ་མ་མཐོང་བསྒྲིབས༔ ཉན་ཐོས་རང་རྒྱལ་གཟུང་འཛིན་ཞེན་པས་བསྒྲིབས༔ དབུ་མ་བདེན་གཉིས་མཐའ་ལ་ཞེན་པས་བསྒྲིབས༔ ཀྲི་ཡོག་བསྙེན་སྒྲུབ་མཐའ་ལ་ཞེན་པས་བསྒྲིབས༔ མ་ཧཱ་ཨ་ནུ་དབྱིངས་རིག་ཞེན་པས་བསྒྲིབས༔གཉིས་མེད་དོན་ལ་གཉིས་སུ་ཕྱེས་བས་གོལ༔ གཉིས་མེད་གཅིག་ཏུ་མ་གྱུར་སངས་མི་རྒྱ༔ ཐམས་ཅད་རང་སེམས་འཁོར་འདས་དབྱེར་མེད་ལ༔ སྤང་བླང་འདོར་ལེན་ཐེག་པས་འཁོར་བར་འཁྱམས༔ རང་རིག་སྐུ་གསུམ་རྩོལ་མེད་ལྷུན་གྲུབ་ལ༔ འདི་མིན་ཐག་རིང་གཞན་དུ་བགྲོད་ཐབས་ཀྱིས༔ ས་ལམ་རྩི་བའི་རྨོངས་པ་དོན་ལ་གཡེལ༔སངས་རྒྱས་དགོངས་པ་བློ་ལས་འདས་པ་ལ༔ དམིགས་གཏད་མཚན་མའི་སྒོམ་བཟླས་བྱེད་པས་འཁྲུལ༔ དེ་ཕྱིར་བྱས་ཆོས་བྱ་བྲེལ་ཀུན་བསྐྱུར་ལ༔ འདི་ལྟར་རིག་པ་ཅེར་མཐོང་རང་གྲོལ་དུ༔ བསྟན་པས་ཆོས་ཀུན་རང་གྲོལ་ཆེན་པོར་རྟོགས༔ དེ་ཕྱིར་རྫོགས་པ་ཆེན་པོར་ཀུན་ཀྱང་རྫོགས༔ ས་མ་ཡ༔ རྒྱ་རྒྱ་རྒྱ༔ཨེ་མ་ཧོ༔ སེམས་ཞེས་བྱ་བའི་རིག་རིག་ཏུར་ཏུར་པོ༔ ཡོད་ནི་གཅིག་ཀྱང་ཡོད་པ་མ་ཡིན་ཏེ༔ བྱུང་ནི་འཁོར་འདས་བདེ་སྡུག་སྣ་ཚོགས་བྱུང་༔ འདོད་ནི་ཐེག་པ་བཅུ་གཉིས་ལྟར་དུ་འདོད༔ མིང་ནི་བསམ་གྱིས་མི་ཁྱབ་སོ་སོར་བཏགས༔ ལ་ལ་དག་གིས་སེམས་ད་སེམས་ཉིད་ཟེར༔ མུ་སྟེགས་ལ་ལས་བདག་ཅེས་མིང་དུ་བཏགས༔ ཉན་ཐོས་པས་ནི་གང་ཟག་བདག་མེད་ཟེར༔ སེམས་ཙམ་པས་ནི་སེམས་ཞེས་མིང་དུ་བཏགས༔ ལ་ལས་དབུ་མ་ཞེས་པའི་མིང་དུ་བཏགས༔ ལ་ལས་ཤེས་རབ་ཕ་རོལ་ཕྱིན་པ་ཟེར༔ ལ་ལས་བདེ་གཤེགས་སྙིང་པོ་མིང་དུ་བཏགས༔ ལ་ལས་ཕྱག་རྒྱ་ཆེན་པོ་མིང་དུ་བཏགས༔ ལ་ལས་ཐིག་ལེ་ཉག་གཅིག་མིང་དུ་བཏགས༔ ལ་ལས་ཆོས་ཀྱི་དབྱིངས་ཞེས་མིང་དུ་བཏགས༔ ལ་ལས་ཀུན་གཞི་ཞེས་པའི་མིང་དུ་བཏགས༔ལ་ལས་ཐ་མལ་ཤེས་པ་མིང་དུ་བཏགས༔ འདི་ཉིད་མངོན་སུམ་མཛུབ་ཚུགས་ངོ་སྤྲད་ན༔ འདས་པའི་རྟོག་པ་རྗེས་མེད་ཡལ་བའི་རྟིང་༔ མ་འོངས་རྟོག་པ་མ་སྐྱེས་སོ་མ་ལ༔ ད་ལྟར་བཟོ་མེད་རང་ལུགས་གནས་པའི་དུས༔ ཐ་མལ་དུས་ཀྱི་ཤེས་པ་འདི་ཀ་ལ༔ རང་གི་རང་ལ་ཅེར་གྱིས་བལྟས་པའི་ཚེ༔ བལྟས་པས་མཐོང་རྒྱུ་མེད་པའི་སལ་ལེ་བ༔ རིག་པ་མངོན་སུམ་རྗེན་པ་ཧྲིག་གེ་བ༔ ཅི་ཡང་གྲུབ་པ་མེད་པས་སྟོང་སང་ངེ་༔ གསལ་སྟོང་གཉིས་སུ་མེད་པས་ཡེ་རེ་བ༔ རྟག་པ་མ་ཡིན་ཅིར་ཡང་གྲུབ་པ་མེད༔ ཆད་པ་མ་ཡིན་སལ་ལེ་ཧྲིག་གེ་བ༔ གཅིག་ཏུ་མ་ཡིན་དུ་མ་རིག་ཅིང་གསལ༔དུ་མ་མ་གྲུབ་དབྱེར་མེད་རོ་གཅིག་ངང་༔ གཞན་ན་མེད་དེ་རང་རིག་འདི་ཉིད་དོ༔དངོས་པོའི་གནས་ལུགས་དོན་གྱི་ངོ་སྤྲོད་དེ༔ འདི་ལ་སྐུ་གསུམ་དབྱེར་མེད་གཅིག་ཏུ་ཚང་༔ ཅིར་ཡང་མ་གྲུབ་སྟོང་པ་ཆོས་ཀྱི་སྐུ༔ སྟོང་པའི་རང་གདངས་གསལ་བ་ལོངས་སྐུ་ཡིན༔ འགག་མེད་ཅིར་ཡང་འཆར་བ་སྤྲུལ་པའི་སྐུ༔ གསུམ་ཀ་གཅིག་ཏུ་ཚང་བ་ངོ་བོ་ཉིད༔ འདི་ཉིད་མཛུབ་ཚུགས་བཙན་ཐབས་ངོ་སྤྲད་ན༔ ད་ལྟ་རང་གི་ཤེས་པ་འདི་ཀ་ཡིན༔ མ་བཅོས་རང་གསལ་འདི་ཀ་ཡིན་པ་ལ༔ སེམས་ཉིད་མ་རྟོགས་བྱ་བ་ཅི་ལ་ཟེར༔ འདི་ལ་བསྒོམ་རྒྱུ་ཅི་ཡང་མེད་པ་ལ༔ བསྒོམ་པས་མ་བྱུང་བྱ་བ་ཅི་ལ་ཟེར༔ རིག་པ་མངོན་སུམ་འདི་ཀ་ཡིན་པ་ལ༔ རང་སེམས་མ་རྙེད་བྱ་བ་ཅི་ལ་ཟེར༔ གསལ་རིག་རྒྱུན་ཆད་མེད་པ་འདི་ཀ་ལ༔ སེམས་ངོ་མ་མཐོང་བྱ་བ་ཅི་ལ་ཟེར༔ ཡིད་ཀྱི་བསམ་མཁན་ཁོ་རང་ཡིན་པ་ལ༔ བཙལ་བས་མ་རྙེད་བྱ་བ་ཅི་ལ་ཟེར༔ འདི་ལ་བྱ་རྒྱུ་ཅི་ཡང་མེད་པ་ལ༔ བྱས་པས་མ་བྱུང་བྱ་བ་ཅི་ལ་ཟེར༔ མ་བཅོས་རང་གསལ་བཞག་པས་ཆོག་པ་ལ༔ གནས་སུ་མ་བཏུབ་བྱ་བ་ཅི་ལ་ཟེར༔ བྱར་མེད་ཅོག་གེ་བཞག་པས་ཆོག་པ་ལ༔ དེ་ལ་མ་ནུས་བྱ་བ་ཅི་ལ་ཟེར༔ གསལ་རིག་སྟོང་གསུམ་དབྱེར་མེད་ལྷུན་གྲུབ་ལ༔ བསྒྲུབས་པས་མ་གྲུབ་བྱ་བ་ཅི་ལ་ཟེར༔ རྒྱུ་རྐྱེན་མེད་པ་རང་བྱུང་ལྷུན་གྲུབ་ལ༔ རྩོལ་བས་མ་ནུས་བྱ་བ་ཅི་ལ་ཟེར༔ རྟོག་པ་ཤར་གྲོལ་དུས་མཉམ་ཡིན་པ་ལ༔ གཉེན་པོས་མ་ཐུབ་བྱ་བ་ཅི་ལ་ཟེར༔ ད་ལྟའི་ཤེས་པ་འདི་ཀ་ཡིན་པ་ལ༔ འདི་ལ་མི་ཤེས་བྱ་བ་ཅི་ལ་ཟེར༔ སེམས་ཉིད་སྟོང་པ་གཞི་མེད་ཡིན་པར་ངེས༔ རང་སེམས་དངོས་མེད་ནམ་མཁའ་སྟོང་པ་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ སྟོང་པ་ཕྱང་ཆད་ཆད་ལྟ་མ་ཡིན་པར༔ རང་བྱུང་ཡེ་ཤེས་ཡེ་ནས་གསལ་བར་ངེས༔ རང་བྱུང་རང་གསལ་ཉི་མའི་སྙིང་པོ་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ རིག་པ་ཡེ་ཤེས་རྒྱུན་ཆད་མེད་པར་ངེས༔ རིག་པ་རྒྱུན་ཆད་མེད་པ་ཆུ་རྒྱུན་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ རྣམ་རྟོག་འགྱུ་དྲན་ངོས་བཟུང་མེད་པར་ངེས༔ འགྱུ་བ་དངོས་མེད་བར་སྣང་སེར་བུ་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ ཅི་སྣང་ཐམས་ཅད་རང་སྣང་ཡིན་པར་ངེས༔ སྣང་བ་རང་སྣང་མེ་ལོང་གཟུགས་བརྙན་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ མཚན་མ་ཐམས་ཅད་རང་སར་གྲོལ་བར་ངེས༔ རང་བྱུང་རང་གྲོལ་བར་སྣང་སྤྲིན་དང་འདྲ༔འདྲ་འམ་མི་འདྲ་རང་གི་སེམས་ལ་ལྟོས༔ སེམས་ལས་མ་གཏོགས་གཞན་ན་ཆོས་མེད་པས༔ ལྟ་བས་བལྟ་རྒྱུ་གཞན་ན་ཆོས་མེད་དོ༔སེམས་ལས་མ་གཏོགས་གཞན་ན་ཆོས་མེད་པས༔ སྒོམ་པས་བསྒོམ་རྒྱུ་གཞན་ན་ཆོས་མེད་དོ༔ སེམས་ལས་མ་གཏོགས་གཞན་ན་ཆོས་མེད་པས༔ སྤྱོད་པ་སྤྱོད་རྒྱུ་གཞན་ན་ཆོས་མེད་དོ༔ སེམས་ལས་མ་གཏོགས་གཞན་ན་ཆོས་མེད་པས༔ དམ་ཚིག་བསྲུང་རྒྱུ་གཞན་ན་ཆོས་མེད་དོ༔ སེམས་ལས་མ་གཏོགས་གཞན་ན་ཆོས་མེད་པས༔ འབྲས་བུ་བསྒྲུབ་རྒྱུ་གཞན་ན་ཆོས་མེད་དོ༔ ཡང་ལྟོས་ཡང་ལྟོས་རང་གི་སེམས་ལ་ལྟོས༔ ཕྱི་རོལ་ནམ་མཁའི་དབྱིངས་སུ་ཕར་བལྟས་པས༔ སེམས་འདི་འཕྲོ་བས་འཕྲོ་ས་མི་གདའ་ན༔ ནང་དུ་རང་གི་སེམས་ལ་ཚུར་བལྟས་པས༔ རྟོག་པ་འཕྲོ་བའི་འཕྲོ་མཁན་མི་གདའ་ན༔ རང་སེམས་འཕྲོ་འཕྲོ་མེད་པའི་སལ་ལེ་བ༔ རང་རིག་འོད་གསལ་སྟོང་པ་ཆོས་ཀྱི་སྐུ༔ སྤྲིན་མེད་དྭངས་པའི་མཁའ་ལ་ཉི་ཤར་འདྲ༔ རྣམ་རྟོག་མི་མངའ་ཅིར་ཡང་སལ་ལེར་མཁྱེན༔ འདི་དོན་རྟོགས་དང་མ་རྟོགས་ཁྱད་པར་ཆེ༔ གདོད་ནས་མ་སྐྱེས་རང་བྱུང་འོད་གསལ་འདི༔ ཕ་མ་མེད་པའི་རིག་པའི་ཁྱེའུ་ཆུང་མཚར༔ སུས་ཀྱང་མ་བྱས་རང་བྱུང་ཡེ་ཤེས་མཚར༔ སྐྱེ་མ་མྱོང་ཞིང་འཆི་རྒྱུ་མེད་པ་མཚར༔ མངོན་སུམ་གསལ་ཡང་མཐོང་མཁན་མེད་པ་འཚར༔ འཁོར་བ་འཁྱམས་ཀྱང་ངན་དུ་མི་འགྲོ་མཚར༔ སངས་རྒྱས་ཐོབ་ཀྱང་བཟང་དུ་མི་འགྲོ་མཚར༔ ཀུན་ལ་ཡོད་ཀྱང་ངོ་མ་ཤེས་པ་མཚར༔ འདི་བཞག་འབྲས་བུ་གཞན་ཞིག་རེ་བ་མཚར༔རང་ལ་ཡོད་ཀྱང་གཞན་དུ་བཙལ་བ་མཚར༔ ཨེ་མ་ཧོ༔ ད་ལྟའི་རིག་པ་དངོས་མེད་གསལ་བ་འདི༔ འདི་ཀ་ལྟ་བ་ཀུན་གྱི་ཡང་རྩེ་ཡིན༔ དམིགས་མེད་ཁྱབ་གདལ་བློ་དང་བྲལ་བ་འདི༔ འདི་ཀ་སྒོམ་པ་ཀུན་གྱི་ཡང་རྩེ་ཡིན༔ མ་བཅོས་འཛིན་མེད་ལྷུག་པར་འཇོག་པ་འདི༔ འདི་ཀ་སྤྱོད་པ་ཀུན་གྱི་ཡང་རྩེ་ཡིན༔ མ་བཙལ་ཡེ་ནས་ལྷུན་གྱིས་གྲུབ་པ་འདི༔ འདི་ཀ་འབྲས་བུ་ཀུན་གྱི་ཡང་རྩེ་ཡིན༔ ནོར་བ་མེད་པས་ཐིག་ཆེན་བཞི་བསྟན་པ༔ ལྟ་བ་ནོར་ས་མེད་པའི་ཐིག་ཆེན་ནི༔ ད་ལྟའི་རིག་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ སྒོམ་པ་ནོར་ས་མེད་པའི་ཐིག་ཆེན་ནི༔ ད་ལྟའི་ཤེས་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ སྤྱོད་པ་ནོར་ས་མེད་པའི་ཐིག་ཆེན་ནི༔ ད་ལྟའི་ཤེས་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ འབྲས་བུ་ནོར་ས་མེད་པའི་ཐིག་ཆེན་ནི༔ ད་ལྟའི་ཤེས་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ མི་འགྱུར་བ་ཡི་གཟེར་ཆེན་བཞི་བསྟན་པ༔ ལྟ་བ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བསྟན་པའི་ཕྱིར་ན་གཟེར་ཞེས་བྱ༔ སྒོམ་པ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བསྟན་པའི་ཕྱིར་ན་གཟེར་ཞེས་བྱ༔ སྤྱོད་པ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བསྟན་པའི་ཕྱིར་ན་གཟེར་ཞེས་བྱ༔ འབྲས་བུ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བསྟན་པའི་ཕྱིར་ན་གཟེར་ཞེས་བྱ༔དུས་གསུམ་གཅིག་ཏུ་བཞག་པའི་མན་ངག་ནི༔ སྔར་རྗེས་མི་བཅད་འདས་པའི་འདུ་ཤེས་དོར༔ ཕྱི་མདུན་མི་བསུ་ཡིད་ཀྱི་འབྲེལ་ཐག་བཅད༔ ད་ལྟ་འཛིན་མེད་ནམ་མཁའི་ངང་ལ་བཞག༔ སྒོམ་དུ་མེད་དེ་ཅིར་ཡང་མི་སྒོམ་ཞིང་༔ ཡེངས་སུ་མེད་དེ་ཡེངས་མེད་དྲན་པ་བརྟེན༔ སྒོམ་མེད་ཡེངས་མེད་ངང་ལ་གྱེར་གྱིས་ལྟོས༔ རང་རིག་ཤེས་པ་རང་གསལ་ལྷང་ངེ་བ༔ ཤར་བ་དེ་ཀ་བྱང་ཆུབ་སེམས་ཞེས་བྱ༔ བསྒོམ་དུ་མེད་དེ་ཤེས་བྱའི་ཡུལ་ལས་འདས༔ ཡེངས་སུ་མེད་དེ་ངོ་བོ་ཉིད་ཀྱིས་གསལ༔ སྣང་སྟོང་རང་གྲོལ་གསལ་སྟོང་ཆོས་ཀྱི་སྐུ༔ སངས་རྒྱས་ལམ་གྱིས་མི་བསྒྲུབ་མངོན་གྱུར་པས༔ རྡོ་རྗེ་སེམས་དཔའ་དུས་འདིར་མཐོང་བ་ཡིན༔ མཐར་ཐུག་ཟད་སར་སྐྱོལ་བའི་གདམས་པ་ནི༔ ལྟ་བ་མི་མཐུན་རྒྱ་ཆེར་གྲངས་མང་ཡང་༔ རང་རིག་སེམས་ཉིད་རང་བྱུང་ཡེ་ཤེས་ལ༔ འདི་ལ་བལྟ་བྱ་ལྟ་བྱེད་གཉིས་སུ་མེད༔ ལྟ་བ་མ་བལྟ་ལྟ་མཁན་མཁན་པོ་ཚོལ༔ ལྟ་མཁན་ཁོ་རང་བཙལ་བས་མ་རྙེད་ན༔ དེ་ཚེ་ལྟ་བ་ཟད་སར་སྐྱོལ་བ་ཡིན༔ ལྟ་བའི་ཕུག་ཀྱང་དེ་ཀ་རང་ལ་ཐུག༔ ལྟ་བས་བལྟ་རྒྱུ་ཅི་ཡང་མེད་པ་ལ༔ ཡེ་མེད་སྟོང་པ་ཕྱལ་བར་མ་སོང་བར༔ ད་ལྟའི་རང་རིག་ཤེས་པ་སལ་ལེ་བ༔ རྫོགས་པ་ཆེན་པོའི་ལྟ་བ་དེ་ཀ་ཡིན༔ རྟོགས་དང་མ་རྟོགས་དེ་ལ་གཉིས་སུ་མེད༔ སྒོམ་པ་མི་མཐུན་རྒྱ་ཆེན་གྲངས་མང་ཡང་༔ རང་རིག་ཐ་མལ་ཤེས་པ་ཟང་ཐལ་ལ༔ བསྒོམ་བྱ་དང་ནི་སྒོམ་བྱེད་གཉིས་སུ་མེད༔ སྒོམ་པས་མ་སྒོམས་སྒོམ་པའི་མཁན་པོ་ཚོལ༔ སྒོམ་པའི་མཁན་པོ་བཙལ་བས་མ་རྙེད་ན༔ དེ་ཚེ་སྒོམ་པ་ཟད་སར་སྐྱོལ་བ་ཡིན༔ སྒོམ་པའི་ཕུག་ཀྱང་དེ་ཀ་རང་ལ་ཐུག༔ བསྒོམ་པར་བྱ་རྒྱུ་ཅི་ཡང་མེད་པ་ལ༔ བྱིང་རྨུགས་འཐིབ་རྒོད་དབང་དུ་མ་སོང་བར༔ ད་ལྟ་མ་བཅོས་ཤེས་པ་སལ་ལེ་བ༔ མ་བཅོས་མཉམ་པར་བཞག་པ་བསམ་གཏན་ཡིན༔ གནས་དང་མི་གནས་དེ་ལ་གཉིས་སུ་མེད༔ སྤྱོད་པ་མི་མཐུན་རྒྱ་ཆེན་གྲངས་མང་ཡང་༔ རང་རིག་ཡེ་ཤེས་ཐིག་ལེ་ཉག་གཅིག་ལ༔ སྤྱད་བྱ་དང་ནི་སྤྱོད་བྱེད་གཉིས་སུ་མེད༔ སྤྱོད་པ་མ་སྤྱོད་སྤྱོད་མཁན་དེ་ཉིད་ཚོལ༔ སྤྱོད་མཁན་དེ་ཉིད་བཙལ་བས་མ་རྙེད་ན༔ དེ་ཚེ་སྤྱོད་པ་ཟད་སར་སྐྱོལ་བ་ཡིན༔ སྤྱོད་པའི་ཕུག་ཀྱང་དེ་ཀ་རང་ལ་ཐུག༔ སྤྱོད་པར་བྱ་རྒྱུ་ཅི་ཡང་མེད་པ་ལ༔ བག་ཆགས་འཁྲུལ་བའི་དབང་དུ་མ་སོང་བར༔ ད་ལྟའི་ཤེས་པ་མ་བཅོས་རང་གསལ་ལ༔ བཅོས་བསླད་བླང་དོར་གང་ཡང་མ་བྱེད་པར༔ དེ་ཀ་རྣམ་པར་དག་པའི་སྤྱོད་པ་ཡིན༔དག་དང་མ་དག་དེ་ལ་གཉིས་སུ་མེད༔ འབྲས་བུ་མི་མཐུན་རྒྱ་ཆེ་གྲངས་མང་ཡང་༔རང་རིག་སེམས་ཉིད་སྐུ་གསུམ་ལྷུན་གྲུབ་ལ༔ བསྒྲུབ་བྱ་དང་ནི་སྒྲུབ་བྱེད་གཉིས་སུ་མེད༔ འབྲས་བུ་མ་སྒྲུབས་སྒྲུབ་མཁན་དེ་ཉིད་ཚོལ༔ སྒྲུབ་མཁན་དེ་ཉིད་བཙལ་བས་མ་རྙེད་ན༔ དེ་ཚེ་འབྲས་བུ་ཟད་སར་སྐྱོལ་བ་ཡིན༔ འབྲས་བུའི་ཕུག་ཀྱང་དེ་ཀ་རང་ལ་ཐུག༔ འབྲས་བུ་བསྒྲུབ་རྒྱུ་ཅི་ཡང་མེད་པ་ལ༔ སྤང་བླང་རེ་དོགས་དབང་དུ་མ་སོང་བར༔ ད་ལྟའི་ཤེས་རིག་རང་གསལ་ལྷུན་གྲུབ་ལ༔ མངོན་གྱུར་སྐུ་གསུམ་རང་གསལ་རྟོགས་པ་ཉིད༔ ཡེ་སངས་རྒྱས་པའི་འབྲས་བུ་དེ་ཉིད་དོ༔ རྟག་ཆད་མཐའ་བརྒྱད་བྲལ་བའི་རིག་པ་འདི༔ གང་གི་མཐའ་མ་ལྷུང་བས་དབུ་མ་ཟེར༔ དྲན་རིག་རྒྱུན་ཆད་མེད་པའི་རིག་པ་ཟེར༔ སྟོང་པ་རིག་པའི་སྙིང་པོ་ཅན་ཡིན་པས༔ དེ་ཕྱིར་བདེ་གཤེགས་སྙིང་པོ་མིང་དུ་བཏགས༔ འདི་དོན་ཤེས་ན་ཤེས་བྱ་ཀུན་གྱི་རབ༔དེ་ཕྱིར་ཤེས་རབ་ཕ་རོལ་ཕྱིན་པ་ཟེར༔ བློ་འདས་མཐའ་དང་ཡེ་ནས་བྲལ་བའི་ཕྱིར༔དེ་ཕྱིར་ཕྱག་རྒྱ་ཆེན་པོ་མིང་དུ་བཏགས༔ དེ་ཉིད་རྟོགས་དང་མ་རྟོགས་ཁྱད་པར་ལས༔འཁོར་འདས་བདེ་སྡུག་ཀུན་གྱི་གཞིར་གྱུར་པས༔ དེ་ཕྱིར་ཀུན་གཞི་ཞེས་པའི་མིང་དུ་བཏགས༔ བཟོ་མེད་ཐ་མལ་རང་གར་གནས་དུས་ཀྱི༔ ཤེས་པ་སལ་ལེ་ཧྲིག་གེ་འདི་ཀ་ལ༔ ཐ་མལ་ཤེས་པ་ཞེས་བྱའི་མིང་དུ་བཏགས༔ བཟང་མདོག་སྙན་མིང་མང་པོ་ཅི་བཏགས་ཀྱང་༔ དོན་ལ་ད་ལྟའི་ཤེས་རིག་འདི་ཀ་ལས༔ འདི་མིན་གཞན་ལས་ལྷག་པ་སུས་འདོད་པ༔ གླང་པོ་རྙེད་ཀྱང་རྗེས་ཚོལ་དེ་བཞིན་དུ༔ སྟོང་གསུམ་ཐག་ཏུ་བྲན་ཡང་རྙེད་མི་སྲིད༔ སེམས་ལས་མ་གཏོགས་སངས་རྒྱས་རྙེད་མི་སྲིད༔འདི་དོན་མ་ཤེས་ཕྱི་རོལ་སེམས་བཙལ་ཀྱང་༔ རང་གིས་གཞན་ཚོལ་རང་ཉིད་ཅི་ཕྱིར་རྙེད༔ དཔེར་ན་གླེན་པ་གཅིག་གིས་མི་མང་ཁྲོད༔ ལྟད་མོ་བྱས་པས་རང་ཉིད་སྟོར་ནས་སུ༔ རང་ངོ་མ་ཤེས་གཞན་དུ་ཚོལ་བ་ཡང་༔ རང་གིས་གཞན་ཚོལ་འཁྲུལ་བ་དེ་བཞིན་ནོ༔དངོས་པོ་གཤིས་ཀྱི་གནས་ལུགས་མ་མཐོང་བས༔ སྣང་བ་སེམས་སུ་མ་ཤེས་འཁོར་བར་གོལ༔ རང་སེམས་སངས་རྒྱས་མ་རྟོགས་མྱང་འདས་བསྒྲིབས༔ འཁོར་འདས་གཉིས་ལ་རིག་དང་མ་རིག་གིས༔ སྐད་ཅིག་གཅིག་གི་བར་ལ་བྱེ་བྲག་ཕྱེད༔ རང་གི་སེམས་ལ་གཞན་དུ་མཐོང་བས་འཁྲུལ༔ འཁྲུལ་དང་མ་འཁྲུལ་ངོ་བོ་གཅིག་པ་སྟེ༔འགྲོ་ལ་སེམས་རྒྱུད་གཉིས་སུ་མ་གྲུབ་པས༔ སེམས་ཉིད་མ་བཅོས་རང་སར་བཞག་པས་གྲོལ༔ འཁྲུལ་བ་དེ་ཉིད་སེམས་སུ་མ་རིག་ན༔ ཆོས་ཉིད་དོན་དེ་ནམ་ཡང་མི་རྟོགས་པས༔ རང་བྱུང་རང་ཤར་རང་གསལ་རང་ལ་བལྟ༔ སྣང་བ་འདི་དག་དང་པོ་གང་ནས་བྱུང་༔ བར་དུ་གང་ན་གནས་ཤིང་མཐར་གར་འགྲོ༔ བལྟས་པས་དཔེར་ན་རྫིང་གི་བྱ་རོག་གིས༔ རྫིང་ནས་འཕུར་ཀྱང་རྫིང་ལས་ལོགས་ས་མེད༔ དེ་བཞིན་སྣང་བ་སེམས་ལ་འཆར་བའི་ཕྱིར༔ རང་གི་སེམས་ལ་ཤར་ཞིང་སེམས་སུ་གྲོལ༔སེམས་ཉིད་ཀུན་ཤེས་ཀུན་རིག་སྟོང་གསལ་འདི༔ གདོད་ནས་གསལ་སྟོང་དབྱེར་མེད་ནམ་མཁའ་ལྟར༔ རང་བྱུང་ཡེ་ཤེས་མངོན་སུམ་གསལ་བ་རུ༔ གཏན་ལ་ཕེབ་ན་དེ་ཀ་ཆོས་ཉིད་དོ༔ ཡིན་པའི་རྟགས་ནི་སྣང་སྲིད་ཐམས་ཅད་ཀུན༔ རང་གི་སེམས་སུ་རིག་ཅིང་སེམས་ཉིད་འདི༔ རིག་ཅིང་གསལ་བས་ནམ་མཁའ་ལྟ་བུར་རྟོགས༔ཆོས་ཉིད་མཚོན་པའི་ནམ་མཁའ་དཔེར་བཞག་ཀྱང་༔ རེ་ཞིག་ཕྱོགས་ཙམ་མཚོན་པའི་བརྡ་ཙམ་སྟེ༔ སེམས་ཉིད་རིག་བཅས་སྟོང་པ་ཅིར་ཡང་གསལ༔ ནམ་མཁའ་རིག་མེད་སྟོང་པ་བེམ་སྟོང་སྟེ༔ དེ་ཕྱིར་སེམས་དོན་ནམ་མཁས་མཚོན་དུ་མེད༔ ཡེངས་སུ་མེད་དེ་དེ་ཀའི་ངང་ལ་ཞོག༔ སྣང་བ་ཀུན་རྫོབ་སྣ་ཚོགས་འདི་དག་ཀྱང་༔ གཅིག་ཀྱང་བདེན་པར་མ་གྲུབ་འཛིན་པ་བཞིན༔ དེས་ན་སྣང་སྲིད་འཁོར་འདས་ཐམས་ཅད་ཀུན༔ རང་གི་སེམས་ཉིད་གཅིག་གི་མཐོང་སྣང་ཡིན༔ གང་ཚེ་རང་གི་སེམས་རྒྱུད་འགྱུར་ཙམ་ན༔ ཕྱི་རུ་འགྱུར་བས་དེ་ཡི་མཐོང་སྣང་འབྱུང་༔ དེས་ན་ཐམས་ཅད་སེམས་ཀྱི་མཐོང་སྣང་སྟེ༔ འགྲོ་བ་རིགས་དྲུག་སོ་སོའི་སྣང་བར་མཐོང་༔ ཕྱི་རོལ་མུ་སྟེགས་རྟག་ཆད་གཉིས་སུ་མཐོང་༔ ཐེག་པ་རིམ་དགུ་སོ་སོའི་ལྟ་བ་མཐོང་༔ སྣ་ཚོགས་མཐོང་ཞིང་སྣ་ཚོགས་མི་གཅིག་པ༔ ཐ་དད་བཟུང་བས་སོ་སོའི་ཞེན་པས་འཁྲུལ༔ སྣང་བ་ཐམས་ཅད་སེམས་ཀྱི་རིག་པས་ན༔ མཐོང་སྣང་ཤར་ཡང་འཛིན་མེད་སངས་རྒྱས་ཡིན༔ སྣང་བ་མ་འཁྲུལ་འཛིན་པས་འཁྲུལ་བ་ཡིན༔ འཛིན་རྟོག་སེམས་སུ་ཤེས་ན་ངང་གིས་གྲོལ༔ ཅིར་སྣང་ཐམས་ཅད་སེམས་ཀྱིས་སྣང་བ་ཡིན༔སྣོད་ཀྱི་འཇིག་རྟེན་བེམ་པོར་སྣང་བའང་སེམས༔ བཅུད་ཀྱི་སེམས་ཅན་རིགས་དྲུག་སྣང་བའང་སེམས༔ མཐོ་རིས་ལྷ་མིའི་བདེ་བ་སྣང་བའང་སེམས༔ ངན་སོང་གསུམ་གྱི་སྡུག་བསྔལ་སྣང་བའང་སེམས༔ མ་རིག་ཉོན་མོངས་དུག་ལྔའི་སྣང་བའང་སེམས༔རང་བྱུང་ཡེ་ཤེས་རིག་པར་སྣང་བའང་སེམས༔ ངན་རྟོག་འཁོར་བའི་བག་ཆགས་སྣང་བའང་སེམས༔ བཟང་རྟོག་མྱང་འདས་ཞིང་ཁམས་སྣང་བའང་སེམས༔ བདུད་དང་འདྲེ་ཡི་བར་ཆད་སྣང་བའང་སེམས༔ ལྷ་དང་དངོས་གྲུབ་ལེགས་པར་སྣང་བའང་སེམས༔ རྣམ་པར་རྟོག་པ་སྣ་ཚོགས་སྣང་བའང་སེམས༔ མི་རྟོག་རྩེ་གཅིག་བསྒོམ་པར་གནས་པའང་སེམས༔ དངོས་པོ་མཚན་མའི་ཁ་དོག་སྣང་བའང་སེམས༔ མཚན་མ་མེད་ཅིང་སྤྲོས་པ་མེད་པའང་སེམས༔ གཅིག་དང་དུ་མ་གཉིས་མེད་སྣང་བའང་སེམས༔ ཡོད་མེད་གང་དུ་མ་གྲུབ་སྣང་བའང་སེམས༔ སེམས་ལས་མ་གཏོགས་སྣང་བ་གང་ཡང་མེད༔ སེམས་ཉིད་མ་འགགས་སྣང་བ་གང་ཤར་ཡང་༔ ཤར་ཀྱང་མཚོ་ཡི་ཆུ་དང་ཆུ་རླབས་བཞིན༔ གཉིས་སུ་མེད་དེ་སེམས་ཀྱི་ངང་དུ་གྲོལ༔ བཏག་བྱ་མ་འགགས་མིང་འདོགས་ཅིར་བཏགས་ཀྱང་༔ དོན་ལ་སེམས་ཉིད་གཅིག་ལས་ཡོད་མ་ཡིན༔ གཅིག་པུ་དེ་ཡང་གཞི་མེད་རྩ་བྲལ་ཡིན༔ གང་གི་ཕྱོགས་སུའང་མཐོང་བ་གཅིག་ཀྱང་མེད༔ དངོས་པོར་མ་མཐོང་ཅིར་ཡང་གྲུབ་པ་མེད༔ སྟོང་པར་མ་མཐོང་རིག་ཅིང་གསལ་བའི་མདངས༔ སོ་སོར་མ་མཐོང་གསལ་སྟོང་དབྱེར་མེད་ངང་༔ ད་ལྟ་རང་གི་རིག་པ་གསལ་ཧྲིག་གེ༔ ཡིན་པར་བྱས་ཀྱང་དེ་ཉིད་བྱེད་མི་ཤེས༔རང་བཞིན་མེད་ཀྱང་ཉམས་སུ་མངོན་སུམ་མྱོང༔ འདི་ཉིད་ཉམས་སུ་མྱོང་ན་ཀུན་གྲོལ་ཏེ༔ དབང་པོ་དག་ལ་རྣོ་རྟུལ་མེད་པར་རྟོགས༔ ཏིལ་དང་འོ་མ་མར་གྱི་རྒྱུ་ཡིན་ཀྱང་༔ མ་བསྲུབས་མ་བཙིར་མར་ཁུ་མི་འབྱུང་ལྟར༔ འགྲོ་ཀུན་སངས་རྒྱས་སྙིང་པོ་དངོས་ཡིན་ཀྱང་༔ ཉམས་སུ་མ་བླངས་སེམས་ཅན་སངས་མི་རྒྱ༔ ཉམས་སུ་བླངས་ན་བ་གླང་རྫི་ཡང་གྲོལ༔ བཤད་མི་ཤེས་ཀྱང་མངོན་སུམ་གཏན་ལ་ཕེབ༔ རང་གི་ཁ་རུ་མྱོང་བའི་བུ་རམ་ལ༔ གཞན་གྱིས་དེ་ཡི་རོ་བཤད་མི་དགོས་བཞིན༔ འདི་ཉིད་མ་རྟོགས་པཎྜི་ཏ་ཡང་འཁྲུལ༔ ཐེག་དགུའི་བཤད་པ་ཤེས་བྱར་མཁས་གྱུར་ཀྱང་༔ མ་མཐོང་རྒྱང་གི་གཏམ་རྒྱུད་བསྙད་པ་བཞིན༔ སངས་རྒྱས་ལ་ནི་སྐད་ཅིག་ཉེར་མ་སོང་༔འདི་ཉིད་རྟོགས་ན་དགེ་སྡིག་རང་སར་གྲོལ༔ འདི་ཉིད་མ་རྟོགས་དགེ་སྡིག་གང་སྤྱད་ཀྱང་༔ མཐོ་རིས་ངན་སོང་འཁོར་བ་ལས་མི་འཕགས༔ རང་སེམས་སྟོངས་གསལ་ཡེ་ཤེས་རྟོགས་ཙམ་ན༔ དགེ་སྡིག་ཕན་གནོད་གང་ཡང་མ་གྲུབ་བོ༔ བར་སྣང་སྟོང་པར་ཆུ་མི་ཆགས་པ་བཞིན༔ སྟོང་པ་ཉིད་ལ་དགེ་སྡིག་ཡེ་མ་གྲུབ༔ དེས་ན་རང་རིག་མངོན་སུམ་བཅར་ཕོག་ཏུ༔ ཅེར་མཐོང་རང་གྲོལ་འདི་ཉིད་རབ་ཏུ་ཟབ༔ དེ་ཕྱིར་རང་རིག་འདི་ལ་འདྲིས་པར་གྱིས༔ ཟབ་རྒྱ་རྒྱ་རྒྱ༔ ཨེ་མ་ཧོ༔ རིག་པ་ངོ་སྤྲོད་ཅེར་མཐོང་རང་གྲོལ་འདི༔ མ་འོངས་ཕྱི་རབས་སྙིགས་མའི་སྐལ་ལྡན་དོན༔ རྒྱུད་ལུང་མན་ངག་རང་རིག་ཉམས་མྱོང་ཀུན༔ དགོངས་པ་མདོར་བསྡུས་ཉུང་གསལ་འདི་སྤྱར་རོ༔ ད་ལྟ་མི་སྤེལ་རིན་ཆེན་གཏེར་དུ་སྦ༔ མ་འོངས་ལས་འཕྲོད་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ རིག་པ་མངོན་སུམ་ངོ་སྤྲོད་བསྟན་པའི་ཟབ་ཆོས་གཅེར་མཐོང་རང་གྲོལ་ཞེས་བྱ་བ༔ ཨོ་རྒྱན་གྱི་མཁན་པོ་པདྨ་འབྱུང་གནས་ཀྱིས་སྦྱར་བ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ གཏེར་སྟོན་གྲུབ་ཐོབ་ཀརྨ་གླིང་པས་སྒམ་པོ་གདར་གྱི་རི་ལྷ་བྲན་གར་བྱེད་པ་འདྲ་བ་ནས་གདན་དྲངས་པའོ༔

Tuesday 6 November 2018

ཐུབ་ཆོག་བྱིན་རླབས་གཏེར་མཛོད།


༄༅། །ཐུབ་ཆོག་བྱིན་རླབས་གཏེར་མཛོད་བཞུགས་སོ། 


༄༅། ན་མོ་གུ་རུ་ཤཱཀྱ་མུ་ན་ཡེ།


དེ་ཡང་མདོ་ཏིང་འཛིན་རྒྱལ་པོ་ལས། འཆག་དང་འདུག་དང་འགྲེང་དང་ཉལ་བ་ན། །མི་གང་ཐུབ་པའི་བཟླ་དྲན་བྱེད་པ། །དེ་ཡི་མདུན་ན་རྟག་ཏུ་སྟོན་པ་བཞུགས། །དེ་ནི་རྒྱ་ཆེན་མྱ་ངན་འདའ་བར་འགྱུར། ཞེས་དང་། སྐུ་ལུས་དག་ནི་གསེར་གྱི་མདོག་འདྲ་བས། །འཇིག་རྟེན་མགོན་པོ་ཀུན་ནས་རབ་ཏུ་མཛེས། དམིགས་པ་འདི་ལ་གང་གི་སེམས་འཇུག་པ། །བྱང་ཆུབ་སེམས་དཔའ་དེ་ནི་མཉམ་བཞག་ཡིན། ཞེས་གསུངས་པ་བཞིན་དུ། བདག་ཅག་རྣམས་ཀྱི་སྟོན་པ་མཚུངས་པ་མེད་པ་ཐུབ་པའི་དབང་པོ་རྗེས་སུ་དྲན་པའི་རྣལ་འབྱོར་དུ་བྱ་བ་ནི། འདི་ལྟ་སྟེ།


སངས་རྒྱས་ཆོས་དང་ཚོགས་ཀྱི་མཆོག་རྣམས་ལ།

བྱང་ཆུབ་བར་དུ་བདག་ནི་སྐྱབས་སུ་མཆི།

བདག་གི་སྦྱིན་སོགས་བགྱིས་པའི་བསོད་ནམས་ཀྱིས།

འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག

ལན་གསུམ། 

སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག

སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག

སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག

ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམ་ཚད་མེད་པ་ལ་གནས་པར་གྱུར་ཅིག

ཚད་མེད་བཞི་བསྒོམ་པ་སྔོན་དུ་བཏང་སྟེ།


ཆོས་ཐམས་ཅད་སྣང་ལ་རང་བཞིན་མ་གྲུབ་པའི་དོན་ཡིད་ལ་དྲན་པའི་ངང་ནས།

ཨཿ་སྐྱེ་མེད་སྟོང་པ་ཉིད་དང་རྟེན་འབྱུང་གི །

སྣང་བ་འགག་མེད་ཟུང་འཇུག་སྒྱུ་མའི་ཚུལ། །

རང་མདུན་ནམ་མཁར་མཆོད་སྤྲིན་རྒྱ་མཚོའི་དབུས། །

རིན་ཆེན་སེང་ཁྲི་པད་ཉི་ཟླ་བའི་སྟེང་། །


སྟོན་པ་མཚུངས་མེད་ཤཱཀྱ་སེང་གེ་ནི། །

གསེར་གྱི་མདོག་ཅན་མཚན་དང་དཔེ་བྱད་ལྡན། །

ཆོས་གོས་གསུམ་གསོལ་རྡོ་རྗེ་སྐྱིལ་ཀྲུང་བཞུགས། །

ཕྱག་གཡས་ས་གནོན་ཕྱག་རྒྱ་ལེགས་བརྐྱངས་ཤིང། །


ཕྱག་གཡོན་མཉམ་བཞག་བདུད་རྩིའི་ལྷུང་བཟེད་བསྣམས། །

གསེར་གྱི་རི་ལྟར་གཟི་བརྗིད་དཔལ་འབར་བ། །

ཡེ་ཤེས་འོད་ཟེར་དྲ་བས་མཁའ་དབྱིངས་ཁྱབ། །

ཉེ་བའི་སྲས་བརྒྱད་གནས་བརྟན་བཅུ་དྲུག་སོགས། །


འཕགས་ཚོགས་རྒྱ་མཚོའི་འཁོར་གྱིས་ཡོངས་བསྐོར་ཞིང་། །

དྲན་པ་ཙམ་གྱིས་སྲིད་ཞིའི་མཐའ་གཉིས་ལས། །

རྣམ་གྲོལ་བདེ་བ་མཆོག་གི་དཔལ་སྩོལ་བ། །

སྐྱབས་ཀུན་འདུས་པའི་བདག་ཉིད་ཆེན་པོར་གསལ།


ཞེས་དེ་ལྟར་སངས་རྒྱས་ཀྱི་སྐུ་ལ་དམིགས་ཏེ་དེ་ན་དངོས་སུ་བཞུགས་ཡོད་སྙམ་པའི་སེམས་བསྐྱེད་མ་ཐག་ཏུ། སངས་རྒྱས་རྣམས་ཀྱི་ཡེ་ཤེས་ཀྱི་སྐུ་ལ་ཕྱོགས་དང་དུས་གང་དུ་ཡང་ཉེ་རིང་མི་མངའ་བའི་ཕྱིར། གང་དུ་དམིགས་པ་དེ་ཉིད་དུ་ངེས་པར་བཞུགས་པར་འགྱུར་ཏེ། མདོ་ལས། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབས་བྱེད་ཅིང་། །ཉེས་པ་ཀུན་ལས་རྣམ་པར་གྲོལ། ཞེས་གསུངས་ཤིང་། རྒྱལ་བ་དེ་ཉིད་ལ་དམིགས་ནས་ཚོགས་བསགས་པ་ཡང་མི་ཟད་པའི་དགེ་རྩ་ཆུད་མི་ཟ་བ་ཡིན་ཏེ། ཕལ་པོ་ཆེ་ལས། །རྒྱལ་བ་དེ་དག་ཐོས་མཐོང་མཆོད་པ་བྱས་པས་ཀྱང་། །ཚད་མེད་པ་ཡི་བསོད་ནམས་ཕུང་པོ་འཕེལ་བར་འགྱུར། །ཉོན་མོངས་འཁོར་བའི་སྡུག་བསྔལ་ཐམས་ཅད་སྤང་འགྱུར་དུ། །འདུས་བྱས་འདི་ནང་བར་མ་དོར་ནི་ཟད་མི་འགྱུར། ཞེས་དང་། དེའི་མདུན་དུ་སྨོན་ལམ་ཇི་ལྟར་བཏབ་པ་ཡང་དེ་བཞིན་དུ་འགྲུབ་སྟེ། འཇམ་དཔལ་ཞིང་གི་ཡོན་ཏན་བསྟན་པ་ལས། །ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་འདྲའི་འབྲས་བུ་ཐོབ་པར་འགྱུར། ཞེས་གསུངས་པའི་ཚུལ་རྣམས་ལ་ངེས་པ་བརྟན་པོ་བསྐྱེད་དེ།


སྙིང་རྗེ་ཆེན་པོས་རྩོད་ལྡན་སྙིགས་མའི་ཞིང་། །

བཟུང་ནས་སྨོན་ལམ་ཆེན་པོ་ལྔ་བརྒྱ་བཏབ། །

པད་དཀར་ལྟར་བསྔགས་མཚན་ཐོས་ཕྱིར་མི་ལྡོག། །

སྟོན་པ་ཐུགས་རྗེ་ཅན་ལ་ཕྱག་འཚལ་ལོ། །


བདག་གཞན་སྒོ་གསུམ་དགེ་ཚོགས་ལོངས་སྤྱོད་བཅས། 

ཀུན་བཟང་མཆོད་པའི་སྤྲིན་དུ་དམིགས་ནས་འབུལ། །

ཐོག་མེད་ནས་བསགས་སྡིག་ལྟུང་མ་ལུས་པ། །

སྙིང་ནས་འགྱོད་པ་དྲག་པོས་སོ་སོར་བཤགས། །


འཕགས་དང་སོ་སོའི་སྐྱེ་བོའི་དགེ་བ་ནི། །

དུས་གསུམ་བསགས་ལ་རྗེས་སུ་ཡི་རང་ངོ་། །

ཟབ་ཅིང་རྒྱ་ཆེ་ཆོས་ཀྱི་འཁོར་ལོའི་ཚུལ། །

ཕྱོགས་བཅུར་རྒྱུན་མི་འཆད་པར་བསྐོར་དུ་གསོལ། །


ཁྱོད་ནི་ནམ་མཁའ་ལྟ་བུའི་ཡེ་ཤེས་སྐུ། །

དུས་གསུམ་འཕོ་འགྱུར་མེད་པར་བཞུགས་མོད་ཀྱི། །

གདུལ་བྱའི་སྣང་ངོར་སྐྱེ་འཇིག་ཚུལ་སྟོན་ཀྱང་། །

སྤྲུལ་པའི་གཟུགས་སྐུ་རྟག་ཏུ་སྣང་བར་མཛོད། །


བདག་གིས་དུས་གསུམ་བསགས་པའི་དགེ་ཚོགས་ཀྱིས། །

མཁའ་ཁྱབ་འགྲོ་བ་ཀུན་ལ་ཕན་སླད་དུ། །

ཆོས་ཀྱི་རྒྱལ་པོ་རྟག་ཏུ་ཉེས་བྱེད་ཅིང་། །

ཆོས་རྗེ་རྒྱལ་བའི་གོ་འཕང་ཐོབ་པར་ཤོག །


བདག་ཅག་སྙིགས་མའི་འགྲོ་བ་མགོན་མེད་རྣམས། །

ཐུགས་རྗེས་ལྷག་པར་བཟུང་བའི་བཀའ་དྲིན་ལས། །

ཞིང་དང་དུས་འདིར་རིན་ཆེན་རྣམ་གསུམ་གྱི། །

སྣང་བ་ཇི་སྙེད་ཁྱེད་ཀྱི་ཕྲིན་ལས་ཉིད། །


དེ་ཕྱིར་སྐྱབས་མཆོག་མཚུངས་མེད་གཅིག་པུ་རུ། །

ཡིད་ཆེས་དད་པས་སྙིང་ནས་གསོལ་འདེབས་ན། །

སྔོན་གྱི་དམ་བཅའ་ཆེན་པོ་མ་བསྙེལ་བར། །

བྱང་ཆུབ་བར་དུ་ཐུགས་རྗེས་རྗེས་འཛིན་མཛོད།


ཅེས་ཡིད་ཆེས་ཀྱི་དད་པ་དྲག་པོས་སྟོན་པ་དངོས་སུ་བཞུགས་ཡོད་སྙམ་པའི་སྐུ་ལ་རྩེ་གཅིག་དུ་དམིགས་ཏེ། 

བླ་མ་སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་ཚལ་ལོ། ། མཆོད་དོ། ། སྐྱབས་སུ་མཆིའོ། 


ཐུགས་རྒྱུད་བསྐུལ་བའི་ཚུལ་དུ་ཤེར་ཕྱིན་ཡི་གེ་ཉུང་ངུ་ལས་གསུངས་པའི་བཟུང་ནི།

ཏ་དྱ་ཐཱ། ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭ་ཧཱ།

ཞེས་ཅི་རིགས་དང་།


ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭ་ཧཱ།

ཞེས་ཨོཾ་མན་ཆད་ཅི་འགྲུབ་ཏུ་བཟླའོ། འདི་དག་གི་སྐབས་སུ་སྟོན་པའི་ཡོན་ཏན་རྗེས་སུ་དྲན་ཏེ། དད་པའི་སེམས་ཀྱིས་རྩེ་གཅིག་ཏུ་སྐུ་ཡི་གསལ་སྣང་ལ་དམིགས་ནས། མཚན་བརྗོད་པ་དང་། བཟུང་བཟླས་པའི་རྐྱེན་གྱིས། སྟོན་པའི་སྐུ་ལས་ཡེ་ཤེས་ཀྱི་འོད་ཟེར་སྣ་ཚོགས་པའི་སྣང་བ་ཆེན་པོས་བདག་དང་སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་བསལ་ཞིང་།  ཐེག་པ་ཆེན་པོའི་ལམ་གྱི་ཡོན་ཏན་ཚུལ་བཞིན་དུ་སྐྱེས་ཏེ་ཕྱིར་མི་ལྡོག་པའི་ས་ནོན་པར་བསམ་ལ་དེ་ལྟར་ཅི་ནུས་སུ་བརྩོན་པར་བྱའོ། 

ཐུན་མཚམས་རྣམས་སུ་མཎྜལ་སོགས་མཆོད་པ་དང་། ཐུབ་སྟོད་ཀྱི་རིགས་དང་། སྙིང་རྗེ་པད་དཀར། རྒྱ་ཆེར་རོལ་པ། སྐྱེས་རབ་སྣ་ཚོགས། དེ་བཞིན་གཤེགས་པའི་མཚན་བརྒྱ་རྩ་བརྒྱད་པ་སོགས་མདོ་གང་འདོད་ཅི་ལྟར་ནུས་པར་བཀླག། དགེ་བའི་རྩ་བ་རྣམས་བླ་མེད་བྱང་ཆུབ་ཏུ་བསྔོ་བ་དང་སྨོན་ལམ་གྱིས་རྒྱས་གདབ་པར་བྱའོ། 

སྤྱིར་འགྲོ་འཆག་ཉལ་འདུག་གི་སྐབས་ཀུན་ཏུ་སྟོན་པ་ཉིད་མ་བརྗེད་པར་དྲན་པ་དང་། མཚན་མོ་ཡང་སྟོན་པ་དངོས་སུ་བཞུགས་པའི་སྐུ་ཡི་འོད་ཀྱིས་ཕྱོགས་ཐམས་ཅད་ཉིན་མོ་ཤིན་ཏུ་དྭངས་བའི་དུས་ལྟ་བུར་སྣང་བའི་འདུ་ཤེས་ཀྱི་ངང་དུ་གཉིད་ལོག་པར་བྱ། དུས་རྒྱུན་དུ་སྟོན་པ་ཉིད་ཀྱིས་ཇི་ལྟར་ཐུགས་བསྐྱེད་པའི་ཚུལ་ལས་བརྩམ་སྟེ། དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་རྣམ་པར་ཐར་པ་ལ་རྗེས་སུ་གཞོལ་བའི་བྱང་ཆུབ་ཀྱི་སེམས་རིན་པོ་ཆེའི་དམ་བཅའ་ལྷོད་པ་མེད་པའི་ངང་ནས་བྱང་ཆུབ་སེམས་དཔའི་སྤྱོད་པ་སྤྱི་དང་། ཁྱད་པར་ཞི་ལྷག་གི་རྣལ་འབྱོར་ལ་ཅི་ནུས་སུ་བརྩོན་པས་དལ་འབྱོར་ཐོབ་པ་དོན་ལྡན་དུ་འགྱུར་ཏེ། བདག་ཅག་གི་སྟོན་པ་འདི་ཉིད་ཀྱི་མཚན་ཐོས་པ་ཙམ་ཞིག་གིས་རིམ་གྱིས་བྱང་ཆུབ་ཆེན་པོའི་ལམ་ལས་ཕྱིར་མི་ལྡོག་པར་འགྱུར་བ་མདོ་དུ་མ་ནས་གསུངས་ལ། གོང་དུ་བསྟན་པའི་བཟུངས་འདི་ལས་སངས་རྒྱས་ཐམས་ཅད་འབྱུང་ཞིང། གཟུངས་འདི་རྙེད་པའི་མཐུས་ཤཱཀྱའི་རྒྱལ་པོ་ཉིད་སངས་རྒྱས་ཤིང་། སྤྱན་རས་གཟིགས་བྱང་ཆུབ་སེམས་དཔའི་སྤྱོད་པ་མཆོག་རུ་གྱུར་པ་དང་། གཟུངས་འདི་ཐོས་པ་ཙམ་གྱིས་བསོད་ནམས་རྒྱ་ཆེན་པོ་ཚེགས་མེད་པར་འཐོབ་ཅིང་ལས་ཀྱི་སྒྲིབ་པ་ཐམས་ཅད་བྱང་བ་དང་། སྔགས་བསྒྲུབ་པ་ན་བགེགས་མ་མཆིས་པར་གྲུབ་པར་འགྱུར་རོ་ཞེས་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེ་ཉུང་ངུ་ཞེས་པ་དེ་ཉིད་ལས་གསུངས་ཤིང་། བཀའ་གཞན་ལས་ཀྱང་གཟུངས་འདི་ལན་གཅིག་བཟླས་པས་བསྐལ་པ་བྱེ་བ་ཕྲག་བརྒྱད་ཁྲིའི་བར་དུ་བྱས་པའི་སྡིག་པ་ཐམས་ཅད་བྱང་བར་འགྱུར་པ་སོགས་ཕན་ཡོན་ཚད་མེད་པ་དང་ལྡན་ཞིང། དེ་བཞིན་གཤེགས་པ་ཤཱཀྱ་ཐུབ་པའི་སྙིང་པོ་དམ་པ་ཉིད་དུ་གསུངས་སོ། 

དད་པ་བསྐྱེད་པ་དང་ཞི་ལྷག་གི་རྣལ་འབྱོར་ལ་ཇི་ལྟར་བརྩོན་པའི་ཚུལ་ཟུར་དུ་བཤད་པར་བྱའོ། །

ཞེས་པ་འདི་ནི་བསླབ་གསུམ་ནོར་བུའི་མཛོད་མངའ་དབོན་ཨོ་རྒྱན་བསྟན་འཛིན་ནོར་བུ་ནས་བཀྲ་ཤིས་པའི་ལྷ་རྫས་དང་བཅས་ཏེ་ནན་ཏན་དུ་བསྐུལ་བ་ཡིད་ལ་འཇགས་པའི་སྟེང་དུ་ཉེ་ཆར་ཡང་དབོན་རིན་པོ་ཆེ་ཉིད་ནས་སྤྲུལ་པའི་སྐུ་འཇིགས་མེད་པད་མ་བདེ་ཆེན་ལ་སྦྲན་ཏེ། རིན་ཆེན་དང་པོ་སོགས་བཀྲ་ཤིས་པའི་ལྷ་རྫས་ཀྱི་སྐྱེས་དང་བཅས་མྱུར་དུ་གྲུབ་པར་གྱིས་ཞེས་དམ་པ་ཟུང་གི་བཀས་བསྐུལ་བ་ལ་བརྟེན་ནས། སྟོན་པ་མཆོག་ལ་མི་ཕྱེད་པའི་དད་པ་ཐོབ་ཅིང་། དུས་མཐར་ཆོས་སྨྲ་བའི་མིང་ཙམ་འཛིན་པ ཤཱཀྱའི་རྗེས་འཇུག་མི་ཕམ་འཇམ་དབྱངས་རྒྱ་མཚོས། རྫ་རྡོ་རྗེ་འཕན་ཕྱུག་གི་རི་ཞོལ་ཕུན་ཚོགས་ནོར་བུའི་གླིང་དུ། ཚུལ་འདི་མཐོང་ཐོས་དྲན་རེག་གི་འགྲོ་བ་རྣམས་ཀྱི་རྒྱུད་པ་སྟོན་པ་ཐུབ་པའི་དབང་པོའི་བྱིན་རླབས་མཚུངས་པ་མེད་པ་མངོན་དུ་འཇུག་པར་གྱུར་ཅིག ༎



Thursday 25 October 2018

དོཧཀོཥནཱམམཧཱམུདྲཨུཔདེཤ

།རྒྱ་གར་སྐད་དུ། །དོ་ཧ་ཀོ་ཥ་ནཱ་མ་མ་ཧཱ་མུ་དྲ་ཨུ་པ་དེ་ཤ། །བོད་སྐད་དུ། །དོ་ཧ་མཛོད་ཅེས་བྱ་བ་ཕྱག་རྒྱ་ཆེན་པོའ་མན་ངག །ལྷན་ཅིག་སྐྱེས་པའི་ཡེ་ཤེས་ཀྱི་སྐུ་བདེ་བ་ཆེན་པོ་ལ་ཕྱག་འཚལ་ལོ། །ཇི་ལྟར་དངོས་དང་དངོས་མེད་སྣང་སྟོང་དང་། །རྒྱུ་དང་མི་རྒྱུ་གཡོ་དང་མི་གཡོ་བ། །ཐམས་ཅད་མ་ལུས་ནམ་མཁའི་རང་བཞིན་ལས། །དུས་རྣམས་ཀུན་ཏུ་ནམ་ཡང་གཡོས་པ་མེད། །ནམ་མཁའ་ནམ་མཁའ་ཞེས་ནི་རབ་བརྗོད་ཀྱང་། །ནམ་མཁའི་ངོ་བོ་ཅིར་ཡང་གྲུབ་པ་མེད། །ཡོད་དང་མེད་དང་ཡོད་མིན་མེད་མིན་དང་། །དེ་ལས་གཞན་དུ་མཚོན་པའི་ཡུལ་ལས་འདས། །དེ་ལྟར་མཁའ་དང་སེམས་ཀྱི་ཆོས་ཉིད་ལ། །ཐ་དད་ཅུང་ཟད་ཡོད་པ་མ་ཡིན་ཏེ། །ཐ་དད་མིང་ནི་བློ་བུར་བཏགས་པ་ཙམ། །དེ་ལ་དོན་མེད་བརྫུན་གྱི་ཚིག་ཏུ་ཟད། །ཆོས་རྣམས་ཐམས་ཅད་རང་གི་སེམས་ཡིན་ཏེ། །སེམས་ལས་མ་གཏོགས་ཆོས་གཞན་རྡུལ་ཙམ་མེད། །གང་གིས་གདོད་ནས་སེམས་མེད་རྟོགས་པ་ཡིས། །དུས་གསུམ་རྒྱལ་བའི་དགོངས་པ་དམ་པ་རྙེད། །ཆོས་ཀྱི་ཟ་མ་ཏོག་ཅེས་ཡོངས་སུ་བཏགས། །དེ་ཡང་ལོག་པའི་ཆོས་གཞན་མ་ཡིན་ཏེ། །གདོད་ནས་ལྷན་ཅིག་སྐྱེས་པའི་རང་བཞིན་ནོ། །དེ་ཡིས་དེ་ཉིད་བསྟན་དུ་ཡོད་མིན་ཏེ། །བརྗོད་དུ་མེད་པ་སུས་ཀྱང་གོ་བ་མེད། །གལ་ཏེ་བདག་པོ་ཡོད་ན་ནོར་ཡོད་དེ། །ཡེ་ནས་བདག་མེད་དེ་ལ་ཅི་ཞིག་ཡོད། །སེམས་ཡོད་གྱུར་ན་ཆོས་ཀུན་ཡོད་རིགས་ཏེ། །སེམས་མེད་པ་ལ་ཆོས་ཤིག་སུ་ཡིས་རྟོགས། །སེམས་དང་ཆོས་སུ་སྣང་བ་ཐམས་ཅད་ནི། །བཙལ་ན་མི་རྙེད་འཚོལ་མཁན་གང་ནའང་མེད། །མེད་པ་དུས་གསུམ་མ་སྐྱེས་མ་འགགས་པ། །དེ་ཉིད་གཞན་དུ་འགྱུར་བ་མེད་པ་ནི། །རང་བཞིན་བདེ་བ་ཆེན་པོའ་གནས་ལུགས་ཡིན། །དེ་ཕྱིར་སྣང་བ་ཐམས་ཅད་ཆོས་ཀྱི་སྐུ། །འགྲོ་བ་སེམས་ཅན་རྣམས་ནི་སངས་རྒྱས་ཉིད། །འདུ་བྱེད་ལས་ཀུན་ཡེ་ནས་ཆོས་ཀྱི་དབྱིངས། །བཏགས་པའི་ཆོས་ཀུན་རི་བོང་རྭ་དང་མཚུངས། 
༈ །ཀྱེ་ཧོ། ཉི་མ་སྤྲིན་བྲལ་འོད་ཟེར་ཀུན་ཁྱབ་ཀྱང་། །མིག་མེད་རྣམས་ལ་མུན་པ་ཉིད་དུ་སྣང་། །ལྷན་ཅིག་སྐྱེས་པ་ཀུན་ལ་ཁྱབ་གྱུར་ཀྱང་། །རྨོངས་པ་དག་ལ་དེ་ཉིད་ཤིན་ཏུ་རིང་། །འགྲོ་བ་རྣམས་ཀྱིས་སེམས་མེད་མ་རྟོགས་པས། །བཏགས་པའི་སེམས་ཀྱིས་སེམས་ཉིད་རབ་ཏུ་བཅིངས། །ཇི་ལྟར་གདོན་གྱིས་བརླབས་པའི་སྨྱོན་པ་དག །དབང་མེད་དོན་མེད་སྡུག་བསྔལ་བྱེད་པ་ལྟར། །དངོས་འཛིན་རྣམ་རྟོག་གདོན་གྱིས་ཟིན་པ་ཡིས། །ཀྱེ་མ་དོན་མེད་སྡུག་བསྔལ་འབའ་ཞིག་བྱེད། ཁ་ཅིག་བློ་ཡི་དབྱེ་བས་རྨོངས་རྣམས་བཅིངས། །བདག་པོ་ཁྱིམ་དུ་བཞག་ནས་གཞན་དུ་ཚོལ། ཁ་ཅིག་གཟུགས་བརྙན་དག་ལ་དོན་དུ་འཛིན། ཁ་ཅིག་རྩ་བ་བོར་ནས་ལོ་འདབ་འབྲེག །ཇི་ལྟར་བྱས་ཀྱང་བསླུས་པ་མ་ཚོར་རོ། 
༈ །ཀྱེ་ཧོ། བྱིས་པ་རྣམས་ཀྱིས་དེ་ཉིད་མ་རིག་ཀྱང་། །དེ་ཉིད་རང་ལ་གཡོ་མེད་ང་ཡིས་རྟོགས། །ང་ཡིས་ཐོག་མཐའ་མེད་པར་ཤེས་གྱུར་པས། །ང་ཡིས་ང་མཐོང་ང་ཉིད་གཅིག་པུར་ལུས། །གཅིག་པོ་ཉིད་ལ་བལྟས་པས་གཅིག་མ་མཐོང་། །མཐོང་བྱ་མཐོང་བྱེད་བྲལ་བས་བརྗོད་དུ་མེད། །བརྗོད་དུ་མེད་པ་སུ་ཡིས་གོ་བར་འགྱུར། །གཉུག་མའི་ཡིད་ལ་གང་ཚེ་བྱང་གྱུར་པ། །དེ་ཚེ་རི་ཁྲོད་ང་ཡིས་རྟོག་པ་འཇུག །སེང་གེའི་འོ་མ་སྣོད་ངན་ཕལ་པར་མིན། །ཇི་ལྟར་ནགས་ན་སེང་གེའི་ང་རོ་ཡིས། །རི་དྭགས་ཕྲ་མོ་ཐམས་ཅད་སྐྲག་གྱུར་ཀྱང་། །སེང་ཕྲུག་རྣམས་ནི་དགའ་བས་རྒྱུག་པ་ལྟར། །གདོད་ནས་མ་སྐྱེས་བདེ་ཆེན་འདི་བསྟན་པས། །རྨོངས་པ་ལོག་རྟོག་ཅན་རྣམས་སྐྲག་འགྱུར་ཀྱང་། །སྐལ་ལྡན་རབ་ཏུ་དགའ་བས་སྤུ་ཟིང་བྱེད། 
༈ །ཀྱེ་ཧོ། །མ་ཡེངས་སེམས་ཀྱིས་རང་གིས་རང་ལ་ལྟོས། །རང་གི་དེ་ཉིད་རང་གིས་རྟོགས་གྱུར་ན། །ཡེངས་པའི་སེམས་ཀྱང་ཕྱག་རྒྱ་ཆེན་པོར་འཆར། །མཚན་མ་རང་གྲོལ་བདེ་བ་ཆེན་པོའ་ངང་། །རྨི་ལམ་དག་གི་བདེ་དང་སྡུག་བསྔལ་ཀུན། །སད་པའི་དུས་ན་རང་བཞིན་མེད་པའི་ཕྱིར། །རེ་དང་དོགས་པའི་བསམ་པ་ཀུན་སྤངས་ནས། །དགག་དང་སྒྲུབ་པའི་བསམ་པ་སུ་ཞིག་བྱེད། །འཁོར་དང་མྱ་ངན་འདས་པའི་ཆོས་རྣམས་ཀུན། །ང་ཉིད་མཐོང་བས་རང་བཞིན་མེད་པའི་ཕྱིར། །རེ་དང་དོག་པའི་བློ་ནི་ཟད་གྱུར་པས། །སྤང་དང་བླང་བའི་འབད་རྩོལ་ཅི་བྱར་ཡོད། །སྣང་གྲགས་ཐམས་ཅད་སྒྱུ་མ་སྨིག་རྒྱུ་དང་། །གཟུགས་བརྙན་དང་མཚུངས་དངོས་པོའ་མཚན་མ་མེད། །སྒྱུ་མར་སྣང་མཁན་སེམས་ཉིད་ནམ་མཁའ་སྟེ། །མཐའ་བྲལ་དབུས་མེད་སུས་ཀྱང་ཤེས་མི་འགྱུར། །གངྒཱ་ལ་སོགས་ཆུ་ཀླུང་སྣ་ཚོགས་པ། །བ་ཚྭ་ཅན་གྱི་རྒྱ་མཚོར་རོ་གཅིག་ལྟར། །བརྟགས་པའི་སེམས་དང་སེམས་བྱུང་སྣ་ཚོགས་དག །ཆོས་ཀྱི་དབྱིངས་སུ་རོ་གཅིག་ཤེས་པར་བྱོས། །གང་ཞིག་ནམ་མཁའི་ཁམས་ཀུན་ཡོངས་བཙལ་ཡང་། །མཐའ་དང་དབུས་མེད་མཐོང་བ་ཡོངས་སུ་འགགས། །དེ་བཞིན་སེམས་དང་ཆོས་ཉིད་ཡོངས་བཙལ་བས། །སྙིང་པོ་རྡུལ་ཙམ་ཡོད་པར་མ་གྱུར་ཏེ། །ཡོངས་སུ་ཚོལ་བའི་སེམས་ཀྱང་མི་དམིགས་པ། །ཅི་ཡང་མ་མཐོང་བ་དེ་དེ་མཐོང་ཡིན། །ཇི་ལྟར་གཟིངས་ལས་འཕུར་བའི་བྱ་རོག་ནི། །ཕྱོགས་རྣམས་བསྐོར་ཞིང་སླར་ཡང་དེ་རུ་འབབ། །འདོད་པའི་སེམས་ཀྱིས་བསྟན་པའི་རྗེས་སྤྱོད་ཀྱང་། །དང་པོའ་སེམས་ཉིད་གཉུག་མ་ཉིད་དུ་འབབ། །རྐྱེན་གྱིས་མི་འགུལ་རེ་བའི་ཡིད་ཆད་པ། །དོགས་པའི་ལྐུགས་པ་གཞིག་པ་རྡོ་རྗེ་སེམས། །རྩ་བ་ཆོད་པའི་སེམས་ཉིད་ནམ་མཁའ་འདྲ། 
༈ །ཀྱེ་ཧོ། །བསྒོམ་དུ་མེད་པས་ཡིད་ལ་མི་བྱ་སྟེ། །ཐ་མལ་ཤེས་པ་རང་ལུགས་གཉུག་མ་ལ། །བཅོས་པའི་དམིགས་པ་དག་གིས་མི་བསླད་དོ། །རང་བཞིན་དག་པའི་སེམས་ལ་བཅོས་མི་དགོས། །མ་གཟུང་མ་གཏང་རང་ག་ཉིད་དུ་ཞོགས། །གལ་ཏེ་མ་རྟོགས་བློ་ལ་བསྒོམ་རྒྱུ་མེད། །རྟོགས་པ་ཅན་ལ་བསྒོམ་བྱ་སྒོམ་བྱེད་མེད། །ཇི་ལྟར་ནམ་མཁས་ནམ་མཁའ་དམིགས་སུ་མེད། །དེ་ལྟར་སྟོང་པས་སྟོང་པ་བསྒོམ་དུ་མེད། །གཉིས་མེད་ཤེས་པ་ཆུ་དང་འོ་མ་ལྟར། །སྣ་ཚོགས་རོ་གཅིག་བདེ་ཆེན་རྒྱུན་ཆད་མེད། །འདི་ལྟར་དུས་གསུམ་རྣམ་པ་ཐམས་ཅད་དུ། །ཡིད་བྱེར་མེད་།།།་སིང་མ་བྲལ་།།།་གཉུག་མའི་ངང་། །དེ་ཉིད་སྐྱོང་ལ་སྒོམ་ཞེས་ཐ་སྙད་བཏགས། །རླུང་ནི་མ་བཟུང་ཡིད་ནི་མ་བཅིངས་པས། །མ་བཅོས་ཤེས་པ་བུ་ཆུང་ལྟ་བུར་ཞོག །དྲན་རྟོག་བྱུང་ན་དེ་ཉིད་རང་ལ་ལྟོས། །ཆུ་དང་རླབས་གཉིས་ཐ་དད་མ་རྟོག་ཅིག །ཡིད་ལ་མི་ཕྱེད་ཕྱག་རྒྱ་ཆེན་པོ་ལ། །བསྒོམ་རྒྱུ་རྡུལ་ཙམ་མེད་པས་མི་བསྒོམ་སྟེ། །སྒོམ་མེད་དོན་ལ་འབྲལ་མེད་སྒོམ་པའི་མཆོག །གཉིས་མེད་ལྷན་སྐྱེས་བདེ་བ་ཆེན་པོའ་རོ། །ཇི་ལྟར་ཆུ་ལ་ཆུ་བཞག་རོ་གཅིག་ལྟར། །ཇི་བཞིན་ངང་དུ་དེ་བཞིན་གནས་པའི་ཚེ། །དམིགས་འཛིན་ཡིད་ནི་རབ་ཏུ་ཞི་བར་འགྱུར། 
༈ །ཀྱེ་ཧོ། །གཉིས་མེད་གཉུག་མའི་རང་བཞིན་གང་དེ་ལ། །སྤང་དང་བླང་བའི་དངོས་པོ་ཅི་ཞིག་ཡོད། །ངས་ནི་ཆོས་ཀུན་མ་བཟུང་མ་བཏང་བས། །བུ་ཁྱོད་འདི་གྱིས་བྱ་བ་མི་སྨྲའོ། །ཇི་ལྟར་ནོར་བུ་དེ་དངོས་མེད་པ་ལྟར། །རྣལ་འབྱོར་ཤེས་པ་དེ་ནི་ངེས་མེད་ལྟར། །འདུ་བྱེད་སྣ་ཚོགས་ཅལ་ཅོལ་གང་སྨྲས་ཀྱང་། །རྣལ་འབྱོར་བློ་ནི་གཅིག་ལས་མི་དགའ་འོ། །གཅིག་ཉིད་ན་ནི་གཅིག་ཉིད་ཡོད་མིན་པས། །རྣམ་པ་སྣ་ཚོགས་རྩ་བ་བྲལ་གྱུར་ཏེ། །སྨྱོན་པ་བཞིན་དུ་རྩིས་མེད་ཡན་པ་ལ། །བྱར་མེད་སྤྱོད་པ་བུ་ཆུང་བཞིན་དུ་གནས། །སྲིད་པའི་འདམ་སྐྱེས་པདྨ་བུང་བའི་སེམས། །ཉེས་པ་གང་ལ་གང་གིས་གོས་པ་མེད། །ཟ་ཞིང་འཐུང་ལ་གཉིས་སྤྲོད་བདེ་བ་དང་། །གལ་ཏེ་ལུས་སེམས་རབ་ཏུ་གདུང་འགྱུར་དང་། །རྣམ་པ་སྣ་ཚོགས་གང་ལ་སྤྱོད་གྱུར་པ། །གང་གིས་མ་བཅིངས་མ་གྲོལ་གོས་པ་མེད། །རྟོགས་པའི་ངང་སྤྱོད་རྩིས་མེད་ངང་དེ་ནས། །རྨོངས་པའི་འགྲོ་བ་ཉིད་དག་མངོན་གྱུར་ཚེ། །མི་བཟོད་སྙིང་རྗེའི་ཤུགས་ཀྱིས་མཆི་མ་འབྱུང་། །བདག་གཞན་འདོག་ནས་ཕན་པ་ཉིད་ལ་འཇུག །དོན་ལ་བརྟགས་ན་དམིགས་པ་གསུམ་བྲལ་བས། །ཡང་དག་མ་ཡིན་རྨི་ལམ་སྒྱུ་མ་འདྲ། །ཆགས་ཐོགས་བྲལ་བས་དགའ་ཞིང་སྐྱོན་མེད་པས། །སྒྱུ་མ་མཁས་པས་སྒྱུ་མའི་དོན་བྱེད་མཚུངས། 
༈ །ཀྱེ་ཧོ། །གདོད་ནས་དག་པ་ནམ་མཁའི་རང་བཞིན་ལ། །སྤང་དང་ཐོབ་པའི་དངོས་པོ་གང་ཡང་མེད། །ཡིད་ལ་བྱར་མེད་ཕྱག་རྒྱ་ཆེན་པོ་ནི། །འབྲས་བུ་གང་དུའང་རེ་བར་མ་བྱེད་ཅིག །རེ་བའི་སེམས་ནི་གདོད་ནས་མ་སྐྱེས་པས། །སྤང་དང་ཐོབ་པའི་དངོས་པོ་ཅི་ཞིག་ཡོད། །གལ་ཏེ་གང་གིས་ཐོབ་པའི་དངོས་ཡོད་ན། །དྲན་པའི་ཕྱག་རྒྱ་རྣམ་བཞིས་ཅི་ཞིག་བྱེད། །ཇི་ལྟར་རི་དྭགས་སྐོམ་པས་གདུངས་པ་ཡིས། །སྨིག་རྒྱུའི་ཆུ་ལ་རབ་ཏུ་རྒྱུག་པ་ལྟར། །རྨོངས་པ་གང་ཞིག་འདོད་པས་རབ་གདུངས་བ། །ཇི་ལྟར་འབད་ཀྱང་སླར་ནི་རིང་བར་འགྱུར། །ཡེ་ནས་མ་སྐྱེས་རང་བཞིན་རྣམ་དག་པས། །དེ་ལས་ཁྱད་པར་ཅུང་ཟད་ཡོད་མིན་ཏེ། །བརྟགས་པའི་ཡིད་ནི་དབྱིངས་སུ་དག་གྱུར་པས། །དེ་ལ་རྡོ་རྗེ་འཆང་ཞེས་བཏགས་པ་ཙམ། །ཇི་ལྟར་བྱེ་ཐང་སྐམ་པོའ་སྨིག་རྒྱུ་ནི། །ཆུར་སྣང་ཆུ་ནི་གཉིས་སུ་མེད་པ་ལྟར། །བཟོད་ནས་དག་པ་བཏགས་པའི་ཡིད་སྤངས་པ། །དེ་ལ་རྟག་ཆད་གཉིས་སུ་བརྗོད་དུ་མེད། །ཡིད་བཞིན་ནོར་བུ་དཔག་བསམ་ཤིང་བཞིན་དུ། །སྨོན་ལམ་དབང་གིས་རེ་བ་ཡོངས་སྐོང་བ། །དེ་ཡང་འཇིག་རྟེན་ཐ་སྙད་ཀུན་རྫོབ་སྟེ། །དམ་པའི་དོན་ལ་འགའ་ཡང་ཡོད་མ་ཡིན། །དོ་ཧ་མཛོད་ཅེས་བྱ་བ་ཕྱག་རྒྱ་ཆེན་པོ་སྙིང་པོ་དོན་གྱི་མན་ངག །དཔལ་རི་ཁྲོད་དབང་ཕྱུག་ཤ་བ་རིའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤྲཱི་བཻ་རོ་ཙ་ནས་རང་འགྱུར་དུ་མཛད་པའོ། །

རྣལ་འབྱོར་གྱི་དབང་ཕྱུག་དཔལ་ཤ་བ་རིའི་ཕྱག་རྒྱ་ཆེན་པོ་སྙིང་པོ་དོན་གྱི་མན་ངག་འདི་ཉིད་རས་ཆུང་སྙན་བརྒྱུད་འཛིན་པའི་དམ་པ་གོང་མ་རྣམས་ཀྱིས་ཐུགས་ཉམས་སུ་བཞེས་ཤིང་འགྲེལ་པ་དང་བསྡུས་དོན་ལ་སོགས་པའང་ཅི་རིགས་པ་མཛད་སྣང་ངོ་།

མཧཱམུདྲཨུཔདེཤ

རྒྱ་གར་སྐད་དུ། མ་ཧཱ་མུ་དྲ་ཨུ་པ་དེ་ཤ བོད་སྐད་དུ། ཕྱག་རྒྱ་ཆེན་པོའི་མན་ངག  །
དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ།  །
དཀའ་བ་སྤྱད་ཅིང་བླ་མ་ལ་གུས་པ། །སྡུག་བསྔལ་བཟོད་ལྡན་བློ་ལྡན་ནྰ་རོ་པ། །
སྐལ་ལྡན་ཁྱོད་ཀྱིས་བློ་ལ་འདི་ལྟར་བྱོས།  །ཕྱག་རྒྱ་ཆེན་པོ་བསྟན་དུ་མེད་ཀྱིས་ཀྱང་། །
དཔེར་ན་ནམ་མཁའ་གང་གིས་གང་ལ་བརྟེན། །རང་སེམས་ཕྱག་རྒྱ་ཆེ་ལ་བརྟེན་ཡུལ་མེད། །
མ་བཅོས་གཉུག་མའི་ངང་དུ་གློད་ལ་ཞོག  །བཅིངས་པ་ཀློད་ན་གྲོལ་བར་ཐེ་ཚོམ་མེད། །
དཔེར་ན་ནམ་མཁའི་དཀྱིལ་བལྟས་མཐོང་བ་འགག་པར་འགྱུར། །དེ་བཞིན་སེམས་ཀྱིས་སེམས་ལ་བལྟས་བྱས་ན། །
རྣམ་རྟོག་ཚོགས་འགག་བླ་མེད་བྱང་ཆུབ་འཐོབ།  །དཔེར་ན་ས་རླངས་སྤྲིན་ནི་ནམ་མཁའི་དབྱིངས་སུ་དེངས། །
གར་ཡང་སོང་བ་མེད་ཅིང་གར་ཡང་གནས་པ་མེད། །དེ་བཞིན་སེམས་ལས་བྱུང་བའི་རྟོག་ཚོགས་ཀྱང་། །
རང་སེམས་མཐོང་བས་རྟོག་པའི་རྦ་རླབས་དྭངས།  །དཔེར་ན་ནམ་མཁའི་རང་བཞིན་ཁ་དོག་དབྱིབས་ལས་འདས། །
དཀར་ནག་དག་གིས་གོས་ཤིང་འགྱུར་བ་མེད། །དེ་བཞིན་རང་སེམས་སྙིང་པོ་ཁ་དོག་དབྱིབས་ལས་འདས། །
དགེ་སྡིག་དཀར་ནག་ཆོས་ཀྱིས་གོས་མི་འགྱུར།  །དཔེར་ན་གསལ་དྭང་ཉི་མའི་སྙིང་པོ་དེ། །
བསྐལ་པ་སྟོང་གི་མུན་པས་སྒྲིབ་མི་འགྱུར། །དེ་བཞིན་རང་སེམས་སྙིང་པོ་འོད་གསལ་དེ། །
བསྐལ་པའི་འཁོར་བས་སྒྲིབ་པར་མི་ནུས་སོ།  །དཔེར་ན་ནམ་མཁའ་སྟོང་པར་ཐ་སྙད་རབ་བརྟགས་ཀྱང་། །
ནམ་མཁའ་ལ་ནི་འདི་འདྲར་བརྗོད་དུ་མེད། དེ་བཞིན་རང་སེམས་འོད་གསལ་བརྗོད་གྱུར་ཀྱང་། །
བརྗོད་པས་འདིར་འདྲར་གྲུབ་ཅེས་ཐ་སྙད་གདགས་གཞི་མེད།  །དེ་ལྟར་སེམས་ཀྱི་རང་བཞིན་གདོད་ནས་ནམ་མཁའ་འདྲ། །
ཆོས་རྣམས་ཐམས་ཅད་དེ་རུ་མ་འདུས་མེད། །ལུས་ཀྱི་བྱ་བ་ཡོངས་ཐོངས་རྣལ་འབྱོར་དལ་བར་སྡོད། །
ངག་གི་སྨྲ་བརྗོད་མེད་དེ་གྲགས་སྟོང་བྲག་ཆ་འདྲ། །ཡིད་ལ་ཅི་ཡང་མི་བསམ་ལ་བཟླའི་ཆོས་ལ་ལྟོས། །
ལུས་ལ་སྙིང་པོ་མེད་པ་སྨྱུགས་མའི་སྡོང་པོ་འདྲ། །སེམས་ནི་ནམ་མཁའི་དཀྱིལ་ལྟར་བསམ་པའི་ཡུལ་ལས་འདས། །
དེ་ཡི་ངང་ལ་བཏང་བཞག་མེད་པར་གློད་ལ་ཞོག  །སེམས་པ་གཏད་སོ་མེད་ན་ཕྱག་རྒྱ་ཆེན་པོ་ཡིན། །
དེ་ལ་གོམས་ཤིང་འདྲིས་ན་བླ་མེད་བྱང་ཆུབ་འཐོབ།  །སྔགས་སུ་སྨྲ་དང་ཕ་རོལ་ཕྱིན་པ་དང་། །
འདུལ་བ་མདོ་སྡེ་སྡེ་སྣོད་ལ་སོགས་པ། །རང་རང་གཞུང་དང་གྲུབ་པའི་མཐའ་ཡིས་ན། །
འོད་གསལ་ཕྱག་རྒྱ་ཆེན་པོ་མཐོང་མི་འགྱུར། །ཞེ་འདོད་བྱུང་བས་འོད་གསལ་མ་མཐོང་བསྒྲིབས། །
རྟོག་པའི་སྲུང་སྡོམ་དམ་ཚིག་དོན་ལས་ཉམས། །ཡིད་ལ་མི་བྱེད་ཞི་འདོད་ཀུན་དང་བྲལ། །
རང་བྱུང་རང་ཞི་ཆུ་ཡི་པ་ཏྲ་འདྲ། །མི་གནས་མི་དམིགས་དོན་ལས་མི་འདའ་ན། །
དམ་ཚིག་མི་འདའ་མུན་པའི་སྒྲོན་མེ་ཡིན།  །ཞེ་འདོད་ཀུན་བྲལ་མཐའ་ལ་མི་གནས་ན། །
སྡེ་སྣོད་ཆོས་རྣམས་མ་ལུས་མཐོང་བར་འགྱུར།  །དོན་འདིར་གཞོལ་ན་འཁོར་བའི་བཙོན་ལས་ཐར། །
དོན་འདིར་མཉམ་བཞག་སྡིག་སྒྲིབ་ཐམས་ཅད་སྲེག །བསྟན་པའི་སྒྲོན་མེ་ཞེས་སུ་བཤད་པ་ཡིན། །
དོན་འདིར་མི་མོས་སྐྱེ་བོ་བླུན་པོ་རྣམས། །འཁོར་བའི་ཆུ་བོས་རྟག་ཏུ་ཁྱེར་བར་ཟད། །
ངན་སོང་སྡུག་བསྔལ་མི་བཟད་བླུན་པོ་སྙིང་རེ་རྗེ། །མི་བཟད་ཐར་འདོད་བླ་མ་མཁས་ལ་བསྟེན། །
བྱིན་རླབས་སྙིང་ལ་ཞུགས་ན་རང་སེམས་གྲོལ་བར་འགྱུར།  །ཀྱེ་ཧོ་འཁོར་བའི་ཆོས་འདི་དོན་མེད་སྡུག་བསྔལ་རྒྱུ། །
བྱས་པའི་ཆོས་ལ་སྙིང་པོ་མེད་པས་དོན་ལྡན་སྙིང་པོ་ལྟོས། །གཟུང་འཛིན་ཀུན་ལས་འདས་ན་ལྟ་བའི་རྒྱལ་པོ་ཡིན། །
ཡེངས་པ་མེད་ན་བསྒོམ་པའི་རྒྱལ་པོ་ཡིན། །བྱ་བཙལ་མེད་ན་སྤྱོད་པའི་རྒྱལ་པོ་ཡིན། །
རེ་དོགས་མེད་ན་འབྲས་བུ་མངོན་དུ་འགྱུར།  །དམིགས་པའི་ཡུལ་འདས་སེམས་ཀྱི་རང་བཞིན་གསལ། །
བགྲོད་པའི་ལམ་མེད་སངས་རྒྱས་ལམ་སྣ་ཟིན། །བསྒོམ་པའི་ཡུལ་མེད་གོམས་ན་བླ་མེད་བྱང་ཆུབ་འཐོབ། །
ཀྱེ་མ་འཇིག་རྟེན་ཆོས་ལ་ལེགས་རྟོགས་དང་། །རྟག་མི་ཐུབ་སྟེ་རྨི་ལམ་སྒྱུ་མ་འདྲ། །
རྨི་ལམ་སྒྱུ་མ་དོན་ལ་ཡོད་མ་ཡིན། །དེས་ན་སྐྱོ་བ་སྐྱེད་ལ་འཇིག་རྟེན་བྱ་བ་ཐོངས། །
འཁོར་ཡུལ་ཆགས་སྡང་འབྲེལ་པ་ཀུན་གཅོད་ནས། །གཅིག་པུར་ནགས་འདབས་རི་ཁྲོད་གནས་པར་བསྒོམ། །
བསྒོམ་དུ་མེད་པའི་ངང་ལ་གནས་པར་གྱིས། །ཐོབ་མེད་ཐོབ་ན་ཕྱག་རྒྱ་ཆེན་པོ་འཐོབ།
།དཔེར་ན་ལྗོན་ཤིང་སྡོང་པོ་ཡལ་ག་ལོ་འདབ་རྒྱས། །རྩ་བ་གཅིག་བཅད་ཡལ་ག་ཁྲི་འབུམ་སྐམ། །
དེ་བཞིན་སེམས་ཀྱི་རྩ་བ་བཅད་ན་འཁོར་བའི་ལོ་འདབ་སྐམ།  །དཔེར་ན་སྐལ་སྟོང་བསགས་པའི་མུན་པ་ཡང་། །
སྒྲོན་མེ་གཅིག་གིས་མུན་པའི་ཚོགས་རྣམས་སེལ། །དེ་བཞིན་རང་སེམས་འོད་གསལ་སྐད་ཅིག་གིས། །
བསྐལ་པར་བསགས་པའི་མ་རིག་སྡིག་སྒྲིབ་སེལ།  །ཀྱེ་ཧོ། །བློ་ཡི་ཆོས་ཀྱིས་བློ་འདས་དོན་མི་མཐོང་། །
བྱས་པའི་ཆོས་ཀྱིས་བྱར་མེད་དོན་མི་རྟོགས། །བློ་འདས་བྱར་མེད་དོན་དེ་ཐོབ་འདོད་ན། །
རང་སེམས་རྩད་ཆོད་རིག་པ་གཅེར་བུར་ཞོག །རྟོག་པ་དྲི་མའི་ཆུ་དེ་དྭངས་སུ་ཆུག །
སྣང་བ་དགག་སྒྲུབ་མི་བྱ་རང་སར་ཞོག །སྤང་ལེན་མེད་པར་སྣང་སྲིད་ཕྱག་རྒྱར་གྲོལ། །
ཀུན་གཞི་སྐྱེ་བ་མེད་པར་བག་ཆགས་སྡིག་སྒྲིབ་སྤོང་། །སྙེམ་བྱེད་རྩིས་གདབ་མི་བྱ་སྐྱེ་མེད་སྙིང་པོར་ཞོག །
སྣང་བ་རབ་སྣང་བློ་ཡི་ཆོས་རྣམས་ཟད་དུ་ཆུག །མུ་མཐའ་ཡོངས་གྲོལ་ལྟ་བའི་རྒྱལ་པོ་མཆོག །
མུ་མེད་གཏིང་ཡངས་སྒོམ་པའི་རྒྱལ་པོ་མཆོག །མཐའ་ཆོད་ཕྱོགས་བྲལ་སྤྱོད་པའི་རྒྱལ་པོ་མཆོག །
རེ་མེད་རང་གྲོལ་འབྲས་བུའི་མཆོག་ཡིན་ནོ།  །ལས་ནི་དང་པོ་གཅོང་རོང་ཆུ་དང་འདྲ། །
བར་དུ་ཆུ་བོ་གངྒཱ་དལ་ཞིང་གཡོ། །ཐ་མ་ཆུ་རྣམས་མ་བུ་འཕྲད་པ་འདྲ། །
བློ་དམན་སྐྱེས་བུའི་ངང་ལ་མི་གནས་ན། །རླུང་གི་གནད་བཟུང་རིག་པ་བཅུད་ལ་བོར། །
ལྟ་སྟངས་སེམས་འཛིན་ཡན་ལག་དུ་མ་ཡིས། །རིག་པ་དང་ལ་མི་གནས་བར་དུ་གཅུན།  །
ལས་རྒྱ་བསྟེན་ན་བདེ་སྟོང་ཡེ་ཤེས་འཆར། །ཐབས་དང་ཤེས་རབ་བྱིན་རླབས་སྙོམས་པར་འཇུག །
དལ་བར་དབབ་ཅིང་བསྐྱིལ་བཟློག་དྲངས་པ་དང་། །གནས་སུ་བསྐྱལ་དང་ལུས་ལ་ཁྱབ་པར་བྱ། །
དེ་ལ་ཆགས་ཞེན་མེད་ན་བདེ་སྟོང་ཡེ་ཤེས་འཆར།  །ཚེ་རིང་སྐྲ་དཀར་མེད་ཅིང་ཟླ་ལྟར་རྒྱས་པར་འགྱུར། །
བཀྲག་མདངས་གསལ་ལ་སྟོབས་ཀྱང་སེང་གེ་འདྲ། །ཐུན་མོང་དངོས་གྲུབ་མྱུར་ཐོང་མཆོག་ལ་གཞོལ་བར་འགྱུར།  །
ཕྱག་རྒྱ་ཆེན་པོ་གནད་ཀྱི་མན་ངག་འདི། །འགྲོ་བ་སྐལ་ལྡན་སྙིང་ལ་གནས་པར་ཤོག །
ཕྱག་རྒྱ་ཆེན་པོ་གྲུབ་པའི་དཔལ་ཏཻ་ལོ་པ་ཆེན་པོའི་ཞལ་སྔ་ནས་མཛད་པ་ཁ་ཆེའི་པཎྜི་ཏ་མཁས་ལ་གྲུབ་པའི་ནྰ་རོ་པས་དཀའ་བ་བཅུ་གཉིས་མཛད་པའི་རྟིང་ལ་ཆུ་བོ་གངྒཱའི་འགྲམ་དུ་ཏཻ་ལོ་པས་གསུངས་པ་ཕྱག་རྒྱ་ཆེན་པོ་རྡོ་རྗེའི་ཚིག་རྐང་ཉི་ཤུ་རྩ་དགུ་པ་རྫོགས་སོ། ། ནཱ་རོ་པ་ཆེན་པོའ་ཞལ་སྔ་ནས་དང་། །བོད་ཀྱི་ལོ་ཙཱ་བ་ཆེན་པོ་སྒྲ་བསྒྱུར་གྱི་རྒྱལ་པོ་མར་པ་ཆོས་ཀྱི་བློ་གྲོས་ཀྱིས། །བྱང་ཕུལླ་ཧ་རིར་བསྒྱུར་ཅིང་ཞུས་ཏེ་གཏན་ལ་ཕབ་པ་རྫོགས་སོ། ། དགེའོ། །

Tuesday 2 October 2018

བླ་མ་དང་ཡི་དམ་དབྱེར་མེད་དུ་སྒྲུབ་ཚུལ་ཤིན་ཏུ་ཟབ་པ།

 
༄༅། །བླ་མ་དང་ཡི་དམ་དབྱེར་མེད་དུ་སྒྲུབ་ཚུལ་ཤིན་ཏུ་ཟབ་པ་བཞུགས་སོ། །

༄༅༅། །རྗེ་བཙུན་འཇམ་དབྱངས་གསུང་གི་མདོ་རྒྱུད་ཀྱི། །
ལེགས་བཤད་དཔལ་ལྡན་ཁྱོད་ལ་མངོན་སུམ་དུ། །
རྟག་ཏུ་འདོམས་པ་སྦས་དོན་རྒྱ་མཚོ་ཡི། །
དེ་ཉིད་རྟོགས་ནས་སྒྲུབ་པ་ལྷུར་མཛད་པ། །
རྗེ་བཙུན་བླ་མའི་ཞབས་ལ་གུས་བཏུད་ནས། །
དེ་ཡིས་དགྱེས་བཞིན་སྩལ་བའི་བདུད་རྩིའི་རྒྱུན། །
མ་གོད་དད་པའི་སྙིམ་པས་ལེགས་བཟུང་ནས། །
བློ་ཡི་བུམ་པར་བཞག་ཕྱིར་བརྗེད་བྱང་བྲི། །


འདིར་བདེ་ལེགས་ཐམས་ཅད་ཀྱི་རྩ་བ་བླ་མ་དང་ཡི་དམ་དབྱེར་མེད་དུ་བྱས་ནས་རྒྱུན་དུ་གསོལ་བ་ཇི་ལྟར་འདེབས་པའི་ཚུལ་དང་། དེ་ཉིད་དང་འབྲེལ་བའི་ཏིང་ངེ་འཛིན་གྱི་དབང་བཞི་རྒྱུན་དུ་བླང་བའི་མན་ངག་ཐུན་མོང་མིན་པ། རྗེ་བཙུན་ཐམས་ཅད་མཁྱེན་པ་ཙོང་ཁ་པ་ཆེན་པོས་ཕྱག་ལེན་ཇི་ལྟར་མཛད་ཀྱི་ཞལ་ཤེས་ནི་འདི་ལྟར་ཡིན་ཞེས་གསུངས་ཏེ། 

དེ་ལ་ཐོག་མར་བླ་མའི་རྣལ་འབྱོར་སྒོམ་ཚུལ་ནི།
 སྔོན་དུ་རང་འཇམ་དབྱངས་སམ་ཡི་དམ་གང་རུང་དུ་བསྒོམ་པའི་སྙིང་གི་ནང་དུ། རྟེན་བརྟན་པའི་གཞལ་ཡས་ཁང་བསྐྱེད་པ་ནི། རང་གི་སྙིང་སྣ་ཚོགས་པདྨ་འདབ་མ་སྟོང་དང་ལྡན་པ་ཁ་གྱེན་དུ་བསྟན་པའི་ནང་དུ། བྷཱུཾ་ལས་རིན་པོ་ཆེ་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ། རྩིག་པ་རིམ་པ་ལྔ་དང་ལྡན་པ་རྒྱན་དུ་མས་སྤྲས་པའི་གཞལ་ཡས་ཁང་ཆེན་པོའི་ཕྱི་རོལ་ཏུ། དུར་ཁྲོད་བརྒྱད། ཕྱོགས་སྐྱོང་བརྒྱད། ཤིང་བརྒྱད། ཞིང་སྐྱོང་བརྒྱད་(རྒྱས་པ་བྱེད་ན་གཞལ་ཡས་ཁང་བསྐྱེད་ཚུལ་འཇིགས་བྱེད་དཔའ་གཅིག་བཞིན་བྱེད་གསུང་བ་རྗེའི་གསུང་ཡིན་ནོ། །) ལ་སོགས་པ་ཐམས་ཅད་ཀྱིས་བསྐོར་བའི་དབུས་སུ། སེང་གེ་བརྒྱད་ཀྱིས་བཏེག་པའི་རིན་པོ་ཆེའི་ཁྲིའི་སྟེང་དུ། པདྨ་དང་ཉི་མའི་གདན་ལ་དྷཱིཿཧྲཱི་དམར་པོ་འོད་དུ་ཞུ་བ། ལས། རྗེ་བཙུན་འཇམ་དབྱངས་དམར་པོ་རྡོ་རྗེ་དང་དྲིལ་བུ་འཛིན་པ། དབྱངས་ཅན་མ་དམར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། གཉིས་ཀ་རུས་པ་དང་རིན་པོ་ཆེའི་རྒྱན་དུ་མས་བརྒྱན་ཅིང་། ཡབ་རྡོ་རྗེའི་སྐྱིལ་ཀྲུང་དང་། ཡུམ་པདྨའི་སྐྱིལ་ཀྲུང་གིས་བཞུགས་པ། ཡབ་ཡུམ་གཉིས་ཀྱི་དཔྲལ་བར་ཨོཾ་དཀར་པོ། །མགྲིན་པར་ཨཱཿ་དམར་པོ། །ཐུགས་ཀར་ཧཱུཾ་སྔོན་པོ། དེ་ལས་འོད་འཕྲོས། ཕྱོགས་བཅུ་ན་བཞུགས་པའི་རྩ་བའི་བླ་མ། བཀའ་བརྒྱུད་ཀྱི་བླ་མ་སྒྲུབ་བརྒྱུད་ཀྱི་བླ་མ། བཤད་བརྒྱུད་ཀྱི་བླ་མ། མན་ངག་བརྒྱུད་ཀྱི་བླ་མ། དབང་བསྐུར་བའི་བླ་མ། ཡི་དམ་སངས་རྒྱས་དང་བྱང་ཆུབ་སེམས་དཔའ། དཔའ་བོ་དཔའ་མོ། །མཁའ་འགྲོ་དང་མཁའ་འགྲོ་མ། ཆོས་སྐྱོང་བསྲུང་མའི་ཚོགས་དང་བཅས་པ། མདུན་གྱི་ནམ་མཁར་སྤྱན་དྲངས་ལ། ཨོཾ་གུ་རུ་ཨཱ་རྱ་མ་ཉྫུ་ཤྲཱི་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱཏཱ། ཞེས་སོགས་ཆུ་གཉིས་དང་ཉེར་སྤྱོད་རོལ་མོ་དང་བཅས་པས་མཆོད་ལ། ཇི་ལྟར་མགོན་པོ་ཁྱོད་ཀྱིས་ནི། །སྔོན་ཚེ་འགྲོ་ལ་དབང་བསྐུར་ལྟར། དེ་བཞིན་ཐུགས་རྗེས་བདག་ལ་ཡང་། །དབང་བསྐུར་དམ་པ་སྩལ་དུ་གསོལ། ཞེས་གསོལ་བ་བཏབ་པས་དེ་རྣམས་ཀྱིས་བུམ་པའི་ཆུས་བླ་མ་ཡབ་ཡུམ་གྱི་སྤྱི་བོ་ནས་དབང་བསྐུར་ཞིང་། ཇི་ལྟར་སྔོན་ཚེ་འགྲོ་རྣམས་ལ། །དབང་བསྐུར་དམ་པ་མཛད་ཇི་བཞིན། །དེ་རིང་ཡེ་ཤེས་བདུད་རྩིའི་ཆུས། །བུ་ཁྱོད་ལ་ནི་དབང་བསྐུར་རོ། །ཨོཾ་ཨཱ་རྱམ་ཉྫུ་ཤྲཱི་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང་། དབང་བསྐུར་བས་ཆུ་རྒྱུན་དེས་ལུས་ཐམས་ཅད་གང་། དྲི་མ་ཐམས་ཅད་དག །དབང་བཞི་ཐོབ། ཆུ་ལྷག་མ་སྤྱི་གཙུག་ཏུ་གནས་པ་ལས། རྡོ་རྗེ་རྩ་ལྔ་པ་རེ་རེས་དབུ་བརྒྱན་པར་གྱུར་པར་བསམ། སླར་ཡང་ཐུགས་ཀའི་ཧཱུཾ་གི་འོད་ཟེར་གྱིས་བཀའ་བརྒྱུད་བླ་མའི་ཚོགས་རྣམས་སྤྱན་དྲངས་ཏེ་བླ་མ་ཡབ་ཡུམ་གྱི་སྤྱི་བོར་ཐིམ། ཡང་འོད་ཟེར་གྱིས་ཡི་དམ་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་དཔའ་མོ་མཁའ་འགྲོ་དང་མཁའ་འགྲོ་མ་ཐམས་ཅད་སྤྱན་དྲངས་ཏེ་བླ་མ་ཡབ་ཡུམ་གྱི་སྐུ་སྟོང་ལ་ཐིམ། ཡང་འོད་ཟེར་གྱིས་ཆོས་སྐྱོང་བསྲུང་མའི་ཚོགས་རྣམས་སྤྱན་དྲངས་ཏེ་སྐུ་སྨད་ལ་ཐིམ། ཡང་འོད་ཟེར་གྱིས་སྣོད་བཅུད་ཀྱི་ཡོན་ཏན་ཐམས་ཅད། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། ཨཱ་ལི་དང་ཀཱ་ལི་བུམ་པ་དང་། ཐོད་པ་བདུད་རྩིས་བཀང་བ། ནོར་བུ་དང་རྒྱལ་མཚན་རལ་གྲི་དང་གྲི་གུག་ལ་སོགས་པ་ཕྱག་མཚན་གྱི་རྣམ་པར་བཀུག་ནས་བླ་མ་ཡབ་ཡུམ་གྱི་ལུས་ཀུན་ལ་ཐིམ་པར་གྱུར། ཅེས་བརྗོད་ལ།  
 
དག་པ་དྲན་པ་ནི། 
དེ་རྣམས་དང་གཉིས་སུ་མེད་པའི་བླ་མ་ཡབ་ཡུམ་གྱི་ཉོན་མོངས་བ་ལྔ་ཡེ་ཤེས་ལྔ་མི་དགེ་བ་བཅུ་དགེ་བ་བཅུ་ཁམས་བཅོ་བརྒྱད་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཕུང་པོ་ལྔ་སྐུ་ལྔ་འབྱུང་བ་བཞི་ཡུམ་བཞི་ཕྱག་སོར་བཅུ་ཁྲོ་བོ་བཅུ་ཞབས་སོར་བཅུ་ཁྲོ་མོ་བཅུ། སྒལ་ཚིགས་རྣམས་ལ་སེམས་དཔའ་བཅུ་དྲུག་དང་སེམས་མ་བཅུ་དྲུག །ཡན་ལག་བཞི་སྒོམ་བཞི། ཚིགས་ཆེན་བཅུ་གཉིས་ལ་མཆོད་པའི་ལྷ་མོ་བཅུ་གཉིས་མཆོད་རྫས་དུ་མ་ཐོགས་ནས། བླ་མ་འཁོར་བཅས་ལ་མཆོད་པ་སྤྱི་བོ་རྣམ་པར་སྣང་མཛད་མགྲིན་པ་འོད་དཔག་མེད་ཐུགས་ཀ་མི་བསྐྱོད་པ། མིག་སའི་སྙིང་པོ། །རྣ་བ་ཕྱག་ན་རྡོ་རྗེ། སྣ་ནམ་མཁའི་སྙིང་པོ། །ལྕེ་འཇིག་རྟེན་དབང་ཕྱུག །ལུས་སྒྲིབ་པ་རྣམ་སེལ། ཡིད་ཀུན་ཏུ་བཟང་པོ། །ཨཱ་ལི་ལུགས་འབྱུང་དང་ལུགས་ལྡོག །སུམ་ཅུ་རྩ་གཉིས་མཚན་སོ་གཉིས། ཀཱ་ལི་ལུགས་འབྱུང་དང་ལུགས་ལྡོག་བརྒྱད་ཅུ་དཔེ་བྱད་བརྒྱད་ཅུའི་རང་བཞིན་དུ་གྱུར། ཅེས་བརྗོད་ཅིང་དོན་ཡིད་ལ་བསམ་མོ། །

དེ་ནས་མཆོད་པ་འབུལ་བ་ནི་ཅི་འབྱོར་པའི་མཆོད་པ་དངོས་སུ་བཤམས་པའམ་ཡིད་ཀྱིས་སྤྲུལ་ཏེ་བྱིན་གྱིས་བརླབ་པ་ནི། ཧྲཱིཿཥྚཱིཿའི་ཡི་དམ་གང་ཡིན་གྱི་ལས་སྔགས་ཀྱིས་བསང་། སྭ་བྷཱ་ཝས་སྟོང་པར་སྦྱངས་ལ་སྟོང་པའི་ངང་ལས་ཨཱཿལས་བྱུང་བའི་ཐོད་པའི་ནང་དུ་ཧཱུཾ་ལས་བྱུང་བའི་མཆོད་རྫས་རྣམས་རང་བཞིན་སྟོང་པ་རྣམ་པ་མཆོད་རྫས་བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་སྟེར་བར་གྱུར། ཨོཾ་ཨརྒྷཾ་ཨཱཿཧཱུཾ། ཨགྷཾཾ་གྱི་གནས་སུ་པཱ་དྱཾ་དང་པུ་ཥྤེ་ནས་ཤ་པྟའི་བར་དང་། རཱུ་པ་ནས་སྤ་ཪྴིའི་བར་སྦྱར་བ་བརྗོད་ལ་ཕྱག་རྒྱ་དང་བཅས་པས་བྱིན་གྱིས་བརླབས་ཏེ། ཨོཾ་གུ་རུ་ཨཱརྱ་མ་ཉྫུ་ཤཱི་སརྦ་བུ་ངྔྷ་བོ་དྷི་ས་ཏྭ་ས་པ་རི་ཝཱ་ར་ཨ་རྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ། ཞེས་སོགས་ཆུ་གཉིས་ཉེར་སྤྱོད་རོལ་མོ་འདོད་ཡོན་ལྔ་དང་བཅས་པས་མཆོད་ལ། ནང་མཆོད་བྱིན་རླབས་བྱས་ཏེ་འབུལ་བ་ནི། ནང་མཆོད་ལས་སྔགས་ཀྱིས་བསངས། སྭ་བྷཱ་ཝས་སྦྱངས་ཏེ་ཡཾ་ལས་རླུང་རཾ་ལས་མེ་ཨཱཿལས་མི་མགོའི་སྒྱེད་བུ་གསུམ་གྱི་སྟེང་དུ་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བའི་ནང་དུ། ཤ་ལྔ་བདུད་རྩི་ལྔ་ཡི་གེ་གསུམ་དང་བཅས་པར་གྱུར། རང་གི་ཐུགས་ཀ་ནས་འོད་འཕྲོས་པས་རླུང་གཡོས་མེ་སྦར་ཏེ། ཐོད་པའི་ནང་གི་རྫས་རྣམས་ཞུ་བ་ལས། ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿ་ཧཱུཾ་ཞེས་ལན་གསུམ་བརྗོད་པས་བྱིན་གྱིས་བརླབས་ཏེ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་ཀྱི་ངོ་བོ་རྩ་བའི་དཔལ་ལྡན་བླ་མ་དམ་པའི་ཞལ་དུ་ཨོཾ་ཨཱཿཧཱུཾ། རྒྱལ་བ་ཁྱབ་བདག་རྡོ་རྗེ་འཆང་ཆེན་པོའི་རྡོ་རྗེ་བཙུན་འཇམ་པའི་དབྱངས་ཀྱི་རྒྱལ་སྲས་དཔའ་བོ་རྡོ་རྗེའི་ཐམས་ཅད་མཁྱེན་པ་ཙོང་ཁ་པ་ཆེན་པོའི་ཞལ་དུ་ཨོཾ་ཨཱཿཧཱུཾ། ཨོཾ་གུ་རུ་ཨཱ་རྱ་མཉྫུ་ཤྲཱི་ས་པ་རི་ཝཱ་ར་ཨོཾ་ཨཱཿཧཱུཾ། ཞེས་པས་དབུལ་ཞིང་དེ་ནས་ཕྱོགས་སྐྱོང་ལ་སོགས་པ་ལའང་འབུལ་བ་སྤྱི་ལྟར་བྱས་ཏེ་བསྟོད་པ་བྱ་བ་ནི། གཞོན་ནུའི་སྐུ་ལུས་འཆང་བའོ། །ཞེས་སོགས་ཚིགས་བཅད་གཅིག་གམ། ཡང་ན་འདུད་ཉི་ཤུས་བསྟོད་པའོ། །གཞན་ཡང་བསྟོད་པ་རྒྱས་བསྡུས་གང་རུང་གིས་བསྟོད། 
དེ་ནས་མཎྜལ་རྒྱས་བསྡུས་གང་འགྲུབ་ཕུལ་ཏེ། རང་གི་ལུས་ལོངས་སྤྱོད་དུས་གསུམ་དགེ་བའི་དངོས་པོ་ཐམས་ཅད་ལྟོས་མེད་དུ་ཕུལ་བར་དམིགས་ནས་འདུན་པ་ཤུགས་དྲག་པོས་ཐལ་མོ་སྦྱར་ཏེ་གསོལ་བ་གདབ་པ་ནི། བླ་མ་ཀུན་འདུས་ཀྱི་ངོ་བོ་དཔལ་ལྡན་བླ་མ་ལ་གསོལ་བ་འདེབས་སོ། །ཡི་དམ་ཀུན་འདུས་སངས་རྒྱས་དང་བྱང་ཆུབ་སེམས་དཔའ། ཀུན་འདུས་དཔའ་བོ་དང་དཔའ་མོ། །ཀུན་འདུས་མཁའ་འགྲོ་དང་ཆོས་སྐྱོང་། ཀུན་འདུས་ཀྱི་ངོ་བོ་བདེ་ལེགས་ཐམས་ཅད་ཀྱི་རྩ་བ་ལེགས་ཚོགས་ཀུན་འདུས་ཀྱི་ངོ་བོ། ས་དང་ལམ་གྱི་བདག་ཉིད། འབྲས་བུ་སྐུ་བཞིའི་བདག་ཉིད། བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཀྱི་བདག་ཉིད་ཟབ་མོའི་དོན་རྟོགས། ཐར་པ་ཆེན་པོའི་གྲོང་ཁྱེར། མཐོ་རིས་ཀྱི་ཐེམ་སྐས་ཐབས་དང་ཤེས་རབ་ཀྱི་བདག་ཉིད། སྲིད་ཞིའི་རྒུད་པ་ཀུན་སེལ་ཡོན་ཏན་ཐམས་ཅད་ཀྱི་རྩ་བ་དཔལ་ལྡན་བླ་མ་ལ་གསོལ་བ་འདེབས་སོ། །ཞེས་སོགས་ཀྱིས་གསོལ་བ་ལན་མང་དུ་བཏབ་ལ། བླ་མ་རྗེ་བཙུན་འཇམ་པའི་དབྱངས་ཀྱིས་སྐྱེ་བ་དང་སྲིད་པ་ཐམས་ཅད་དུ་བདག་གི་ཐེག་པ་ཆེན་པོའི་དགེ་བའི་བཤེས་གཉེན་མངོན་སུམ་དུ་མཛད་ནས། ཚེ་རབས་ཐམས་ཅད་དུ་རྒྱལ་བ་རྣམས་ཀྱི་དམ་པའི་ཆོས་མ་ལུས་པ་རྒྱལ་བའི་དགོངས་པ་ཇི་ལྟ་བ་བཞིན་དུ་འཛིན་ནུས་པར་བྱིན་གྱིས་བརླབ་ཏུ་གསོལ། ཞེས་སོགས་སྨོན་ལམ་གང་འགྲུབ་བཏབ་པའི་མཐར། གང་ཚེ་བལྟ་བར་འདོད་པའམ། ཞེས་གསུངས་པའི་སྨོན་ལམ་བརྗོད། ཐོག་མར་དེ་ལྟར་བསྒོམས་ཏེ་གསོལ་བ་བཏབ་པ་དེ་ནས་བཟུང་སྟེ། བླ་མ་ཡབ་ཡུམ་གཞལ་ཡས་ཁང་དང་བཅས་པ་གཤེགས་གསོལ་མི་བྱེད་པར། དུས་དང་རྣམ་པ་ཐམས་ཅད་དུ་ཡང་ཡང་གསལ་བཏབ་ཀྱིན། སྐད་ཅིག་ཀྱང་འབྲལ་མེད་དུ་སྙིང་ནང་དུ་བཞུགས་པར་སྒོམ་པ་གལ་ཆེའོ། །དེ་ཕྱིན་ཆད་བླ་མའི་རྣལ་འབྱོར་སྒོམ་ཚུལ་ནི། མདུན་གྱི་ནམ་མཁར་སྣ་ཚོགས་པདྨ་འདབ་མ་སྟོང་དང་ལྡན་པའི་སྟེང་དུ། ཞེས་པ་ནས་གེགས་མེད་པར་ཡང་མཐོང་བར་ཤོག །ཅེས་པའི་བར་མདུན་དུ་བླ་མ་ཡབ་ཡུམ་བསྒོམས་ཏེ་མཆོད་བསྟོང་གསོལ་བ་བཏབ་པ་རྣམས་སྔར་བཞིན་བྱས་པའི་མཐར་རང་གི་ཐུགས་ཀའི་འོད་ཟེར་གྱིས་སྤྱན་དྲངས་ཏེ་མདུན་གྱི་བླ་མ་ཡབ་ཡུམ་གཞལ་ཡས་ཁང་དང་བཅས་པ་རང་གི་སྙིང་ནང་གི་བླ་མ་ཡབ་ཡུམ་གཞལ་ཡས་ཁང་དང་བཅས་པ་ལ་ཐིམ་པས་མཐུ་སྟོབས་དང་གཟི་བརྗིད་ཕུན་སུམ་ཚོགས་པར་གྱུར་པར་བསམ་མོ། །དེ་ཡང་རྣམ་པ་རྗེ་བཙུན་ཡབ་ཡུམ་དུ་སྒོམ་ཡང་ངོ་བོ་རྩ་བའི་བླ་མ་རང་དུ་སྒོམས་ནས་རབ་ཐུན་དྲུག་འབྲིང་ཐུན་བཞི་ཐ་མའང་ཉིན་ཞག་རེ་ལ་ལན་རེ་མ་ཆག་པ་བསྒོམ་ཞིང་གསོལ་བ་འདེབས་པ་ཡིན་ཏེ། དེ་ལྟར་བྱས་པའི་ཕན་ཡོན་ནི་ཤིན་ཏུ་གནད་ཆེ་བ་མང་དུ་ཡོད་དོ། །དེ་ལྟར་སྔོན་དུ་བླ་མའི་རྣལ་འབྱོར་སྒོམ་ཚུལ་བསྟན་པ་དེ་དང་སྦྲེལ་ཏེ་ཏིང་ངེ་འཛིན་གྱི་དབང་བཞི་ལེན་པའི་གདམས་པ་ཁྱད་པར་ཅན་ནི། (རྗེ་རིན་པོ་ཆེ་བདག་བསྐྱེད་གཙོ་བོར་གསང་སྒྲུབ་ལ་མཛད། རྡོ་རྗེ་འཇིགས་བྱེད་ལའང་མང་དུ་མཛད། དེས་ན་གསང་འདུས་དང་བདེ་མཆོག་ལ་བྱས་ཀྱང་ཆོག །བདག་གིས་ནི་ནང་སྒྲུབ་ལ་གཙོ་བོར་བྱས་ནང་སྒྲུབ་ནི་གཙོ་ཆེར་དགོངས་ལ། གསང་སྒྲུབ་ནི་བླ་མེད་ཀྱི་ཐུན་མོང་མིན་པ་འཇིགས་བྱེད་ལ་དགོངས་པས་བདག་བསྐྱེད་ནང་སྒྲུབ་དང་། མདུན་བསྐྱེད་གསང་སྒྲུབ་ལ་བྱས་ན་ལེགས་སོ། །) སྔོན་དུ་བདག་བསྐྱེད་འཇམ་དཔལ་ནང་སྒྲུབ་ལ་སོགས་པ་གང་ལ་བྱེད་ཀྱང་འདྲ་སྟེ། དེའི་མཆོད་བསྟོད་ཀྱི་བར་རྫོགས་པར་བྱས་ནས་མདུན་བསྐྱེད་བླ་མ་ཡབ་ཡུམ་སྔར་ལྟར་བསྐྱེད་ནས་མཆོད་བསྟོད་གསོལ་བ་བཏབ་པ་སོགས་བྱས་ནས་རང་ལོ་མ་བསྟིམ་པའི་གོང་དུ་བཟླས་པ་གང་གྲུབ་བྱས་ཏེ་དབང་ལེན་པ་ཡིན་ལ། དེའི་ཚུལ་ནི། ཡབ་ཀྱི་ཐུགས་ཀར་ཉི་མའི་གདན་ལ་དྷཱིཿཡུམ་གྱི་ཐུགས་ཀར་ཉི་གདན་ལ་ཧྲཱིཿའི་མཐའ་མར་ཨོཾ་ཨ་ར་པ་ཙ་ན་དྷཱིཿཧྲཱིཿས་བསྐོར་བར་གྱུར་བར་བསམས་ལ། ཨོཾ་ཨ་ར་པ་ཙ་ན་དྷཱིཿཧྲཱིཿཞེས་བསྙེན་པ་གང་གྲུབ་བྱས་པའི་མཐར་མཆོད་བསྟོད་གང་གྲུབ་བྱས་ལ་མཎྜལ་ཕུལ་ཏེ། དཀོན་མཆོག་གསུམ་ལ་བདག་སྐྱབས་མཆི། ཞེས་པ་ནས། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པའི་བར་ལན་གསུམ་བླ་མའི་རྗེས་ཟློས་བྱེད་པར་བསྒོམ་སྟེ་བརྗོད་པས་ཐུན་མོང་གི་སྡོམ་པ་གཟུང་། དེ་བཞིན་དུ། སངས་རྒྱས་བྱང་ཆུབ་སེམས་དཔའ་ཀུན། ཞེས་པ་ནས། སེམས་ཅན་མྱ་ངན་འདས་ལ་དགོད། ཅེས་པའི་བར་ལན་གསུམ་གྱིས་རིགས་ལྔའི་སྡོམ་པ་གཟུང་ལ། དབང་ལེན་པ་དང་པོ་ནི། བུམ་དབང་གི་དངོས་གཞི་རྡོ་རྗེ་སློབ་དཔོན་གྱི་དབང་གི་དོན་དུ་མཎྜལ་ཕུལ་ཏེ། བྱང་ཆུབ་རྡོ་རྗེས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །དེ་ལྟར་བདག་ལའང་སྩལ་དུ་གསོལ། ཞེས་ལན་གསུམ་གསོལ་བ་བཏབ་པས། །བླ་མ་ཡབ་ཡུམ་རང་གི་སྦྱི་བོར་བྱོན། སྙོམས་པར་ཞུགས་པའི་དགའ་བའི་སྒྲས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། ཡབ་ཀྱི་ཞལ་ནས་ཞུགས། སྐུའི་དབྱིབས་བརྒྱུད། ཡུམ་གྱི་སྦྱོར་མཚམས་ནས་བྱང་སེམས་ཀྱི་བདུད་རྩིའི་རྒྱུན་བྱུང་བ་རང་གི་སྤྱི་གཙུག་ནས་ཞུགས། བདེ་བ་ཆེན་པོས་ལུས་ཐམས་ཅད་གང་བར་གྱུར་པར་བསམ། རང་ཉིད་ཀྱིས་རྡོར་དྲིལ་དང་བཅས་པས་རིག་མ་ལ་འཁྱུད་པའི་བདེ་བ་བསྐྱེད་པ་རྡོ་རྗེ་སློབ་དཔོན་གྱི་དབང་གི་ངོ་བོ་ཡིན་ནོ་སྙམ་དུ་བསམ་མོ། །དེས་བུམ་པའི་དབང་ཐོབ་ལུས་ཀྱི་དྲི་མ་སྲོག་གཅོད་སོགས་གསུམ་དག་ལུས་ཐ་མལ་དུ་འཛིན་པའི་དྲི་མ་འཁྲུད་པས་སྐུ་རྡོ་རྗེ་སྦྱོང་། ལམ་བསྐྱེད་རིམ་ཡན་ལག་དང་བཅས་པ་བསྒོམ་པ་ལ་དབང་བར་བྱས། འབྲས་བུ་སྤྲུལ་པའི་སྐུ་འགྲུབ་པའི་ནུས་པ་ཁྱད་པར་ཅན་བཞག །ཅེས་བརྗོད་ཀྱིན་དོན་ཡིད་ལ་བྱའོ། །དེ་ནས་གསང་དབང་གི་དོན་དུ་མཎྜལ་གསོལ་བཏབ་སྔར་བཞིན་བྱས་ལ། བླ་མ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་སངས་རྒྱས་དང་བྱང་ཆུབ་སེམས་དཔའ་སྤྱན་དྲངས་ཡབ་ཀྱི་སྤྱི་བོ་ནས་ཞུགས། སྐུའི་དབྱིབས་བརྒྱུད། ཡབ་ཡུམ་གྱི་སྦྱོར་མཚམས་ནས་བྱུང་བའི་བྱང་སེམས་དཀར་དམར་མྱངས་པས། ཆུ་རྒྱུན་དེ་མགྲིན་པའི་གནས་རྣམས་ལ་ཐིམ། ལྕེ་སྟེང་དུ་མྱངས་པ་ལས་སྐྱེས་པའི་བདེ་བས་སྟོང་པ་ཡུལ་དུ་བྱས་པའི་བདེ་སྟོང་དབྱེར་མེད་ཀྱི་ཏིང་ངེ་འཛིན་གསང་དབང་གི་ངོ་བོར་གྱུར་པར་བསམས་ལ། དེས་གསང་དབང་ཐོབ། ངག་གི་དྲི་མ་བརྫུན་དུ་སྨྲས་པ་སོགས་བཞི་དང་། རླུང་སྔགས་སོ་སོར་སྣང་ཞིང་ཞེན་པའི་དྲི་མ་འཁྲུད་པས་གསུང་རྡོ་རྗེ་སྦྱོང་། ལམ་ཀུན་རྫོབ་སྒྱུ་མའི་སྐུ་བདག་བྱིན་རླབས་སྒོམ་པ་ལ་དབང་འབྲས་བུ་ལོངས་སྤྱོད་རྫོགས་པའི་སྐུ་འགྲུབ་པའི་ནུས་པ་ཁྱད་པར་ཅན་བཞག་གོ །ཞེས་དོན་བསམས་ལ་བརྗོད་དོ། །དེ་ནས་ཤེས་རབ་ཡེ་ཤེས་ཀྱི་དབང་གི་དོན་དུ་སྔར་ལྟར། རང་འཇམ་དབྱངས་དཔའ་བོ་གཅིག་པ་སོགས་སུ་བསམ་པ་ལ། བླ་མས་དབྱངས་ཅན་མ་རིག་མ་ལོ་བཅུ་དྲུག་ལོན་པ་ཞིག་བྱིན་པར་བསམས་པའམ། ཡང་ན་རང་གི་རིག་མ་དེ་ཉིད་གསལ་བཏབ་ལ་རང་གི་གསང་གནས་ཧཱུཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ་རྭ་དབུས་མའི་ནོར་བུ་ལ་ཨོཾ་ཡིག་གིས་མཚན་པ། །ཡུམ་གྱི་གསང་གནས་ཨཱཿལས་པདྨ་དམར་པོ་འདབ་མ་ལྔ་པ་ཟེའུ་འབྲུ་ལ་ཨཱཿས་མཚན་པར་བསམ། ཡབ་ཡུམ་སྙོམས་པར་ཞུགས་པས་ལུས་ཐམས་ཅད་ཐིག་ལེས་གང་། ཐིག་ལེ་ཐམས་ཅད་བདེ་བའི་རང་བཞིན་སྟོང་པ་ཡུལ་དུ་བྱས་པའི་བདེ་སྟོང་དབྱེར་མེད་ཀྱི་ལྷན་སྐྱེས་ཀྱི་དགའ་བ་ཤེས་རབ་ཡེ་ཤེས་ཀྱི་དབང་གི་ངོ་བོ་ཐོབ་པར་བསམས་ལ། དེས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་བརྣབ་སེམས་ལ་སོགས་པ་དག །གང་སྣང་ཀུན་བདེ་སྟོང་དབྱེར་མེད་དུ་འཆར་བ་ལ་སྒྲིབ་པའི་དྲི་མ་འཁྲུང་པའི་ཐུགས་རྡོ་རྗེ་སྦྱོང་། ལམ་འོད་གསལ་ཕྱག་རྒྱ་ཆེན་པོ་སྒོམ་པ་ལ་དབང་། འབྲས་བུ་ཆོས་ཀྱི་སྐུ་མངོན་དུ་འགྱུར་བའི་ནུས་པ་ཁྱད་པར་ཅན་བཞག །ཅེས་བརྗོད་ལ་དོན་བསམ་མོ། །འདིར་བདེ་བའི་ཡུལ་གྱི་སྟོང་པ་ནི། གང་ཟག་དང་གཟུགས་སོགས་ཕྱིའི་ཡུལ་ལྔ། མིག་ཤེས་ལ་སོགས་པའི་སྐྱེ་མཆེད་ཚོགས་དྲུག །དེ་རྣམས་རང་བཞིན་གྱིས་སྟོང་པ་དང་། བདེན་པས་སྟོང་པ་དང་། དོན་དམ་པར་སྟོང་པ་དང་། རང་གི་མཚན་ཉིད་ཀྱིས་སྟོང་པ་དེ་རྣམས་དོན་གཅིག་ཅིང་། གང་ཟག་དང་ཡུལ་གཟུགས་སྒྲ་སོགས་དེ་རྣམས་ཀྱི་སྟེང་དུ་གང་གིས་སྟོང་པའི་དགག་བྱ་ནི་ཐོག་མ་མེད་པ་ནས་རྟོག་པའི་དབང་གིས་བཞག་པ་མ་ཡིན་པའི་ཡོད་པ་ཡིན་ལ། ཡོད་པ་དེ་ནི་དོན་དམ་པར་གྲུབ་པ་དང་། རང་གི་མཚན་ཉིད་ཀྱིས་གྲུབ་པ་དང་། བདེན་པར་གྲུབ་པ་དང་། རང་གི་ངོ་བོས་གྲུབ་པ་ཡིན་ལ། དེ་རྣམས་དོན་གཅིག་ཅིང་། རང་བཞིན་གྱིས་སྟོང་པའི་སྟོང་རྒྱུའི་དགག་བྱ་དང་། དོན་དམ་པར་མེད་རྒྱུའི་དགག་བྱ་ནི། དོན་དམ་པར་གྲུབ་པ་སོགས་དེ་རྣམས་ཡིན་ནོ། །དོན་དམ་པར་གྲུབ་པ་དང་རང་བཞིན་གྱིས་གྲུབ་པ་སོགས་དེ་རྣམས་ཁྱད་གཞི་གང་ཟག་གི་སྟེང་དུ་མེད་པ་ནི། གང་ཟག་གི་བདག་མེད་དང་མིག་ལ་སོགས་པ་ཆོས་ཀྱི་སྟེང་དུ་མེད་པ་ནི་ཆོས་ཀྱི་བདག་མེད་ཡིན་ནོ། །གང་ཟག་དང་རང་ཉིད་རང་གི་མཚན་ཉིད་ཀྱིས་མ་གྲུབ་པའི་སྟོང་ཉིད་དང་། ཆོས་རང་གི་མཚན་ཉིད་ཀྱིས་མ་གྲུབ་པའི་སྟོང་ཉིད་ནི་བདེ་བའི་ཡུལ་གྱིས་བསྒོམ་བྱ་ཡིན་ནོ། །གང་ཟག་རང་བཞིན་གྱིས་སྟོང་པ་དང་། ཆོས་རང་བཞིན་གྱིས་སྟོང་པ་ནི་གང་ཟག་དང་ཆོས་ཀྱི་བདག་མེད་ཀྱང་ཡིན་པས་དོན་གཅིག་གོ །གང་ཟག་དང་ཆོས་རང་གི་མཚན་ཉིད་ཀྱིས་གྲུབ་པར་འཛིན་པ་དང་། གང་ཟག་དང་ཆོས་དོན་དམ་པར་གྲུབ་པར་འཛིན་པའི་བློ་ནི། ཉོན་མོངས་ཅན་གྱི་མ་རིག་པ་འཁོར་བའི་རྩ་བ་ཡིན་ལ་གང་ཟག་དང་ཆོས་ཀྱི་བདག་འཛིན་ཡང་ཡིན་ཏེ། འཛིན་ཚུལ་ནི་གང་ཟག་དང་ཆོས་རྟོག་པའི་དབང་གིས་ཕར་བཞག་པ་མིན་པར། གང་ཟག་དང་ཆོས་ཁོ་རང་གི་ངོས་ནས་གྲུབ་པར་འཛིན་པ་ཡིན་ལ། སྤྱིར་གྱི་གོང་དུ་བཤད་པའི་རང་བཞིན་སྟོང་པ་ཉིད་དེ་བློའི་ཡུལ་དུ་བྱས་ནས་བསྒོམ་པ་ཡིན་ཞིང་། བདེ་བས་སྟོང་པ་ཡུལ་དུ་བྱས་ནས་བསྒོམ་པའི་ཚེ་བློས་སྟོང་པ་ཡུལ་དུ་བྱས་ནས་བསྒོམ་པ་བཞིན་དུ། བདེ་བ་དང་བློ་གཉིས་གོལ་ས་བརྗེས་ནས་བདེ་བས་སྟོང་པ་ཡུལ་དུ་བྱས་ནས་བསྒོམ་པར་བྱའོ། །དེ་ལྟ་བུའི་སྟོང་པ་སྒོམ་ཚུལ་ནི་གསང་དབང་ཤེར་དབང་། དབང་བཞི་པའི་སྐབས་ཀྱི་བདེ་བས་སྟོང་བ་ཡུལ་དུ་བྱས་ནས་བསྒོམ་པའི་ཚུལ་ཡིན་ནོ། །དེས་ན་དབང་བཞི་པའི་དོན་དུ་མཎྜལ་ཕུལ་ཏེ། ཁྱོད་ཞབས་པདྨོའི་ཞེས་སོགས་ཀྱིས་གསོལ་བ་བཏབ་པས་བླ་མས་འདི་ལྟར་གསུངས་པར་བསམས་ཏེ། ཤེས་རབ་ཡེ་ཤེས་ཀྱི་དབང་གི་སྐབས་སུ་རང་དང་རིག་མ་གཉིས་འདོད་ལྷ་ཡབ་ཡུམ་དུ་སྣང་བཞིན་པའི་ངང་ནས་སྙོམས་པར་ཞུགས་པའི་དུས་ན་ལྷན་ཅིག་སྐྱེས་པའི་བདེ་བས་རང་བཞིན་སྟོང་པ་ཉིད་ཡུལ་དུ་བྱས་ནས་མཉམ་སྦྱོར་དུ་ཡོད་པ་དེ་བཞིན་དུ། བདེ་བས་སྟོང་པ་ཡུལ་དུ་བྱས་ནས་བསྒོམ་པའི་རྒྱུན་གོམས་པར་བྱས་པ་ལས་མཐར་རླུང་སེམས་ཙམ་ལས་གྲུབ་པའི་ལོངས་སྤྱོད་རྫོགས་པ་ཡེ་ཤེས་ཀྱི་སྐུ་རང་སྣང་གི་རིག་མ་དང་ཁ་སྦྱོར་བའི་ལུས་ཅན། དེའི་དུས་ཉིད་ན་ཐུགས་ལྷན་ཅིག་སྐྱེས་པའི་དགའ་བ་དང་། རང་བཞིན་སྟོང་པ་གཉིས་རོ་གཅིག་ཏུ་ཞུགས་པའི་ཐམས་ཅད་སྟོང་པ་འོད་གསལ་དང་ངོ་བོ་དབྱེར་མེད་པའི་གཉིས་སུ་མེད་པའི་ཡེ་ཤེས་ཟུང་འཇུག་གི་གོ་འཕང་ཐོབ་པ་དབང་བཞི་པའི་ངོ་བོ་ཡིན་ནོ། །དེས་ན་དབང་བཞི་པ་ཚིག་གི་སྒོ་ནས་བརྡ་སྤྲད་ནས་ངོ་སྤྲོད་པར་བྱེད་པས་ན་དབང་བཞི་པ་ཚིག་གི་དབང་ཞེས་པའི་དོན་དེ་ཡིན་ནོ། །ཞེས་གསུངས་ཏེ་བརྡ་སྤྲད་པར་བསམས་ལ། དེས་དབང་བཞི་པ་ཚིག་དབང་ཐོབ། ལུས་ངག་ཡིད་གསུམ་གྱི་སྒྲིབ་པའི་བག་ཆགས་འཁྲུད་པའི་ནུས་པ་ཁྱད་པར་ཅན་བཞག །ལམ་བདེན་པ་གཉིས་དབྱེར་མེད་ཟུང་འཇུག་གི་རྫོགས་རིམ་སྒོམ་པ་ལ་དབང་། འབྲས་བུ་ཟུང་འཇུག་རྡོ་རྗེ་འཆང་གི་སྐུ་མངོན་དུ་བྱེད་པའི་སྐལ་བ་དང་ལྡན་པར་བྱས་སོ། །ཞེས་དབང་གི་དག་པ་བྱིན་པར་བསམས་ལ་བརྗོད། དེ་ནས་སྐུ་གསུང་ཐུགས་སྤྱིའི་དབང་གི་དོན་དུ་མཎྜལ་ཕུལ་ཏེ། ཇི་ལྟར་མགོན་པོ་ཁྱོད་ཀྱི་ནི། །སྐུ་གསུང་ཐུགས་ཀྱི་ཡོན་ཏན་རྣམས། །གཞན་ཕྱིར་མངོན་དུ་མཛད་པ་བཞིན། །མགོན་པོས་བདག་ལ་སྩལ་དུ་གསོལ། ཞེས་གསོལ་བ་བཏབ་པས། ཇི་ལྟར་མགོན་པོ་འཇམ་དབྱངས་ལ། །ཡོན་ཏན་དཔག་མེད་མངའ་ཇི་བཞིན། །འཇམ་པའི་དབྱངས་ཀྱི་ཐུགས་རྗེ་ཡིས། །སྐུལ་ལྡན་འདི་ལ་འཇུག་པར་ཤོག །ཅེས་གསུངས་ཏེ། བླ་མ་ཡབ་ཡུམ་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་བླ་མ་ཡབ་ཡུམ་གཉིས་པ་བྱོན་ཏེ། རང་གི་སྤྱི་གཙུག་ནས་ཞུགས་པས་བླ་མ་ཡབ་ཡུམ་གྱི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་པར་བསམ་མོ། །དེ་ནས་བཀའ་དྲིན་གྱི་ཡོན་དུ་མཎྜལ་ཕུལ་ཏེ། མཆོད་བསྟོད་གང་འགྲུབ་བྱས་ལ་བཟོད་གསོལ་དང་སྨོན་ལམ་གང་འགྲུབ་བྱས་ཏེ། སྔར་བཤད་པ་ལྟར། སྙིང་གའི་འོད་ཟེར་གྱིས་སྤྱན་དྲངས་ཏེ། རང་གི་སྤྱི་བོ་ནས་ཞུགས་ཏེ་སྙིང་ནང་གི་བླ་མ་ཡབ་ཡུམ་ལ་ཐིམ་པ་སྔར་ལྟར་བསམ་མོ། །བླ་མ་ཡི་དམ་དབྱེར་མེད་དུ་བྱས་ནས་གསོལ་བ་འདེབས་པ་དང་ཏིང་ངེ་འཛིན་གྱི་དབང་བཞི་རྒྱུན་དུ་ལེན་པའི་གདམས་པ་རྗེ་བཙུན་ཙོང་ཁ་པ་ཆེན་པོའི་ཞལ་ཤེས་ཁྱད་པར་ཅན་འདི་ནི། རྟོགས་ལྡན་འཇམ་དཔལ་རྒྱ་མཚོའི་གསུང་རྒྱུན་ལས་ཇི་ལྟར་བྱུང་བ་བཞིན་ཡི་གེར་བཀོད་པའོ། །མདྒ་ལཾ། །

ཕྱག་ཆེན་ལྔ་ལྡན་རྡོ་རྗེའི་མགུར་གྱི་ཚིག་འགྲེལ།

༄༅། །ཕྱག་ཆེན་ལྔ་ལྡན་རྡོ་རྗེའི་མགུར་གྱི་ཚིག་འགྲེལ་རྒྱལ་ཀུན་ཡེ་ཤེས་རྟེན་འབྲེལ་ལམ་བཟང་ཞེས་བྱ་བ་བཞུགས་སོ། །

        ན་མོ་མཉྫུ་ཤྲཱི་ཡེ། །སྐུ་གསུམ་ལྷུན་འགྲུབ་འཇམ་དཔལ་རྡོ་རྗེ་འཆང༌། གསང་གསུམ་སྒྱུ་འཕྲུལ་དྲྭ་བའི་ཟློས་གར་གྱིས། བཤེས་གཉེན་ཚུལ་འཛིན་དཔལ་མགོན་བླ་མ་དང༌། །དབྱེར་མེད་ཀུན་མཁྱེན་འབྲི་གུང་པ་ལ་འདུད། །རྒྱལ་བའི་གསུང་རབ་ཀུན་གྱི་ཟ་མ་ཏོག །ཡབ་གཅིག་འཇིག་རྟེན་གསུམ་མགོན་རྡོ་རྗེའི་གསུང༌། །ལྔ་ལྡན་རྩ་བའི་ཚིག་འགྲེལ་བརྗེད་ཐོ་ཙམ། །བཀའ་བཞིན་བླ་མའི་དྲིན་གྱིས་གང་ཤེས་འབྲི། །
དེ་ཡང་གངས་ཅན་གྱི་ལྗོངས་འདིར། གསང་སྔགས་བླ་ན་མེད་པའི་ལམ་སྲོལ་འདི་སྐྱེས་ཆེན་དམ་པ་རྣམས་ཀྱིས་གདུལ་བྱའི་དབང་པོ་དང་འཚམས་པར་བཀྲལ་བའི་བཀའ་སྲོལ་མི་འདྲ་བ་མང་དུ་མཆིས་མོད། །རྫོགས་པའི་སངས་རྒྱས་མགོན་པོ་འབྲི་གུང་པ་ཆེན་པོའི་ཕྱག་ཆེན་ལྔ་ལྡན་གྱི་གདམས་པ་ནི། ལམ་གྱི་རྩ་བའམ་སྙིང་པོའི་དོན་གྱི་ཆོས་ལྔ་པོ་སྟོན་པར་མཛད་པ་ཡིན་ལ་ཆོས་ཐམས་ཅད་སྙིང་པོའི་དོན་ལ་སྦྱོར་ཤེས་དགོས་པ་ནི་གལ་ཆེ་བས། ཐེག་པ་ཆེན་པོ་རྒྱུད་བླ་མ་ལས་རྡོ་རྗེའི་གནས་ཀྱི་ནང་ནས་བདེ་བར་གཤེགས་པའི་སྙིང་པོ་ལ་བརྗོད་བྱའི་དངོས་གཞིར་མཛད་པ་དང༌། ནཱ་རོ་དང༌། མཻ་ཏྲི་པ་ནས་བརྒྱུད་པའི་དེ་ཁོ་ན་ཉིད་གཙོ་བོར་འཆད་པ་ལ་སྙིང་པོའི་སྐོར་པ་ཞེས་གྲགས་ཤིང༌། ལོ་ཙཱ་བ་ཆེན་པོ་མར་པས། རྗེ་སྙིང་པོའི་དོན་སྟོན་ཆོས་ཀྱི་སྐུ། ཞེས་གསུང་པ་དང༌། བརྒྱུད་པ་འདི་ལ་ཡང་དོན་བརྒྱུད་སྙིང་པོ་རྒྱལ་བ་འབྲི་གུང་པ་ཞེས་གྲགས་ཤིང༌། སྙིང་པོའི་དོན་ཉམས་སུ་བླང་པས་ཆོས་ཐམས་ཅད་མ་འདྲེས་གསལ་རྫོགས་ཉམས་སུ་བླངས་པར་ཡང་ཤེས་དགོས་ཏེ། བསྟན་པ་ཐམས་ཅད་འགལ་མེད་དམ། ཆོས་ཐམས་ཅད་དུ་མ་རོ་གཅིག་ཅེས་པས་བཀའ་བརྒྱུད་གོང་མའི་ཉམས་ལེན་གྱི་གནད་མཐའ་དག་ཐུགས་སུ་ཆུད་པ་རྣམས་ཀྱི་གསུངས་ལས་ཇི་སྐད་འབྱུང་བ་བཞིན་རྒྱུད་ལྡན་གྱི་དཔལ་མགོན་བླ་མ་དམ་པ་ནས་ལེགས་པར་བསླབ་དགོས་ཏེ། རྗེ་མི་ལས། ང་ཡི་བརྒྱུད་པ་ངོ་མཚར་ཆེ། །དྲུག་པ་རྡོ་རྗེ་འཆང་ཆེན་ནས། །སྒྲ་བསྒྱུར་ལོ་ཙཱ་ཡན་ཆད་དུ། །བདེ་གཤེེགས་སྤྲུལ་པ་མ་ལགས་པ། གང་ཟག་རྒྱུད་པས་བར་མ་ཆོད། །ཅེས་གསུངས་པ་བཞིན། དོན་རྒྱུད་སྙིང་པོའི་བསྟན་པ་འདིའི་རྗེས་སུ་འཇུག་ཅིང༌། བྱང་ཆུབ་བསྒྲུབ་པར་འདོད་པ་ཀུན་གྱི་ཉམས་སུ་ལེན་བྱར་མེད་དུ་མི་རུང་བ་ནི་ཕྱག་རྒྱ་ཆེན་པོ་ལྔ་ལྡན་འདི་ཡིན་ཞིང༌། གྲུབ་པའི་དབང་ཕྱུག་མི་ལ་རས་ཆེན་གྱིས་ལྔ་ལྡན་ཞེས་མཚན་སྨོས་པར་མ་མཛད་ཀྱང༌། དོན་གྱི་ཚིག་རྐང་རྣམས་སྟོན་པར་མཛད་པ་ཞིག་སྟེ། ཉ་མ་ལེགས་སེ་འབུམ་ལ་གདམས་པ་ལས། །སེམས་ཅན་རྣམས་ལ་སྙིང་རྗེ་སྒོམས། རང་ལུས་ཐུགས་རྗེ་ཆེན་པོར་སྒོམས། །སྤྱི་བོར་རྩ་བའི་བླ་མ་སྒོམས། །ཕྱག་རྒྱ་ཆེ་ལ་བསྒོམ་ཡུན་བསྲིང༌། །རྗེས་ལ་བསྔོ་བས་རྒྱ་ཡིས་ཐོབ། །དེ་གོ་བར་གྱིས་ལ་ལྷ་ཆོས་མཛོད། །ཅེས་གསུངས་པ་དང༌། མཉམ་མེད་དྭགས་པོ་རིན་པོ་ཆེ་ནས་བརྒྱུད་པའི་བདེ་གཤེགས་འཁོར་བ་འཇིག་དངོས་ཕག་མོ་གྲུ་པས་སྡེ་སྣོད་གསུམ་དང་རྒྱུད་སྡེའི་དོན་རྣམས་ཉམས་སུ་ལེན་ལུགས་ལྔ་རུ་བསྡུས་ནས་ཕུན་སུམ་ཚོགས་པའི་དགེ་འདུན་ལྔ་སྟོང་ལ་ཚོགས་སུ་གསུངས་པས་གཞན་རྣམས་ཀྱིས་ཟབ་མོའི་དོན་གྱི་ངེས་པ་མ་རྙེད་པ་ལ། འཇིག་རྟེན་གསུམ་གྱི་མགོན་པོ་འབྲི་གུང་པས་བུམ་པ་གང་བྱོས་ཚུལ་དུ་ཐུགས་སུ་ཆུབ་ནས་ཉམས་སུ་བཞེས་པས་རེ་རེས་ཀྱང་གནས་སྐབས་དང་མཐར་ཐུག་གི་ནད་དང་བར་ཆད་ཞི་བ་དང་མཆོག་དང་ཐུན་མོང་གི་ཡོན་ཏན་ཐམས་ཅད་ཐོག་པ་མེད་པར་ཐོབ་པ་མཁྱེན་ནས་ཟབ་པ་དང་རྒྱ་ཆེ་བའི་བཀའ་བསྩལ་ཇི་སྙེད་པ་ཐམས་ཅད་ཀྱང་འདིའི་གནད་སྟོན་པ་ཡིན་ཏེ༌། དེ་བཞིན་གཤེགས་པའི་གསུང་གི་མཛོད་ཆེན་པོའང་ཡིན་ནོ། །
དེའི་ཚུལ་ནི།  །བྱང་ཆུབ་སེམས་དང་ཡི་དམ་ལྷ། །བླ་མ་ཕྱག་རྒྱ་ཆེན་པོ་དང༌། ། བསྔོ་བའི་ཆོས་ཀྱི་ཉམས་སུ་བླང༌། །ཞེས་ཕྱག་ཆེན་ལྔ་ལྡན་དུ་གྲགས་ལ། རྗེ་ཕག་མོ་གྲུ་པས་སྐྱོབ་པ་འཇིག་རྟེན་གསུམ་མགོན་ལ་བུ་ཁྱོད་བྱང་ཆུབ་མ་ཐོབ་བར་དུ་དམ་པའི་ཆོས་ལྔ་པོ་དང་ནམ་ཡང་འབྲལ་བར་མ་བྱེད་ཅེས་གདམས་པར་མཛད་པ་བཞིན། ཀླུ་སྒྲུབ་གཉིས་པ་སྐྱོབ་པ་འཇིག་རྟེན་གསུམ་གྱི་མགོན་པོས་རྩལ་དུ་བཏོན་པར་མཛད་པའི་འབྲི་གུང་ཕྱག་ཆེན་ལྔ་ལྡན་ཞེས་མཚན་ཡོངས་སུ་གྲགས་པ། བླ་མའི་མན་ངག་ཚད་མ། བདེ་བར་གཤེགས་པའི་བཀའ་ལུང་ཚད་མ། རྣལ་འབྱོར་པའི་ཉམས་མྱོང་ཚད་མ། རྟེན་འབྱུང་གི་ལོ་རྒྱུས་ཚད་མ་སྟེ།  ཚད་མ་བཞི་པོས་ལེགས་པར་གཏན་ལ་ཕབས་ནས་སྟོན་པར་མཛད་པའི་སྙིང་པོ། མདོ་རྒྱུད་ལུང་དང་འབྲེལ་བའི་ཆེ་བ། དངོས་སྟོབས་རིག་པས་གྲུབ་པའི་ཆེ་བ། མན་ངག་མྱོང་བས་བརྒྱན་པའི་ཆེ་བ། བྱིན་རླབས་ཚན་ཁ་ཆེ་བའི་ཆེ་བ། བདེ་བར་གཤེགས་པའི་གསུང་གི་མཛོད་ཡིན་པའི་ཆེ་བ་སྟེ། ཆེ་བ་ལྔ་དང་ལྡན་པ།  གསང་ཆེན་གདམས་པ་རྒྱ་མཚོའི་སྙིང་བཅུད། ཚེ་གཅིག་སངས་རྒྱས་སྒྲུབ་པའི་ཉེ་ལམ། འབྲེལ་ཚད་དོན་ལྡན་གྱི་ཆོས་མཆོག་འདི་ཉིད་ཚུལ་བཞིན་ཉམས་སུ་ལེན་ཤེས་ན། ཚེ་འདི་ཉིད་ལ་འབྲས་བུ་རྡོ་རྗེ་འཆང་གི་གོ་འཕང་མངོན་དུ་བྱེད་པར་འགྱུར་བ་བཀའ་བརྒྱུད་གྲུབ་ཐོབ་རྒྱ་མཚོའི་ཤུལ་ལམ་འཁྲུལ་མེད་ཞིག་སྟེ། རྗེ་སྒམ་པོ་པས། དོན་མ་ནོར་ཉམས་སུ་ལེན་ཤེས་ན། །ཚེ་འདི་ལ་འབྲས་བུ་མངོན་སུམ་སྟེར། །དུས་ཕྱི་མར་མི་འགྱང་བློ་རེ་བདེ། །ཞེས་གསུངས་པ་ལྟར། དེ་དག་གི་དོན་ཟབ་ཅིང་ཕྲ་བ་ནི། དཔལ་མགོན་བླ་མ་མཉེས་པའི་གསུང་གི་གསང་བ་ཟབ་མོ་ལས་རིམ་པས་འབད་དེ་ཤེས་པར་བྱས་ནས་འཁྲིད་དགོས་ཏེ། དེ་ལ་ཚིག་ཁྲིད་བློ་ལ་ཐེབས་པ། མྱོང་ཁྲིད་ཉམས་སུ་མྱོང་བ། དོན་ཁྲིད་རྒྱུད་ལ་སྐྱེ་བར་བྱེད་པའི་འཁྲིད་ལུགས་རྣམ་པ་གསུམ་ཡོད་པ་ལས། ཚིག་ཁྲིད་ཀྱིས་དོན་སྤྱི་བློ་ལ་ཤར་བའི་གོ་བ་རྙེད། མྱོང་ཁྲིད་ཀྱིས་རང་མཚན་ཉམས་འོག་ཏུ་ཚུད་པའི་མྱོང་བ། དོན་ཁྲིད་ཀྱིས་ཡིན་ལུགས་ཚུལ་བཞིན་དུ་གྱུར་པ་རྟོགས་པར་འགྱུར་བ་ཡིན་ལ། འདིར་ནི་ཚིག་འབྲེལ་དོན་སྤྱི་ཙམ་དགོས་གལ་ཞེས་འབྲི་གུང་༧སྐྱབས་མགོན་དཀོན་མཆོག་བསྟན་འཛིན་ཀུན་བཟང་ཕྲིན་ལས་ལྷུན་གྲུབ་དཔལ་བཟང་པོ་མཆོག་ནས་བཀའ་ཕེབས་པར་བརྟེན་བདག་གི་སྐལ་བས་ཅི་ལྟར་དཔོག་པའི་ཚིག་དོན་གྱི་ཆ་ཅུང་ཟད་ཙམ་ཞིག་བཀའ་དྲིན་འཁོར་མེད་དཔལ་མགོན་བླ་མའི་ཞལ་དྲོད་ལ་གཞི་བཅོལ་ནས་འཆད་པའོ། །

དཔའ་པོ་གཅིག་པའི་སྒྲུབ་ཐབས།


༄༅།      །བཅོམ་ལྡན་འདས་དཔལ་རྡོ་རྗེ་འཇིགས་བྱེད་དཔའ་པོ་གཅིག་པའི་སྒྲུབ་ཐབས་བདུད་ལས་རྣམ་རྒྱལ་གྱི་ངག་འདོན་ནག་འགྲོས་བློ་དམན་ལས་དང་པོ་བ་ལ་ཁྱེར་བདེ་བརབཀོད་པ་བཞུགས་སོ།  

༄༅། །ན་མོ་གུ་རུ་བཛྲ་བྷཻ་ར་ཝཱ་ཡ། །

ཁྱབ་བདག་འཇམ་པའི་རྡོ་རྗེ་གཤིན་རྗེའི་གཤེད། ། 
མགོན་དེ་དགྱེས་པ་ཀུན་བསྐྱེད་མཁའ་འགྲོའི་གཙོ།   
ཟུང་འཇུག་གོ་འཕང་མངོན་གྱུར་ལཱ་
ལི་ཏ།  །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །

གྲུབ་མཆོག་དོན་ཡོད་རྡོ་རྗེ་ཡེ་ཤེས་སྤས།   
རླུང་སེམས་དབང་བསྒྱུར་པདྨ་བཛྲ་དང་།    
མདོ་རྒྱུད་མངའ་བདག་མར་མེ་མཛད་པའི་ཞབས།    
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།     

མཐུ་སྟོབས་དབང་ཕྱུག་རྭ་ལོ་རྡོ་རྗེ་གྲགས། 
འཇིག་རྟེན་མིག་གྱུར་ཆོས་རབ་དེ་སྲས་མཆོག 
དཔལ་ལྡན་ཡེ་ཤེས་སེདྒེ་འབུམ་སེང་ཞབས། །
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། ། 

བདུད་བཞིའི་གཡུལ་བཟློག་རྗེ་བཙུན་རྒྭ་ལོ་དང་། 
ཀུན་མཁྱེན་ཤེས་རབ་སེདྒེ་ཡེ་ཤེས་དཔལ། 
དོན་གཉིས་ལྷུན་གྱིས་གྲུབ་པའི་རིན་པོ་ཆེ། 
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།   

རྒྱལ་བ་གཉིས་པ་བློ་བཟང་གྲགས་པའི་དཔལ།     
མཁས་གྲུབ་དམ་པ་ཤེས་རབ་སེངྒེ་དང་།    
ཟུང་འཇུག་མཆོག་བརྙེས་དཔལ་ལྡན་བཟང་པོའི་ཞབས།   
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།       

མདོ་རྒྱུད་བསྟན་པའི་མངའ་བདག་དགེ་འདུན་འཕེལ།  
རྒྱུད་དོན་ཇི་བཞིན་གཟིགས་པ་བཀྲ་ཤིས་འཕགས།  
དོན་གཉིས་ལྷུན་གྲུབ་བསམ་འགྲུབ་རྒྱ་མཚོའི་ཞབས། །
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། ། 

ཡོངས་རྫོགས་བསྟན་པའི་མངའ་བདག་བརྩོན་འགྲུས་འཕགས།       
ལེགས་བཤད་འབྱོར་བའི་མཛོད་འཛིན་རྡོ་རྗེ་བཟང་།          
གདམས་པའི་གཏེར་མཛོད་སངས་རྒྱས་རྒྱ་མཚོའི་ཞབས།     
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།    

གྲུབ་པའི་དབང་ཕྱུག་བློ་བཟང་ཆོས་རྒྱན་དང་།   
རྡོ་རྗེ་འཛིན་པ་དཀོན་མཆོག་རྒྱལ་མཚན་ཞབས།    
སྣང་མཐའི་
ཟློས་གར་བློ་བཟང་ཡེ་ཤེས་ལ།  
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།   

རྒྱལ་བའི་དབང་བོ་བསྐལ་བཟང་རྒྱ་མཚོ་དང་།  
རྒྱུད་དོན་འཛིན་པ་རོལ་བའི་རྡོ་རྗེའི་ཞབས། །
བསྟན་པའི་མངའ་བདག་ངག་དབང་ཚུལ་ཁྲིམས་ལ།  
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།   

མདོ་སྔགས་ཡོངས་རྫོགས་བྱང་ཆུབ་ཆོས་འཕེལ་དང་།  
བཀའ་དྲིན་མཉམ་མེད་བྲག་རི་རྡོ་རྗེ་འཆང་།  
བློ་བཟང་ཆོས་འབྱོར་རྒྱ་མཚོ་དཔལ་བཟང་པོ།   
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།   

།ཡོངས་འཛིན་ཆེན་པོ་གླིང་སྤྲུལརྡོ་རྗེ་འཆང་།  
བློ་བཟང་ལུང་རྟོགས་བསྟན་འཛིན་འཕྲིན་ལས་ཞབས། །
མཁན་ཆེན་བསྟན་པ་ཆོས་འཕེལ་དཔལ་བཟང་པོ།    
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།    

རབ་འབྱམས་རྒྱལ་བ་ཀུན་གྱི་ཡེ་ཤེས་ནི།    
འཇིགས་མཛད་ཁྲོ་བོར་མངོན་བཞེངས་མི་ཡི་གར།   
བཀའ་དྲིན་མཉམ་མེད་བདེ་ཆེན་སྙིང་པོ་ལ།    
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ།    

དེ་ལྟར་བསྟོད་པས་ཚེ་རབས་ཀུན་ཏུ་བདག    
ཐེག་མཆོག་དགེ་བའི་བཤེས་ཀྱིས་རྗེས་བཟུང་སྟེ།  
ཟབ་རྒྱས་ཆོས་ཀྱི་དགའ་སྟོན་གྱིས་འཚོ་ཞིང་།  
མ་རྣམས་དོན་དུ་བྱང་ཆུབ་བསྒྲུབ་པ་ལ།   

འགལ་རྐྱེན་བདུད་བཞིའི་གཡུལ་ལས་རྣམ་རྒྱལ་ཏེ།  
ཞི་རྒྱས་དབང་དྲག་གྲུབ་ཆེན་བརྒྱད་ལ་སོགས།   
དངོས་གྲུབ་ཀུན་གྱི་འབྱོར་བ་རབ་རྒྱས་ཤིང་།   
ཐུབ་བསྟན་སྙིང་བོ་འཛིན་པའི་མཆོག་གྱུར་ཅིག  

ཚེ་རབས་ཀུན་ཏུ་རྒྱལ་བ་ཙོང་ཁ་བས།  
ཐེག་མཆོག་བཤེས་གཉེན་དངོས་སུ་མཛད་པའི་མཐུས། །
རྒྱལ་བས་བསྔགས་པའི་ལམ་བཟངདེ་ཉིད་ལས།     
སྐད་ཅིག་ཙམ་ཡང་བཟློག་པར་མ་གྱུར་ཅིག    ། 

རྗེ་བཙུན་བླ་མ་བློ་བཟང་གྲགས་པའི་དཔལ།   
མོས་གུས་སྙིང་ནས་ཡིད་ཀྱིས་གསོལ་བ་འདེབས།   
མགོན་ཁྱོད་གང་དུ་བཞུགས་པའི་ཞིང་ཁམས་དེར།  
བདག་སོགས་མྱུར་དུ་འོང་པར་བྱིན་གྱིས་རློབས།   

སྐྱེ་བ་ཀུན་ཏུ་ཡང་དག་བླ་མ་དང་། །
འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་།  
ས་དང་ལམ་གྱི་ཡོན་ཏན་རབ་རྫོགས་ནས།   
རྡོ་རྗེ་འཆང་གི་གོ་འཕང་མྱུར་ཐོབ་ཤོག  

རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་་་་པ་འཛིན་པའི་སྐུར་བཞེངས་པར་གྱུར།  
   
ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།    ཨོཾ་སྭ་བྷཱ་ཝ་ཤུདྡྷཿསརྦ་དྷརྨཿསྭཱ་བྷཱ་ཝ་ཤུད་དྷོ྅་ཧཾ།   སྟོང་བ་ཉིད་དུ་གྱུར།    

སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ལྟ་བུ་བ་དན་གྱིས་མཚན་པ།   དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ།     དེའི་སྟེང་དུ་ཨཱཿལས་མི་མགོའི་སྒྱེད་བུ་གསུམ་གྱི་སྟེང་དུ་ཨཱཿལས་བྱུང་བའི་ཐོད་པ་དཀར་པོ།  དེའི་ནང་གི་ཤར་དུ་བྷཱུཾ་ལས་བྱུང་བའི་བ་ལང་གི་ཤ་གོས་མཚན་པ།   ལྷོར་ཨཾ་ལས་བྱུང་བའི་ཁྱིའི་ཤ་ཀུས་མཚན་པ།     ནུབ་ཏུ་ཛྲིཾ་ལས་བྱུང་བའི་གླང་པོ་ཆེའི་ཤ་དས་མཚན་པ།   བྱང་དུ་ཁཾ་ལས་བྱུང་བའི་རྟའི་ཤ་ཧས་མཚན་པ།   དབུས་སུ་ཧཱུཾ་ལས་བྱུང་བའི་མིའི་ཤ་ནས་མཚན་པ།   ཤར་ལྷོར་ལཾ་ལས་བྱུང་པའི་དྲི་ཆེན་བིས་མཚན་པ།  ལྷོ་ནུབ་ཏུ་མཱཾ་ལས་བྱུང་བའི་རཀྟ་རས་མཚན་པ།  ནུབ་བྱང་དུ་བཾ་ལས་བྱུང་བའི་བྱང་སེམས་དཀར་པོ་ཤུས་མཚན་པ།   བྱང་ཤར་དུ་ཏཱཾ་ལས་བྱུང་བའི་རྐང་མར་མས་མཚན་པ།   དབུས་སུ་བཾ་ལས་བྱུང་བའི་དྲི་ཆུ་མཱུས་མཚན་པ།   དེ་དག་གི་སྟེང་དུ་ཨོཾ་དཀར་པོ།   ཨཱཿདམར་པོ།   ཧཱུཾ་སྔོན་པོ་གསུམ་སྟེང་ནས་སྟེང་དུ་བརྩེགས་པར་གྱུར།     རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་རླུང་ལ་ཕོག་པས་རླུང་གཡོས་མེ་སྦར་ཏེ་ཐོད་པའི་རྫས་རྣམས་ཞུ་ཞིང་ཁོལ་པར་གྱུར།    ཡི་གེ་གསུམ་ལས་འོད་ཟེར་རིམ་པ་བཞིན་དུ་འཕྲོས་པས།       སྐུ་རྡོ་རྗེ་གསུང་རྡོ་རྗེ།      ཐུགས་རྡོ་རྗེ་རྣམས་བཀུག་ནས་ཡི་གེ་གསུམ་ལ་རིམ་གྱིས་ཐིམ་པ་རྣམས་ཐོད་པར་ལྷུང་ནས་ཞུ་བས་ཧཱུཾ་གིས་ཁ་དོག་དྲི་ནུས་ཀྱི་་་་སྐྱོན་སྦྱངས།    ཨཱཿས་བདུད་རྩིར་རྟོགས་པར་བྱས།    ཨོཾ་གྱིས་མང་པོར་སྦར་ཞིང་སྤེལ་བར་གྱུར།   ཨོཾ་ཨཱཿཧཱུཾ།   ལན་གསུམ་བརྗོད།   

 ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།  ཨོཾ་སྭ་བྷཱ་ཝ་ཤུ་དྡྷཿསརྦ་དྷརྨཿསྭཱ་བྷཱ་ཝཤུད་དྷོ྅་ཧཾ།སྟོང་བ་ཉིད་དུ་གྱུར།  སྟོང་པའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཧཱུཾ་ཞུ་བ་ལས་བྱུང་བའི་མཆོད་ཡོན།    ཞབས་བསིལ།   དྲི།   མེ་ཏོག   བདུག་སྤོས།  མར་མེ།    ཞལ་ཟས། རོལ་མོ་རྣམས་རང་བཞིན་བདེ་སྟོང་རྣམ་པ་མཆོད་རྫས་བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པརགྱུར།     ཨོཾ་ཨརྒྷཾ་ཨཱཿཧཱུཾ།   ཨོཾ་པཱདྱཾ་ཨཱཿཧཱུཾ། ཨོཾ་གནྡྷེ་ཨཱཿཧཱུཾ།  ཨོཾ་པུཥྤེ་ཨཱཿཧཱུཾ།   ཨོཾ་དྷུ་པེ་ཨཱཿཧཱུཾ།   ཨོཾ་ཨཱ་ལོ་ཀེ་ཨཱཿཧཱུཾ།   ཨོཾ་ནེེ་ཝི་ཏེ་ཨཱཿཧཱུཾ། ཨོཾ་ཤཔྟ་ཨཱཿཧཱུཾ།  
  
ཕྱོགས་སྐྱོང་གི་གཏོར་མ་ནང་མཆོད་ལྟར་བྱིན་གྱིས་བརླབ།        

 ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།     ཨོཾ་སྭ་བྷཱ་ཝ་ཤུདྡྷཿསརྦ་དྷརྨཿསྭཱ་བྷཱ་ཝ་ཤུད་དྷོ྅་ཧཾ།  སྟོང་བ་ཉིད་དུ་གྱུར།    སྟོང་པའི་ངང་ལས་ཡཾ་ལས་རླུང་་གི་དཀྱིལ་འཁོར་སྔོན་པོ་གཞུའི་དབྱིབས་ལྟ་བུ་བ་དན་གྱིས་མཚན་པ།    དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ།   དེའི་སྟེང་དུ་ཨཱཿལས་མི་མགོའི་སྒྱེད་བུ་གསུམ་གྱི་སྟེང་དུ་ཨཱཿལས་བྱུང་བའི་ཐོད་པ་དཀར་པོ།  དེའི་ནང་གི་ཤར་དུ་བྷཱུཾ་ལས་བྱུང་བའི་བ་ལང་གི་ཤ་གོས་མཚན་པ།   ལྷོར་ཨཾ་ལས་བྱུང་བའི་ཁྱིའི་ཤ་ཀུས་མཚན་པ།ནུབ་ཏུ་ཛྲིཾ་ལས་བྱུང་བའི་གླང་པོ་ཆེའི་ཤ་དས་མཚན་པ།  བྱང་དུ་ཁཾ་ལས་བྱུང་བའི་རྟའི་ཤ་ཧས་མཚན་པ།      དབུས་སུ་ཧཱུཾ་ལས་བྱུང་བའི་མིའི་ཤ་ནས་མཚན་པ།    ཤར་ལྷོར་ལཾ་ལས་བྱུང་པའི་དྲི་ཆེན་བིས་མཚན་པ།   ལྷོ་ནུབ་ཏུ་མཱཾ་ལས་བྱུང་བའི་རཀྟ་རས་མཚན་པ།   ནུབ་བྱང་དུ་བཾ་ལས་བྱུང་བའི་བྱང་སེམས་དཀར་པོ་ཤུས་མཚན་པ།    བྱང་ཤར་དུ་ཏཱཾ་ལས་བྱུང་བའི་རྐང་མར་མས་མཚན་པ། དབུས་སུ་བཾ་ལས་བྱུང་བའི་དྲི་ཆུ་མཱུས་མཚན་པ།  དེ་དག་གི་སྟེང་དུ་ཨོཾ་དཀར་པོ།   ཨཱཿདམར་པོ།      ཧཱུཾ་སྔོན་པོ་གསུམ་སྟེང་ནས་སྟེང་དུ་བརྩེགས་པར་གྱུར།    རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་རླུང་ལ་ཕོག་པས་རླུང་གཡོས་མེ་སྦར་ཏེ་ཐོད་་་པའི་རྫས་རྣམས་ཞུ་ཞིང་ཁོལ་པར་གྱུར།        ཡི་གེ་གསུམ་ལས་འོད་ཟེར་རིམ་པ་བཞིན་དུ་འཕྲོས་པས།      སྐུ་རྡོ་རྗེ་གསུང་རྡོ་རྗེ།      ཐུགས་རྡོ་རྗེ་རྣམས་བཀུག་ནས་ཡི་གེ་གསུམ་ལ་
རིམ་གྱིས་ཐིམ་པ་རྣམས་ཐོད་པར་ལྷུང་ནས་ཞུ་བས་ཧཱུཾ་གིས་ཁ་དོག་དྲི་ནུས་ཀྱི་སྐྱོན་སྦྱངས།    ཨཱཿས་བདུད་རྩིར་རྟོགས་པར་བྱས།   ཨོཾ་གྱིས་མང་པོར་སྦར་ཞིང་སྤེལ་བར་གྱུར།   ཨོཾ་ཨཱཿཧཱུཾ།   ལན་གསུམ་བརྗོད།        

རང་གི་ཐུགས་ཀའི་ཧཱུཾ་སྔོན་པའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ཕྱོགས་སྐྱོང་བཅོ་ལྔ་འཁོར་དང་བཅས་པ་བཀུག་ནས་ཕྱོགས་མཚམས་རྣམས་སུ་འཁོད་པ་་་སྐད་ཅིག་གིས་འོད་གསལ་དུ་བཅུག་པ་ལས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པའི་སྐུར་བཞེངས་པའི་མགྲོན་རྣམས་ཀྱི་ལྗགས་ཧཱུཾ་་ལས་སྐྱེས་པའི་རྡོ་རྗེ་རྩེ་གཅིག་པ་དཀར་པོ་འོད་ཀྱི་སྦུ་གུ་ཅན་རྣམས་སུ་གྱུར།    ཨོཾ་ཡ་མ་རཱ་ཛཱ་ས་དོ་མེ་ཡ།ཡ་མེ་དོ་རུ་ཎ་ཡོ་ད་ཡ།  ཡ་ད་ཡོ་ནིར་ཡ་ཀྵེ་ཡཙྪ་ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ་སྭཱཧཱ།  ཨོཾ་བྷུ་ཙ་ར་ནཾ།  ཡ་པཱ་ཏཱ་ལ་ཙ་ར་ཡ།  མཱན་ཁེ་ཙ་ར་ཡ།  ཏ་བཱུ་ར་བ་ནི་གཱ་ནཾ།  ཀ་དཀྵི་ན་དཱི་ག་ཡ།  ཧཱུཾ་བཤྩི་མ་ནཾ། ཕཊ།  ཨུད་ཏ་ར་ཏི་གཱ་ཡ།  ཨོཾ་ཨི།  ཧྲཱིཿཡ།  ཥྚཱིཿབ། ཝི་ཀྵི།  ༄༅།    ཀྲི་ཀོ།  ཏཱ་ཨེ།  ན་ཡ།  ན་དེ།  ཧཱུཾ་བྷྱོཿཕཊ་སརྦ་བྷུ་ཏེ་བྷྱཿ ལན་གསུམ་བརྗོད།  

ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ།  པཱ་དྱཾ།  གནྡྷེ། པུཥྤེ།  དྷུ་པེ།  ཨ་ལོ་ཀེ ནེེ་ཝི་ཏེ།  ཤཔྟ་པྲ་ཏཱི་ཙྪ་ཧཱུཾ་སྭཱ་ཧཱ།  ཨོཾ་ད་ཤ་དིཀ་ལོ་ཀཱ་པཱ་ལ་ས་པ་རི་ཝཱ་ར་ཨོཾཿཧཱུཾ།  

བཅོམ་ལྡན་ཆོས་རྗེ་འཇམ་དབྱངས་སྤྱན་ལམ་དུ།   
བདུད་འདུལ་བསྟན་པ་བསྲུང་བར་ཞལ་བཞེས་པ།  ། 
ལས་ཀྱི་གཤིན་རྗེ་མ་མོ་མཁའ་འགྲོ་མ། །
འབྱུང་པོ་རོ་ལངས་ཅི་བགྱི་བཀའ་ཉན་ཚོགས།  
ཕྱི་ནངསྐྱོང་བའི་དམ་ཅན་མ་ལུས་ལ།   
བདག་ནི་རེ་བའི་སེམས་ཀྱིས་འདུད་ཅིང་མཆིས།  

ཕྱོགས་སྐྱོང་འཁོར་དང་བཅས་པ་རྣམས་ཀྱིས་བདག་གི་དགེ་བའི་བྱ་བ་རྣམས་མཐར་ཕྱིན་པ་དང་དེའི་བར་ཆད་ཞི་བའི་འཕྲིན་ལས་མཛོད་ཅིག   
ཨོཾ་ཡ་མཱནྟ་ཀ་ས་མ་ཡ།  མ་ནུ་པཱ་ལ་ཡ།  ཡ་མཱན་ཏ་ཀ་ཏྭེ་ནོ་བ་ཏིཥྛ།  དྲི་ཌྷོ་མེ་བྷཱ་བ།  སུ་ཏོ་ཥྱོ་མེ་བྷཱ་བ།  མ་ནུ་རཀྟོ་མེ་བྷཱ་བ།  སུ་པོ་ཥྱོ་མེ་བྷཱ་བ། སརྦ་སིད་དྷི་མྨེ་བྲ་ཡཙྪ།  སརྦ་ཀ་རྨཱསུ་ཙ་མེ།  ཙི་ཏྟཾ་ཤྲཱི་ཡཾ་ཀུ་རུ་ཧཱུཾ།  ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ། བཛྲ་མ་མེ་མུཉྩ་བཛྲ་བྷ་ཝ།  མ་ཧཱ་ས་མ་ཡ་ས་ཏྭ་ཨཱཿཧཱུཾ་ཕཊ།    

མ་རྙེད་ཡོངས་སུ་མ་ཤེས་དང་།     
གང་ཡང་ནུས་པ་མ་མཆིས་པས།   
འདིར་ནི་བྱ་བ་གང་བགྱིས་པ།  
དེ་ཀུན་ཁྱེད་ཀྱིས་བཟོད་མཛད་རིགས། །

ཨོཾ་ཨཱཿཧཱུཾ་བཛྲ་མུཿཕྱོགས་སྐྱོང་འཁོར་བཅས་རང་གནས་སུ་གཤེགས་པར་གྱུར།  

བདག་བསྐྱེད་མཆོད་པ་བྱིན་རླབས་གོང་ལྟར་བྱ།        

ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།      ཨོཾ་སྭ་བྷཱ་ཝ་ཤུ་དྡྷཿསརྦ་དྷརྨཿསྭཱ་བྷཱ་ཝ་ཤུད་དྷོ྅་ཧཾ། སྟོང་བ་ཉིད་དུ་གྱུར།      སྟོང་པའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཧཱུཾ་ཞུ་བ་ལས་བྱུང་བའི་མཆོད་ཡོན།    ཞབས་བསིལ།   དྲི།   མེ་ཏོག   བདུག་སྤོས།  མར་མེ།    ཞལ་ཟས། རོལ་མོ་རྣམས་རང་བཞིན་བདེ་སྟོང་རྣམ་པ་མཆོད་རྫས་བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར།     ཨོཾ་ཨརྒྷཾ་ཨཱཿཧཱུཾ།   ཨོཾ་པཱདྱཾ་ཨཱཿཧཱུཾ། ཨོཾ་གནྡྷེ་ཨཱཿཧཱུཾ།  ཨོཾ་པུཥྤེ་ཨཱཿཧཱུཾ།   ཨོཾ་དྷུ་པེ་ཨཱཿཧཱུཾ།   ཨོཾ་ཨཱ་ལོ་ཀེ་ཨཱཿཧཱུཾ།   ཨོཾ་ནེེ་ཝི་ཏེ་ཨཱཿཧཱུཾ། ཨོཾ་ཤཔྟ་ཨཱཿཧཱུཾ།      

རང་ཉིད་འཇིགས་བྱེད་ཞལ་གཅིག་ཕྱག་གཉིས་པར་གསལ་བའི་ཐུགས་ཀར་པདྨ་དང་ཉི་་་མ་ལ་གནས་པའི་ཧཱུཾ་གི་འོད་ཟེར་གྱིས་འཇིག་རྟེན་གྱི་ཁམས་མུ་མེད་པ་གསལ་བར་བྱས། དེ་
ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་།  རིག་པའི་ཚོགས་ཀྱིས་བསྐོར་པའི་རྡོ་རྗེ་འཇིགས་བྱེད་བླ་མ་དང་བཅས་པ་མདུན་གྱི་ནམ་མཁའ་སྤྱན་དྲངས།  འོད་ཟེར་རང་གི་སྙིང་གར་ཐིམ་པར་གྱུར།   
གང་གི་དྲིན་གྱིས་བདེ་ཆེན་གནས།   
སྐད་ཅིག་གིས་ནི་ཐོབ་འགྱུར་པ།  
བླ་མ་རིན་ཆེན་ལྟ་བུ་ཡི།    
རྡོ་རྗེ་ཅན་ཞབས་པད་ལ་འདུད།  

གཟུགས་མཆོག་མཆོག་ཏུ་དྲག་པོ་ཆེ། །
དཔའ་བོ་མཆོག་གི་སྤྱོད་ཡུལ་ཅན། །  
གདུལ་དཀའ་འདུལ་བའི་དོན་མཛད་པ། །
རྡོ་རྗེ་འཇིགས་བྱེད་ལ་ཕྱག་འཚལ། །

རང་གི་སྙིང་གའི་ས་བོན་གྱི་འོད་ཟེར་ལས་བྱུང་བའི་རྩི་ཀ་དཀར་མོ།   ཕག་མོ་སྔོན་མོ།   དབྱངས་ཅན་མ་དམར་མོ།    གོོ་རི་ལྗང་གུ་ཕྱག་ན་མཆོད་རྫས་སྣ་ཚོགས་པ་ཐོགས་པ་རྣམས་ཀྱིས་མཆོད་པར་གྱུར།  ཨོཾ་ཧྲཱིཿཥྚཱིཿཧ།  ཨོཾ་ཧཱུཾ་ཧཱུཾ་ཕཊ།  ཨོཾ་ཝི་ཀྲི་ཏཱ་ན་ན་དུཥྚཾ་ས་ཏྭ་ད་མ་ཀ་གཿགཿ  ཨོཾ་ཀུ་མ་རཱ་རཱུ་པི་ཎེ་ཛཿཛཿཧཱུཾ་ཕཊ།    ཨོཾ་ཧྲཱིཿཧཿཧེ་ཕཊ།     ཨོཾ་དཱིཔྡ་ལོ་ཙ་ནི་ཝི་ཀྲི་ཏཱ་ན་ན་མ་ཧཱ་ཨ་ཊྚ་ཊྚ་ཧ་ས་ན་དི་པྟ་ཡེ་སྭཱ་ཧཱ།   ཨོཾ་བཛྲ་ནེ་ཝི་དྱ་ཨཱཿཧཱུཾ་སྭཱཧཱ།  ཨོཾ་བཛྲ་ཤཔྟ་ཨཱ་ཧཱུཾ།  

སྡིག་པ་རྣམས་ནི་བཤག་པར་བྱ།   
སྐྱེས་ཤིང་བྱུང་བ་རྣམས་ནི་བསལ།   
མི་བྱེད་པར་ཡང་སྤྱན་སྔར་བརྗོད།  
དེ་བཞིན་བསོད་ནམས་རྗེས་ཡི་རང་།   

བདག་གིས་བདེ་འགྲོར་ཡོངས་སུ་བསྔོ། །
དཀོན་མཆོག་གསུམ་ལ་སྐྱབས་སུ་འགྲོ། །
སེམས་ཅན་ཐམས་ཅད་བདག་གིས་སྒྲོལ། ། 
བྱང་ཆུབ་གནས་ལ་འགོད་པར་བགྱི།  

བྱང་ཆུབ་སེམས་ནི་ཡང་དག་བསྐྱེད།  
ཡོན་ཏན་རྒྱ་མཚོ་ཁྱེད་རྣམས་ལ།  
བདག་གིས་ལུས་ནི་དབུལ་བར་བགྱི།   
ཡང་དག་རྗོགས་བའི་སངས་རྒྱས་དང་། །

དེ་སྲས་ལམ་གྱུར་སྦྱིན་སོགས་ཚུལ།  
སྐུ་གསུམ་ཡེ་ཤེས་ཐོབ་བྱའི་ཕྱིར། །
རབ་ཏུ་དང་བས་བསྟེན་པར་བགྱི། །
སངས་རྒྱས་བྱང་ཆུབ་སེམས་དཔའ་ཀུན།   

བདག་ལ་དགོངས་པར་མཛད་དུ་གསོལ། །
བདག་མིང་འདི་ཞེས་བགྱི་བ་ནི། །
དུས་འདི་ནས་ནི་བཟུང་ནས་ནི། ། 
བྱང་ཆུབ་སྙིང་པོར་མཆིས་ཀྱི་བར།  

ཇི་ལྟར་དུས་གསུམ་མགོན་པོ་རྣམས།  
བྱང་ཆུབ་ཏུ་ནི་ངེས་མཛད་ཕྱིར། །
བྱང་ཆུབ་སེམས་ནི་བླ་ན་མེད། །
དམ་པ་བདག་གིས་བསྐྱེད་པར་བགྱི། །

རིགས་ལྔ་སྤྱི་དང་སོ་སོ་ཡི།  
དམ་ཚིག་སྡོམ་པ་མ་ལུས་བཟུང་།   
མ་བསྒྲལ་བ་རྣམས་བདག་གིས་བསྒྲལ།   
མ་གྲོལ་བ་རྣམས་བདག་གིས་དགྲོལ།    

དབུགས་མ་ཕྱིན་པ་དབུགས་དབྱུང་ཞིང་།   
སེམས་ཅན་མྱ་ངན་འདས་ལ་དགོད།  

སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག  
སེམས་ཅན་ཐམས་ཅད་སྡུག་བསྔལ་དང་བྲལ་བར་གྱུར་ཅིག  
སེམས་ཅན་ཐམས་ཅད་བདེ་བ་དང་མི་འབྲལ་བར་གྱུར་ཅིག        
སེམས་ཅན་ཐམས་ཅད་འཇིག་རྟེན་གྱི་ཆོས་བརྒྱད་དང་གཟུང་འཛིན་གྱི་རྣམ་རྟོག་གིས་མི་བསྐྱོད་པའི་བཏང་སྙོམས་ལ་གནས་བར་བྱའོ།།

ཨོཾ་སྭ་བྷ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ། ཨོཾ་ཤཱུནྱ་ཏ་ཛྙཱ་ན་བཛྲ་སྭ་བྷྰ་ཝ་ཨཏྨ་ཀོ྅་ཧཾ།  རང་དང་ཚོགས་ཞིང་གི་ལྷ་དང་དེ་དག་ལས་གཞན་པའི་ཆོས་ཐམས་ཅད་བརྟེན་ནས་བཏགས་པ་ཡིན་པའི་ཕྱིར།    རྟག་ཆད་ལ་སོགས་པའི་མཐའ་བཞི་དང་བྲལ་བ་བདག་མེད་པའི་རང་བཞིན་སྟོང་བ་ཉིད་དུ་གྱུར།  སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་དུ་བའི་མདོག་ཅན་གཞུ་ལྟ་བུ་རྒྱལ་མཚན་གྱིས་མཚན་པ། དེ་སྟེང་དུ་རཾ་ལས་མེའི་དཀྱིལ་འཁོར་དམར་བོ་གྲུ་གསུམ་འབར་བའི་ཕྲེང་བས་འཁྲིགས་པའི་རྡོ་རྗེ་རྒྱན་གྱིས་བརྒྱན་པ།    དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ།    དེའི་སྟེང་དུ་ལཾ་ལས་སའི་དཀྱིལ་འཁོར་སེར་བོ་གྲུ་བཞིར་རྡོ་རྗེས་མཚན་པའི་སྟེང་དུ་ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུཾ་གིས་མཚན་པ།      དེ་ལས་འོད་ཟེར་འོག་ཏུ་འཕྲོས་པས་རྡོ་རྗེའི་ས་གཞི།   ལོགས་སུ་འཕྲོས་པས་རྡོ་རྗེའི་རྭ་བ།    སྟེང་དུ་འཕྲོས་པས་རྡོ་རྗེའི་གུར།གུར་གྱི་འོག་རྭ་བའི་སྟེང་དུ་རྡོ་རྗེའི་བླ་རེ་སྟེ།  ཐམས་ཅད་ཀྱང་རྡོ་རྗེ་འབར་བའི་རང་བཞིན་བར་མཚམས་མེད་པར་དུམ་བུ་གཅིག་ཏུ་གྱུར་པའི་ཕྱི་རོལ་ཏུ་བསྐལ་བ་འཇིག་པའི་མེ་ལྟ་བུའི་ཁ་དོག་སྣ་ལྔའི་མེ་དཔུང་ཕྱོགས་བཅུར་འཕྲོ་བར་གྱུར།   

རྭ་བའི་དབུས་སུ་བྷཱུཾ་ལས་བཀའི་འཁོར་ལོ་སེར་བོ་རབ་ཏུ་འབར་བ་གཡས་བསྐོར་དུ་འཁོར་བ།      རྩིབས་བཅུ་ལྟེ་བ་དང་བཅས་བ།  ལྟེ་བའི་ནང་དང་རྩིབས་ལ་ཅུང་ཟད་མ་རེག་པའི་གནས་རྣམས་སུ་སྣ་ཚོགས་པདྨ་དང་ཟླ་བ་དང་ཉི་མའི་གདན་གསུམ་གསུམ།      གདན་དབུས་མའི་སྟེང་དུ་ཧཱུཾ་ཡིག་ཡོངས་སུ་གྱུར་པ་ལས།    རང་ཉིད་གནོད་མཛེས་རྒྱལ་པོ་སྐུ་མདོག་མཐིང་ག་མི་བསྐྱོད་པའི་ཅོད་པན་ཅན།      མཐིང་དཀར་དམར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།  ལྷག་མ་གཡས་གཉིས་རིན་པོ་ཆེ་དང་ལྕགས་ཀྱུ།     གཡོན་གཉིས་པདྨ་དང་ཞགས་པ་འཛིན་པ།   ཞབས་གཡས་བསྐུམས་ཤིང་གཡོན་བརྐྱངས་པའི་སྟབས་ཀྱིས་བཞུགས་པ།   ཡབ་ཡུམ་སྙོམས་པར་ཞུགས་པའི་ཐུགས་ཀའི་ཧཱུཾ་གི་འོད་ཟེར་གྱིས་བཀུག་པའི་ཁྲོ་བོ་བཅུ་ཞལ་དུ་བཅུག་ནས་ཞུ་བ་རྡོ་རྗེ་ལམ་ནས་ཡུམ་གྱི་པདྨར་ཞུགས་པའི་ཐིག་ལེ་བཅུ་ལས་ཧཱུཾ་རིང་བོ་བཅུ་དང་།    དེ་ལས་ཁྲོ་བོ་
བཅུར་གྱུར་པའི་གཤིན་རྗེའི་གཤེད་སྔོན་པོ་རྣམ་སྣང་གི་ཅོད་པན་ཅན།   སྔོ་དཀར་དམར་
པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།    ལྷག་
མ་གཡས་གཉིས་རིན་པོ་ཆེ་དང་རྡོ་རྗེའི་ཐོ་བ།  གཡོན་གཉིས་པདྨ་དང་རལ་གྲི་འཛིན་པ།  ཧཱུཾ་པདྨ་ལས་སྤྲོས་ཏེ།  ཤར་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད།  གཞན་གྱིས་མི་ཐུབ་པ་དཀར་པོ་མི་བསྐྱོད་པའི་ཅོད་པན་ཅན།   དཀར་མཐིང་དམར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།      ལྷག་མ་གཡས་གཉིས་རིན་པོ་ཆེ་དང་བེ་ཅོན།  གཡོན་གཉིས་པདྨ་དང་རལ་གྲི་འཛིན་པ།   ཧཱུཾ་པདྨ་ལས་སྤྲོས་ཏེ། ལྷོ་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད།  རྟ་མགྲིན་དམར་པོ་འོད་དཔག་མེད་ཀྱི་ཅོད་པན་ཅན།   དམར་མཐིང་དཀར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།       ལྷག་མ་གཡས་གཉིས་རིན་པོ་ཆེ་དང་པདྨ།  གཡོན་གཉིས་འཁོར་ལོ་དང་རལ་གྲི་འཛིན་པ།  ཧཱུཾ་པདྨ་ལས་སྤྲོས་ཏེ།  ནུབ་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད།   བདུད་རྩི་འཁྱིལ་བ་སྔོན་པོ་མི་བསྐྱོད་པའི་ཅོད་པན་ཅན།        སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།  ལྷག་མ་གཡས་གཉིས་རིན་པོ་ཆེ་དང་རྡོ་རྗེ།  གཡོན་གཉིས་པདྨ་དང་རལ་གྲི་འཛིན་པ།    ཧཱུཾ་པདྨ་ལས་སྤྲོས་ཏེ།      བྱང་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད།    འདོད་རྒྱལ་མཐིང་ག་མི་བསྐྱོད་པའི་ཅོད་པན་ཅན།    མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།      ལྷག་མ་གཡས་གཉིས་རིན་པོ་ཆེ་དང་ལྕགས་ཀྱུ།   གཡོན་གཉིས་པདྨ་དང་རལ་གྲི་འཛིན་པ།  ཧཱུཾ་པདྨ་ལས་སྤྲོས་ཏེ།  མེ་མཚམས་ཀྱི་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད།  དབྱུག་སྔོན་ཅན་སྔོན་པོ་མི་བསྐྱོད་པའི་ཅོད་པན་ཅན།   སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།      ལྷག་མ་གཡས་གཉིས་རིན་པོ་ཆེ་དང་དབྱུག་པ།    གཡོན་གཉིས་པདྨ་དང་རལ་གྲི་འཛིན་པ།   ཧཱུཾ་པདྨ་ལས་སྤྲོས་ཏེ།    བདེན་བྲལ་གྱི་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད།  སྟོབས་པོ་ཆེ་སྔོན་པོ་མི་བསྐྱོད་པའི་ཅོད་པན་ཅན།  སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།   ལྷག་མ་གཡས་གཉིས་རིན་པོ་ཆེ་དང་རྩེ་གསུམ།     གཡོན་གཉིས་པདྨ་དང་
རལ་གྲི་འཛིན་པ།   ཧཱུཾ་པདྨ་ལས་སྤྲོས་ཏེ།       རླུང་མཚམས་ཀྱི་རྩིབས་ཀྱི་སྟེང་གི་གདན་ལ་
གཡོན་བརྐྱངས་ཀྱིས་འཁོད།  མི་གཡོ་བ་མཐིང་ག་མི་བསྐྱོད་པའི་ཅོད་པན་ཅན། མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།   ལྷག་མ་གཡསགཉིས་རིན་པོ་ཆེ་དང་རལ་གྲི།    གཡོན་གཉིས་པདྨ་དང་རྡོ་
རྗེ་འཛིན་པ།    ཧཱུཾ་པདྨ་ལས་སྤྲོས་ཏེ།      དབང་ལྡན་གྱི་རྩིབས་ཀྱི་སྟེང་གི་གདན་ལ་གཡོན་
བརྐྱངས་ཀྱིས་འཁོད།         གཙུག་ཏོར་འཁོར་ལོས་སྒྱུར་བ་ལྗང་སེར་མི་བསྐྱོད་པའི་ཅོད་
པན་ཅན།   ལྗང་སེར་དཀར་དང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་
རང་འདྲའི་ཡུམ་ལ་འཁྱུད་ཅིང་།   ལྷག་མ་གཡས་གཉིས་རིན་པོ་ཆེ་དང་འཁོར་ལོ།  གཡོན་
གཉིས་པདྨ་དང་རལ་གྲི་འཛིན་པ།     ཧཱུཾ་པདྨ་ལས་སྤྲོས་ཏེ།     གཙོ་བོའི་སྟེང་གི་ཅུང་ཟད་
ཙམ་གྱི་མདུན་གྱི་གདན་ལ་གཡོན་བརྐྱངས་ཀྱིས་འཁོད།          རྡོ་རྗེ་ས་འོག་མཐིང་ག་མི་
བསྐྱོད་པའི་ཅོད་པན་ཅན།       མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་
གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།  ལྷག་མ་གཡས་གཉིས་རིན་པོ་ཆེ་དང་རྡོ་རྗེ།  གཡོན་གཉིས་པདྨ་དང་རལ་གྲི་འཛིན་པ།   ཧཱུཾ་པདྨ་ལས་སྤྲོས་ཏེ།   གཙོ་བོའི་འོག་གི་ཅུང་ཟད་ཙམ་གྱི་རྒྱབ་ཀྱི་གདན་ལ་གཡོན་བརྐྱངས་ཀྱིས་འཁོད། བཅུ་གཅིག་པོ་ཐམས་ཅད་ཀྱང་མཆེ་བ་གཙིགས་ཤིང་ཞལ་སོ་སོ་ཡང་དམར་ལ་ཟླུམ་པའི་སྤྱན་གསུམ་པ།    དབུ་སྐྲ་དང་སྨ་ར་དམར་སེར་འབར་ཞིང་གྱེན་དུ་འཁྱིལ་བ།    འཁོར་ལོ་དང་རྣ་ཆ་ལ་སོགས་པས་བརྒྱན་ཅིང་སྣ་ཚོགས་པའི་སྦྲུལ་གྱི་རྒྱན་ཅན།   བདུད་དང་བགེགས་ཐམས་ཅད་རྩད་
ནས་འབྱིན་པའི་སྟོབས་དང་ལྡན་པ།  སྐུ་ལས་སྐྱེས་པའི་ཡེ་ཤེས་ཀྱི་མེ་དཔུང་རབ་ཏུ་འབར་
པའི་དབུས་ན་བཞུགས་ཤིང་འཇིགས་སུ་རུང་བའི་རྡོ་རྗེ་འབར་བ་སྤྲིན་ལྟར་འཁྲིགས་པ་་་་་
ཕྱོགས་བཅུར་འཕྲོས་པས་གདུག་པ་ཅན་ཐམས་ཅད་ཚར་གཅོད་པར་གྱུར།     རང་ཉིད་
གནོད་མཛེས་སུ་གནས་པ་ཡོངས་སུ་གྱུར་པ་ལས་རྡོ་རྗེ་སེམས་དཔའ་སྐུ་མདོག་དཀར་པོ་་་་
དཀར་མཐིང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།    ལྷག་མ་གཡས་གཉིས་རྡོ་རྗེ་དང་རལ་གྲི་གཡོན་གཉིས་རིན་པོ་ཆེ་དང་པདྨ་
འཛིན་པ་ཡོངས་སུ་གྱུར་པ་ལས།        ཆོས་འབྱུང་དཀར་བོ་གྲུ་གསུམ་པ་གྱེན་དུ་འགྲེང་བ་
འོག་ཏུ་ཕྲ་ཞིང་སྟོད་ཡངས་པ།    འོག་ཟུར་ནས་བཾ་ལས་བྱུང་བའི་སྣ་ཚོགས་པདྨའི་ལྟེ་བར་
ཧཱུཾ་ལས་སྣ་ཚོགས་རྡོ་རྗེ།  ཤར་གྱི་རྭ་དཀར།  ལྷོའི་རྭ་སེར།  ནུབ་ཀྱི་རྭ་དམར། བྱང་གི་རྭ་ལྗང་།  དབུས་ཀྱི་ལྟེ་བ་སྔོན་པོས་བརྒྱན་པ།   ལྟེ་བའི་དབུས་སུ་བྷྲཱུཾ་ལས་འཁོར་ལོ་
བྷྲཱུཾ་གྱིས་མཚན་པ་ལས་བྱུང་བའི་རྣམ་སྣང་དཀར་བོ།         དཀར་མཐིང་དམར་པའི་ཞལ་
གསུམ་ཕྱག་དྲུག་གི་དང་བོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་།   ལྷག་མ་གཡས་
གཉིས་རྡོ་རྗེ་ལ་གནས་པའི་འཁོར་ལོ་དང་རལ་གྲི    གཡོན་གཉིས་རིན་པོ་ཆེ་དང་པདྨ་
འཛིན་པ་ཡོངས་སུ་གྱུར་བ་ལས་གཞལ་ཡས་ཁང་གྲུ་བཞི་སྒོ་བཞི་བ།     ཕྱི་རོལ་ནས་རིམ་
པ་བཞིན་དཀར་སེར་དམར་ལྗང་སྔོ་བའི་རྩིག་པ་ལྔ་དང་ལྡན་པ་རྩིག་བའི་སྟེང་ན་རིན་པོ་ཆེ་སྣ་ཚོགས་པས་མཛེས་པར་བྱས་པའི་རིན་པོ་ཆེའི་ཕ་གུ་སེར་བོས་བསྐོར་བའི་གཞལ་ཡས་ཁང་གི་ཕྱེད་ཀྱི་ཚད་དུ་རྡོ་རྗེའི་ཕྲེང་བས་ཟླུམ་པོར་བསྐོར་བ་ལ་བརྟེན་པའི་ཀ་བ་བརྒྱད་་་་་
ཀྱིས་བཏེགས་པའི་རྡོ་རྗེའི་གདུང་བཞིས་མཛེས་པར་ཕུབ་པ།    རྩེ་མོ་རྡོ་རྗེ་ནོར་བུ་རིན་པོ་
ཆེའི་ཏོག་གིས་མཛེས་པའི་ནང་གི་ཤར་དཀར།  ལྷོ་སེར།  ནུབ་དམར།  བྱང་ལྗང་།  དབུས་སྔོ་བ།    ཕ་གུའི་སྟེང་ན་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་འཕྱང་བའི་རིན་པོ་ཆེའི་དྲ་བ་དང་།    དྲ་བ་ཕྱེད་པ་ལ་དྲིལ་བུ་དང་རྔ་ཡབ་ལ་སོགས་པས་བརྒྱན་པ།    དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ།     དེའི་སྟེང་དུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན་ལ་བ་དན་དང་རྒྱལ་མཚན་ལ་སོགས་པས་མཛེས་པར་བྱས་པ།     རྩིག་པའི་མཐའ་ནས་འདོད་ཡོན་གྱི་སྣམ་བུ་དམར་བོས་འགྲམ་སྟེགས་ཀྱི་རྣམ་པར་བསྐོར་བ་ལ་ལྷ་མོ་མཆོད་རྫས་ཐོགས་པ་རྣམས་འཁོད་ནས་མཆོད་པ་བྱེད་པ།   སྒོ་དང་སྒོ་ཁྱུད་ཀྱི་ཕྱིའི་མཚམས་དང་།   འོག་གི་ཕྱི་ནང་གི་གྲྭ་བཞིར་ཟླ་ཕྱེད་རྡོ་རྗེ་རིན་ཆེན་གྱིས་སྤྲས་པ།   སྒོ་བཞི་སོ་སོའི་མདུན་དུ་ཀ་བ་བཞི་བཞིས་བཏེགས་པའི་རྟ་བབས་སྣམ་བུ་བཅུ་གཅིག་དང་ལྡན་པའི་སྟེང་དུ་ཆོས་ཀྱི་འཁོར་ལོ།   དེའི་གཡས་གཡོན་དུ་རི་དྭགས་ཕོ་མོ་དང་བཅས་པ།      རྡོ་རྗེའི་རྭ་བ་མེ་རི་དང་བཅས་པའི་ཕྱི་རོལ་ཏུ།   གཏུམ་དྲག་ལ་སོགས་པའི་དུར་ཁྲོད་བརྒྱད་ན།    ནཱ་ག་གེ་སེར་གྱི་ཤིང་ལ་སོགས་པའི་ཤིང་བརྒྱད།    དེའི་རྩ་བར་བརྒྱ་བྱིན་ལ་སོགས་བའི་ཕྱོགས་སྐྱོང་བརྒྱད།   རྩེ་མོར་རྫུ་འཕྲུལ་ཆེན་པོ་གླང་བོ་ཆེའི་གདོང་བ་ཅན་ལ་སོགས་པའི་ཞིང་སྐྱོང་བརྒྱད། ཐུགས་རྗེའི་ཆུ་བརྒྱད།    དེ་ལ་གནས་པའི་ནོར་རྒྱས་ལ་སོགས་པའི་ཀླུ་བརྒྱད།      དེ་དག་གི་སྟེང་གི་ནམ་མཁའ་ལ་སྒྲོགས་པ་ལ་སོགས་པའི་སྤྲིན་བརྒྱད།  ཡེ་ཤེས་ཀྱི་མེ་བརྒྱད།  མཆོད་རྟེན་བརྒྱད།  གཞན་ཡང་ཀེང་རུས་དང་།    གསལ་ཤིང་གིས་ཕུགས་པའི་རོ་དང་།    ཤིང་ལ་དཔྱངས་པ་
དང་།    སྐྱེས་བུ་ཟ་བ་དང་།    མཚོན་གྱིས་ཕུགས་པ་ལ་སོགས་པ་དང་།     བྱ་རོག་དང་བྱ་
རྒོད་དང་ཁྱི་དང་ཅེ་སྤྱང་དང་།   སེང་གེ་དང་སྟག་ལ་སོགས་པ་དང་།    ཅ་ཅོ་སྒྲོགས་པའི་
རོ་ལངས་དང་།  གནོད་སྤྱིན་དང་སྲིན་པོ་ལ་སོགས་པ་རྣམས་ཀྱིས་འཇིགས་སུ་རུང་བ། གྲུབ་པ་དང་རིག་པ་འཛིན་པ་དང་དམ་ཚིག་སྤྱོད་པའི་རྣལ་འབྱོར་བ།  བཅོམ་ལྡན་འདས་
ལ་རྩེ་གཅིག་ཏུ་ལྟ་བ།   གཅེར་བུ་སྐྲ་བཤིག་པ།      ཕྱག་རྒྱ་ལྔས་བརྒྱན་པ།  ཅང་ཏེའུ་དང་
ཐོད་པ་དང་ཁ་ཌྭཱཾ་ཀ་འཛིན་པ།      ཐོད་པས་སྤྱི་བོར་བརྒྱན་པ།      རྒོད་ཅིང་དུར་ཁྲོད་དུ་
འཇུག་པ་སོགས་ཀྱིས་ཤིན་ཏུ་ངོ་མཚར་བར་བྱེད་བའི་དུར་ཁྲོད་རྣམས་ཀྱིས་བསྐོར་བའི་་་་་

གཞལ་ཡས་ཁང་གི་དབུས་སུ་ཡཾ་ལས་རླུང་གི་དཀྱིལ་འཁོར་ནག་ལ་ཅུང་ཟད་དམར་བའི་་་
མདོག་ཅན་གྱི་སྟེང་དུ།      ཨ་ཡིག་དང་པོ་ལས་བྱུང་བའི་ཟླ་བའི་དཀྱིལ་འཁོར།       དེའི་
དབུས་སུ་ཆུ་ལས་ཆུ་བུར་གྱི་ཚུལ་དུ་དྷཱིཿསེར་བོ་ལས་བྱུང་བའི་རལ་གྲི་དབུས་སུ་དྷཱིཿས་མཚན་པ།     དེ་ལས་འོད་འཕྲོས་བདེ་བར་གཤེགས་པ་ཐམས་ཅད་སྦྱན་དྲངས་ཏེ་ཐིམ་པ་ཡོངས་སུ་གྱུར་བ་ལས།    རང་ཉིད་རྒྱུ་རྡོ་རྗེ་འཛིན་པ་འཇམ་དཔལ་གཞོན་ནུར་གྱུར་བ་སྐུ་མདོག་སེར་བོ་ཡིད་ཙམ་ཁྲོས་པ་ཕྱག་གཡས་རལ་གྲི་འཕྱར་ཞིང་།   གཡོན་གྱིས་གླེགས་བམ་ཐུགས་ཀར་བསྣམས་པ།     ཞབས་རྡོ་རྗེའི་སྐྱིལ་ཀྲུང་གིས་བཞུགས་པ་མཚན་སོ་གཉིས་དང་དཔེ་བྱད་བརྒྱད་ཅུས་བརྒྱན་པ།      རལ་བའི་ཟུར་ཕུད་ལྔ་དང་ལྡན་ཞིང་རྒྱན་ཐམས་ཅད་ཀྱིས་བརྒྱན་པ། དེའི་ཐུགས་ཀར་ཨཱཿལས་བྱུང་བའི་ཉི་མའི་དཀྱིལ་འཁོར།  དེའི་འོད་ཀྱིས་ཕྱོགས་བཅུ་ན་བཞུགས་པའི་རྣམ་སྣང་ལ་སོགས་པའི་སངས་རྒྱས་དང་།    རྡོ་རྗེ་རྣོན་པོ་ལ་སོགས་པའི་བྱང་ཆུབ་སེམས་དཔའ་དང་།   རྡོ་རྗེ་ལྕགས་ཀྱུ་ལ་སོགས་པའི་ཁྲོ་བོ་དང་། སེམས་མ་རྡོ་རྗེ་མ་ལ་སོགས་པའི་རིག་པ་རྣམས་སྤྱན་དྲངས་ཏེ།   འཇམ་དཔལ་དང་བཅས་པ་ཉི་མ་ལ་ཞུགས་པ་ལས་འོད་ཟེར་གྱིས་དཔག་ཚད་སྟོང་ཕྲག་བརྒྱར་ཁྱབ་པའི་ཉི་་་མའི་དཀྱིལ་འཁོར་དུ་གྱུར།   དེའི་སྟེང་དུ་ཧཱུཾ་ཡིག་མཐིང་ག་འོད་ཟེར་ལྔ་དང་ལྡན་པ་ལས་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ཚོགས་རྣམས་སྤྱན་དྲངས་ཧཱུཾ་ལ་ཞུགས་པ་ལས་ཁྲོ་བོའི་རྡོ་རྗེ་ཁ་དོག་ནག་པོ་རྩེ་དགུ་པ།  རྭ་ཤིན་ཏུ་གདེངས་པ་འོད་ཟེར་ལྔ་དང་ལྡན་པ།    ལྟེ་བ་ལ་ཧཱུཾ་ཡིག་གིས་མཚན་པ།   དེ་ལས་རྡོ་རྗེ་ཕྲ་མོའི་གཟུགས་སྤྲོས་པས་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ཚོགས་རྣམས་སྤྲོས་ཏེ།   ནམ་མཁའི་ཁམས་ཐམས་ཅད་ཏིལ་གྱི་གང་བུ་བཞིན་དུ་གང་བ།     ཉི་མ་ལ་གནས་པས་སེམས་ཅན་རྣམས་སྨིན་པར་བྱས་ནས་རྡོ་རྗེ་འཇིགས་བྱེད་ཐོབ་པར་བྱས་པ་དང་ལྷ་གཅིག་ཏུ་འདུས་ཏེ་རྡོ་རྗེ་ལ་ཐིམ་པར་གྱུར།      

ཟླ་བ་ཉི་མ་རྡོ་རྗེ་ཧཱུཾ་དང་བཅས་པ་ཡོངས་སུ་གྱུར་པ་ལས་སྣ་ཚོགས་པདྨ་དང་ཟླ་བ་དང་ཉི་མའི་གདན་གྱི་སྟེང་དུ་རང་ཉིད་འབྲས་བུ་རྡོ་རྗེ་འཛིན་པ་དཔལ་རྡོ་རྗེ་འཇིགས་བྱེད་ཆེན་པོ།   སྐུ་མདོག་མཐིང་ནག་ཞལ་དགུ་ཕྱག་སོ་བཞི་ཞབས་བཅུ་དྲུག་པ་གཡས་བསྐུམས་ཤིང་གཡོན་བརྐྱངསབའི་སྟབས་གྱིས་བཞུགས་པ།         ཁམས་གསུམ་པོ་ཟ་བར་ནུས་པ་ཧ་ཧ་ཞེས་སྒྲོགས་ཤིང་ལྗགས་འདྲིལ་བ།   མཆེ་བ་རྣམ་པར་གཙིགས་པ་ཁྲོ་གཉེར་ཅན།     ཁྲོ་གཉེར་གྱི་འགྲམ་དུ་སྨིན་མ་དང་སྤྱན་འཇིག་པའི་དུས་ལྟར་འབར་བ།    སྐྲ་ཁམ་སེར་གྱེན་དུ་བརྫེས་པ། འཇིག་རྟེན་དང་འཇིག་རྟེན་ལས་འདས་པའི་ལྷ་ལ་སྡིགས་མཛུབ་བྱེད་པ། འཇིགས་པ་རྣམས་ཀྱང་འཇིགས་པར་མཛད་པ།      ཕེེཾ་ཀ་རའི་སྒྲ་ཆེན་པོ་འབྲུག་ལྟར་སྒྲོགས་པ།   མིའི་ཁྲག་དང་ཞག་དང་རྐང་དང་ཚིལ་བུ་ཟ་བ་འཇིགས་སུ་རུང་བའི་ཐོད་པ་སྐམ་པོ་ལྔས་ཐོད་བྱས་ཤིང་མགོ་བོ་རློན་པ་ལྔ་བཅུའི་ཐོད་པའི་ཕྲེང་བས་བརྒྱན་པ།    སྦྲུལ་ནག་པོའི་མཆོད་ཕྱིར་ཐོགས་དང་མི་རུས་ཀྱི་འཁོར་ལོ་དང་རྣ་ཆ་ལ་སོགས་པའི་རུས་པའི་རྒྱན་རྣམས་ཀྱིས་་་བརྒྱན་པ་གསུས་པ་ཆེ་བ་གཅེར་བུའི་གཟུགས་ཅན་མཚན་མ་གྱེན་དུ་འགྲེང་བ།     སྨིན་མ་དང་རྫི་མ་དང་སྨ་ར་དང་བ་སྤུ་རྣམས་དུས་མཐའི་མེ་ལྟར་འབར་ཞིང་།     རྩ་ཞལ་ནག་པོ་མ་ཧེའི་གདོང་ཅན།    ཤིན་ཏུ་ཁྲོས་པ་རྭ་རྣོན་པོ་ཅན།     དེའི་སྟེང་མ་རྭ་གཉིས་ཀྱི་དབུས་ཀྱི་ཞལ་དམར་པོ་རབ་ཏུ་འཇིགས་པ་ཞལ་ནས་ཁྲག་འཛག་པ།  དེའི་སྟེང་དུ་འཇམ་དཔལ་གྱི་ཞལ་སེར་པོ་ཡིད་ཙམ་ཁྲོས་པ།   གཞོན་ནུའི་རྒྱན་གྱིས་བརྒྱན་པ།      སྤྱི་བོར་རལ་བ་ལྔ་དང་ལྡན་པ།    རྭའི་རྩ་བའི་གཡས་ཀྱི་ཞལ་དང་པོ་སྔོན་པོ།      དེའི་གཡས་ཞལ་དམར་པོ་གཡོན་ཞལ་སེར་པོ།    རྭའི་རྩ་བའི་གཡོན་གྱི་ཞལ་དང་པོ་དཀར་བོ།       དེའི་གཡས་ཞལ་དུད་ཁ།   གཡོན་ཞལ་ནག་པོ།  ཞལ་རྣམས་ཤིན་ཏུ་ཁྲོས་པ།  ཞལ་དགུ་བོ་ཐམས་ཅད་ཀྱང་སྤྱན་གསུམ་གསུམ་དང་ལྡན་པ།      ཕྱག་གཡས་གཡོན་གྱི་དང་པོ་གཉིས་ཀྱིས་གླང་པོ་ཆེའི་པགས་པ་རློན་པ་མགོ་གཡས་དང་སྤུ་ཕྱིར་བསྟན་ཏེ་ལག་པ་དང་རྐང་བའི་པགས་པ་གཡོནཔ་ནས་བརྐྱངས་ཏེ་འཛིན་པ།    ལྷག་མ་གཡས་ཀྱི་དང་པོ་ན་གྲི་གུག    གཉིས་པ་ན་བྷི་དྷི་པཱ་ལ།  གསུམ་པ་ན་གཏུན་ཤིང་།  བཞི་བ་ན་ཆུ་གྲི།  ལྔ་བ་ན་ཀ་ཎ་ཡ།  དྲུག་པ་ན་དགྲ་སྟ།  བདུན་པ་ན་མདུང་།  བརྒྱད་པ་ན་མདའ།  དགུ་བ་ན་ལྩགས་ཀྱུ། བཅུ་བ་ན་དབྱུག་ཏོ།  བཅུ་གཅིག་པ་ན་ཁ་ཊྭཱཾ་ཀ  བཅུ་གཉིས་པ་ན་འཁོར་ལོ། བཅུ་གསུམ་པ་ན་རྡོ་རྗེ་རྩེ་ལྔ་པ།  བཅུ་བཞི་པ་ན་རྡོ་རྗེའི་ཐོ་བ།    བཅོ་ལྔ་བ་ན་རལ་གྲི།   བཅུ་དྲུག་པ་ན་ཅང་ཏེའུ་བསྣམས་ཤིང་།     ལྷག་མ་གཡོན་གྱི་དང་པོ་ན་ཁྲག་གིས་བཀང་བའི་ཐོད་པ།    གཉིས་པ་ན་ཚངས་པའི་མགོ་བོ།  གསུམ་པ་ན་ཕུབ།  བཞི་བ་ན་རྐང་བ།  ལྔ་བ་ན་ཞགས་པ།  དྲུག་པ་ན་གཞུ། བདུན་པ་ན་རྒྱུ་མ།  བརྒྱད་པ་ན་དྲིལ་བུ།  དགུ་པ་ན་ལག་པ།    བཅུ་བ་ན་དུར་ཁྲོད་ཀྱི་རས།    བཅུ་གཅིག་པ་ན་སྐྱེས་བུ་གསལ་ཤིང་ལ་བཙུགས་པ།      བཅུ་གཉིས་པ་ན་མེ་ཐབ།   བཅུ་གསུམ་པ་ན་ཐོད་ཚལ།  བཅུ་བཞི་བ་ན་སྡིགས་མཛུབ།  བཅོ་ལྔ་བ་ན་འཕན་རྩེ་གསུམ་པ།  བཅུ་དྲུག་པ་ན་རླུང་རས་བསྣམས་པ།  ཞབས་གཡས་ཀྱི་དང་པོས་མི།  གཉིས་པས་མ་ཧེ།  གསུམ་པས་གླང་།  བཞི་བས་བོང་བུ།  ལྔ་བས་རྔ་མོང་། དྲུག་པས་ཁྱི།  བདུན་པས་ལུག  བརྒྱད་པས་ཝ་དང་།  གཡོན་གྱི་དང་པོས་བྱ་རྒོད།  གཉིས་པས་འུག་པ།  གསུམ་པས་བྱ་རོག  བཞི་བས་ནེ་ཙོ།  ལྔ་བས་ཁྲ། དྲུག་པས་བྱ་ཆེན་པོ།  བདུན་པས་ཁྱིམ་བྱ།  བརྒྱད་པས་བཞད་མནན་པ།  ཚངས་པ་དང་དབང་པོ་དང་ཁྱབ་འཇུག་དང་དྲག་པོ་དང་།  གཞོན་ནུ་གདོང་དྲུག་དང་ལོག་འདྲེན་དང་ཟླ་བ་དང་ཉི་མ་རྣམས་ཁ་སྦུབ་ཏུ་བྱས་ཏེ།   ཞབས་འོག་ཏུ་མནན་ནས་མེ་དཔུང་རབ་ཏུ་འབར་བའི་ཀློང་དཀྱིལ་ན་བཞུགས་པ།    དེའི་མིག་གཉིས་སུ་ས་སྙིང་གི་རང་བཞིན་ཀྵིཾ་དཀར་བོ།       རྣ་བར་ཕྱག་རྡོར་གྱི་རང་བཞིན་ཛྲིཾ་ནག་པོ།   སྣར་ནམ་སྙིང་གི་རང་བཞིན་ཁཾ་སེར་བོ།   ལྕེར་སྤྱན་རས་གཟིགས་ཀྱི་རང་བཞིན་རཾ་དམར་པོ།   དཔྲལ་བར་སྒྲིབ་སེལ་གྱི་རང་བཞིན་ཀཾ་ལྗང་གུ།  ལྟེ་བར་ཀུན་བཟང་གི་རང་བཞིན་སཾ་དཀར་བོ།    སྤྱི་བོར་སྐུ་རྡོ་རྗེའི་རང་བཞིན་ཨོཾ་དཀར་བོ།    མགྲིན་པར་གསུང་རྡོ་རྗེའི་རང་བཞིན་ཨཱཿདམར་བོ།    ཐུགས་ཀར་ཐུགས་རྡོ་རྗེའི་རང་བཞིན་ཧཱུཾ་སྔོན་པོ།  པར་གྱུར།            

རང་ཉིད་དམ་ཚིག་སེམས་དཔའི་ཐུགས་ཀར་ཟླ་གདན་ལ་ཡེ་ཤེས་སེམས་དཔའ་འཇམ་དཔལ་གཞོན་ནུར་གྱུར་པ་སྐུ་མདོག་སེར་བོ་ཡིད་ཙམ་ཁྲོས་པ།  ཕྱག་གཡས་རལ་གྲི་འཕྱར་ཞིང་།  གཡོན་གྱིས་གླེགས་བམ་ཐུགས་ཀར་བསྣམས་པ།  ཞབས་རྡོ་རྗེའི་སྐྱིལ་ཀྲུང་གིས་བཞུགས་པ།   མཚན་སོ་གཉིས་དང་དཔེ་བྱད་བརྒྱད་ཅུས་བརྒྱན་པ།  རལ་བའི་ཟུར་ཕུད་ལྔ་དང་ལྡན་ཞིང་རྒྱན་ཐམས་ཅད་ཀྱིས་བརྒྱན་པ།  

དེའི་ཐུགས་ཀར་ཨཱཿལས་བྱུང་བའི་ཉི་མའི་དཀྱིལ་འཁོར་གྱི་དབུས་སུ་ཏིང་ངེ་འཛིན་སེམས་དཔའ་ཧཱུཾ་ཡིག་མཐིང་ག་འོདཟེར་ལྔ་འཕྲོ་བ།      ཨོཾ་ཧྲཱིཿཧ་བྷོ་མ་ཧཱ་ཀྲོ་དྷ་ཨཱ་ག་ཙྪ་ཨཱ་ག་ཙྪ་ཨ་སྨཱ་ད་བཱུ་ཛ་པྲ་ཏི་གྲྀ་ཧཱ་ནྟུ་བྲ་སཱ་ད་མེ་དྷི་མཱན་ཀུ་རུ་སྭཱ་ཧཱ།         རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས།   རང་བཞིན་གྱི་གནས་ནས་བསྒོམས་པ་དང་འདྲ་བའི་དཔལ་རྡོ་རྗེ་འཇིགས་བྱེད་དཔའ་བོ་གཅིག་པའི་རྟེན་དང་བརྟེན་པའི་དཀྱིལ་འཁོར་མདུན་གྱི་ནམ་མཁར་སྤྱན་དྲངས་ 
ཨོཾ་ཧྲཱིཿཥྚི་ཝི་ཀྲི་ཏཱ་ན་ན་ཧཱུཾ་ཕཊ།    ཨོཾ་ཧྲཱིཿཥྚཱིཿཧ།    ཨོཾ་ཧཱུཾ་ཧཱུཾ་ཕཊ།     ཨོཾ་ཝི་ཀྲི་ཏཱ་ན་ན་དུཥྚཾ་
སཏྭ་ད་མ་ཀ་གཿགཿ    ཨོཾ་ཀུ་མ་རཱ་རཱུ་པི་ཎེ་ཛཿཛཿཧཱུཾ་ཕཊ། ཨོཾ་ཧྲཱིཿཧཿཧེ་ཕཊ།    ཨོཾ་དཱིཔྡ་ལོ་
ཙ་ནི་ཝི་ཀྲི་ཏཱ་ན་ན་མ་ཧཱ་ཨ་ཊྚ་ཊྚ་ཧ་ས་ན་དི་པྟ་ཡེ་སྭཱ་ཧཱ།       ཨོཾ་བཛྲ་ནེ་ཝི་དྱ་ཨཱཿཧཱུཾ་སྭཱཧཱ། 
ཨོཾ་བཛྲ་ཤཔྟ་ཨཱ་ཧཱུཾ། ཞེས་སོགས་ཀྱིས་མཆོད། 

ཨོཾ་མུདྒ་རཱ་ཛཿ  ཨོཾ་དནྚ་ཧཱུཾ།  ཨོཾ་པདྨ་བཾ།  ཨོཾཁཌྒ་ཧོཿ   ཨོཾ་ཧྲཱིཿཧ་བྷོ་མ་ཧཱ་ཀྲོ་དྷ་ཨཱ་ག་ཙྪ་ཨཱ་ག་ཙྪ་ཨ་སྨཱ་ད་བཱུ་ཛ་པྲ་ཏི་གྲྀ་ཧཱ་ནྟུ་བྲ་སཱ་ད་མེ་དྷི་མཱན་ཀུ
རུ་སྭཱ་ཧཱ།    

སླར་ཡང་རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས།  ཕྱོགས་བཅུ་ན་བཞུགས་
པའི་སངས་རྒྱས་སྲས་དང་བཅས་པ་མདུན་གྱི་ནམ་མཁར་སྤྱན་དྲངས། ཨོཾ་ཧྲཱིཿཥྚཱིཿཧ།  ཨོཾ་ཧཱུཾ་
ཧཱུཾ་ཕཊ།     ཨོཾ་ཝི་ཀྲི་ཏཱ་ན་ན་དུཥྚཾ་སཏྭ་ད་མ་ཀ་གཿགཿ   ཨོཾ་ཀུ་མ་རཱ་རཱུ་པི་ཎེ་ཛཿཛཿཧཱུཾ་ཕཊ།
ཨོཾ་ཧྲཱིཿཧཿཧེ་ཕཊ།       ཨོཾ་དཱིཔྡ་ལོ་ཙ་ནི་ཝི་ཀྲི་ཏཱ་ན་ན་མ་ཧཱ་ཨ་ཊྚ་ཊྚ་ཧ་ས་ན་དི་པྟ་ཡེ་སྭཱ་ཧཱ།        ཨོཾ་བཛྲ་ནེ་ཝི་དྱ་ཨཱཿཧཱུཾ་སྭཱཧཱ།      ཨོཾ་བཛྲ་ཤཔྟ་ཨཱ་ཧཱུཾ།       

དེ་བཞིན་གཤེགས་པ་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ།   ཞེས་གསོལ་པ་བཏབ་པས།  དེ་རྣམས་ཀྱིས་སྤྲོས་པའི་ལྷ་མོ་ཙ་རྩི་ཀ་ལ་སོགས་པ་རྣམས་ཀྱིས་ཤིས་པ་བརྗོད་པ་སྔོན་དུ་འགྲོ་བས།  ཟླ་བ་ལྟ་བུའི་བུམ་པ་དཀར་བོ་བདུད་རྩི་ལྔས་བཀང་བ་བཟུང་ནས།         སངས་རྒྱས་རྣམས་ནི་ཐམས་ཅད་ཀྱིས།  །སྐྱེ་བས་ཐོབ་པའི་དབང་བསྐུར་པ།  །ཇི་ལྟར་དེ་བཞིན་བདག་གིས་ནི།    དག་པ་ལྷ་ཡི་ཆུས་དབང་བསྐུར     །ཞེས་གསུང་ཞིང་སྤྱི་བོ་ནས་དབང་བསྐུར་བས།  དབང་གི་ཆུས་ལུས་ཐམས་ཅད་གང་།   དྲི་མ་ཐམས་ཅད་དག    ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་བ་ལས།       གཙོ་བོའི་རྩ་ཞལ་གྱི་དབུ་ལ་མི་བསྐྱོད་པས་དབུ་བརྒྱན་ཅིང་དབང་གི་ལྷ་རྣམས་རང་ཉིད་ལ་ཐིམ་པར་གྱུར།    
མཆོད་པ་འབུལ་བ་ནི།     ཨོཾ་ཡ་མཱནྟ་ཀ་ཨརྒྷཾ་པྲ་
ཏཱི་ཙྪ་ཧཱུཾ་སྭཱཧཱ།  ཨོཾ་ཡ་མཱནྟ་ཀ་པཱདྱཾ་པྲ་ཏཱི་ཙྪ་ཧཱུཾ་སྭཱཧཱ།   ཨོཾ་ཡ་མཱནྟ་ཀ་གནྡྷེ་པྲ་ཏཱི་ཙྪ་ཧཱུཾ་སྭཱཧཱ།   ཨོཾ་ཡ་མཱནྟ་ཀ་པུཥྤེ་པྲ་ཏཱི་ཙྪ་ཧཱུཾ་སྭཱཧཱ།    ཨོཾ་ཡ་མཱནྟ་ཀ་དྷཱུ་བེ་པྲ་ཏཱི་ཙྪ་ཧཱུཾ་སྭཱཧཱ།       ཨོཾ་ཡ་མཱནྟ་ཨ་ལོ་ཀེ་པྲ་ཏཱི་ཙྪ་ཧཱུཾ་སྭཱཧཱ།    ཨོཾ་ཡ་མཱནྟ་ཀ་ནེ་ཝི་དྱཱ་པྲ་ཏཱི་ཙྪ་ཧཱུཾ་སྭཱཧཱ།    ཨོཾ་ཡ་མཱནྟ་ཀ་ཤཔྟ་ པྲ་ཏཱི་ཙྪ་ཧཱུཾ་སྭཱཧཱ།  

ནང་མཆོད་ནི།   ཨོཾ་མཆོད་དོ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོ་ཆོས་ཀྱི་ཕུང་བོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་འཕགས་པའི་དགེ་འདུན་ཐམས་ཅད་ཀྱི་མངའ་བདག་དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ཨོཾ་་་་ཨཱཿཧཱུཾ།  བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་བོའི་ཞལ་དུ་ཨོཾ་ཨཱཿཧཱུཾ།  ཡེ་ཤེས་ཀྱི་མཁའ་འགྲོ་མའི་ཞལ་དུ་ཨོཾ་ཨཱཿཧཱུཾ། ལཱ་ལི་ཏ་བཛྲའི་ཞལ་དུ་ཨོཾ་ཨཱཿཧཱུཾ། ཨ་མོ་གྷ་བཛྲའི་ ཞལ་དུ་ཨོཾ་ཨཱཿཧཱུཾ།     ཡེ་ཤེས་འབྱུང་གནས་སྦས་པའི་ཞལ་དུ་ཨོཾ་ཨཱཿཧཱུཾ།    པདྨ་བཛྲའི་ཞལ་དུ་ཨོཾ་ཨཱཿཧཱུཾ། དི་བཾ་ཀ་ར་རཀྵི་ཏའི་ཞལ་དུ་ཨོཾ་ཨཱཿཧཱུཾ། རྭ་ལོ་ཙཱ་བ་རྡོ་རྗེ་གྲགས་ཀྱི་ ཞལ་དུ་ཨོཾ་ཨཱཿཧཱུཾ། རྭ་ཆོས་རབ་ཀྱི་ཞལ་དུ་ཨོཾ་ཨཱཿཧཱུཾ། རྭ་ཡེ་ཤེས་སེང་གེའི་ཞལ་དུ་ཨོཾ་ཨཱཿཧཱུཾ། རྭ་འབུམ་སེང་གེ་ཞལ་དུ་ཨོཾ་ཨཱཿཧཱུཾ།  རྗེ་བཙུན་རྒྭ་ལོའི་ཞལ་དུ་ཨོཾ་ཨཱཿཧཱུཾ།   རོང་བ་ཤེས་རབ་སེང་གེའི་ཞལ་དུ་ཨོཾ་ཨཱཿཧཱུཾ།  བླ་མ་ཡེ་ཤེས་དཔལ་བའི་ཞལ་དུ་ཨོཾ་ཨཱཿཧཱུཾ།་ ཆོས་རྗེ་དོན་གྲུབ་རིན་ཆེན་གྱི་ཞལ་དུ་ཨོཾ་ཨཱཿཧཱུཾ།      ཆོས་ཀྱི་རྒྱལ་བོ་ཙོང་ཁ་པ་ཆེན་པོའི་ཞལ་དུ་ཨོཾ་ཨཱཿཧཱུཾ། མཁས་གྲུབ་བསྟན་པའི་ཉི་མ་དགེ་ལེགས་དཔལ་བཟང་པོའི་ཞལ་དུ་ཨོཾ་ཨཱཿཧཱུཾ།    རྗེ་བཙུན་ཤེས་རབ་སེངྒེའི་ཞལ་དུ་ཨོཾ་ཨཱཿཧཱུཾ།  འདུལ་འཛིན་དཔལ་ལྡན་བཟང་པོའི་ཞལ་དུ་ཨོཾ་ཨཱཿཧཱུཾ།འཇམ་དབྱངས་དགེ་འདུན་འཕེལ་བའི་ཞལ་དུ་ཨོཾ་ཨཱཿཧཱུཾ།      རྒྱུད་ཆེན་བཀྲ་ཤིས་འཕགས་པའི་ཞལ་དུ་ཨོཾ་ཨཱཿཧཱུཾ།       རྒྱུད་ཆེན་བསམ་གྲུབ་རྒྱ་མཚོའི་ཞལ་དུ་ཨོཾ་ཨཱཿཧཱུཾ།     རྒྱུད་ཆེན་བརྩོན་འགྲུས་འཕགས་པའི་ཞལ་དུ་ཨོཾ་ཨཱཿཧཱུཾ།        རྒྱུད་ཆེན་རྡོ་རྗེ་བཟང་པོའི་ཞལ་དུ་ཨོཾ་ཨཱཿཧཱུཾ།    རྒྱུད་ཆེན་སངས་རྒྱས་རྒྱ་མཚོའི་ཞལ་དུ་ཨོཾ་ཨཱཿཧཱུཾ།    པན་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་གྱི་ཞལ་དུ་ཨོཾ་ཨཱཿཧཱུཾ།     རྡོ་རྗེ་འཛིན་པ་དཀོན་མཆོག་རྒྱལ་མཚན་གྱི་ཞལ་དུ་ཨོཾ་ཨཱཿཧཱུཾ།    པན་ཆེན་བློ་བཟང་ཡེ་ཤེས་ཀྱི་ཞལ་དུ་ཨོཾ་ཨཱཿཧཱུཾ།    རྒྱལ་བའི་དབང་པོ་བློ་བཟང་བསྐལ་བཟང་རྒྱ་མཚོའི་ཞལ་དུ་ཨོཾ་ཨཱཿཧཱུཾ།    གྲུབ་པའི་དབང་ཕྱུག་རོལ་བའི་རྡོ་རྗེའི་ཞལ་དུ་ཨོཾ་ཨཱཿཧཱུཾ།    ཁྲི་ཆེན་ངག་དབང་ཚུལ་ཁྲིམས་ཀྱི་ཞལ་དུ་ཨོཾ་ཨཱཿཧཱུཾ།   ཁྲི་ཆེན་བྱང་ཆུབ་ཆོས་འཕེལ་གྱི་ཞལ་དུ་ཨོཾ་ཨཱཿཧཱུཾ།     བྲག་རི་བློ་བཟང་ཆོས་འབྱོར་རྒྱ་མཚོའི་ཞལ་དུ་ཨོཾ་ཨཱཿཧཱུཾ།    ཡོངས་འཛིན་གླིང་སྤྲུལ་བློ་བཟང་ལུང་རྟོགས་བསྟན་འཛིན་འཕྲིན་ལས་ཀྱི་ཞལ་དུ་ཨོཾ་ཨཱཿཧཱུཾ།       མཁན་ཆེན་མཁྱེན་རབ་བསྟན་པ་ཆོས་འཕེལ་དཔལ་བཟང་པོའི་ཞལ་དུ་ཨོཾ་ཨཱཿཧཱུཾ།          དྲིན་ཆེན་རྩ་བའི་བླ་མ་རྡོ་རྗེ་འཆང་བདེ་ཆེན་སྙིང་པོ་དཔལ་བཟང་པོའི་ཞལ་དུ་ཨོཾ་ཨཱཿཧཱུཾ།       གཞན་ཡང་དབང་བསྐུར་རྒྱུད་བཤད་མན་ངག་གནང་བའི་བླ་མ་དམ་པ་བརྒྱུད་པ་དང་བཅས་བ་རྣམས་ཀྱི་ཞལ་དུ་ཨོཾ་ཨཱཿཧཱུཾ།        ཨོཾ་ཡ་མཱནྟ་ཀ་ཧཱུཾ་ཕཊ།      ཨོཾ་ཨཱཿཧཱུཾ།              གཞན་ཡང་རྒྱུད་སྡེ་ཆེན་བོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུཾ།        ཆོས་ཀྱི་རྒྱལ་བོ་འཁོར་དང་བཅས་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ།   གཞན་ཡང་སྔོན་སངས་རྒྱས་མཐོང་བ།   དམ་པའི་ཆོས་ཐོས་པ།    འཕགས་པའི་དགེ་འདུན་ལ་བརྟེན་པ།      བསྟན་པ་དང་འཁོར་རྣམ་བཞི་སྐྱོང་བར་ཞལ་གྱིས་བཞེས་པ།      བླ་མ་གོང་མ་རྣམས་ཀྱིས་བསྟེན་ཅིང་བསྒྲུབས་པའི་སྲུང་མ་དམ་ཚིག་ཅན་རྣམས་ཀྱི་ཞལ་དུ་ཨོཾ་ཨཱཿཧཱུཾ།    ཡུལ་ཉི་ཤུ་རྩ་བཞི།    གནས་སུམ་ཅུ་རྩ་གཉིས།  དུར་ཁྲོད་ཆེན་པོ་བརྒྱད་ན་གནས་པའི་དཔའ་བོ་དང་།  རྣལ་འབྱོར་མ་དང་།  ཕྱོགས་སྐྱོང་དང་།    ཞིང་སྐྱོང་དང་།       ཀླུ་ལ་སོགས་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ།  གཞི་བདག་གཉུག་མར་གནས་པ་དང་སེམས་ཅན་ཐམས་ཅད་ལྷར་གྱུར་བ་རྣམས་ཀྱི་ཞལ་དུ་ཨོཾ་ཨཱཿཧཱུཾ།      ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ཏེ་རང་གི་ལུས་ལ་ཞུགས་པར་གྱུར།     ཨོཾ་ཧྲཱི་ཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།   ཨོཾ་ཨཱཿཧཱུཾ།      ཨོཾ་ཨ་མྲྀ་ཏ་སྭཱ་ད་ན་བཛྲ་སྭ་བྷཱ་ཝ་ཨཱཏྨ་ཀོཉ་ཧཾ།མགྲོན་ཐམས་ཅད་ཡེ་ཤེས་ཀྱི་བདུད་རྩིས་མཉེས་ཤིང་ཚིམ་པར་གྱུར། 

བསྟོད་པ་ནི།    
ཧཱུཾ།      གཉིས་མེད་ཐུན་མོང་མ་ཡིན་ཁྱབ་པའི་སྐུ།   །ཀུན་ལ་སྙོམས་མཛད་རྒྱལ་བ་ཀུན་གྱི་
ཡབ།   །ཆོས་ཀྱི་དབྱིངས་གྱུར་རྒྱལ་བ་ཀུན་གྱི་ཡུམ།   །ཡེ་ཤེས་སེམས་དཔའ་རྒྱལ་བ་ཀུན་གྱི་
སྲས།     །ཕྱག་འཚལ་འཇམ་དཔལ་དཔལ་གྱུར་རྫོགས་པ་ཁྱོད།  །ཆོས་ཀྱི་སྐུ་ལ་བྱམས་སྡང་
མི་མངའ་ཡང་།  །སྲིད་གསུམ་གདུག་བ་མ་ལུས་འདུལ་བའི་ཕྱིར།   །ཐུགས་རྗེ་ཐབས་ཀྱིས་
ཁྲོ་རྒྱལ་སྐུར་སྟོན་པ།  །འཇིགས་བྱེད་གཤིན་རྗེའི་གཤེད་ལ་ཕྱག་འཚལ་ལོ།        

དེ་ལྟར་ཞལ་དགུ་ནི་གསུང་རབ་ཡན་ལག་དགུ།     རྭ་གཉིས་ནི་བདེན་པ་གཉིས།   ཕྱག་སོ་བཞི་དང་སྐུ་གསུང་ཐུགས་ཏེ་སོ་བདུན་ནི་བྱང་ཕྱོགས་སོ་བདུན།     ཞབས་བཅུ་དྲུག་
ནི་སྟོང་ཉིད་བཅུ་དྲུག    མཚན་མ་གྱེན་དུ་འགྲེང་བ་ནི་བདེ་བ་ཆེན་བོ་རྒྱས་པ།      མི་ལ་
སོགས་པ་ནི་དངོས་གྲུབ་བརྒྱད་དང་།    བྱ་རྒོད་ལ་སོགས་པ་ནི་དབང་ཕྱུག་བརྒྱད་དག་པ་
ཡིན་ལ།   གཅེར་བུ་ནི་སྒྲིབ་གཡོགས་མེད་པ་དང་།     སྐྲ་གྱེན་དུ་བརྫེས་བ་ནི་མྱ་ངན་ལས་
འདས་བའི་གོ་འཕང་སྟོན་པའོ།        །དེ་དག་གི་དོན་མདོར་བསྡུ་ན།     གཏན་ལ་དབབ་
པའི་གཞི་གསུང་རབ་ཡན་ལག་དགུའི་བརྗོད་བྱ་ཀུན་རྫོབ་སྒྱུ་མ་དང་དོན་དམ་ནམ་མཁའ
ལྟ་བུ་ཁོང་དུ་ཆུད་པའི་ལམ་བྱང་ཕྱོགས་སོ་བདུན་ཡིན་ལ།      ལམ་དེའི་གཙོ་བོ་དོན་དམ་
རྟོགས་པ་ལ་ནི་སྟོང་ཉིད་བཅུ་དྲུག་གི་རྟོགས་པ་ཡོད་དེ།     དེ་ཡང་ཐབས་བདེ་བ་ཆེན་པོ་
དང་དབྱེར་མེད་པར་ཞུགས་པའོ།   །ལམ་དེས་བགྲོད་པའི་འབྲས་བུ་དངོས་གྲུབ་ཐུན་མོང་
བ་དང་།      ཐུན་མོང་མ་ཡིན་པ་གཉིས་ཀྱི་གཙོ་བོ་ནི་སྒྲིབ་པ་ཟད་པའི་མྱང་འདས་སོ།    
ཞེས་རྡོ་རྗེ་འཇིགས་བྱེད་ཀྱི་རྣམ་པར་ཤར་བའི་སྐུས་དེ་ལྟར་མཚོན་པ་གོ་བར་བྱེད་པའོ།  ། 

ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།  ཨོཾ་སྭ་བྷཱ་ཝ་ཤུ་དྡྷཿསརྦ་དྷརྨཿསྭཱ་བྷཱ་ཝ་ཤུད་དྷོ྅་ཧཾ།   སྟོང་
བ་ཉིད་དུ་གྱུར།   སྟོང་བའི་ངང་ལས་ཕྲེང་རྡོག་རྣམས་རེ་རེ་ནས་པད་ཉིའི་སྟེང་དུ་ཧཱུཾ་ཡིག་
ཡོངས་སུ་གྱུར་བ་ལས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་
ཐོད་པ་འཛིན་པ་གཡོན་བརྐྱངས་ཀྱིས་བཞུགས་པའི་སྤྱི་བོར་ཨོཾ།    མགྲིན་པར་ཨཱཿ  ཐུགས་
ཀར་ཧཱུཾ་གིས་མཚན་པར་གྱུར།    ཐུགས་ཀའི་ཧཱུཾ་ལས་འོད་ཟེར་འཕྲོས་བསྒོམས་པ་དང་འདྲ་
བའི་ཡེ་ཤེས་པ་དང་དབང་ལྷ་སྤྱན་དྲངས།   ཛཿཧཱུཾ་བཾ་ཧོཿ  གཉིས་སུ་མེད་པར་གྱུར། དབང་
ལྷས་དབང་བསྐུར་མི་བསྐྱོད་པས་དབུ་བརྒྱན་པར་གྱུར།  ཨོཾ་ཡ་མཱནྟ་ཀ་ཨརྒྷཾ།   པཱདྱཾ།  གནྡྷེ། 
པུཥྤེ།  དྷུ་པེ།  ཨ་ལོ་ཀེ ནེེ་ཝི་ཏེ།  ཤཔྟ་པྲ་ཏཱི་ཙྪ་ཧཱུཾ་སྭཱ་ཧཱ།   ཨོཾ་ཡ་མཱནྟ་ཀ་ཧཱུཾ་ཕཊ།ཨོཾ་ཨཱཿཧཱུཾ།      གཟུགས་མཆོག་མཆོག་ཏུ་དྲག་པོ་ཆེ།  །དཔའ་བོ་མཆོག་གི་སྤྱོད་ཡུལ་ཅན།   །གདུལ་དཀའ་འདུལ་བའི་དོན་མཛད་པ།    །རྡོ་རྗེ་འཇིགས་བྱེད་ལ་ཕྱག་འཚལ།    ཨོཾ་ཡ་མཱནྟ་ཀ་ཧཱུཾ་ཕཊ། ལན་བདུན་བཟླ།  རྡོ་རྗེ་འཇིགས་བྱེད་འོད་དུ་ཞུ་བ་ལས་ཁྲག་འཛག་བའི་མི་མགོའི་ཕྲེང་བའི་ རྣམ་པར་གྱུར།   ཨོཾ་ཨ་ར་པ་ཙ་ན་དྷཱིཿ    ཅི་འགྲུབ་བཟླས་པའི་མཐར།    ཨོཾ་ཡ་མ་རཱ་ཛཱ་ས་དོ་མེ་ཡ།  ཡ་མེ་དོ་རཱ་ཎ་ཡོ་ད་ཡ།     ཡ་ད་ཡོ་ནི་ར་ཡ་ཀྵེ་ཡ།  ཡ་ཀྵེ་ཡ་ཙྪ་ནི་རཱ་མ་ཡ་ཧཱུཾ་ཧཱུཾ་
ཕཊ་ཕཊ་སྭཱཧཱ། རྩ་སྔགས་སོ། །     ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།  སྙིང་པོའོ།  ། ཨོཾ་ཡ་མཱནྟ་ཀ་ཧཱུཾ་ཕཊ།
ཉེ་སྙིང་ངོ་། ། 
ཅི་འགྲུབ་བཟླས་པའི་མཐར།         ཨོཾ་ཡ་མཱནྟ་ཀ་ས་མ་ཡ།  མ་ནུ་པཱ་ལ་ཡ།  ཡ་མཱན་ཏ་ཀ་ཏྭེ་
ནོ་བ་ཏིཥྛ།  དྲི་ཌྷོ་མེ་བྷཱ་བ།  སུ་ཏོ་ཥྱོ་མེ་བྷཱ་བ།  མ་ནུ་རཀྟོ་མེ་བྷཱ་བ།  སུ་པོ་ཥྱོ་མེ་བྷཱ་བ། སརྦ་སིད་དྷི་མྨེ་བྲ་ཡཙྪ།  སརྦ་ཀརྨཱསུ་ཙ་མེ།  ཙི་ཏྟཾ་ཤྲཱི་ཡཾ་ཀུ་རུ་ཧཱུཾ།  ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ། བཛྲ་མ་མེ་མུཉྩ་བཛྲ་བྷ་ཝ།  མ་ཧཱ་ས་མ་ཡ་ས་ཏྭ་ཨཱཿཧཱུཾ་ཕཊ།      ཨོཾ་ཡ་མཱནྟ་ཀ་ཨརྒྷཾ། པཱདྱཾ།  གནྡྷེ།  པུཥྤེ།  དྷུ་པེ།  ཨ་ལོ་ཀེ ནེེ་ཝི་ཏེ།  ཤཔྟ་པྲ་ཏཱི་ཙྪ་ཧཱུཾ་སྭཱ་ཧཱ།   ཨོཾ་ཡ་མཱནྟ་ཀ་ཧཱུཾ་ཕཊ། ཨོཾ་ཨཱཿཧཱུཾ།   
གཟུགས་མཆོག་མཆོག་ཏུ་དྲག་པོ་ཆེ།  
དཔའ་བོ་མཆོག་གི་སྤྱོད་ཡུལ་ཅན།   
གདུལ་དཀའ་འདུལ་བའི་དོན་མཛད་པ། །
རྡོ་རྗེ་འཇིགས་བྱེད་ལ་ཕྱག་
འཚལ།   

 དེ་ནས་གཏོར་མ་བྱིན་གྱིས་བརླབས་ནས་འབུལ་བ་ནི།  ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།     ཨོཾ་སྭ་བྷཱ་ཝ་ཤུདྡྷཿསརྦ་དྷརྨཿསྭཱ་བྷཱ་ཝ་ཤུད་དྷོ྅་ཧཾ།   སྟོང་བ་ཉིད་དུ་གྱུར།    སྟོང་པའི་ངང་
ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ལྟ་བུ་བ་དན་གྱིས་མཚན་པ།་་་་   དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ།     དེའི་སྟེང་དུ་ཨཱཿལས་མི་མགོའི་སྒྱེད་བུ་གསུམ་གྱི་སྟེང་དུ་ཨཱཿལས་བྱུང་བའི་ཐོད་པ་དཀར་པོ།  དེའི་ནང་གི་ཤར་དུ་བྷཱུཾ་ལས་བྱུང་བའི་བ་ལང་གི་ཤ་གོས་མཚན་པ།   ལྷོར་ཨཾ་ལས་བྱུང་བའི་ཁྱིའི་ཤ་ཀུས་མཚན་པ།     ནུབ་ཏུ་ཛྲིཾ་ལས་བྱུང་བའི་གླང་པོ་ཆེའི་ཤ་དས་མཚན་པ།   བྱང་དུ་ཁཾ་ལས་བྱུང་བའི་རྟའི་ཤ་ཧས་མཚན་པ།   དབུས་སུ་ཧཱུཾ་ལས་བྱུང་བའི་མིའི་ཤ་ནས་མཚན་པ།   ཤར་ལྷོར་ལཾ་ལས་བྱུང་པའི་དྲི་ཆེན་བིས་མཚན་པ།  ལྷོ་ནུབ་ཏུ་མཱཾ་ལས་བྱུང་བའི་རཀྟ་རས་མཚན་པ།  ནུབ་བྱང་དུ་བཾ་ལས་བྱུང་བའི་བྱང་སེམས་དཀར་པོ་ཤུས་མཚན་པ།   བྱང་ཤར་དུ་ཏཱཾ་ལས་བྱུང་བའི་རྐང་མར་མས་མཚན་པ།   དབུས་སུ་བཾ་ལས་བྱུང་བའི་དྲི་ཆུ་མཱུས་མཚན་པ།   དེ་དག་གི་སྟེང་དུ་ཨོཾ་དཀར་པོ།   ཨཱཿདམར་པོ།   ཧཱུཾ་སྔོན་པོ་གསུམ་སྟེང་ནས་སྟེང་དུ་བརྩེགས་པར་གྱུར།     རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་རླུང་ལ་ཕོག་པས་རླུང་གཡོས་མེ་སྦར་ཏེ་ཐོད་པའི་རྫས་རྣམས་ཞུ་ཞིང་ཁོལ་པར་གྱུར།    ཡི་གེ་གསུམ་ལས་འོད་ཟེར་རིམ་པ་བཞིན་དུ་འཕྲོས་པས།       སྐུ་རྡོ་རྗེ་གསུང་རྡོ་རྗེ།       ཐུགས་རྡོ་རྗེ་རྣམས་བཀུག་ནས་ཡི་གེ་གསུམ་ལ་རིམ་གྱིས་ཐིམ་པ་རྣམས་ཐོད་པར་ལྷུང་ནས་ཞུ་བས་ཧཱུཾ་གིས་ཁ་དོག་དྲི་ནུས་ཀྱི་སྐྱོན་སྦྱངས།    ཨཱཿས་བདུད་རྩིར་རྟོགས་པར་བྱས།   ཨོཾ་གྱིས་མང་པོར་སྦར་
ཞིང་སྤེལ་བར་གྱུར།      ཨོཾ་ཨཱཿཧཱུཾ།  ལན་གསུམ་བརྗོད།                  

མདུན་དུ་སྐད་ཅིག་གིས་དཔལ་རྡོ་རྗེ་འཇིགས་བྱེད་དཔའ་བོ་གཅིག་པའི་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྗོགས་པར་གྱུར།              རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས།དཔལ་རྡོ་རྗེ་འཇིགས་བྱེད་དཔའ་བོ་གཅིག་པའི་ཡེ་ཤེས་པའི་དཀྱིལ་འཁོར་ཕྱོགས་སྐྱོང་དང་བཅས་པ་སྤྱན་དྲངས།   ཛཿཧཱུཾ་བཾ་ཧོཿ  ཡེ་ཤེས་པ་དང་དམ་ཚིག་པ་དང་གཉིས་སུ་མེད་པར་གྱུར། མགྲོན་རྣམས་ཀྱི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དཀར་བོ་འོད་ཀྱི་སྦུ་གུ་ཅན་དུ་གྱུར་བས་གཏོར་མའི་བཅུད་ཐམས་ཅད་དྲངས་ཏེ་གསོལ་པར་གྱུར།   ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།     བཛྲ་བྷེེ་ར་ཝ་ཡ་ཨ་དྷི་བ་ཏི་ཨི་མཾ་བ་ལིཾ་ཏ་ཁ་ཁཱ་ཧི་ཁཱ་ཧི་ཧཱུཾ་ཕཊ་སྭཱ་ཧཱ།  ལན་བདུན་གྱིས་འབུལ།   

ཨོཾ་ཧྲཱིཿཥྚཱིཿཧ།    ཨོཾ་ཧཱུཾ་ཧཱུཾ་ཕཊ།      ཨོཾ་ཝི་ཀྲི་ཏཱ་ན་ན་དུཥྚཾ་སཏྭ་ད་མ་ཀ་གཿགཿ    ཨོཾ་ཀུ་མ་རཱ་རཱུ་པི་ཎེ་ཛཿཛཿཧཱུཾ་ཕཊ། ཨོཾ་ཧྲཱིཿཧཿཧེ་ཕཊ།    ཨོཾ་དཱིཔྡ་ལོ་ཙ་ནི་ཝི་ཀྲི་ཏཱ་ན་ན་མ་ཧཱ་ཨ་ཊྚ་ཊྚ་ཧ་ས་ན་དི་པྟ་ཡེ་སྭཱ་ཧཱ།    ཨོཾ་བཛྲ་ནེ་ཝི་དྱ་ཨཱཿཧཱུཾ་སྭཱཧཱ།   ཨོཾ་བཛྲ་ཤཔྟ་ཨཱ་ཧཱུཾ། ཨོཾ་ཡ་མཱནྟ་ཀ་ཧཱུཾ་ཕཊ། ཨོཾ་ཨཱཿཧཱུཾ། 

གཉིས་མེད་ཐུན་མོང་མ་ཡིན་ཁྱབ་པའི་སྐུ། །   
ཀུན་ལ་སྙོམས་མཛད་རྒྱལ་བ་ཀུན་གྱི་ཡབ། 
ཆོས་ཀྱི་དབྱིངས་གྱུར་རྒྱལ་བ་ཀུན་གྱི་ཡུམ། 
ཡེ་ཤེས་སེམས་དཔའ་རྒྱལ་བ་ཀུན་གྱི་སྲས། 
ཕྱག་འཚལ་འཇམ་དཔལ་དཔལ་གྱུར་རྫོགས་པ་ཁྱོད།  
ཆོས་ཀྱི་སྐུ་ལ་བྱམས་སྡང་མི་མངའ་ཡང་།   
སྲིད་གསུམ་གདུག་བ་མ་ལུས་འདུལ་བའི་ཕྱིར།   
ཐུགས་རྗེ་ཐབས་ཀྱིས་ཁྲོ་རྒྱལ་སྐུར་སྟོན་པ།  
འཇིགས་བྱེད་གཤིན་རྗེའི་གཤེད་ལ་ཕྱག་འཚལ་ལོ།   

ཨོཾ་ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནིར་ཡ་ཀྵེ་ཡཙྪ་ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ་སྭཱཧཱ།  ཨོཾ་བྷུ་ཙ་ར་ནཾ།  ཡ་པཱ་ཏཱ་ལ་ཙ་ར་ཡ།མཱན་ཁེ་ཙ་ར་ཡ། ཏ་བཱུ་ར་བ་ནི་གཱ་ནཾ།  ཀ་དཀྵི་ན་དཱི་ག་ཡ།  ཧཱུཾ་བཤྩི་མ་ནཾ། ཕཊ།  ཨུད་ཏ་ར་ཏི་གཱ་ཡ།  ཨོཾ་ཨི།  ཧྲཱིཿཡ།  ཥྚཱིཿབ། ཝི་ཀྵི།  ཀྲི་ཀོ།  ཏཱ་ཨེ།  ན་ཡ།  ན་དེ།  ཧཱུཾ་བྷྱོཿཕཊ་སརྦ་བྷུ་ཏེ་བྷྱཿ  ལན་གསུམ་བརྗོད།

ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ།  པཱ་དྱཾ།  གནྡྷེ།  པུཥྤེ།  དྷུ་པེ།  ཨ་ལོ་ཀེ ནེེ་ཝི་ཏེ།  ཤཔྟ་པྲ་ཏཱི་ཙྪ་ཧཱུཾ་སྭཱ་ཧཱ།  ཨོཾ་ད་ཤ་དིཀ་ལོ་ཀཱ་པཱ་ལ་ས་པ་རི་ཝཱ་ར་ཨོཾཿཧཱུཾ།  

བཅོམ་ལྡན་ཆོས་རྗེ་འཇམ་དབྱངས་སྤྱན་ལམ་དུ། །
བདུད་འདུལ་བསྟན་པ་བསྲུང་བར་ཞལ་བཞེས་པ།    ། 
ལས་ཀྱི་གཤིན་རྗེ་མ་མོ་མཁའ་འགྲོ་མ།    
འབྱུང་པོ་རོ་ལངས་ཅི་བགྱི་བཀའ་ཉན་ཚོགས།  
ཕྱི་ནང་སྐྱོང་བའི་དམ་ཅན་མ་ལུས་ལ།  
བདག་ནི་རེ་བའི་སེམས་ཀྱིས་འདུད་ཅིང་མཆིས།    
ཕྱོགས་སྐྱོང་འཁོར་དང་བཅས་པ་རྣམས་ཀྱིས་བདག་གི་དམ་པའི་ཆོས་སྒྲུབ་པའི་བར་ཆད་ཐམས་ཅད་ཞི་བའི་འཕྲིན་ལས་མཛོད་ཅིག  །    

གཏང་རག་གི་མཆོད་པ་ནི།   ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ།      ཨོཾ་སྭ་བྷཱ་ཝ་ཤུ་དྡྷཿསརྦ་དྷརྨཿསྭཱ་བྷཱ་ཝ་ཤུད་དྷོ྅་ཧཾ།    སྟོང་བ་ཉིད་དུ་གྱུར།  སྟོང་པའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཧཱུཾ་ཞུ་བ་ལས་བྱུང་བའི་མཆོད་ཡོན།  ཞབས་བསིལ།   དྲི།   མེ་ཏོག  བདུག་སྤོས། མར་མེ།    ཞལ་ཟས།     རོལ་མོ་རྣམས་རང་བཞིན་བདེ་སྟོང་རྣམ་པ་མཆོད་རྫས་བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར།     ཨོཾ་ཨརྒྷཾ་ཨཱཿཧཱུཾ།   ཨོཾ་པཱདྱཾ་ཨཱཿཧཱུཾ། ཨོཾ་གནྡྷེ་ཨཱཿཧཱུཾ།  ཨོཾ་པུཥྤེ་ཨཱཿཧཱུཾ།  ཨོཾ་དྷུ་པེ་ཨཱཿཧཱུཾ།ཨོཾ་ཨཱ་ལོ་ཀེ་ཨཱཿཧཱུཾ།   ཨོཾ་ནེེ་ཝི་ཏེ་ཨཱཿཧཱུཾ། ཨོཾ་ཤཔྟ་ཨཱཿཧཱུཾ། ཨོཾ་ཡ་མཱནྟ་ཀ་ཨརྒྷཾ། པཱདྱཾ།  གནྡྷེ། པུཥྤེ།  དྷུ་པེ།  ཨ་ལོ་ཀེ  ནེེ་ཝི་ཏེ།   ཤཔྟ་པྲ་ཏཱི་ཙྪ་ཧཱུཾ་སྭཱ་ཧཱ།   ཨོཾ་ཡ་མཱནྟ་ཀ་ཧཱུཾ་ཕཊ།  ཨོཾ་ཨཱཿཧཱུཾ།  

གཉིས་མེད་ཐུན་མོང་མ་ཡིན་ཁྱབ་པའི་སྐུ། 
ཀུན་ལ་སྙོམས་མཛད་རྒྱལ་བ་ཀུན་གྱི་ཡབ། 
ཆོས་ཀྱི་དབྱིངས་གྱུར་རྒྱལ་བ་ཀུན་གྱི་ཡུམ། 
ཡེ་ཤེས་སེམས་དཔའ་རྒྱལ་བ་ཀུན་གྱི་སྲས། 
ཕྱག་འཚལ་འཇམ་དཔལ་དཔལ་གྱུར་རྫོགས་པ་ཁྱོད། །
ཆོས་ཀྱི་སྐུ་ལ་བྱམས་སྡང་མི་མངའ་ཡང་། །   
སྲིད་གསུམ་གདུག་བ་མ་ལུས་འདུལ་བའི་ཕྱིར།
ཐུགས་རྗེ་ཐབས་ཀྱིས་ཁྲོ་རྒྱལ་སྐུར་སྟོན་པ།
འཇིགས་བྱེད་གཤིན་རྗེའི་གཤེད་ལ་ཕྱག་འཚལ་ལོ། 

བསྟོད་པར་འོས་པ་ཐམས་ཅད་ལ། 
ཞིང་རྡུལ་ཀུན་གྱི་གྲངས་སྙེད་ཀྱི། 
ལུས་བཏུད་པ་ཡིས་རྣམ་ཀུན་ཏུ། 
མཆོག་ཏུ་དད་པས་བསྟོད་པར་བགྱི། 

རྣམ་དག་བསམ་པས་ཚུལ་འདིར་འབད་པ་ལས།   
བྱུང་བའི་དགེ་བས་མཐའ་ཡས་འགྲོ་བ་ཀུན།  
སྐྱེ་ཞིང་སྐྱེ་བར་འཇམ་དབྱངས་ཞི་ཁྲོ་ཡིས།    
འབྲལ་བར་མེད་པར་རྗེས་སུ་འཛིན་གྱུར་ཅིག །

ནམ་མཁའ་ཇི་སྲིད་སྐུ་ལྔའི་བདག་ཉིད་ཅན།།
ཁ་སྦྱོར་བདུན་ལྡན་གོ་འཕང་མངོན་གྱུར་ནས།     
མཐའ་དག་འགྲོ་འདི་གོ་འཕང་དེ་ཉིད་ལ།  
སྐད་ཅིག་ཉིད་ལ་བདེ་བླག་འགོད་པར་ཤོག ། 

ཨོཾ་ཡ་མཱནྟ་ཀ་ས་མ་ཡ།  མ་ནུ་པཱ་ལ་ཡ།  ཡ་མཱན་ཏ་ཀ་ཏྭེ་ནོ་བ་ཏིཥྛ།  དྲི་ཌྷོ་མེ་བྷཱ་བ།  སུ་ཏོ་ཥྱོ་མེ་བྷཱ་བ། མ་ནུ་རཀྟོ་མེ་བྷཱ་བ།  སུ་པོ་ཥྱོ་མེ་བྷཱ་བ། སརྦ་སིད་དྷི་མྨེ་བྲ་ཡཙྪ།  སརྦ་ཀརྨཱ་སུ་ཙ་མེ།  ཙི་ཏྟཾ་ཤྲཱི་ཡཾ་ཀུ་རུ་ཧཱུཾ།  ཧ་ཧ་ཧ་ཧ་ཧོཿ  བྷ་ག་ཝཱན། སརྦ་ཏ་ཐཱ་ག་ཏ། བཛྲ་མ་མེ་མུཉྩ་བཛྲ་བྷ་ཝ།    མ་ཧཱ་ས་མ་ཡ་ས་ཏྭ་ཨཱཿཧཱུཾ་ཕཊ།    

གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར།  །མགོན་ཁྱོད་དེ་ཀུན་བཟོད་མཛོད་རིགས།    །མ་རྙེད་ཡོངས་སུ་མ་ཤེས་དང་།།གང་ཡང་ནུས་པ་མ་མཆིས་པས།  །འདིར་ནི་བྱ་བ་གང་བགྱིས་པ།  །དེ་ཀུན་ཁྱོད་ཀྱིས་བཟོད་མཛད་རིགས།   །ལྷག་པ་དང་ནི་ཆད་པ་དང་།  །ཆོ་གའི་ཡན་ལག་ཉམས་པ་དང་།  །བདག་གི་བརྗེད་ངས་ཅི་མཆིས་པ།   །དེ་ཡང་བཟོད་པར་མཛད་དུ་གསོལ།    


དགེ་བ་འདི་ཡིས་མྱུར་དུ་བདག  ། འཇམ་དཔལ་དཔའ་བོ་འགྲུབ་གྱུར་ནས།  
འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །བདག་ལ་དངོས་གྲུབ་མཆོག་
སྩོལ་ལེགས།   །ཏིང་འཛིན་ཀུན་གྱི་འབྲས་བུ་སྩོལ།  །སེམས་ཅན་ཀུན་ལ་ཅི་འདོད་པའི།  
དངོས་གྲུབ་བླ་ན་མེད་པ་སྩོལ།  

ཨོཾ་ཨཱཿ་ཧཱུཾ་བཛྲ་མུཿ་འཇིག་རྟེན་ལས་འདས་པའི་མགྲོན་གྱི་ཡེ་ཤེས་པ་གཤེགས།    དམ་ཚིག་པ་རང་ཉིད་ལ་ཐིམ།    མགྲོན་གཞན་རྣམས་རང་གནས་སུ་གཤེགས་པར་གྱུར།    དུར་ཁྲོད་སྲུང་འཁོར་དང་བཅས་པ་གཞལ་ཡས་ཁང་ལ་ཐིམ།གཞལ་ཡས་ཁང་རང་ལ་ཐིམ།  རང་དམ་ཚིག་སེམས་དཔའ་ཡེ་ཤེས་སེམས་དཔའ་ལ་ཐིམ།  ཡེ་ཤེས་སེམས་དཔའ་ཏིང་ངེ་འཛིན་སེམས་དཔའ་ལ་ཐིམ། ཏིང་ངེ་འཛིན་སེམས་དཔའི་ཞབས་ཀྱུ་ཨུ་ནི་ཧ་ལ།  ཧ་ནི་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ་ཐིམ།  དེ་ཡང་མི་དམིགས་པ་སྟོང་པར་གྱུར། སྟོང་བའི་ངང་ལས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱི་རྣམ་པར་གྱུར་བའི་སྤྱི་བོར་ཨོཾ།  མགྲིན་པར་ཨཱཿ། ཐུགས་ཀར་ཧཱུཾ་གིས་མཚན་པར་གྱུར།  

ཤིས་བརྗོད་བསྡུས་པ་ནི། 
རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག །
ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག །
མ་དང་མཁའ་འགྲོ་རྣམས་ཀྱི་བཀྲ་ཤིས་ཤོག །
ཆོས་སྐྱོང་སྲུང་རྣམས་ཀྱི་བཀྲ་ཤིས་ཤོག །

སརྦ་མངྒ་ལཾ།  
བཅོམ་ལྡན་འདས་དཔལ་རྡོ་རྗེ་འཇིགས་བྱེད་དཔའ་བོ་གཅིག་པའི་སྒྲུབ་ཐབས་བདུད་ལས་རྣམ་རྒྱལ་གྱི་ཆོ་ག་འདི་ནི་མ་ཐང་དགོན་པའི་འདོན་པ་ལ་བསྟུན་ནས་འཇིགས་མེད་སྐལ་ལྡན་གྱིས་བསྒྲིགས་པའོ།།