Wednesday, 10 July 2019

དཀར་ཆག


ལྷ་རམས་པ་དགེ་འདུན་མཐར་ཕྱིན་གྱི་བོད་ཡིག་དྲ་རྒྱའི་དཀར་ཆག

བཀའ་ཐང་དུམ་བུ།

ཨེ་མ་ཧོ༔རྒྱལ་པོ་ཆེན་པོ་ལེགས་པར་ཉོན༔ བདག་འདྲ་པདྨ་འབྱུང་གནས་ངས༔ ཐུན་མོང་མངོན་པར་ཤེས་པར་ལྔ༔ མ་འོང་མངོན་པར་ཤེས་པར་ལྔ༔ ད་ལྟའི་མངོན་པར་ཤེས་པར་ལྔ༔ ཚད་མེད་མངོན་པར་ཤེས་པར་ལྔ༔ མངོན་ཤེས་ལྔ་པོ་ང་ཡིས་ཤེས༔ སྔོན་ཚེ་སྣང་བ་མཐའ་ཡས་ཅོད་དཔག་མེད༔ རི་བོ་ཏ་ལར་མགོན་པོ་སྤྱན་རས་གཟིགས༔ དྷ་ན་ཀོ་ཤར་པདྨ་འབྱུང་གནས་ང༔ མཚོན་ཚུལ་ཙམ་ལ་སྐུ་གསུམ་སྣང་གྱུར་ཀྱང་༔ དོན་ལ་དབྱེར་མེད་སོ་སོར་ཐ་མི་དད༔ ཆོས་དབྱིངས་གནས་སུ་ཀུན་ཏུ་བཟང་པོ་དང་༔ སྟུག་པོ་བཀོད་ཏུ་རྡོ་རྗེ་འཆང་ཆེན་པོ༔ རྡོ་རྗེ་གདན་དུ་ཐུབ་པ་ཆེན་པོ་ཉིད༔ གཉིས་མེད་པདྨ་ང་རུ་ལྷུན་གྱིས་གྲུབ༔ དེ་བཞིན་ང་ལ་གསོལ་བ་རྒྱུན་དུ་ཐོབ༔ 
          རྒྱལ་པོའི་གདུང་རབས་བརྒྱད་དང་བཅུ་གསུམ་ནས༔ སེ་ཆེན་རྒྱལ་པོའི་བོད་ལ་དམག་དྲངས་ནས༔ བོད་འབངས་ཐམས་ཅད་འཕུང་པའི་གཞི་རུ་འགྲོ༔ ང་ཡི་ལྷ་ཁང་རྣམས་ཀྱང་འཇིག་པར་བྱེད་༔ དེ་དུས་ང་སྤྲུལ་ས་སྐྱ་ཞེས་བྱ་འབྱུང༔ སྟོད་ཀྱི་ཕྱོགས་ནས་ཡབ་མིང་འཇམ་དཔལ་དང་༔ ཡུམ་མིང་སྒྲོལ་མ་ཞེས་བྱའི་སྲས་སུ་འཁྲུངས༔ འགྲོ་མགོན་འཕགས་པ་ཀུན་དགའ་རྒྱལ་མཚན་ཞེས༔ ང་ཡི་ལྷ་ཁང་རྣམས་ལ་ཞིག་གསོ་བྱེད༔ གསང་སྔགས་བསྟན་པ་དར་ཞིང་རྒྱས་པར་འགྱུར༔ བོད་འབངས་སེམས་ཅན་བདེ་ཞིང་སྐྱིད་པར་འབྱུང་༔ 
           དེ་ནས་བོད་ཀྱི་རྒྱལ་པོ་ཧམ་ཐོབ་བྱེད༔ རེས་འགའ་ཆོས་རྒྱལ་རེས་འགའ་བདུད་རྒྱལ་རེ༔ ཆོས་རྒྱལ་དེ་ཡིས་ཆོས་ཁྲིམས་་ཚུགས་པར་བྱེད༔ བདུད་རྒྱལ་དེ་ཡིས་ཆོས་ཁྲིམས་བཤིག་པར་བྱེད༔ དེ་དུས་མི་ལ་དར་རྒུད་སྣ་ཚོགས་འོང་༔ ཐུབ་པའི་ལུང་བསྟན་མདོ་ཁམས་སྒང་ཞིག་ཏུ༔ ཨ་ཏི་ཤ་ཡི་སྤྲུལ་པ་བློ་བཟང་གྲགས༔ སྐྱེས་བུ་དེ་བྱོན་བོད་ལ་བདེ་སྐྱིད་འཆར༔ དེ་དུས་དཀར་ཕྱོགས་རྣམས་ཀྱང་སྤོབས་པ་ཐོབ༔ མྱང་སྨད་ཉི་མ་མདོ་རུ་རྫོང་ཞིག་ཆགས༔ ལྷ་ས་དམར་པོ་རི་ལ་ལཧ་ཁང་འབྱུང་༔ ང་ཡི་སྤྲུལ་པ་ཆོ་རྒྱན་གླིང་པ་བྱོན༔ གཏེར་ཁ་ཉི་ཤུ་རྩ་ལྔ་དེ་དུས་འབྱེད༔ 
         དེ་སྐད་གསུངས་པས་རྒྱལ་པོ་སྤྱན་ཆབ་ཤོར༔ ཡང་ཅིག་ཕྱག་འཚལ་མཎཌལ་ཕུལ་ནས་སུ༔ འདྲེན་པའི་སྐྱེས་བུ་སློབ་དཔོན་ཆེན་པོ་ལགས༔ བདག་གི་གདུང་བརྒྱུད་འདི་ནས་ག་ཙམ་ཆགས༔ བོད་འབས་སེམས་ཅན་བདེ་སྐྱིད་ག་ཙམ་ཆགས་༔ མ་ཧྰ་གུ་རུ་ཆེན་པོའི་གསུང་བར་ཞུ༔ ཞེས་ཞུས་ཕྱག་ནི་དབུ་ཐོད་བུད་བུད་འཚལ༔ 
        དེ་ནས་གུ་རུ་ཆེན་པོའི་བཀའ་སྩལ་པ༔ རྒྱལ་ཁྱོད་ཀྱི་རྒྱལ་རྒྱུད་འདི་ནས་བཟུང་༔ སྟོད་ཀྱི་ཕྱོགས་ནས་མེ་ལོང་ཧ་བཏབ་ཡལ༔ དེ་རྗེས་བོད་ཀྱི་རྒྱལ་པོ་རེས་མོས་བྱེད༔ ཁྱད་པར་བྱང་ཆུབ་སེམས་དཔའི་སྤྲུལ་པ་ཞིག༔ མདོ་སྡེ་སྐལ་བ་བཟང་པོའི་མཚན་ཅན་འབྱུང༔ གདོང་སྨེ་ཅན་གྱིས་བོད་ཀྱི་རྒྱལ་ས་འཛིན༔ སྐྱིད་པའི་ཉི་མ་རྒྱ་མཐོངས་གྲིབ་མ་ཙམ༔ རྟ་ལུག་སྤྲེལ་གསུམ་ལོ་ལ་རྒྱ་དམག་འོང༔ ཆུ་ཕོ་སྤྲེལ་ལ་ཡར་ལུང་དམག་སྒར་འཆའ༔ མཐའ་མ་བོད་འདི་རྒྱ་ཡི་འོག་ཏུ་འཇུག༔ ཕ་སྤུན་ནང་འཁྲུག་རྟ་སྒོ་སྒང་དུ་འཁྲུག༔ བུམ་ཐང་ཕྱོགས་ནས་ཁྲི་ཡི་ཟུར་ཆ་གནོན༔ རྒྱལ་སྲིད་ཆོས་ཁྲིམས་སྐྱོང་བའི་ང་སྤྲུལ་འབྱོན༔ བལ་ཡུལ་རྒྱ་རྫོང་རྣམས་སུ་འཁྲུག་པར་བྱེད༔ བོད་ལ་སྐྱིད་པའི་ཉི་མ་ཅུང་ཟད་འཆར༔ སྤྱོད་ངན་རང་གིས་བྱས་ནས་དུས་ངན་ཟེར༔ དུས་ནི་མི་འགྱུར་མི་རྣམས་འགྱུར་བ་ཡིན༔ དེ་དུས་མི་ལ་བསོད་ནམས་སྙན་གྲགས་མེད༔ 
            པདྨ་ང་ལ་གསོལ་བ་རྒྱུན་དུ་ཐོབ༔ ཉིན་མོ་བྱུང་དུས་ཐུགས་རྗེ་ཆེན་པོ་སྒོམས༔ སེམས་ཅན་དོན་དུ་སྙིང་པོ་མ་ཎི་དྲོངས༔ ཕ་མ་རིགས་དྲུག་དྲིན་ལན་ཁྱེར་ཏེ་འོང་༔ མཚན་མོ་བྱུང་དུས་པད་འབྱུང་ང་ཉིད་སྒོམས༔ རང་གི་དོན་དུ་བཛྲ་གུ་རུ་་དྲོངས༔ སྙིགས་མའི་སེམས་ཅན་ཐམས་ཅད་ང་ཡིས་སྐྱོབ༔ དུས་གསུམ་རྒྱུན་ཆད་མེད་པར་ང་ཡིས་གཟིགས༔ ངན་སོང་གསུམ་དུ་སྐྱེས་ཀྱང་བསླུ་རུ་འོང་༔ བོད་ལ་དྲིན་ཆེན་བྱས་ཀྱང་དྲིན་མི་གོ༔ ང་ལ་རྒྱུན་དུ་གསོལ་བ་འདེབས་ནུས་ན༔ དུས་ངན་ཚེ་ལོ་བཅུ་པ་བཟློག་ཐབས་ཡོད༔ བྱམས་པའི་སྤྲུལ་པ་ཁྲི་བདུན་ཞེས་པ་འབྱུང༔ སྐལ་ངན་ཚེ་ལོ་བཅུ་པའི་སྡུག་བསྔལ་གྲོལ༔ ཡང་ཞིག་བསྐལ་པ་ཡར་འཕེལ་བདེ་བར་འགྱུར༔ སངས་རྒྱས་ཞལ་གཟིགས་ཡང་ཡང་འབྱུང་བར་འགྱུར༔ ནང་རེ་དགོང་རེ་བོད་ཀྱི་དོན་ལ་འོང་༔ དད་པ་ཅན་ལ་པད་འབྱུང་སྒོ་ཉལ་ཡོད༔ ང་ཡི་སྐུ་ལ་འདས་འཁྲུངས་ཡོད་མ་མཆིས༔ རྒྱལ་སྲས་མི་ཁྲི་བཙན་པོ་ཞེས་བྱ་ཁྱོད༔ འདི་ནས་སྐྱེ་བ་བཅུ་བདུན་འགྲོ་དོན་མཛད༔ དེ་ནས་ཨོ་རྒྱན་མཁའ་འགྲོའི་གླིང་དུ་བྱོན༔ ལོཙྪ་ཆེན་པོ་བེ་རོ་ཙཱ་ན་ཁྱོད༔ པདྨ་ང་ཡི་དམ་ཆོས་ཟབ་མོ་འདི༔ དཔལ་གྱི་བསམ་ཡས་དབུ་རྩེར་གཏེར་དུ་སྦོས༔ མ་འོངས་ལས་འཕྲོ་ཅན་ལ་སྤྲོད་ཅིག་གསུངས༔ ང་ནི་མི་སྡོད་སྲིན་པོ་འདུལ་དུ་འགྲོ༔ སྲིན་པོ་ཐམས་ཅད་ཆོས་ལ་བཀོད་ནས་འགྲོ༔ ཞེས་གསུངས་ཞལ་ལྷ་ནུབ་ཏུ་་གཟིགས་སོ༔ ས་མ་ཡ༔ རྒྱ་རྒྱ་རྒྱ༔ གཏེར་སྟོན་ཨོ་རྒྱན་གླིང་པས་བསམ་ཡས་མཆིམས་ཕུ་ནས་གཏེར་ནས་སྤྱན་དྲངས་པའོ༔

Thursday, 30 May 2019

མི་ཆོས་གནད་ཀྱི་ཕྲེང་བ།

མི་ཆོས་གནད་ཀྱི་ཕྲེང་བ།

འབྲོམ་སྟོན་པ་རྒྱལ་བའི་འབྱུང་གནས།



ཁོ་བོས་བྱང་གི་ཕྱོགས་ནས་གཙོ་བོའི་བུ། །
ཁོ་བོས་ས་མཐར་བསྐོར་བས་མི་མཐོང་མྱོང་། །
རྣ་གཏམ་མང་དུ་ཐོས་པས་བཤད་པ་ཚ། །
ཡིན་མིན་མགོ་ལྟག་ཕྱེད་པས་གྲུང་བོར་གྲགས། །

གནས་དང་ཕྱོགས་རྣམས་གང་དུ་འགྲོ་ཡང་རུང་། །
གཞི་དང་གནས་མལ་གང་དུ་བྱེད་ཀྱང་རུང་། །
གྲོགས་དང་འགྲོགས་ལུགས་སུ་ལ་འཚོལ་ཡང་རུང་། །
གཞན་དང་བསྟུན་པ་མི་ཆོས་རྩ་བ་ཡིན། །

དེ་ཡི་སྟེང་ནས་འདུན་མ་བཤད་ཀྱི་ཉོན། །
བྱ་བྱེད་ཡོངས་ཀྱི་མགོ་ལྟག་ཕྱེ་ཡི་ཉོན། །
ལྷ་ཞི་ཀླུ་ཞིའི་གདམས་པ་བཤད་ཀྱི་ཉོན། །
ཆོས་ལ་མི་ཆོས་ཟབ་པ་འདི་ལྟར་ལེགས། །

སུ་ཡི་དོན་དུ་དཀའ་སྤྱད་བྱེད་ན་ཡང་། །
བྱ་ཤེས་ཀོ་ལོང་སྡུག་ཡུས་ཆུང་བར་མཛོད། །
ལས་དང་བྱ་བ་ཇི་ལྟར་བྱེད་ན་ཡང་། །
མཛད་སྤྱོད་ཐམས་ཅད་མི་དང་མཐུན་པར་མཛོད། །

རང་ལ་ཡོན་ཏན་ཇི་ཙམ་ཡོད་ན་ཡང་། །
གཞན་ལ་ཁྱད་གསོད་བརྙས་པ་ཆུང་བར་མཛོད། །
རང་ཉིད་ནོར་ལ་ཆགས་ཞེན་ཆེ་ན་ཡང་། །
གཞན་གྱི་ནོར་ལ་ཧབ་ཤ་ཆུང་བར་མཛོད། །

རང་ཉིད་ལས་ཐབས་འདུན་མ་མཁས་ན་ཡང་། །
སྤྱི་ཡི་ཁྲིམས་ལ་ས་ཆོད་ཆུང་བར་མཛོད། །
རང་ཉིད་བསགས་པའི་ནོར་རྫས་ཡིན་ན་ཡང་། །
མང་བོའི་གསེབ་ཏུ་ལྐོག་ནོད་ཆུང་བར་མཛོད། །

རང་ཉིད་ཀུན་གྱིས་ཚད་མར་ཁུར་ན་ཡང་། །
ངའོ་སྙམ་པའི་ང་རྒྱལ་ཆུང་བར་མཛོད། །
རང་ཉིད་ཀུན་ལས་ཁྱད་པར་འཕགས་ན་ཡང་། །
ཆེ་བའི་ང་རྒྱལ་ཅུང་ཟད་མེད་པར་མཛོད། །

རང་ཉིད་དགེ་བའི་བཤེས་སུ་གསོལ་ན་ཡང་། །
མཁས་དམན་ཀུན་ལ་བརྙས་པ་ཆུང་བར་མཛོད། །
རང་གི་གོང་ན་ཆེ་བ་གཞན་མེད་ཀྱང་། །
འོག་ཏུ་བཞུགས་ལ་འཇུག་པ་བདེ་བར་མཛོད། །

གཞན་གྱི་ཚོགས་དཔོན་ཇི་ལྟར་ངན་ན་ཡང་། །
གུས་པའི་ཚུལ་གྱིས་ཕྱག་དང་ཕྱག་ལན་མཛོད། །
རང་དང་མཉམ་པའི་གང་ཟག་སུ་བྱུང་ཡང་། །
མགོ་ཡང་མཐོ་བའི་བཀུར་སྟི་གུས་པར་མཛོད། །

མཛེ་སྤྲང་ལ་སོགས་སུ་ཡིས་ཆོས་ཞུས་ཀྱང་། །
ཀུན་གྱི་དབུས་སུ་གདམས་ངག་ལྷུག་པར་སྟོན། །
གལ་ཏེ་མཐོ་འཚམས་ཁ་ཚོད་ལྟ་ན་ཡང་། །
ཧ་ཅང་ཕུལ་དུ་ཕྱིན་པས་ལྷུག་པར་སྟོན། །

ཚོགས་དང་བསྙེན་བཀུར་སོགས་ཀྱིས་མཆོད་འོས་ཀྱང་། །
དེ་ལ་མ་ལྟ་ཀུན་ལ་ཐང་མ་རྡོལ།།
ངེས་པར་གང་ལ་གསང་བར་འོས་པ་རྣམས། །
ལྐུགས་པའི་ཚུལ་གྱིས་ཁ་རོག་དབེན་སར་བཞུགས། །

དེ་ཡང་རགས་པ་སྤྱི་ཡི་རྣམ་གཞག་ཡིན། །
ད་དུང་སྙིང་གཏམ་ལགས་པས་གསན་མཛོད་དང་། །

འགྲོགས་ལུགས་དགྲ་ལ་འཚོལ་དང་ཟབ་པ་ཡིན། །
སྙིང་གཏམ་བུ་ལ་གསོང་དང་བརྟན་པ་ཡིན། །
ཁ་འདོན་གྲེ་བར་བསྐྱིལ་དང་བཙུན་པ་ཡིན། །
མཚང་གཏམ་བར་དུ་གསོང་དང་མཁས་པ་ཡིན། །

རང་མཚང་རང་གིས་བྲུས་དང་མཁས་པ་ཡིན། །
གཞན་མཚང་ལྷོད་ལ་ཞོག་དང་དགེ་བ་ཡིན། །
བློ་གཏད་སྙིང་གིས་སྐྱོང་དང་ངོ་མཚར་ཆེ།།

སྙིང་གཏམ་ལགས་པས་ད་དུང་གསན་མཛོད་དང་། །

འཕྲད་མ་ཐག་ཏུ་སྙིང་གཏམ་འཆད་པ་མཚང་། །
མ་བརྟག་པ་ལ་བློ་གཏད་བྱེད་པ་མཚང་། །
བརྟགས་ནས་འཁྲུལ་ན་ད་རུང་བྱེད་པ་མཚང་། །
བག་མེད་མི་ལ་བྱ་བྱེད་ཆོལ་བ་མཚང་། །

ཤ་མི་ཚ་ལ་ཕུག་བསྲེ་ཆོལ་བ་མཚང་། །
དད་པ་མེད་ལ་སློབ་མར་བསྟེན་པ་མཚང་། །
སྙིང་རྗེ་མེད་ལ་བླ་མར་ཁུར་བ་མཚང་། །
ཁྲེལ་གཞུང་མེད་ལ་གྲོགས་པོར་བསྟེན་པ་མཚང་། །

མི་ཉན་པ་ལ་ཁ་ཏ་བྱེད་པ་མཚང་། །
མི་ཤེས་པ་ལ་གྲོས་ཕུགས་འདྲི་བ་མཚང་། །
མཚང་དུ་ཤེས་ནས་ད་རུང་མི་འདོར་ན། །
རང་ཉིད་སྨྱོན་པ་ཡིན་པར་ཤེས་བར་བྱ། །

སྙིང་གཏམ་ལགས་པས་ད་དུང་གསན་མཛོད་དང་། །

བཟའ་བཏུང་ཟ་དུས་ཐམས་ཅད་བཀའ་སློབ་བདེ། །
ཞག་གསུམ་འགྲོགས་ནས་རང་མཚང་སྟོན་པ་མང་། །
ཉེ་རིང་ཡོངས་ལ་ལོ་གཅིག་མ་བརྟེན་པར། །
བྱ་བྱེད་བཅོལ་ན་མྱུར་དུ་ནོངས་པར་འགྱུར། །

རང་ལ་བརྟེན་པའི་མཚང་གཏམ་ངན་པ་ཡིན། །
གཅིག་གི་སེམས་ལ་ཤར་ན་གཏོར་འགོང་ཡིན། །
གཏམ་དེ་གཉིས་ལ་གྲགས་ན་ཕུང་བྱེད་ཡིན། །
གསུམ་ལ་གྲགས་ན་གཏམ་ངན་རླུང་ཁྱེར་ཡིན། །

མི་མངོན་དབྱིངས་སུ་ཡལ་ན་མཁས་པ་ཡིན། །
ངག་མཚང་ཐབས་ཀྱིས་ཤེས་ན་གད་མོ་འཆོར། །
དགོས་པ་རང་གིས་བསུས་ན་བདུད་རིགས་དགའ། །
ཕུང་བྱེད་གྲོགས་སུ་བསྒྱུར་ན་མཚང་རེ་ཆེ། །

སྙིང་གཏམ་ལགས་པས་ད་དུང་གསན་མཛོད་དང་། །

ཟས་ལ་ཞེན་པ་མ་ཆེ་མི་ལ་བྱིན། །
ནོར་ལ་སེར་སྣ་མ་ཆེ་ཆོས་ལ་མཆོད། །
བཞིན་ལ་འགྱུར་ལྡོག་མ་མང་འཛུམ་གྱིས་བསུས། །
དགྲ་ཟུན་བཤའ་རལ་མ་མང་སྤྱི་སྙོམས་སྟེན། །

འཁོར་ལ་བསྟོད་ར་མ་མང་བློ་ཁོག་སྡོམས། །
མྱུར་དུ་སྨད་ར་མ་མང་ཐབས་ཀྱིས་སྤོང་། །
སུ་ལ་ཁས་ལེན་མ་མང་ལག་ལེན་སྐྱོངས། །
གང་ལའང་ཉེས་ཁ་མ་འདིངས་གྲོས་ཁ་སྐྱེད། །

ཉེས་ན་འགྱོད་ཐལ་མ་བྱེད་ཕྱིས་འབྱུང་སྡོམས། །
སྙིང་གཏམ་ལགས་པས་ད་དུང་གསན་མཛོད་དང་། །
སྡུག་ཁ་དགྲ་ཡི་གཡབ་མོ་ལེགས་པར་ཆོད། །
བྱ་མང་བྱུར་གྱི་སྣ་འདྲེན་ལེགས་པར་ཆོད། 

བློ་མང་འདུན་མའི་དཀྲུག་ཤིང་ལེགས་པར་ཆོད། །
གཤིས་ངན་དགྲ་བོའི་ཚོགས་ས་ལེགས་པར་ཆོད། །
རྣམ་རྟོག་སྡུག་འདྲེའི་ཕོ་ཁྲོམ་ལེགས་པར་ཆོད། །
འཁོར་ངན་གཏམ་གྱི་གཞི་མ་ལེགས་པར་ཆོད། །

གྲོགས་ངན་འགྱོད་པའི་རྩ་བ་ལེགས་པར་ཆོད། །
ཡུལ་ངན་སྡུག་གི་འཁོར་བ་ལེགས་པར་ཆོད། །
མི་ཆོས་རྐང་བའི་ཐི་གུ་ལེགས་པར་ཆོད། །

སྙིང་གཏམ་ལགས་པས་ད་དུང་གསན་མཛོད་དང་། །

དུས་ངན་སྙིགས་མ་ལྔ་རུ་བདོ་བའི་དུས། །
ཆོས་པ་ཡོངས་ཀྱི་བགེགས་འདྲེ་ཆགས་སྡང་གནོད། །
གང་དུ་ཕྱིན་ཀྱང་ཆགས་སྡང་ཆུང་བར་མཛོད། །
ཇི་ལྟར་བགྱིས་ཀྱང་དམན་ཆ་བླངས་པར་འཚལ། །

ཐག་རིང་བལ་བོའི་ཐང་ནི་ཚད་པ་ཆེ། །
ཁ་སྐོམ་བཏུང་བའི་ཚོགས་ལ་གཟབ་པར་འཚལ། །
ལ་སྟོད་ལྷོ་ཡི་ཕྱོགས་ནི་དགྲ་འཇིགས་ཆེ། །
ཞེ་སྡང་ངན་སྔགས་ཚོགས་ལ་གཟབ་པར་འཚལ། །

ཉང་ཤབ་བྱང་གི་ཕྱོགས་ནི་སྨེ་མཆུ་མང་། །
ལོང་གཏམ་ཚིག་གི་ཚོགས་ལ་གཟབ་པར་འཚལ། །
པུར་རྒྱལ་བོད་ཀྱི་ཡུལ་ནི་ཁྲེལ་གཞུང་ངན། །
ཡིད་འབྱུང་ཁོང་ཁྲོའི་ཚོགས་ལ་གཟབ་པར་འཚལ། །

དེང་དུས་སྐྱེ་བོའི་ཚོགས་ནི་གསར་འགྲོགས་ཆེ། །
བསླུ་བྲིད་འཁོར་གྱི་ཚོགས་ལ་གཟབ་པར་འཚལ། །

སྙིང་གཏམ་ལགས་པས་ད་དུང་གསན་མཛོད་དང་། །

ཡི་དམ་ལྷ་ལ་རེ་ལྟོས་མ་ཤོར་བར། །
དུས་ངན་མི་ལ་རེ་ལྟོས་ཆུང་བར་མཛོད། །
འགྲོགས་པའི་མི་ལ་ཁྲེལ་གཞུང་མ་ཆུང་བར། །
ལེགས་ཉེས་གང་ལ་བཤད་གཞུང་ཉུང་བར་མཛོད། །

དཀར་པོའི་ཆོས་ལ་ཕྱི་བཤོལ་མ་འདིངས་པར། །
དམ་པའི་ཆོས་ལ་སྦྱོར་བ་ཐོབ་པར་མཛོད། །
འདུན་མ་ཡོངས་ལ་སྐྱིད་འདོད་མ་ཆེ་བར། །
བླ་མའི་ཕྱོགས་སུ་སྒོ་གསུམ་གུས་པ་མཛོད། །

མདོར་ན་མཐོ་བ་ཐམས་ཅད་ཞྭ་བཞིན་ཁུར། །
དམའ་བ་རལ་གྲིའི་སོ་བཞིན་ཀུན་ནས་སྐྱོངས། །
མཉམ་པ་རྨོས་དོར་བཞིན་དུ་དགའ་བར་འགྲོགས། །
བྱ་བ་གང་ལའང་རང་འདོད་ཆུང་བར་མཛོད། །
འདུན་མ་ཡོངས་ལ་སྤྱི་སྙོམས་ཆེ་བར་མཛོད། །

འདི་ལྟར་ཁྱོད་ལ་བསླབ་བྱ་གདམས་པ་འདི། །
བྱེ་འུ་སྒོ་ངའི་འདུ་ཤེས་མ་ཤོར་བར། །
ལེགས་བཤད་འདི་དག་ལཉྩའི་ཡི་གེར་བཀོད། །
དབེན་པའི་གནས་སུ་ལྟད་མོ་ཆེ་བར་ལྟོས།།
ཡུན་དུ་བསྲིངས་ན་ཤིན་ཏུ་འཕྲོད་པར་གདའ། །

འདི་ནས་བཟུང་སྟེ་སྐྱེ་བ་ཐམས་ཅད་དུ། །
འཕྲིན་ལས་མཉམ་དུ་འགྲོ་བ་འདྲེན་བྱེད་ཅིང་། །
ཀུན་ཏུ་བཟང་པོའི་སྨོན་ལམ་ཇི་ལྟ་བ། །
དགའ་བའི་སྨོན་ལམ་གཅིག་ཏུ་གདབ་པར་བགྱི། །

ཞེས་འབྲོམ་སྟོན་པ་རྒྱལ་བའི་འབྱུང་གནས་ཀྱིས་གསུངས་སོ།། །།


Thursday, 4 April 2019

ཐུན་དྲུག་གི་ཉམས་ལེན་བྱ་ཚུལ།

ཐུན་དྲུག་གི་ཉམས་ལེན་བྱ་ཚུལ་བཞུགས་སོ། །

 པཎ་ཆེན་བློ་བཟང་ཆོས་ཀྱི་རྒྱལ་མཚན།
           ༄༅། །ན་མོ་གུ་རུ་མཉྫུ་གྷོ་ཥཱ་ཡ། རྡོ་རྗེ་འཆང་དབང་དཔལ་ལྡན་བླ་མ་ཡི། ། ཞབས་ཀྱི་པདྨོར་གུས་པས་ཕྱག་བྱས་ཏེ། ། དམ་ཚིག་སྡོམ་པ་དག་བྱེད་རྨད་བྱུང་ཐབས། ། རྒྱུད་དང་རྗེ་བཙུན་བླ་མའི་གསུངས་བཞིན་བཤད། ། དེ་ཡང་རྒྱུད་སྡེ་གོང་མ་གཉིས་ཀྱི་དཀྱིལ་འཁོར་ཆེན་པོར་དབང་བསྐུར་བ་ལེགས་པར་ཐོབ་པའི་གང་ཟག་རང་རང་གིས་ཇི་སྲིད་སྔགས་སྡོམ་རྒྱུད་ལ་ལྡན་པ་དེ་སྲིད་དུ། རྩ་བ་དང་ཡན་ལག་གི་དམ་ཚིག་དང་སྡོམ་པ་རྣམས་ལ་ཉིན་ཞག་རེ་རེའི་ནང་དུ་སྔོ་བགྲངས་བྱེད་ཅིང་། ཁྱད་པར་རིགས་ལྔའི་དམ་ཚིག་ཐུན་དྲུག་ཏུ་བསྐྱར་དགོས་ཏེ། དེ་ལྟར་མ་བྱས་ན་ཁ་ན་མ་ཐོ་བ་སྤོམ་པོར་འགྱུར་བའི་ཕྱིར་ཏེ། རྩེ་མོ་ལས། ཉིན་དང་མཚན་མོ་ལན་གསུམ་དུ། ། ཉིན་རེ་བཞིན་ནི་འདའ་བར་བྱ། ། གང་ཚེ་ཉམས་གྱུར་རྣལ་འབྱོར་བ། ། ཁ་ན་མ་ཐོ་སྤོམ་བར་འགྱུར། ། ཞེས་གསུངས་པའི་ཕྱིར། དེ་ནས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་སྤྱད་པ་སྤྱོད་པར་འདོད་པ་རྣམས་ཀྱིས་ནི། བསྟེན་པ་དང་བཟའ་བ་དང་། བསྲུང་བའི་དམ་ཚིག་རྣམས་རྡོ་རྗེ་འཆང་ཆེན་པོས་གསུངས་པ་ལྟར་བསྟེན་དགོས་པས། དེ་དག་ཚུལ་རྒྱས་པར་རྗེ་ཐམས་ཅད་མཁྱེན་པས་བཀའ་སྩལ་བའི་རྩ་ལྟུང་རྣམ་བཤད་དང་། བླ་མ་ལྔ་བཅུ་བའི་རྣམ་བཤད་དང་། རྣལ་འབྱོར་རོལ་བའི་དགའ་སྟོན། ཐུན་དྲུག་གི་རྣལ་འབྱོར་སོགས་སུ་བལྟ་བར་བྱ་ཞིང་། འདིར་ནི་དེ་དག་གི་དོན་ལས་དང་པོ་བ་རྣམས་ཀྱིས་ཐུན་དྲུག་ཏུ་ཉམས་སུ་ལེན་ཚུལ་འཁྱེར་བདེ་བའི་ཕྱིར་ཚིགས་སུ་བཅད་པའི་སྒོ་ནས་བརྗོད་པར་བྱའོ། ། 
སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། ། 
བྱང་ཆུབ་བར་དུ་བདག་ནི་སྐྱབས་སུ་མཆི། ། 
བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། ། 
འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག ། ཅེས་པ་ནི་སྐྱབས་འགྲོའི་བསླབ་བྱ་ཉིན་ལན་གསུམ་མཚན་ལན་གསུམ་སྐྱབས་སུ་འགྲོ་ཚུལ་དང་སེམས་བསྐྱེད་དུས་དྲུག་ཏུ་བཟུང་ཚུལ་ལོ། 
སེམས་ཅན་ཐམས་ཅད་ཉེ་རིང་ཆགས་སྡང་དང་། ། 
བྲལ་ནས་ཁྱད་པར་འཕགས་པའི་བདེ་བ་ཐོབ། ། བར་བྱའོ་སྙམ་དུ་བཏང་སྙོམས་པར་གྱུར་ཅིག སྙམ་དུ་བྱམས་པ་དང་། བར་གྱུར་ཅིག་སྙམ་དུ་སྙིང་རྗེ་དང་། 
བཟོད་དཀའི་སྡུག་བསྔལ་རྒྱ་མཚོ་ལས་བསྒྲལ་ཏེ། 
ཐར་བ་དམ་པའི་བདེ་དང་འབྲལ་བར་མ་གྱུར་ཅིག། སྙམ་དུ་དགའ་བར་བྱའོ། ། ཞེས་པ་ནི་ཚད་མེད་བཞི་སྒོམ་ཚུལ་ཏེ་རིགས་ལྔའི་དམ་ཚིག་གི་ནང་ནས་བྱམས་པ་དང་མི་འཇིགས་པའི་སྦྱིན་པ་བྱ་ཚུལ་རིན་འབྱུང་གི་དམ་ཚིག་བསྲུང་ཚུལ་གཉིས་འདིས་ཚང་།
འགྲོ་ཀུན་སྲིད་ཞིའི་འཇིགས་པ་ལས་སྒྲོལ་ཕྱིར། ། 
རྫོགས་པའི་བྱང་ཆུབ་ཐོབ་པར་འདོད་པའི་སེམས། ། 
དེང་ནས་བཟུང་སྟེ་སངས་རྒྱས་མ་ཐོབ་པར། ། 
སྲོག་གི་ཕྱིར་ཡང་མི་བཏང་བཟུང་བར་བགྱི། ། སྙམ་དུ་སྨོན་སེམས་ཆོ་གས་བཟུང་ཕྱིར་ཞག་རེ་ལ་ཐུན་དྲུག་ཏུ་བཟུང་དགོས་པར་གསུངས་པའི་བསླབ་བྱའོ། ། 
འཇུག་སྡོམ་ལེན་འདོད་ནས་མདུན་དུ་སྟོན་པ་འཁོར་བཅས་བཞུགས་བར་དམིགས་ནས། 
ཇི་ལྟར་སྔོན་གྱི་བདེ་གཤེགས་ཀྱིས། ། 
བྱང་ཆུབ་ཐུགས་ནི་བསྐྱེད་པ་དང་། 
བྱང་ཆུབ་སེམས་དཔའི་བསླབ་པ་ལ། །
དེ་དག་རིམ་བཞིན་གནས་པ་ལྟར། ། 
བདག་ཀྱང་འགྲོ་ལ་ཕན་དོན་དུ། །
བྱང་ཆུབ་སེམས་ནི་བསྐྱེད་བགྱི་ཞིང་། ། 
བྱང་ཆུབ་སེམས་དཔའི་བསླབ་པ་ལ། ། 
རིམ་པ་བཞིན་དུ་བསླབ་པར་བགྱི། ། ཞེས་སོགས་གསུམ་བརྗོད། བྱང་སྡོམ་བླང་། 
དེང་དུས་བདག་ཚེ་འབྲས་བུ་ཡོད། ། 
མི་ཡི་སྲིད་པ་ལེགས་པར་ཐོབ། ། 
དེ་རིང་སངས་རྒྱས་རིགས་སུ་སྐྱེས། ། 
སངས་རྒྱས་སྲས་སུ་ད་གྱུར་ཏོ། ། 
ད་ནི་བདག་གིས་ཅི་ནས་ཀྱང་། ། 
རིགས་དང་མཐུན་པའི་ལས་བརྩམས་ཏེ། ། 
སྐྱོན་མེད་བཙུན་པའི་རིགས་འདི་ལ། ། 
རྙོག་པར་མི་འགྱུར་དེ་ལྟར་བྱ། ། ཞེས་ཕན་ཡོན་བསམས་ཏེ་སྤྲོ་བ་བསྐྱེད། འདི་ནི་སེམས་བསྐྱེད་རྒྱས་པར་བྱ་བའི་ཕྱིར་དགའ་བ་སྒོམས་པས་བྱང་ཆུབ་ཀྱི་སེམས་ནི་ཕན་ཡོན་ཐུན་དྲུག་ཏུ་བསམ་ཚུལ་ལོ། ། 
མདུན་གྱི་ནམ་མཁའ་ཡིད་འཕྲོག་རིན་ཆེན་ཁྲི། ། 
ཆུ་སྐྱེས་ཉི་ཟླ་རྒྱས་པའི་དཀྱིལ་འཁོར་སྟེང་། ། 
རྩ་བའི་བླ་མ་ཁྱབ་བདག་རྡོ་རྗེ་འཆང་། ། 
སྐུ་མདོག་སྔོན་པོ་ཞལ་གཅིག་ཕྱག་གཉིས་ཀྱིས། ། 
རྡོར་དྲིལ་བཟུང་ནས་རང་འདྲ་ཡུམ་ལ་འཁྱུད། ། 
མཚན་དཔེའི་གཟི་འབར་རིན་ཆེན་རྒྱན་མང་མཛེས། ། 
ཡིད་འཕྲོག་ལྷ་རྫས་གོས་ཀྱི་ན་བཟའ་ཅན། ། 
དྲན་པ་ཙམ་གྱིས་གདུང་བ་ཀུན་སེལ་ཅིང་། ། 
སྐྱབས་མཆོག་མ་ལུས་འདུས་པའི་བདག་ཉིད་དུ། ། 
སྐྱིལ་ཀྲུང་ཚུལ་གྱིས་བཞུགས་པའི་གནས་གསུམ་དུ། ། 
ཡི་གེ་གསུམ་མཚན་ཧཱུཾ་གི་འོད་ཟེར་གྱིས། ། 
རང་བཞིན་གནས་ནས་བླ་མ་རྡོ་རྗེ་འཆང་། ། 
ཛཿཧཱུཾ་བཾ་ཧོཿགཉིས་སུ་མེད་པར་གྱུར། ། འདི་ནི་མི་བསྐྱོད་པའི་རིགས་ཀྱི་དམ་ཚིག་སློབ་དཔོན་བཟུང་ཚུལ་ལོ། ། གང་གི་དྲིན་གྱིས་བདེ་ཆེན་ཉིད། ། 
སྐད་ཅིག་ཉིད་ལ་འཆར་བ་གང་། ། 
བླ་མ་རིན་ཆེན་ལྟ་བུ་ཡི། ། 
རྡོ་རྗེ་ཅན་ཞབས་པད་ལ་འདུད། ། འདི་ནི་བྱང་སེམས་ཀྱི་ཉེས་བྱས་དང་པོ་ལས་སེམས་བསྲུང་ཚུལ་དང་བླ་མ་ལྔ་བཅུ་བར། མཆོག་ཏུ་དད་པས་དུས་གསུམ་དུ། ། ཞེས་གསུངས་པ་ལྟར། ཕྱག་འཚལ་ཚུལ་ལོ། ། 
བདག་པོས་བཟུང་མ་བཟུང་དང་། ། 
དངོས་བཤམས་ཡིད་ཀྱི་སྤྲུལ་བ་ལས། ། 
བྱུང་བ་ཕྱི་ནང་གསང་བ་ཡི། ། 
སྣ་ཚོགས་མཆོད་སྤྲིན་རྒྱ་མཚོས་མཆོད། ། འདི་ནི་དོན་གྲུབ་ཀྱི་རིགས་ཀྱི་དམ་ཚིག་བསྐྱང་ཚུལ་ལོ། ། 
བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་ཚོགས་བཅས། ། 
རིན་ཆེན་མཎྜལ་བཟང་བོ་ཀུན་བཟང་མཆོད་པའི་ཚོགས་བཅས་པ། ། 
བློ་ཡིས་བླངས་ནས་བླ་མ་ཡི་དམ་དཀོན་མཆོག་གསུམ་ལ་འབུལ། ། 
ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ། ། འདི་ནི་ལྔ་བཅུ་བར་བླ་མ་ལ་མཎྜལ་དུས་གསུམ་དུ་འབུལ་བར་གསུངས་པའི་བསླབ་བྱའོ། ། 
དུས་གསུམ་ཕྱོགས་བཅུའི་བདེ་གཤེགས་མ་ལུས་པ། ། 
གང་འདུལ་ཇི་བཞིན་ངུར་སྨིག་རྣམ་རོལ་གྱིས། ། 
གྲངས་མེད་ཞིང་དུ་རྒྱལ་བའི་མཛད་པ་ཅན། ། 
བླ་མ་རིན་པོ་ཆེ་ལ་གསོལ་བ་འདེབས། ། 
རྡོ་རྗེ་འཆང་གིས་བློ་དམན་བསམ་པའི་ངོར། ། 
རབ་འབྱམས་རྒྱལ་བའི་འཁོར་ལོ་མཐའ་དག་ལས། ། 
ལྷག་པའི་ཞིང་གི་དམ་པར་ལེགས་བསྔགས་པའི། ། 
བླ་མ་རིན་པོ་ཆེ་ལ་གསོལ་བ་འདེབས། ། 
མཆོག་དང་ཐུན་མོང་དངོས་གྲུབ་མ་ལུས་ཀུན། ། 
མགོན་ཁྱོད་ཚུལ་བཞིན་བསྟེན་པའི་རྗེས་འགྲོ་བར། ། 
མཐོང་ནས་ལུས་དང་སྲོག་ཀྱང་ཡོངས་གཏད་དེ། ། 
ཁྱོད་མཉེས་ཁོ་ན་སྒྲུབ་པར་བྱིན་གྱིས་རློབས། ། སྙམ་དུ་སེམས་པ་ནི་དགེ་བའི་བཤེས་གཉེན་ལ་དད་གུས་སྒོམ་ཚུལ་གྱི་གནད་བསྡུས་བའོ། ། 
དེ་ལྟར་གསོལ་བ་བཏབ་པས་བླ་མ་མཆོག ། 
རང་གི་སྤྱི་བོའི་གཙུག་ཏུ་ས་མ་ཛཿ 
སླར་ཡང་དགྱེས་བཞིན་རང་དང་རོ་གཅིག་གྱུར། ། 
བདག་ཉིད་རྡོ་རྗེ་སེམས་དཔའི་ང་རྒྱལ་གྱིས། ། 
ལྷན་སྐྱེས་བདེ་ཆེན་གསང་བའི་རྡོ་རྗེ་དང་། ། 
རང་བཞིན་སྤྲོས་བྲལ་གསང་པའི་གཎྚ་ཡི། ། 
མཚོན་བྱེད་བཟུང་ནས་བཅོམ་ལྡན་འདས་མར་འཁྱུད། ། བར་སེམས་པ་འདི་གསུམ་ནི་རྡོར་དྲིལ་ཕྱག་རྒྱའི་དམ་ཚིག་བསྐྱེད་ཚུལ་བླ་མེད་ལྟར་རོ། ། 
བདག་གི་ལུས་དང་དེ་བཞིན་ལོངས་སྤྱོད་དང་། ། 
དུས་གསུམ་དགེ་ཚོགས་ཕུང་བོ་ཅི་མཆིས་པ། ། 
མར་གྱུར་སེམས་ཅན་ཀུན་གྱི་དོན་གྱི་ཕྱིར། ། 
དེང་ནས་འཕངས་པ་མེད་པར་བཏང་བར་བྱ། ། སྙམ་དུ་གཏོང་སེམས་སྤེལ་བ་ནི་རྒྱལ་སྲས་ཀྱི་སྦྱིན་པའི་ཉམས་ལེན་དང་རིན་འབྱུང་གི་དམ་ཚིག་ཟང་ཟིང་དང་ཆོས་སྦྱིན་བྱ་ཚུལ་ལོ། ། ལོང་བྱུང་ན་སོ་སོའི་མ་མཐའི་སྡོམ་གྱི་སྒོ་ནས་དམ་ཚིག་དང་སྡོམ་པ་རྣམས་ལ་སྔོ་བགྲངས་བྱེད་ཅིང་མ་ལྕོགས་ན་འདི་ཙམ་གྱིས་ཀྱང་སྡོམ་པ་གསུམ་ཀ་ལ་དྲན་ཤེས་བསྟེན་ཚུལ་དུ་འགྱུར་རོ། ། 
སོ་ཐར་བྱང་སེམས་རྡོ་རྗེ་ཐེག་པ་ཡི། ། 
རྣམ་དག་བཅས་པའི་བསླབ་པ་ཕྲ་མོ་ལས། ། 
རྨི་ལམ་དུ་ཡང་འདའ་བར་མི་བྱེད་པར། ། 
རྒྱལ་བའི་བཀའ་བཞིན་བདག་གིས་བསྒྲུབ་པར་བྱ། ། སྙམ་པ་ནི་སྔགས་སྡོམ་བཟུང་བས་རྩ་བ་དང་ཡན་ལག་གི་དམ་ཚིག་དང་སྡོམ་པ་ལ་སྔོ་བགྲངས་ཐུན་དྲུག་ཏུ་བྱེད་ཚུལ་ལོ། ། 
ཐེག་པ་གསུམ་དང་རྒྱུད་སྡེ་བཞིས་བསྡུས་པའི། ། 
ལུང་དང་རྟོགས་པའི་དམ་ཆོས་མ་ལུས་པ། ། 
རྒྱལ་བའི་དགོངས་པ་ཇི་བཞིན་ལེགས་བཟུང་སྟེ། ། སྙམ་པ་ནི་པདྨའི་རིགས་ཀྱི་དམ་ཚིག་བསྐྱང་ཚུལ་ལོ། ། 
གང་འཚམས་ཐབས་ཀྱིས་འགྲོབ་ཡོངས་སུ་སྒྲོལ། ། སྙམ་པ་ནི་རྣམ་སྣང་གི་རིགས་ཀྱི་དམ་ཚིག་སེམས་ཅན་དོན་བྱེད་ཀྱི་ཚུལ་ཁྲིམས་བསྐྱང་ཚུལ་ལོ། ། ཞེས་དེ་དག་གི་དོན་དྲན་བཞིན་པས་བརྗོད་ཅིང་མཇུག་ཏུ་བཟང་བོ་སྤྱོད་པ་སོགས་ཀྱི་སྨོན་ལམ་བྱའོ། ། སྨྲས་པ། རྣམ་མང་རྒྱུད་སྡེ་རྒྱ་མཚོ་སྐྱེད་ཚུལ་ལས། ། ཐུན་དྲུག་རྣལ་འབྱོར་མེ་ཏོག་འཕྲེང་མཛེས་པ། ། ལེགས་པར་སྤེལ་འདི་རིག་སྔགས་འཆང་རྣམས་ཀྱི། ། དམ་ཚིག་སྡོམ་པ་དག་བྱེད་རྒྱན་མཆོག་ཡིན། ། 
འདི་ལས་འོངས་པའི་རྣམ་དཀར་དགེ་བའི་མཐུས། ། 
ཚེ་རབས་ཀུན་ཏུ་རྡོ་རྗེ་འཆང་དབང་གིས། ། 
བཅས་པའི་མཚམས་ལས་ནམ་ཡང་མི་འདའ་བར། ། 
རིམ་གཉིས་ལམ་གྱི་རིམ་པ་མཐར་ཕྱིན་ཤོག ། ཅེས་པ་འདི་ནི་རང་གི་སློབ་མ་སྡེ་སྣོད་འཛིན་པ་དུ་མས་བསྐུལ་བ་དང་། ཁྱད་པར་ཉིན་ཞག་ཕྲུགས་རེ་ལ་ཐུན་དྲུག་ཏུ་འདི་ལྟ་བུའི་ཉམས་སུ་ལེན་པ་བྱུང་ན། ། བོད་ཀྱི་གསེར་ཆོས་སུ་གྲགས་པའི་ཟབ་ཟབ་མོ་རྣམས་ཀྱིས་ཆ་ཙམ་དུའང་བསྐྲུན་དུ་མེད་པའི་རྒྱལ་བ་དགྱེས་པའི་བཀའ་སྲོལ་དུ་རྗེ་ཡབ་སྲས་རྣམས་ཀྱིས་བསྔགས་ཤིང་། རྒྱུད་སྡེ་དང་མཐུན་པའི་ཉམས་ལེན་དུ་ཆོས་ཀྱི་རྗེས་སུ་འབྲང་བའི་བློས་རྟོགས་པའི་ཉེར་ལེན་གྱིས་བསྐུལ་བ་ལ་བརྟེན་ནས་རིག་པ་འཛིན་ལ་ཆོས་ཀྱི་རྒྱལ་མཚན་གྱིས་སྦྱར་བའོ། ། 
མངྒ་ལཾ། །